Read Zeme Naga 2 SAMUEL 16 Bible Online

2 SAMUEL 16 - Zeme Naga bible

2 SAMUEL 16

¹Dabidbe kedeiloa ’ntûm giam kecheîne tatpat kai dege, Mephiboshethbe guâ ka’ngguapeu Zibabe, hekunmerângne kena, tingkukuak haî na, grepchîkang dûm haî kat, tinglumting rachî haî kat, zai grepchî zau bung kat tei lu pechu kahedau de lei.

²Zai heguang ne Zibabe je, “’Ndaitew ze airamme ze teiwang lau?” kacheu de lei. Zibabe ne kak ze, “Hekunmerângne ramme ze heguang kibaume chuarabe hang, tingku benai tinglum ting rachî ze rehangme ramme teurabe hang, zai grepchî zau ze tingkangram ge herei ze kenuihuaktime sakrabe hang lei,” ze kacheu de lei.

³Zai heguang ne rang ze, “Acheuzaine ning pau na rehang’mpeu ’ndai’ngge la lau?” ze kacheu de lei. Zibabe ne heguang je, “Pie le lau, pa â Jerusalem ge bam la lei; pa ne rang ze, ‘Nemai ge a peu gu heguangram ze Israelbe ki ne achu pei gai dai gu lei,’ kacheu de lei,” ze kacheu de lei.

⁴Dadege heguang ne Zibabe je, “Pie le lau, Mephiboshethbe gu leine ze chuna â ning gu de lei,” ze acheu bei de lei. Zai Zibabe ne, “Hengêutewbe I pei lei, a wangpeu heguang gau, ning masuage I betingbeta ka’nggiabe peize ngau ze bam lau,” ze kacheu de lei.

⁵Bahurim ge heguang Dabidbe wang dadege, Saulbe kibaume ruage ziemmena hangkatpeu, Gerabe na pe ji Shime-ibe kacheupeu zuapat te lei; zai pa wangbe ge chiangzutza ze wang lei.

⁶Zai Dabidbe je pa tingchu ne tua de lei, zai heguang Dabidbe guâ ka’ngguame leine je du tua de lei; zai pa hezat’mbia benai pa heku’mbia ge baudime leine benai peranchime leine bam lei.

⁷Zai Shime-ibe ne chiang ze, “Tat kelua zu lau, tatkelua zu lau, nang hejai tewpatbe ziemmena, ’nta kau gau! ze kacheu de lei.

⁸Saulbe ki gu hejai mî leine ze Tingwang ne ning peireige peiruî gai de lei, pe bâm nang kaheguangbe bâm ge zeu; zai Tingwang ne heguangram ze ning na Absalombe ba ge pei gai ’nde lei. Pie le lau, ning peireige nang gaderabe ze â la de lei, nang â hejai tewpatbe kau daseu,” ze kacheu de lei.

⁹Dadege Zeruiale na Abishaibe ne heguang je, “’Ndaitew ze aipau chaidibe hetei ne a wangpeu heguang je chiang gai ra lau? I ne zuapat ze pe peî dâng ne che lei,” ze kacheu de lei.

¹⁰Kane heguang ne, “Zeruiale name gau, ningnui je ’ndaikau I tew ra lau? ‘Dabidbe je chiang gai zu lau,’ ze Tingwang ne pechu ranggaibeibe ziegene pa chiang gai zaine â, ‘’Ndaitew ze nang chigum tew lau?’ ze châu acheuchi ra lau,” ze kacheu de lei.

¹¹Zai Abishaibe benai pe guâ ka’ngguame leine je Dabidbe ne, “Pie le lau, a na gîmsingbepeu ne achu tewchat ra peu lei; ai Benjamin’mpeu â acheu ra run de lei. Peize pe sui-suitew zu lau, zai pechu peize chiang gai lau; Tingwang ne pechu lang gai bei daseu.

¹²Tingwang ne I hereuliebe pie gai leu gu lei, chidezai Tingwang ne nemai ge achu chianggaibe hangge keyibe ne achu peiruî gai lêu gu lei,” ze kacheu de lei.

¹³Dadege Dabidbe benai pe gu ziemmena ramme puidi gene tat ti de lei. Shime-ibe â pe dagene kat lam’mbia peloangriang luî tat ze, chiang zutza ze, zai Dabidbe je tingchu ne tuâ ze kedeiniamoîne ’nruk ze tat ti de lei.

¹⁴Zai heguang benai pe dage ziemmename bamme leine lei-desang ze Jordan chang de lei; zai chige pa sau’ntak kai de lei.

¹⁵Chunage Absalombe benai Israelme leine Jerusalem ge wang de lei, zai Ahithophelbe pe dage bam lei.

¹⁶Zai Arka’mpeu Hushaibe, Dabidbe kangpeu, Absalombe dage wang dege Hushaibe ne Absalombe je, “Heguang ringtie lau! heguang ringtie lau!” ze kacheu de lei.

¹⁷Zai Absalombe ne Hushaibe je, “Aize ning kangpeu je nang kehungbe de mei? ’Ndaitew ze ning kangpeu je nang nguatat mak lau?” ze kacheu de lei.

¹⁸Zai Hushaibe ne Absalombe je, “Mak lei, Tingwang ne, zai aipau ziemmename ne, zai Israelme leine ne langgaibeipeu gu I chang gu lei zai pe dage I bam bam gu lei.

¹⁹Zai sa dai ze, châu guâ I ’nggua ra lau? Pe na ne ra mak mei? Ning peu guâ I ka’nggua gum ze, ning guâ I ’nggua gu lei,” kacheu de lei.

²⁰Dadege Absalombe ne Ahithophelbe je, “Ning gu ’nningtak rang gai lau; ’ndaikau anui tew ra lau?” ze kacheu de lei.

²¹Ahithophelbe ne Absalombe je, “Ning peu gu nausîpui ramme heki reî ra pa sâudiakkaime dage jei zu lau; zai ning peu ne ningchu ngaugailak ra ning runne ningchu tew gai de lei be Israelme leine seu gu, zaine ning dage bamme leine baran tew’nchi gai gu lei,” ze acheu bei de lei.

²²Dadege ’mpûm peireige Absalombe hang penui ne hetiampaîki liâm gai de lei, zai Israelme leine masua gene pe peu gu nausîpui ramme dage Absalombe jei de lei.

²³Chipau ting ge Ahithophelbe ne mâ-geteigaibe â mige ne Hera gu sam ’nneulube gum lei; chigum ze Dabidbe benai Absalombe ne du Ahithophelbe gu mâ-rangbe leine je â ’nning ka’mmi de lei.