Read Zeme Naga 2 SAMUEL 3 Bible Online

2 SAMUEL 3 - Zeme Naga bible

2 SAMUEL 3

¹Saulbe ki benai Dabid ki kakge kahereibe bam de lei; zai Dabidbe â pe ranchibi-bi di, zai Saulbe ki â pe ran-gabi-bi di de lei.

²Zai Hebron ge Dabidbe dagene pe na ’mpeumi ramme lungkeu de lei: Pe na meraipeu â Ammonbe Jezril’mpui Ahino-amle dagene lungkeu lei.

³Zai pakenapeu â Kileabbe lei, Karmel ge Nabalbe nâu kemîpui Abigaille dagene lungkeube na lei; zai pakechumbe â Absalombe, Geshur heguang Talmaibe na heleu’mpui Maakale na lei;

⁴zai pamedaibe â Haggithle na Adonijabe lei; zai pamengeube â Abitalle na Shephatiabe lei;

⁵zai paserukbe â Eglale, Dabidbe nâu na Ithre-ambe lei. Aime ze Hebron gene Dabidbe dagene lungkeume ramme de lei.

⁶Saulbe ki benai Dabidbe ki kakge kahereibe bam de lei, Abnerbe â Saulbe ki ge pe ran tew’nchi-bi bi bam de lei.

⁷Chunage Saulbe gu nausîpui, pe ji Rizpale, Aiahbe na bam lei; zai Ish-boshethbe ne Abnerbe je, “’Ndaitew ze a peu gu nausîpui je nang ’nna gai lau?” ze kacheu de lei.

⁸Dadege Abnerbe ne Ish-boshethbe sam ramme peireige pe lumpum-desang di de lei, zai acheu sa ze, “I ze Juda gu kechoapeu semei? Nemai ge ning peu Saulbe ki je, pe sime je zai pe kangme je ka’nnumbe kattew ze bam lei, zai ningchu Dabidbe ba ge pei gai mak lei; kane acheubeisede nemai ge nang achu ’mpuimi tedeu ge kemaube hang ’ndam gai lei.

⁹Hera ne Abnerbe je chigum tew gai lau, zai I ne Dabidbe hangge Tingwang ne ’ndaikau hat kai ’ndi mei be,

¹⁰Saulbe ki gene heguangram ze teihelei gai ze Dan gene Beer-sheba riâ changbe, Israel benai Juda peireige Dabidbe gu heguang-bamrâ ze teichugairabe ze tewpui gai mak zaine â aipau peireige du tew gai be lau,” ze kacheu de lei.

¹¹Zai Abnerbe je Ish-boshethbe ne kêdabe sam kakdaichi lak tai de lei, pechu pa hingbe ziegeneu.

¹²Abnerbe ne Hebron ge Dabidbe dage hepâupaume je lang gai ze, “Heram ze châu gu chang lau? Ning gu samhatbe a dage tew gai lau, zai pie le lau, Israelme leine je ning dage teiwang ra ning dage a ba bam gu lei,” ze kacheu de lei.

¹³Zai pa ne rang ze, “Yi de lei, ning dage I samhat kai gu lei; kane mâ-kat ning dage I ’nnang gu lei; chize â, nang achu ngau ra wang dezai Saulbe na ’mpuimi Mikalle je nang nguawang raî makchai â, a ju nang ngau ra mak lei,” ze kacheu lei.

¹⁴Dege Ish-boshethbe Saulbe na dage Dabidbe hepâupaume je lang gai de lei. Acheu sa ze, “A nâu Mikalle je achu pei lau, Philistinme haime gu geitû ne pemîtew ze a nâu hang ranggailupui jeu,” ze kacheu de lei.

¹⁵Dadege Ish-boshethbe ne lang gai bei ze, Laisbe na Paltielbe pe napeu dagene pechu ngua dai ’ndi de lei.

¹⁶Kane pe napeu pechu nguatat ze Bahurim ’mpuî tâluî pe chai hapzutza ze hangchang de lei. Dege Abnerbe ne pechu rang ze, “Tat chu lau, helatwang dai zu lau,” acheu bei de lei. Zai pa helat dai di de lei.

¹⁷Zai Abnerbe Israelme gu gechîngme je ’mpau ze, “Besua’ngka ningnui Dabidbe je ningnui peireige heguang hang peu ze bam de lei.

¹⁸Chuna â chize teiwangchang gai zu lau, Tingwang ne Dabidbe je samhat kai ze, ‘A guâ ka’ngguapeu Dabidbe ba gene a gu ziemmena Israelme je Philistinme ba gene zai penui teureime leine ba gene I tew’nring gai gu lei,’ ze kacheu daseu,” ze acheu bei lei.

¹⁹Abnerbe du Benjamin kiria je ka’mpau de lei; zai Abnerbe Hebron ’mbe Dabidbe dage, Israelme leine benai Benjamin kiria leine keyibe tew ra ka’nningbe tak salia ra tat ti de lei.

²⁰Abnerbe ne ziemmena ’ngkaime je ngua lu Hebron ge Dabidbe dage wang dadege, Abnerbe benai pe dage bamme hangge Dabidbe ne teseu kedibe tew gai de lei.

