Read Zeme Naga 2 SAMUEL 19 Bible Online

2 SAMUEL 19 - Zeme Naga bible

2 SAMUEL 19

¹“Pie le lau, heguang ze Absalombe je puîhap ze la de lei,” be Joabbe je salia bei de lei.

²Dadege chipau mai hereingambe ze haimena hangge kadesuibe chang di de lei, chipau mai ge “Heguang â pe na je desui la de lei,” be ziemmename seu di dadegeu.

³Zai chipau mai ge â ziemmename herei gene ’ngngam ze reine ze tattibe gum ze, namdi ’mbe reine ze tat ti di de lei.

⁴Heguangpeu pe ju keba lu ze, pe rankai ’nrung ze, “Hei a na Absalombai, Hei Absalombai, a na lei, a na lei!” kacheu de lei.

⁵Dadege Joabbe heguang ki ge gut lu ze, “Nemai ge nang ne ning guâ ka’ngguame leine ju ka’ngngambe marak ne ruichim gai bei de lei, nemai ge ning keringbe, ning na ’mpeumi benai ’mpuimi keringbe zai ning nâu ramme benai ning gu nausîpui ramme keringbe ’nripatkaibeime jeu,

⁶ningchu kehungme je nang ngaugailak zai ningchu ngaugailakme je nang kehungbe ziegeneu. Nang ne nemai ge sipai ge kanguame benai ka’ngguame â ning hangge mâ de mak lei be teilia’nchichiak kai bei daseu; nemai ge anui ’nteumena â chai kam di, Absalombe ring bei laîzaine â nang ning suiyi gu lei be I chipat lu de lei.

⁷Chidaze chunage chu lu zuapat ze ning guâ ka’ngguame je ka’nggia ze ’mpau gai be lau, Tingwang ji gene I deseu gai de lei, nang zuapat mak tizai â, nemai tingmuî ge ning dage ziemmena hangkat de bam ra mak lei; zai aize â ning hangge nang rehang’ngka gene chuna riâ changbe ge ning peireige kesiabe daube suadu sia’nteu gu lei,” ze kacheu de lei.

⁸Dadege heguang zuachu lu, zai keriekemui ge ’ntau gai de lei; zai ziemmename leine je, “Pie le lau, keriekemui ge heguang ’ntau la de lei,” ze salia gai de lei; zai ziemmename leine heguang suage wang de lei. Chunage Israelme penui ki lam-lam’mbe haimena pak kam di de lei.

⁹Zai Israelme kiria leine ge ziemmena leine kebieng ze bam di de lei, “Heguang ne anui teureime ba gene anui je ’nripat kai bei, zai Philistinme ba gene anui je tew’nring gai bei de lei; zai chunage pa â Absalombe gu heram gene pak te lei.

¹⁰Kane Absalombe anui peireige anui ne ’nnukkaipeu â herei gene chai de lei, chunage chidaze ’ndaitew ze heguang je nguawangdairabe tedeu ge mâ de ningnui ne sa mak lau?” ze kacheu de lei.

¹¹Zai tingkupeu kena Zadokbe benai Abiatharbe dage heguang Dabidbe aipau samkela ze lang gai ze, “Juda ge gechîngme je salia be lau, ‘Heguang je pe ki lam’mbe nguawangdairabe ge nâlangrame ’ndaitew ze ningnai chang ra lau, Israelme leine gu sam â heguang dage wang kam di zeu?

¹²Ningnai â a puiname lei, ningnai a ra benai a chie lei; ’ndaitew ze heguang je teiwang nâlangrame ningnai chang ra lau?’ acheu zeu.

¹³Zai Amasabe je rang gai lau, ‘Nang a ra benai a chie mak mei? Chuna gene seu ze Joabbe bâm ge nang a gu hereikangme gu pemuitewpeu chang makchaine â, Hera ne aigum ze aipau peireige du a peireige tew gai lau,’ acheu zeu,” ze kacheu de lei.

¹⁴Zai Judame leine lung ze hangkatpeu lung gum bam ra pa ne tew gai ’ndi de lei; chidadege penui ne heguang dage, “Nang benai ning guâ ka’ngguame leine helatwang dai zu lau,” acheu ze sam lang gai de lei.

