Read Zeme Naga 2 SAMUEL 24 Bible Online

2 SAMUEL 24 - Zeme Naga bible

2 SAMUEL 24

¹Israelme peireige Tingwang pe lumpumtew gai kadai de lei, zai pa ne Dabidbe dagene penui peireige tâtew gai ze, “Tat ze Israelme benai Judame riak sei gai lau,” ze acheu ze rang gai lei.

²Dadege heguang ne Joabbe benai pe dage bamme sipai ge kanguame dage rang ze, “Tat ze Israelme kiria leine Dan gene Beer-sheba riâ tat ze, ziemmename je sei gai lau, dezai ziemmename riak I chî le ra hangge zeu,” ze kacheu de lei.

³Kane Joabbe ne heguang je rang ze, “Peize Tingwang ning Rapeu ne ziemmename je penui bambe suadu kie ze lua haî kat kaisuâ gai be lau, a wangpeu heguang mik ne ngaukâ bambe luage zeu; kane ’ndaitew ze a wangpeu aipau tâ tew gai nei lau?” ze kacheu de lei.

⁴Kane heguang sam ne Joabbe benai sipai ge kanguame sam je nimchim ’ndi de lei. Dadege Joabbe benai sipai ge kanguame ne Israelme ziemmename riak sei ra heguang masua gene zuapat ti de lei.

⁵Penui Jordan ka ze Aroer gene seichu de lei, zai bekâmram sûngngang ge bambe namdi gene seichu ze, Gad ’mbia tat ze Jazer chang de lei.

⁶Dadege penui Gilead ge wang de lei, zai Hethme ram Kades ge wang de lei; zai penui Dan ge wang ze, Dan gene Sidon tatguâ de lei,

⁷zai Tira gu keriengdi ge wang ze, Hibme benai Kanaanme gu namdi leine ge wang de lei; zai penui Beer-sheba ge Juda gu Negeb ge zuapat ti de lei.

⁸Dadege heram pelane penui tat kai kam lu dege, penui kêu sekui ze hezie ’ngkai kam gai dege Jerusalem ge wang de lei.

⁹Zai heguang dage ziemmena riak seilube ze Joabbe ne pei gai de lei. Israel ge peranchime chang haî desat hiazutkie teime bam lei, zai Juda gu ziemmena chang haî mengeu lei.

¹⁰Kane pa ziemmena riak seilube chângge Dabidbe lung pa tew’nteu gai de lei. Zai Dabidbe ne Tingwang dage rang ze, “I ne ’ndaikau tew gai ’ndi mei be ge I hemuigai’ndi-desang de lei. Kane chunage, Hei Tingwang gau, ningchu I kakellum lei, ning guâ ka’ngguapeu gu hemui-helut ze lutua gai lau, kemiebe tâ I tew gai ’ndi de lei,” ze kacheu de lei.

¹¹Zai hechua ge Dabidbe zuachu dege, kemeu’mpeu Gadbe Dabidbe gu kemeu samsapeu dage Tingwang gu sam wang de lei,

¹²“Tat ze Dabidbe je salia lau, ‘Aigum ze Tingwang ne rang lei, mâ-kechum I ningchu pei gai lei; chipau ruage kat kelâng le lau, dezai chize ning dage I tew gai le ra hangge zeu,’ acheu zeu,” ze kacheu de lei.

¹³Dadege Gadbe Dabidbe dage wang lu, pechu salia de lei, zai pechu rang ze, “Ning gu heram lungge kum chum herakûm wang ra mei, nune ning teureime ne ningchu gua’nchu bei ze penui suage kêu chum nang pak ra mei, nune ning gu heram ge hezie kechum herarît wang ra lau? Chunage ’nningdesi gai ni lau, zai ’ndaikau kak mei be sam ze achu langgaipeu dage I pungwang dai ra sa’nchi gai zu lau,” ze kacheu de lei.

