Read Zeme Naga 2 SAMUEL 21 Bible Online

2 SAMUEL 21 - Zeme Naga bible

2 SAMUEL 21

¹Chuna Dabidbe ting ge herakûm kum chum wangkeduahang de lei; zai Dabidbe ne Tingwang je mâ-ka’mmêt te lei, zai Tingwang ne rang ze, “Gibeonme je pa ne tewchatbe ziegene Saulbe benai pe kibaume peireige, hejaipâu lamui lei,” ze kacheu de lei.

²Dadege heguang ne Gibeonme je ku gai de lei. Chuna Gibeonme â Israel gu ziemmena mak lei; kane Amorram gu ’nsakpatme bau lei; Israel name ne penui je ’nzâ gai ’nde ra hat kai ’ndi leusede, Saulbe ne Israel benai Juda hangge rankaibe gene penui je gî kam ’nde ra peu lei.

³Zai Dabidbe ne Gibeonme je, “Ningnui hangge I ’ndaikau tew gai ra lau? Zai ’ndaigum ze I peiruî dai ra lau, dezai ningnui ne Tingwang heurâ ze ’nnam gai ra hangge zeu?” ze kacheu de lei.

⁴Gibeonme ne pechu rang ze, “Saulbe zai pe ki benai anui kakge â gepût gechâk sam tedeu mak lei; zai Israel ge mî je du tewchatrabe du anui deu mak lei,” kacheu de lei. Zai pa ne, “Ningnui hangge I tewgairabe deu ge ningnui ne ’ndaikautew lei lau?” kacheu de lei.

⁵Penui ne heguang je, “Israel gu heram lungge anui bâm hang ga kam de ra, anui je tewka’nggapeu, zai tew’nsia kam ’nde ra ka’nningpeu je

⁶peize pe na hangsename je anui dage peipat kai lau, dezai Gibeon ge Tingwang gu kedeiloa ’ntûm peireige Tingwang suagene penui je anui ne kakchat ne ra hangge zeu,” ze kacheu de lei. Zai heguang ne rang ze, “Penui je I pei gu lei,” ze kacheu lei.

⁷Kane heguang ne Saulbe na Jonathanbe na Mephiboshethbe je â tew’nring gai de lei, Tingwang ne deseugai’ndibe ze penui kakge, zai Dabidbe benai Saulbe na, Jonathanbe kakge bambe ziegeneu.

⁸Heguang ne Aiahbe na Rizpale na rehangme, Saulbe dagene lungkeube Armonibe benai Mephiboshethbe je â ngua ’ndi de lei; zai Saulbe na Merable na hangmengeume Meholath’mpeu Barzillaibe na Adrielbe dagene pa lungkeume je â,

⁹pa ne Gibeonme ba ge penui je pei gai ’ndi de lei, zai kedeiloa’ntûm peirei gene Tingwang suagene penui ne chime je kakchat te lei, zai penui hangsename chai’nsam di de lei. Hechit pîbang barli gatchube ting ge penui je tewchat ’ndi de lei.

¹⁰Aiahbe na ’mpuimi Rizpale ne pa bamrabe bâm hang tingchu peireige meseigiria paî liâm gai lu, hechit pîbang gene chu ze kechaipum peireige tinggîm ’mbene tingdiâ gai mak tâne pa kuâ bam de lei, zai tîngna ge tinggîm ge ’nruine liamruabe ramme benai tingmuî ge kedei ge hekaubena ramme chige wang gai mak ra pa ne reî bam de lei.

¹¹Aiahbe na Rizpale, Saulbe nâu, nausîpui ne, ’ndaikau tâ tew mei be Dabidbe je salia bei dege,

¹²Dabidbe tat lu, Saulbe ra ramme benai pe na Jonathanbe ra ramme, Gibeon ge Philistinme ne Saulbe je tewchatbe mai ge, Philistinme ne penui je kakchatbe bâm, ’mpuî’mmai gene hega’ndime Jabes-gileadme dagene teiwang de lei;

¹³zai pa ne chi gene Saulbe ra ramme benai pe na Jonathanbe ra ramme teihang de lei; zai penui ne kakchat’ndime ra ramme du teiwang’ndui gai de lei.

¹⁴Zai Benjaminram Zela ge Saulbe ra ramme benai pe na Jonathanbe ra ramme pe peu Kisbe raw ge penui ne bai gai de lei; zai heguang ne samdiegaibe leine penui tew gai de lei. Zai chipau chângge heram hangge gekiebe ze Hera ne ’ngking bei de lei.

¹⁵Philistinme ne Israelme dage herei kadai de lei, zai Dabidbe pe guâ ka’ngguame benai wangkeu di de lei; zai Philistinme je penui ka’nggi de lei; zai Dabidbe lei-desang di de lei.

¹⁶Zai Ishbi-benobbe, ziemmena kedibe chaname ruage hangkat pe gu hengeu perît, kangngâgeî gu shekel haî chum kau hengeu teipeu, zai hiazutkie karchibe pungpeu ne Dabidbe je tewchat ra ka’nning de lei.

¹⁷Kane Zeruiale na Abishaibe ne pechu ’ngngâ bei ze Philistin’mpeu je ’nggi ze pechu tewchat ’ndi de lei. Dadege Dabidbe kumme ne pechu kiâm ze, “Nang â herei’nggi ra anui je nguatat ra zuapat dai ra mak te lei, Israelme gu hemibung tew’mmit mak ra hangge zeu,” ze kacheu de lei.

¹⁸Aipau chângge Philistinme dage Gob ge herei kadai de lei; dadege Hushath’mpeu Sibbekaibe ne Saphbe, ziemmena kedime chaname ruage bambepeu je gî ’ndi de lei.

¹⁹Zai Philistinme je Gob ge herei kadai rei lei; zai Bethlehem’mpeu Jaare-oregimbe na Elhananbe ne Gath’mpeu Goliathbe pe gu hengeu’nta paîdakbe kang gumbe teipeu je gî ’ndi de lei.

²⁰Zai Gath ge herei kadai de lei, ziemmena pesiang tie-kadesangpeu, pe ba katlam ge pe bakêrang seruk ruk, zai pe pî katlam ge pe pîkêrang seruk-ruk, ’ngkai ze medai pungpeu bam lei; zai pa du pekaudime ruagene piakeube kau lei.

²¹Zai pa ne Israelme je kesiakechui gai bei dadege, Dabidbe sipeu, Shime-ibe na Jonathanbe ne pechu gî ’ndi de lei.

²²Aime hang medaime â Gath ge ziemmena pekaudime dagene piakeu lei; Zai Dabidbe ba gene benai pe guâ ka’ngguame ba gene penui kau di de lei.