¹⁵Dadege Jordan ’mbe heguang helatwang kadai de lei; zai Judame heguang je hedau ra, zai heguang je Jordan geuki nguaka gai ra Gilgal ge pat te lei.

¹⁶Zai Benjamin’mpeu Gerabe na Shime-ibe, Bahurim gene heguang Dabidbe je hedau ra Juda gu ziemmena benai kelua ze wangkeu de lei;

¹⁷zai pe dage Benjaminme ruagene ziemmena chang kat bam lei. Zai Saulbe ki guâ ka’ngguapeu Zibabe pe na rehangme hangkereu ze mengeu benai pe guâ ka’ngguame ziemmena hang’ngkaime je ngua lu heguang tailam Jordan ’mbe kelua ze wangkeu de lei.

¹⁸Zai penui heguang kibaume je nguakapat ra, zai pe suigut tâ tew ra depiau gene kapat te lei. Zai Gerabe na Shime-ibe pa Jordan kapattena dege, heguang suage kâukeu gai de lei,

¹⁹zai heguang je, “A wangpeu heguang Jerusalem putkaibe mai ge ning guâ ka’ngguapeu ne kemaube tewgai’ndibe ze peize a wangpeu ne chibam se lau, zai pechu kemaube hang chak kai se lau; peize heguang ne chize pe lung ge ’nningtei se lau.

²⁰I hemui tâ tew ’nde lei be ning guâ ka’ngguapeu chi daseu; chidaze pie le lau, nemai ge I wang de lei, Josepbe kiria leine gene a pau heguang je hedau ra wangkeuraîlangpeu chang zeu,” ze kacheu de lei.

²¹Zeruiale na Abishaibe ne kak ze, “Tingwang ne ’nnukkailupeu je pa ne chiang gai daze, aipau deu hangge Shime-ibe je tewchat mak ra mei?” ze kacheu de lei.

²²Kane Dabidbe ne, “Zeruiale name bau gau, ningnui benai I ze chau nung ze lau? Nemai ge ningnui a teureime chang de ra de mei? Nemai tingnaimikpui ge Israel ge mige je â tewchat ra de mei?” ze kacheu de lei.

²³Zai heguang ne Shime-ibe je, “Nang chai ra mak lei,” ze acheu bei de lei. Zai heguang ne pechu pe sam hatkai bei de lei.

²⁴Saulbe na Mephiboshethbe heguang je hedau ra wangkeu de lei; pa â heguang tatrimnadibe mai gene pa hereu mak ze wang dai mak tânege, pe pî du hedui’nzut mak, pe biagêu du rim mak, pe paî ramme du geta mak ze bam lei.

²⁵Zai heguang je hedau ra Jerusalem gene pa wang dege, heguang ne pechu, “Mephiboshethbai, ’ndaitew ze nang achu nguatat mak lau?” ze kacheu de lei.

²⁶Pa ne kak ze, “A wangpeu Hei heguang gau, a guâ ka’ngguapeu ne achu choa ’ndi de lei; ning guâ ka’ngguapeu ne pechu rang ze, ‘A hangge hekunmerângne kedâ gai lau, dezai chige I chua lu heguang je nguatat ra hangge zeu,’ ze acheu bei de lei. Ning guâ ka’ngguapeu â pe pî sia dadegeu.

²⁷Pa ne ning guâ ka’ngguapeu je a wangpeu heguang dage kesia ’ndam gai de lei. Kane a wangpeu heguang â Hera gu angel’mpeu gum de lei; chidaze ning dage yi-yibe tew zu lau.

²⁸A peu kibaume leine â, a wangpeu heguang suage chai ra buibe ziemmena de lei; kane ning guâ ka’ngguapeu je ning gu mâ-teube-kaira ge teume ruage nguateu ra kai bei-bei de lei. Mâkedabe ’ndaikau I heguang dage kie dai ra larei lau?” ze kacheu de lei.

²⁹Heguang ne pechu kak ze, “’Ndaitew ze ning deu ge sa dai ra lau? I ne ram’nzeigai’ndibe kau de lei: Nang benai Zibabe ne heram je ’nggi gu lei,” ze kacheu de lei.

