Read Zeme Naga 2 SAMUEL 17 Bible Online

2 SAMUEL 17 - Zeme Naga bible

2 SAMUEL 17

¹Chipau peireige Ahithophelbe ne Absalombe je rang ze, “I ne ziemmena chang kereu-ze-kename je kelâng gai che lei, zaine nemai tingmuî ge Dabidbe je gua’nsa ra zuapat ra hangge zeu.

²Pa lei di, pe lung chei di ze bambe luage pechu I ’nggi gu lei, dezai pechu hing-desang de ra tew gai be ra hangge zeu; dezai pe dage bamme leine pak kam du de lei, heguang je runne I tewkau gai gu lei,

³zai meibepui pe napeu ki lam’mbe wangbe gum ze ziemmename leine je ning dage I nguawang gai dai gu lei. Nang â hangkat gu keringbe je runne peu lei, zai baudime â lunghegeitenai ze bam gu lei,” ze kacheu de lei.

⁴Zai ai geteigaibe zene Absalombe benai Israelme gu gechîngme leine suî tew’mmi bei de lei.

⁵Dadege Absalombe ne, “Arka’mpeu Hushaibe je du kû gai lau, pa ’ndaikau sa ra lamei, anui ’ngking gai ni kei lei,” ze kacheu lei.

⁶Zai Absalombe dage Hushaibe wang dege Absalombe ne pechu, “Ahithophelbe ne aigum ze sa de lei; pa ne geteiliabe luigum ze anui tew ra mei? Mak lei dizai â nang salia zu lau,” ze kacheu de lei.

⁷Dadege Hushaibe ne Absalombe je, “Chunage Ahithophelbe ne geteigaibe ze yi mak lei,” ze acheu bei de lei.

⁸Hushaibe ne chipau peireige du sa ze, “Ning peu benai pe kumme bau â penui ranchime bau lei be nang chî lei, zai penui laîpat kai dege â ’nduloa ge hegum bepoine ramme je kagesan gum de lei. Chi runne mak ze, ning peu â herei’nggichibe kau lei, pa â tingmuîzeu pe gume ruage bam ra mak lei.

⁹Pie le lau, chunage du kedeikui bûnglube ge mei nu mâkedabe ge mei ze pa â ’mbai la de lei. Zai herei’nggichuraibe ge hanggesame je tewkau ’ndi dezai, chize seu-seume ne, ‘Absalombe chai suitatme ruage hebi la de lei,’ ze acheu gu lei.

¹⁰Dezai ziemmena gekuube kau, pe lungtak du duilui lungtak gumbe kau du pe hîng ne ’ngguaipeniak kai du de lei; Israelme leine ne ning peu â peranchi-kadesangbe kau lei, zai pe gu ziemmena ramme pe dage bamme leine ziemmena gekuube kâu kam lei be chî lei.

¹¹Kane I ne rangbe ze â sungkling kung ge hegitmoîne ramme deseîloa chang ra ’nduigaibe gum ze, Dan gene Beer-sheba changbe Israelme leine ning dage wang’nduigairabe ze de lei, dezai ning pum ne herei ge tat ra hangge zeu.

¹²Chigum ze pechu ngauduibe bâm ge pechu anui ’nggi gu lei, zai kedei ge kezik keusatkatkaibe gum ze pe peireige ngau’nchiepuang bam ra wangchang gu lei; dezai pa benai pe gu ziemmena ramme pe dage bamme leine hangkat te ’nsak kai ra mak lei.

¹³Pa ne namdi ’mbe pak’mbia gai de lêuzai â, Israelme leine chipau namdi ge heria ramme teiwang lu, zai chize ne heningkâm ’mbe guatua ne ra de lei. Tingchukâng poine katte chige ngau ta de mak tâneu,” ze kacheu de lei.

¹⁴Dadege Absalombe benai Israelme leine ne, “Arka’mpeu Hushaibe ne geteiliabe â Ahithophelbe gu geteiliabe suadu yi’nteu lei,” ze kacheu de lei. Tingwang ne Ahithophelbe gu geteiliabe keyibe je duî ra die gai ’ndi dadegeu, dezai Absalombe peireige Tingwang ne kesiabe tew gai le ra hangge zeu.

