Read Zeme Naga 2 SAMUEL 2 Bible Online

2 SAMUEL 2 - Zeme Naga bible

2 SAMUEL 2

¹Aipau chângge Dabidbe Tingwang dage ka’mmêt te lei, “Juda gu namdi ruage kat ge â I hang ra de mei?” ze acheu zeu. Zai Tingwang ne pechu, “Hang zu lau.” Ze kacheu de lei. Dabidbe ne, “’Ndaibe namdi ’mbe I hang ra lau?” ze kacheu de lei. Zai pa ne “Hebron ’mbe lei,” ze acheu bei de lei.

²Dadege Dabidbe zai pe nâu kena, Jezril’mpui Ahino-amle, benai Karmel ge Nabalbe nâu kemîpui, Abigaille du chilia ’mbe hang di de lei.

³Zai Dabidbe ne pe dage bamme, pe kibaume ruage haimena je pe dage nguahang de lei; zai Hebron gu keloa ramme ge penui bam de lei.

⁴Juda gu ziemmena ramme wang lu, chige penui ne Dabidbe je Juda ki peireige heguang hang ’nnuk kai de lei. “Jabes-gileadme ne Saulbe je bai gai lei,” ze Dabidbe je penui ne salia bei dege,

⁵Dabidbe ne Jabes-gileadme dage sampaume lang gai de lei, zai penui dage, “Tingwang ne ningnui je peize ’nnam gai be lau, ningnui ne ningnui wangpeu Saulbe je lungsangtewbe teilia ze pechu bai gai bei daseu!

⁶Peize chunage Tingwang ne pa hungka’ntipbe benai ’nnumtewbe ningchu pei gai lau! Zai aipau tâ ningnui ne tewgaibe ziegene ningnui dage keyibe I tew gai gu lei.

⁷Chunage chidaze peize ningnui ba ranchi ze bam lau, zai kuugiereu ze bam lau; ningnui wangpeu Saulbe â chai de daseu; zai Juda ki ne penui peireige heguang hang achu ’nnuk kai bei daseu,” ze kacheu lei.

⁸Chunage Nerbe na Abnerbe, Saulbe gu hereikang muiteipeu ne Saulbe na Ish-boshethbe je ngua lu ze pechu Mahanaim ’mbe nguawang gai de lei;

⁹zai pa ne pechu Gilead peireige zai Ashurme zai Jezril zai Ephraim zai Benjamin zai Israelme leine peireige heguang hang sum gai bei de lei.

¹⁰Ish-boshethbe, Saulbe na â Israelme peireige pa heguangsap kai dege kum hedai di de lei, zai pa kum na kaheguang lei. Kane Juda ki â Dabidbe chai suitat ti de lei.

¹¹Zai Dabidbe Hebron ge Juda ki peireige kaheguangbe kum sena ze kêu seruk lei.

¹²Nerbe na Abnerbe, zai Saulbe na Ish-boshethbe guâ ka’ngguame Mahanaim gene Gibeon ’mbe zuapat ti de lei.

¹³Zai Zeruiale na Joabbe zai Dabidbe guâ ka’ngguame, penui je hedau ra Gibeon gu dekuaki ’mbe zuapat ti de lei, zai penui dekuaki katlam hangkat, zai dekuaki gene kêda ’mbia kêdapeu ka’ntau de lei.

¹⁴Zai Abnerbe ne Joabbe je rang ze, “Peize rehangme ramme zuachu lu anui suage ’nta gai lau,” ze acheu bei de lei. Zai Joabbe ne rang ze, “Peize penui je zuachu zu lau,” ze acheu bei lei.

¹⁵Chidadege penui chu lu periak sei ze zuapat te lei, Benjamin benai Saulbe na Ish-boshethbe lam gene hangkereu ze kena zai Dabidbe guâ ka’ngguame hangkereu ze kena lei.

¹⁶Zai hangkat-kat ze pechu ka’nggipeu peî tei lu, zai pe teureipeu lap ge hiazutkie rei gai de lei; dadege penui kâuheruahiam gai di de lei. Chidadege chipau bâm je Helkath-hazzurim ze kû lei, Gibeon ge bambe bâm jeu.

