Read Zeme Naga 2 SAMUEL 18 Bible Online

2 SAMUEL 18 - Zeme Naga bible

2 SAMUEL 18

¹Dadege Dabidbe ne pe dage bamme je gekumwang’ndui gai de lei, zai changme peireige sipai ge kanguame zai haîme peireige sipai ge kanguame sum gai de lei.

²Zai Dabidbe ne hereikang langpat kai de lei, Joabbe ne pemuiteibe kangge bau chum ge bau kat, Zeruiale na Abishaibe, Joabbe kinapeu ne pemuiteibe kangge bau chum ge bau kat, zai Gath’mpeu Ittaibe ne pemuiteibe kangge bau chum ge bau kat, acheu ze hereikangme je langpat kai de lei. Zai heguang ne pe kumme je, “I du ningnui benai zuapat ku lei,” ze kacheu de lei.

³Kane penui ne, “Nang â zuapat ra mak lei. Anui pak ra chang zai â penui ne anui je ’nningtinggeu ra mak daseu. Anui ruagene pa’mpi chai di lêuzai du, penui ne anui je ’nningtinggeu ra mak lei, kane nang â anui chang kereume ’nchung lei, chidaze namdi gene anui je ’ngngâ ra langgairabe ze yibi gu lei,” ze acheu bei lei.

⁴Heguang ne penui je rang ze, “Ningnui dage yilangbe I tew gu lei,” ze kacheu de lei. Dadege keriekemui hiage heguangsap kai de lei, hereikangme leine haî ne haî, chang ne chang zuapatbe luage zeu.

⁵Zai heguang ne Joabbe, Abishaibe zai Ittaibe je samdie gai ze,, “Rehang’mpeu Absalombe je a hang ziegene tewjâm se lau,” ze kacheu de lei. Zai heguang ne Absalombe deu ge sipai ge kanguame dage samranggaibe luage chize baudime leine seu di de lei.

⁶Dadege hereikangme ramme Israelme je ’nggi ra ’nduloa ’mbe zuapat ti de lei, zai Ephraim hênam gene kaherei de lei.

⁷Zai Israelme gu ziemmena je Dabidbe guâ ka’ngguame ne chigene ngam ’ndi de lei, zai chipau mai â herei ngam’ndi-desang ze ziemmena chang-’ngkaime je tewchat ’ndi de lei.

⁸Kahereibe rasam ze heram leine ratat ti de lei; zai chipau mai ge hiazutkie gene suadu hênamkang gene ziemmename chai ka’ngkie de lei.

⁹Zai Dabidbe guâ ka’ngguame je hedau ra Absalombe pedâuyibe ngau lu de lei. Pe gu hekun ching ge Absalombe â chua bam lei, zai ’mpubang kedibe keî ramme misongga bambe kangge hekunsei ze pakpat ti de lei, zai pe peî ze ’mpubang kakge chia-kuak kai di lei, zai pe kangge hekun bambe ze tat ti dege â tinggîm benai kedei kakge keî’nchielia bam di de lei.

¹⁰Zai ziemmena hangkat peu chize ngau de lei, zai pa ne Joabbe je salia ze, “Pie le lau, Absalombe ’mpubang ge keî’nchie bambe I ngau de lei,” ze acheu bei de lei.

¹¹Zai Joabbe ne pechu rangliapeu je, “’Ndaigum nang ne pechu ngau rei se lau! Acheuzaine ’ndaitew ze nang pechu chigene kedei ’mbe lakkeu gai mak lau? A suiyi ze ning hangge gepût kâng kereu benai hekiakâk kat pei gai bu de lei,” ze kacheu de lei.

¹²Kane chipaupeu ne Joabbe je, “A ba dei ge gepût-rangkâng chang kat kairitsit kai bei sede heguang na peireige a ba hua gai ra mak lei; anui geseube gene heguang ne nang benai Abishaibe zai Ittaibe je, ‘A hang ziegene rehang’mpeu Absalombe je ’nggum lau,’ ze samdie gai de zeî lau.

¹³Kêdabe lam gene du, pa keringbe peireige I ne a jaisittew gai zai â (zai heguang dagene mâ de teibai’ndibe ga lei) nang du ning runne bam’ndeu du de lei,” ze acheu bei de lei.

¹⁴Joabbe ne, “Aigum ze ning dage pehî tew’ngga ze I bam ra mak lei,” ze kacheu de lei. Zai pa ne pe ba ge hengeu kechum tei lu, chize Absalombe ’nnung ge hia gai bei de lei, ’mpubang ge pa ring ze bambe luage zeu.

¹⁵Zai Joabbe gu hereipuâteime rehangme hangkereume ne Absalombe je sapgua lu, pechu lak kai lu, pechu tewchat ’ndi de lei.

¹⁶Dadege Joabbe ne hegeîluîkie ’mmut kai bei ze, Israelme je gua’nchumiebe gene hereikangme bau ramme wang kadai de lei; Joabbe ne penui je tew’nsau gai bei dadegeu.

¹⁷Zai penui ne Absalombe je pua lu, hênamkang ge rehûmkuiki kedibe ge pechu tuâ gai bei de lei; zai pe peireige tingchudepei ramme kuachim gai bei de lei; zai Israelme leine haimena pe ki lam-lam’mbe pak kam di de lei.