³⁰Zai Mephiboshethbe ne heguang je, “Hei, peize pa ne lu kam zu lau, a wangpeu heguang mâ de hereu mak ze pe ki lam helatwang dai la daseu,” ze kacheu de lei.

³¹Chunage Gilead’mpeu Barzillaibe Rogelim gene wangkeu de lei; zai heguang je Jordan nguaka gai ra Jordan ’mbe pa nguakeu di de lei.

³²Barzillaibe a chîng-kezuziedibe kau, kum riakdesat chang di de lei; zai pa ne heguang je pa Mahanaim ge bambe ting ge pa hetak peipat bei de lei; pa â keheube kau ziemmena dadegeu.

³³Zai heguang ne Barzillaibe je, “A tailam wang lau, zai ning hangge I ne Jerusalem ge nang ka’nnangbe pei gu lei,” ze kacheu lei.

³⁴Kane Barzillaibe ne heguang je, “Jerusalem ’mbe heguang je I nguahang ra tingkum ’ndaikie ge I ring ra larei lau?

³⁵Nemai I kum riakdesat te lei; keyi-kesia I ’nningchi duî semei? Ning guâ ka’ngguapeu pa teuyi-teusia chî dui semei? ’Mpeumi benai ’mpuimi leutewbe kuâ I ’ngkingchi duî rei semei? ’Ndaitew ze acheuzaine a wangpeu heguang je ning guâ ka’ngguapeu ne heput tewritkaisuâ ra lau?

³⁶Ning guâ ka’ngguapeu ne Jordan nguaka gai lu kecheîne heguang je nguatat kai ra de lei. ’Ndaitew ze heguangpeu ne getoabehi acheu zeuge peiruî ra lau?

³⁷Peize ning guâ ka’ngguapeu â helatwang dai zu lau, dezai a gu namdi ge a peu benai a pui raw taige I chai le ra hangge zeu. Kane ning guâ ka’ngguapeu Kimhambe aige la lei; peize pechu a wangpeu heguang je pa nguatat tu lau; zai ning dage yi-yibe peize ning hangge tew gai be lau,” ze acheu bei de lei.

³⁸Zai heguang ne kak ze, “Kimhambe â achu nguatat ku lei, zai ning dage yi-yibe pe hangge I tew gai bu lei; zai a dagene nang luneibe leine ning hangge tew gai gu lei,” ze kacheu de lei.

³⁹Dadege ’nteumena Jordan katat ti de lei, zai heguang du tat ti de lei; zai heguang ne Barzillaibe je gepût kai lu, pechu ’nnam gai bei de lei, zai pe ki lam’mbe pa helatwang dai di de lei.

⁴⁰Gilgal ’mbe heguang tat’nduâtat ti de lei, zai Kimhambe pe dage tat ti de lei; Juda gu ziemmena leine benai Israel gu ziemmena pa’mpi heguang je nguatat ti de lei.

⁴¹Dadege Israel gu ziemmena leine heguang dage wang ze, heguang je kacheu de lei, “’Ndaitew ze anui puina Juda gu ziemmena ningchu ngua’mbaitat lu, zai heguang benai pe kibaume zai Dabidbe kumme leine pechu Jordan nguakapat lau?” ze kacheu de lei.

⁴²Juda gu ziemmena leine ne Israel gu ziemmename je kak ze, “Heguang â anui je kahechutbe ziegene lei. ’Ndaitew ze aipau tedeu ge ningnui lumpum lau? Heguang ne luigaibeibe gene anui mâ-teu mei? Nune heguang ne mâ-kelage â anui hangge pei bei mei?” ze kacheu de lei.

⁴³Zai Israelme gu ziemmename ne Juda gu ziemmename je kak ze, “Heguang dage anui gu hedam kereu lamui lei, zai Dabidbe dagene du anui gu â ningnui gu suadu kie’nteu lei. ’Ndaitew ze anui je ningnui ngauka’nna lau? Heguang je nguawang dai ra saraime ze anui mak semei?” ze kacheu de lei. Kane Juda gu ziemmename sam ramme â Israelme gu ziemmename sam ramme suadu â penui samted teuka’nteu lei.