¹⁵Dadege tingkupeu kena, Zadokbe benai Abiatharbe je Hushaibe ne rang ze, “Aigum ze Ahithophelbe ne Absalombe benai Israel ge gechîngme leine je laddei de lei; zai aigum ze I du geteilia de lei.

¹⁶Chunage chidaze kelua ze lang gai ze, Dabidbe je salia zu lau, ‘Nemai tingmuî â hênamkang depeu ge jei se lau, kane ’ndaigummeisede tat’ngka de lau; heguang benai pe dage bamme leine je tew’ngga kam mak ra hangge zeu,’ ze acheu zeu,” ze kacheu de lei.

¹⁷Chunage Jonathanbe benai Ahimazbe â En-rogel geuki ge kuâ bam de lei; ka’ngguapeu hangkat tat lu penai je salia ka’nsui lei, dezai penai ne tat ze heguang Dabidbe je salia ra hangge zeu. Namdi ’mbe penai gutbe ngau ra pei mak daseu.

¹⁸Kane rehang’mpoine ne penai je ngaudau lu ze, Absalombe je salia bei de lei; dadege penai hangna kelua ze tat ti de lei, zai Bahurim ge hangkatpeu pe ki tedirielung ge dekuaki bambepeu ki ge wang de lei; zai penai chi dekuaki lung ’mbe gut ti de lei.

¹⁹Zai ’mpuimi ne paî tei lu dekuaki peireige tapchim gai lu, pe peireige chêu ’nruk kai bei de lei, dege mâ de chî ta di de lei.

²⁰Chipau ki ge Absalombe guâ ka’ngguame ’mpuimi dage wang dadege, penui ne, “Ahimazbe benai Jonathanbe ’ndai’ngge la lau?” ze kacheu de lei. Zai ’mpuimi ne penui je, “Penai â ’nggeuki katlam ’mbe tat te lei,” ze acheu bei de lei. Zai penui ne peu gai ze penai je peupat lak dadege, Jerusalem ’mbe penui helatwang dai di de lei.

²¹Penui tattibe châng dege ziemmena hangna ze dekuaki gene pat lu, tat ze heguang Dabidbe je salia bei de lei. Penai ne Dabidbe je, “Chu lu, kelua ze ’nggeuki kapat te zu lau; aigum ze ningchu ’nggi ra Ahithophelbe ne geteitew la daseu,” ze kacheu de lei.

²²Dadege Dabidbe chu lu, zai pe dage bamme leine Jordan kapat ti de lei; tingbapat dege â mî de Jordan kapatmakbe kau ga di de lei.

²³Pa ne geteiliabe sui mak te lei be Ahithiophelbe ngau lu dege, pe gu hekunmerângne ge chua ra teleu gai lu, pe gu namdi ge pe ki lam’mbe tat ti de lei, zai pe ki teleu zun lu ze, pe runne pechu kak te lei, zai pa chai di de lei, zai pe peu raw ge bai gai de lei.

²⁴Dadege Dabidbe Mahanaim ge wang de lei. Zai Absalombe Israelme leine je ngua lu Jordan kapat ti de lei.

²⁵Chunage Absalombe ne Joabbe kelei ge Amasabe je hereikangme peireige pemui pua ra sum gai de lei. Amasabe â Ishmael kiria’mpeu, pe ji Ithrabe kacheupeu, Nahasbe na Abigalle, Joabbe pui Zeruiale sipui je pe nâu hang lupeu lei.

²⁶Zai Israelme benai Absalombe â Gileadram ge wang’ndui gai de lei.

²⁷Mahanaim ge Dabidbe wang dege, Ammonme gu Rabba gene Nahasbe na, Shobibe, zai Lo-debar gene Ammielbe na, Makirbe, zai Rogelim gene Gilead’mpeu Barzillaibe ne,

²⁸jeîra ramme, heduikuak ramme, zai hegamli ramme, dekuîmeu, barli dekuîmoîne, chêu getalube, teipi ramme, zai kunra,

²⁹’ngkuidui zai tungduikâng ramme, zai meli ramme, zai tungduikâng Dabidbe benai pe dage bamme teu ra pungwang de lei; penui ne, “Ziemmena ramme hênamkang ge ’njei-herei zai lei di la de lei,” ze salia bei be ziegeneu.