¹⁸Chunage Absalombe pa keringbe ting ge pe runne pe hang tingchusum kedibe heguang gu hening kâm ge sumgaibe bam lei, pa ne, “A ji chiteibamrabe kau hangge I a na ’mpeumi ga lei,” acheu ze sa gai ’ndi dadegeu; tingchusum ze pe ji gene pa ’ntak kai lei, zai nemai riâ chang ze Absalombe gu chusum ze kû lamui lei.

¹⁹Zai Zadokbe na Ahimazbe ne, “I ne paktat ze heguang suage Tingwang ne peteureime ba gene pechu meupat kai bei de lei ze sam pauhang gai che lei,” ze kacheu de lei.

²⁰Zai Joabbe ne pechu, “Nemai â nang sam pauchang ra mak lei; bechâng dezai nang sam pauchang duî lei, kane nemai â nang hepâupau ra mak lei, heguang na chaidibe ziegeneu,” ze acheu bei de lei.

²¹Dadege Joabbe ne Kus’mpeu je, “Tat ze nang ’ndaikau ngau mei be heguang je salia be lau,” ze acheu bei de lei. Kus’mpeu ze Joabbe suage keikeu gai ze, hengêutewbe pei gai lu, paktat ti de lei.

²²Dadege Zadokbe na Ahimazbe ne Joabbe je rang dai ze, “’Ndaikau wangchang mei lêuzai du, Kus’mpeu chai paktat che lei,” ze kacheu de lei. Zai Joabbe ne, a na gau, “Ning hangge hepâupaube hang mâ de getoabehi ngau ra ’ngga lei be chikâ lu ze ’ndaitew ze nang paktat ra lau,” ze acheu bei de lei.

²³“’Ndaikau wangchang mei lêuzaidu I paktat ku de lei,” ze pa ne kacheu de lei. Dadege pa ne pechu rang ze, “Paktat te zu lau,” acheu bei de lei. Dadege Ahimazbe peningkâm ’mbia ’mpuî gene paktat ze Kus’mpeu je pak’nzû di de lei.

²⁴Chuna Dabidbe â keriekemui kena kakge ’ntau bam lei, zai hekêtkaipeu kerie gene kerie’mpûm peirei ’mbe chu di de lei, zai pa pe mik ’ngngangrakchu lu pie gai dege, ziemmena hangkat pe runne pakwangbe pa ngau de lei.

²⁵Zai hekêtkaipeu ne heguang je kûpat lu salia de lei, zai heguang ne, “Pa pe runne zaine â pe mui ge sam karchibe la de lei,” kacheu de lei. Zai pa kelua-desang ze wang’nna di de lei.

²⁶Zai hekêtkaipeu ne kêdapeu pakwangbe ngau kadai de lei; zai hekêtkaipeu ne, kerie-kemuireîpeu je kû lu ze, “Pie le lau, kêdapeu pe runne pakwang dai mui de lei!” ze kacheu de lei. Heguang ne, “Pa du sam karchibe pungwangbe kau de lei,” ze kacheu de lei.

²⁷Zai hekêtkaipeu ne, “Pakwangraîpeu pakbe â Zadokbe na Ahimazbe pakbe gum lei,” kacheu de lei. Zai heguang ne, “Pa â ziemmena keyibe kau lei, zai sam keyibe tei lu wangbe kau de lei,” ze kacheu de lei.

²⁸Dadege Ahimazbe ne heguang dage sa ze, “Getaleine yi kam lei,” ze kacheu de lei. Zai heguang suage pe ju kedei ’mbe kâu’ngkumkeu lu, “Tingwang ning Rapeu, a pau heguang peireige penui ba getuachugaime je peipatkaipeu je peize toa bam lau,” ze kacheu de lei.

²⁹Zai heguang ne, “Rehang’mpeu Absalombe yi ze la mei?” kacheu de lei. Ahimazbe ne kak ze, “Joabbe ne ning guâ ka’ngguapeu je langgaibe luage baudime keleulia bambe I ngau lei, kane chize ’ndaikau mei be I â chî mak lei,” ze kacheu de lei.

³⁰Heguang ne, “’Mbia lu ze, aige sap kai de lau,” ze acheu bei lei. Dadege pa ’mbia gai lu, sap kai di de lei.

³¹Zai pie le lau, Kus’mpeu wang de lei, zai Kus’mpeu ne, “A wangpeu heguang hangge samkeyibe de lei! Tingwang ne ning peireige ka’nggime tâtewchibe gene nemai ge ningchu meupat kai bei de lei,” ze kacheu de lei.

³²Heguang ne Kus’mpeu je, “Absalombe yi ze la mei?” kacheu de lei. Zai Kus’mpeu ne kak ze, “Peize a wangpeu heguang teureime zai ning peireige kesiatewme leine â, chi rehang’mpeu gum chang lau,” ze acheu bei de lei.

³³Zai heguang pe lung sia-desang di ze, keriekemui ’mbe hekisiâm ’mbe hang lu hap ti de lei; zai pa tatpat dege, acheu ze, “Hei a na Absalombai, a na gau, A na Absalombe gau! Ning kelei ge I chai di laîzaine yi de lei, Hei Absalombe a na gau, a na gau!” ze kacheu de lei.