¹⁴Dadege Dabidbe ne Gadbe je, “I lunghereu-desang de lei, Tingwang ba ge anui kau gai zu kei lei, pa ka’nggiabe â di daseu; kane ziemmename ba ge â peize I kau gai ra pei se lau,” ze kacheu de lei.

¹⁵Dadege Tingwang ne Israelme peireige herarît kechibe ze hechua gene pehî diegaibe riâ kaichang gai de lei; zai chige ziemmename Dan gene Beer-sheba changbe ge ziemmena chang riaksena chaichang lei.

¹⁶Zai Angel’mpeu ne Jerusalem ’mbia chize tew’nsia ne ra pe ba getuapat kai dadege â Tingwang pe lung heli dai di de lei; zai angel’mpeu ziemmename ruage tew’nsia ra tâtewpeu je rang ze, “Bui de lei; chuna ning ba sau gai de zu lau,” ze acheu bei de lei. Jebus’mpeu Araunabe gu kechaîpung ge Tingwang gu angel’mpeu â bam di de lei.

¹⁷Dadege angel’mpeu ziemmename je tewchatpeu je ngau lu dege Tingwang je Dabidbe ka’mpau de lei, zai acheu sa ze, “Pie le lau, I hemui gai ’ndi de lei, I ne sia-desang ze tew’nsia ’ndi de lei, kane aipau meli ramme ne ’ndaikau tew bei lau, I ningchu kakellum lei, peize a peireige benai a peu ki peireige ning bahuâ kai be lau,” ze kacheu de lei.

¹⁸Zai chipau mai ge Dabidbe dage Gadbe wang ze, pechu kacheu de lei, “Hang zu lau, Jebus’mpeu Araunabe gu kechaîpung ge Tingwang dage herâtewbe-kaira teichu gai zu lau,” ze acheu zeu.

¹⁹Dadege Dabidbe Tingwang ne sam diegaibeibe luigum ze Gadbe sam seulube gene hang di de lei.

²⁰Zai Araunabe piekeu dadege, heguang benai pe guâ ka’ngguame pe tailam hangbe ngau lu de lei; zai Araunabe zuapat lu heguang dage pe ju kedei ge ’ngkumkeu lu hengêutewbe pei gai de lei.

²¹Zai Araunabe ne sa ze, “’Ndaitew ze a wangpeu heguang pe guâ ka’ngguapeu dage wang lau?” ze kacheu de lei. Dabidbe ne, “Tingwang dage herâtewbe-kaira tew ra ning gu kechaîpung lui ra lei, chidezai tewsabe rarît ze ziemmename dagene tei’mbia le ra hangge zeu,” ze kacheu de lei.

²²Dadege Araunabe ne Dabidbe je, “Peize a wangpeu heguang ne pe dage yira-rabe tew zu lau; aige rûkambe-râtew ra getumsei ramme lamui lei, zai chêuneibe-kaira ramme, zai heching hangge getumsei ramme gu guangkam ramme lamui lei.

²³Airamme, Hei heguangpeu gau, Araunabe ne heguang je pei gai de lei,” ze kacheu de lei. Zai Araunabe ne heguang ze, “Tingwang ning Rapeu ne ningchu lun gai de lei,” ze kacheu de lei.

²⁴Kane heguang ne Araunabe je, “Mak lei, kane penui hangge ning dagene chize I lu ra lei; Tingwang a Rapeu dage rûkambe-râtewbe a gu mâ de pemî ga ze I peipat ra mak lei,” ze kacheu de lei. Dadege chêuneibe pung benai getumsei ramme ze gepûtgeî shekel rengeu hangge Dabidbe lui de lei.

²⁵Zai chige Tingwang dage Dabidbe herâtewbe-kaira tew gai de lei, zai rûkambe-râtewbe benai desieyibe-râtewbe peipat kai de lei. Dadege heram hangge gekietewbe ze Tingwang ne ’ngking bei de lei, zai Israelram gene herarît tei’mbia ’ndi de lei.