Read Zeme Naga 2 SAMUEL 20 Bible Online

2 SAMUEL 20 - Zeme Naga bible

2 SAMUEL 20

¹Chunage chige ziemmena ’nta kau hangkat, pe ji Shebabe kacheupeu Benjamin kiria kau, Bikribe na bam lei; zai pa ne hegeîluîkie ’mmut ze, “Dabidbe dage anui gu hedam ga lei, zai Jesibe na dage anui nguaheurabe ’ngga lei; pe gu hetiamki ge haimena tat zu lau, Hei Israelme gau,” ze kacheu de lei.

²Dadege Israel gu ziemmena leine Dabidbe dagene zuapat kam di de lei, zai Bikribe na Shebabe chai suitat kam di de lei; kane Juda gu ziemmena â Jordan gene Jerusalem riâ penui gu heguang chai suitat ti de lei.

³Zai Dabidbe pe ki ge Jerusalem ge wang de lei; zai heguang ne nausîpui ramme hangkereume pe ki reîkua ra pa sâudiakkaime je ngua lu, kereîme kangge heki ge kai bei de lei, zai penui hangge geteu-kesak peipat bei de lei, kane penui je ’nna gai mak lei. Dadege kemîpui changbe telung gum ring ze, penui je â kechaibe riâ chang ze bangnam gai ’ndi de lei.

⁴Dadege heguang ne Amasabe je, “Hezie kechumne lungge a dage Juda gu ’mpeumi leine je kûwang’ndui gai lau, zai nang du aige bam lau,” ze acheu bei de lei.

⁵Dadege Amasabe Judame je kûwang’ndui ra tat ti de lei; kane pechu diegaibe hî peirei pa rî di de lei.

⁶Zai Dabidbe ne Abishaibe je, “Chunage Absalombe suadu Bikribe na Shebabe ne anui peireige tewhereu’nteu gai gu rei lei; ning gu heguangpeu guâ ka’ngguame je ngua lu pechu gua’nchumie zu lau, peize kerie ka’ntipbe namdi ramme ge pa gut lu, anui je tewhereu gai mak ra hangge zeu,” ze kacheu de lei.

⁷Zai chige Abishaibe chaige, Joabbe zai Kerethme zai Pelethme zai ziemmena pe ranchime leine tat ti de lei; Bikribe na Shebabe je gua’nchumie ra Jerusalem gene penui zuapat ti de lei.

⁸Gibeon ge tingchutum kedibe bambe ge penui chang dadege, Amasabe penui je hedau ra wang de lei. Chunage Joabbe â hereikangme puâ kai lu bam lei, zai hiazutkie pechûp ge kai lu, pe kia ge kak kai de lei, zai pa tatzuawang dadege, pechûp ze kêutat ti de lei.

⁹Zai Joabbe ne Amasabe je, “A kinapeu gau, nang yi ze bam mei?” ze kacheu de lei. Zai Joabbe ne Amasabe je pechu keput ra pe ba hezat’mbia ba ne pe tekangmai tei gai de lei.

¹⁰Kane Amasabe â Joabbe ba ge hiazutkie bambe ze pa ’nting gai mak lei; dadege Joabbe ne pechu pe pum ge rei bei de lei, zai kedei ge perai tewpat kai bei de lei, lua na rei gai mak ze, pa chai di de lei. Dadege Joabbe benai pe kinapeu Abishaibe ne Bikribe na Shebabe je guâka’nsa de lei.

¹¹Zai Joabbe kumme ruage hangkat ne Amasabe hiage sap lu, “Joabbe je ka’nchâme leine, zai Dabidbe je mêuhâme leine, peize Joabbe chai sui lau,” ze kacheu de lei.

¹²Zai Amasabe â ’mpuîhimdi ge pe jai ge ’nnia ze tuâ bam di de lei. Zai tatka’ngguakme leine pechu ngau lu, sau gai de lei; zai hangkatpeu ne ziemmena ramme sâugai’ndibe ngau lu dege, pa ne pechu ’mpuîhimdi gene ’nduloa ’mbe Amasabe je puapat lu pe peireige paî ne tapchim gai bei de lei.