¹⁷Zai chipau mai ge herei chi-kadesang lei; zai Abnerbe benai Israelme gu ziemmena ramme je â Dabidbe guâ ka’ngguame suagene duî ’ndi de lei.

¹⁸Zai Zeruiale na hangchumme, Joabbe, Abishaibe, zai Asahelbe chige bam lei. Chunage Asahelbe â helung gum ze ka’nzet lei;

¹⁹zai Asahelbe ne Abnerbe je guaka’nsa de lei, zai pa Abnerbe chai suitatbe ge hezat’mbia du zai heku’mbia du ’nriakpie mak ze tat ti de lei.

²⁰Dadege Abnerbe ne pe chai ’nriakpie lu acheu ze, “Chize nang mei, Asahelbai?” kacheu de lei. Zai pa ne kak ze, “I de lei,” ze acheu bei de lei.

²¹Abnerbe ne pechu rang ze, “Ning hiage hezat’mbia zai heku’mbia pie lu ze rehang’mpeu hangkat je nîm lu pe gu hereichâ lu le lau,” acheu bei de lei. Kane Asahelbe â pechu ka’nsabe gene pehia heguapie mak lei.

²²Zai Abnerbe ne Asahelbe je rang dai ze, “Achu ka’nsabe gene ’mbia de lau, ’ndaitew ze ningchu kedei ge I tewkau gai ra lau? ’Ndaigum ze ning sipeu Joabbe tailam a ju ’ngnganghangchi ra lau?” ze kacheu de lei.

²³Kane pa ’mbiameu tai lei. Chidadege Abnerbe ne pechu pe bungpui ge hengeu ne hia bei de lei, zai hengeu ze pe chingtua ’mbe pelatat ti de lei; zai pa chige kau gai de lei, zai pa bambe bâm ge chai gai di de lei. Zai Asahelbe kau gai lu chaigaidibe bâm ge wanggaime leine saprim bam di de lei.

²⁴Kane Joabbe benai Abishaibe â Abnerbe je guâka’nsa de lei; zai naimik kêu dadege Amma deiloa ge penai wang de lei, Gibeon hênamkang ’mpuî Giah suage bambe gezeu.

²⁵Zai Benjaminme penui runne Abnerbe chaige wangherua gai de lei, zai bau kat chang di de lei, peloa’ntûm peireige penui zeu hang peu gai de lei.

²⁶Dadege Abnerbe ne Joabbe je kû ze, “Hiazutkie ne betingbeta tew’ngga bam ra mei? Betun-gairabe ze â sia-desang gu de lei be nang chî mak mei? ’Ndaitie ge ning gu ziemmename ze penui puiname je gua’nsa ta ra rang gai mak bam ra rei lau?” ze kacheu de lei.

²⁷Zai Joabbe ne sa ze, “Hera bambe ziegene, nang ne sa gai mak sede, ziemmena ramme ne penui puiname je guaka’nsabe gene hechua dezai sau du de lei,” ze kacheu de lei.

²⁸Dadege Joabbe ne hegeîluîkie ’mmut kai de lei; zai ziemmena leine sau di de lei, zai Israelme je penui gua’nsa ta di de lei, zai penui ’nggi de ’nggi ta di de lei.

²⁹Zai Abnerbe benai pe gu ziemmename chipau mai tingmuî ge Araba tatpelatat ti de lei; Jordan geuki penui ka ze, tîngna riâ changbe tat ze, Mahanaim penui wangchang de lei.

³⁰Abnerbe je guaka’nchube gene Joabbe â helat dai di de lei; zai ziemmename leine je pa gekumwang gai dege, chige Asahelbe je sâu ze Dabidbe guâ ka’ngguame ziemmena hangkereu ze sekui gabe chîdau de lei.

³¹Kane Dabidbe guâ ka’ngguame ne Benjaminme je ziemmena haî chum zai Abnerbe gu ziemmena riakseruk bichat ’ndi de lei.

³²Zai Asahelbe je penui ne tei lu, pe peu gu heraw Bethlehem ge bambe ge pechu bai gai de lei. Zai Joabbe benai pe gu ziemmename tingmuî tâluî tat ze, Hebron chang dege tingbapat ti de lei.