²¹Zai Abnerbe ne Dabidbe je rang ze, “I chu lu tat lu ze, Israelme leine je a wangpeu heguang dage nguawang’ndui gai gu lei, dezai penui ne ning dage samhat kai ra hangge zeu, dezai nang ne ka’nchâme leine peireige heguang ra hangge zeu,” ze kacheu de lei. Dadege Dabidbe ne Abnerbe je langpat kai ’ndi de lei, zai pe suiyi ze tat ti de lei.

²²Mâtiege mak ze Dabidbe guâ ka’ngguame Joabbe je ngua lu kahereibe gene wang ze, hereichâ misongga penui teiwang de lei, kane Abnerbe â Hebron ge Dabidbe dage bam mak lei, pa ne pechu lang gai bei ze pa â pe suiyi ze tat ti dadegeu.

²³Joabbe benai pe dage hereikangme bamme wang dadege, Joabbe dage salia ze, “Nerbe na Abnerbe heguang dage wang lu, zai pechu tat ra pei gai bei ze, pe suiyi ze pa â tat ti de lei,” ze acheu bei lei.

²⁴Dadege Joabbe heguang dage pat lu, “’Ndaikau nang tew gai ’ndi lau? Pie le lau, Abnerbe ning dage wang de lei; ’ndaitew ze nang pechu langtua ’ndi lau, chipauziegene pa tat ti de zeî lau?

²⁵Nerbe na Abnerbe ningchu choa ra ning dage wang lei be nang chî lei, nang zuapatbe zai nang zuagutbe chî ra, zai nang tatew leine chî ra hangge zeu,” ze acheu bei de lei.

²⁶Dabidbe bambe gene Joabbe zuapat dege, pa ne Abnerbe tailam sampaume je lang gai de lei, zai penui ne pechu Sira dekuaki gene nguawang kadai de lei; kane Dabidbe â chize chî mak lei.

²⁷Zai Hebron ge Abnerbe wang dai dege Joabbe pechu ’mpautî ra hangge keriekemui zuilung ’mbe pechu ngua’mbiapat ti de lei, zai chige pa ne pe bungpui ge rei bei ze pa chai di de lei, pe sipeu Asahelbe jai mî hangge zeu.

²⁸Chipau chângge Dabidbe chize seu lu dege, pa ne sa ze, “Nerbe na Abnerbe jai ziegene I benai a gu heguangram ze Tingwang suage betingbeta hangge kemaube ’ngga lei.

²⁹Peize chi Joabbe peireige, zai pe peume leine ki peireige kêu gai lau; zai peize Joabbe ki ge hangkat â, kahejaibe rarît mei nu, ka’mpabe mei nu, hetui’ntui ze bamme mei nu, hiazutkie ne gî’ndime mei zai teu ra game mei ze bam bam lau!” ze kacheu de lei.

³⁰Zai chigum ze Joabbe benai pe kinapeu Abishaibe ne Abnerbe je tewchat te lei, pa ne penai sipeu Asahelbe je Gibeon ge kahereibe gene tewchat’ndibe ziegeneu.

³¹Dadege Dabidbe ne Joabbe benai pe dage bamme ziemmena leine dage rang ze, “Ningnui paîni ramme hit lu meseigiria paî bâ lu, Abnerbe je puîhap zu lau,” ze acheu bei de lei. Zai heguang Dabidbe ze kechingpuame chai suitat ti de lei.

³²Abnerbe je Hebron ge penui bai gai lei, zai heguang pe kuâ’nrung ze Abnerbe raw ge hap kai de lei; zai ziemmena leine hap kam di de lei.

³³Zai heguang ne Abnerbe je puîhap ze, “Kemiebe kau chai gum ze Abnerbe chai ra mei?

³⁴Ning ba ramme pi mak, ning pî ramme du hegeîria ne keî mak zeu; helungriaksiame suage mige kau gai gum ze nang kau gai de lei,” ze puîhap te lei. Zai ziemmena leine pe peireige hap kai kadai de lei.

³⁵Dadege baudime leine tingnaimik kêu mak kerei da, kane Dabidbe dage tingku teu ra tum gai ra wang de lei; kane Dabidbe ne deseu gai ze, acheu sa ze, “I ne tingku mei nu ’ndaikau mei tingnaimik kêu makge ’ndâu dizai â, Hera ne aipau peireige du a dage peize tew gai lau!” ze kacheu de lei.

³⁶Zai ziemmena ’nteumena chize chî di de lei, zai chize ne penui suitew’mmi bei de lei; heguang ne mâ-tewgaibe leine ne ’nteumena suî tew’mmigaibe luigum zeu.

³⁷Dadege ziemmena ’nteumena zai Israelme leine ne Nerbe na Abnerbe je tewchatrabe ze heguang suî’nning mak lei be chipau mai ge chipat ti de lei.

³⁸Zai heguang ne pe guâ ka’ngguame je, “Nemai ge Israel ge heguangsinpeu zai ziemmena kedibe kau kâukeu di de lei be ningnui chî mak mei?

³⁹Zai ’nnukkailube heguang chang leusede, nemai ge I a ran-ga lei; zai aime Zeruiale name a hangge tingrak-desang di de lei. Kesiabe tewme je pe lungriaksiabe luigum ze Tingwang ne peiruî gu lei,” ze kacheu de lei.