¹³Pechu ’mpuîhimdi gene hela ’mbe teitat ti dege, ziemmename leine Bikribe na Shebabe je gua’nsa ra Joabbe chai suitat kam di de lei.

¹⁴Zai Shebabe â Israelme zat leine je tatkatat ze Beth-maka gu Abel ge chang de lei; zai Bikrime leine wang’ndui lu pe chai suigut ti de lei.

¹⁵Zai Joabbe dage bamme ziemmename leine Beth-maaka gu Abel ge wang ze pechu tuaguâ ’ndi de lei; namdi je ’nggi ra penui ne tingchu kuachu de lei, zai chize kerie je kuadachu de lei; zai penui ne kerie ze huî-kagetie de lei, chize peize bakêu de ra hangge zeu.

¹⁶Dadege ’mpuimi kaningchingbe kau ne namdi gene kû ze, “’Ngking le lau! ’ngking le lau! Joabbe je, ‘Ailia wang lau, dezai ningchu I ’mpau gai ra hangge zeu,’ ze acheu be lau,” kacheu de lei.

¹⁷Zai pa ’mpuimi taige wang gai de lei; zai ’mpuimi ne, “Nang Joabbe mei?” ze kacheu de lei. Pa ne kak ze, “I de lei,” kacheu de lei. Dadege pa ne pechu, “Ning guâ ka’ngguapui sam ’ngking gai lau,” ze kacheu de lei. Zai pa ne kak ze, “I ’ngking lamui lei,” ze kacheu de lei.

¹⁸Dadege pa ne, “Penui â ’ndâ’ngka gene, ‘Peize Abel gene penui mâ-’mmêt le lau,’ acheu ze sa’nzie bam de lei; zai chidadege â penui ne patedeu salia’nchi gai gai de lei.

¹⁹Israel ge I ze desieyibe zai ’nnumtewbe kat te lei; Israel ge hêpui changbe namdi ze nang tew’nsia ra peu zeu, ’ndaitew ze Tingwang heurâ je nang tew’ngga’nzâu ne ra tew lau,” ze kacheu de lei.

²⁰Joabbe ne kak ze, “A dagene chize mâdau de mak lei, I ne ’nzuakeu zai tew’nsia ra nung â mâdau du mak lei.

²¹Chize â gesang mak lei, kane Ephraim peloaram’mpeu hangkat Bikribe na Shebabe kacheupeu ne heguang Dabidbe peireige pe ba huachu gai lei; pechu runne sâu gai be lau, zaine chi namdi gene I zuapat tu lei,” ze kacheu de lei. Zai ’mpuimi ne Joabbe je, “Pie le lau, pe peî ze kerie peirei ’mbe ning tailam tuâchu gai bu lei,” ze kacheu de lei.

²²Dadege chipaupui ze pe gu ningching gene ziemmename leine dage tat ti de lei. Zai Bikribe na Shebabe peî ze penui ne dâng lu, Joabbe tailam tuâpat kai bei de lei. Dadege pa ne hegeîluîkie ’mmut kai bei ze, penui ’nteumena namdi gene penui ki lam-lam’mbe tatrimna kam di de lei. Zai Jerusalem heguang tailam Joabbe helatwang dai di de lei.

²³Chunage Joabbe â Israelme leine gu sipai ge kanguame de lei; zai Jehoiadabe na Benaiabe â Kerethme benai Pelethme gu pemui tei ze bam de lei.

²⁴Zai Adorambe â heguang lang tewbe ge besuitewpeu lei, zai Ahiludbe na Jehoshaphatbe â rawteipeu lei,

²⁵zai Shebabe â rawsuipeu lei; zai Zadokbe benai Abiatharbe â tingku kena lei;

²⁶Jair’mpeu Irabe du Dabidbe gu tingkupeu lei.