Read Zeme Naga 2 SAMUEL 5 Bible Online

2 SAMUEL 5 - Zeme Naga bible

2 SAMUEL 5

¹Dadege Israelme kiria zat leine Hebron ge Dabidbe dage wang de lei, zai acheu sa ze, “Pie le lau, anui â ning ra benai ning chie de lei.

²’Ndâge Saulbe ne anui peireige kaheguang ’ngkage Israel ge nguapat zai nguagut ze bambe nang de lei; zai Tingwang ne ningchu rang lei, ‘Nang ne a gume Israelme hang melireîpeu chang gu lei, zai Israelme peireige nang heguang chang gu lei,’ ze kacheube zeu,” ze kacheu de lei.

³Dadege Israelme gu gechîngme leine Dabidbe dage Hebron ge wang de lei, zai heguang Dabidbe ne Hebron ge Tingwang suagene penui dage samhat kai de lei, zai penui ne Dabidbe je Israelme peireige heguang hang ’nnuk kai de lei.

⁴Dabidbe pa heguangchu ’ngkage pe tingkum ze himreu lei, zai tingkum hedai pa kaheguang lei.

⁵Hebron gene Juda peireige kum sena ze kêu seruk pa heguang gai lei; zai Jerusalem gene Israel benai Juda leine peireige kum himreu ze kechum kaheguang lei.

⁶Jerusalem ge bamme Jebusme, “Dabidbe ’ndaikau aige gutchi ra lau” ze ’nning gai lu ze Dabidbe je, “Nang aige gutsiak du ra mak lei, mikchitme benai tatchilakme ne ningchu reîkua ’ndu lei,” kacheume bau je ’nggi ra heguang benai pe kumme Jerusalem ’mbe hang di de lei.

⁷Acheusede Dabidbe ne Zaion keriengdi lu ’ndi de lei, zai chize Dabidbe gu namdi lei.

⁸Zai Dabidbe ne chipau mai ge sa ze, “Mige Jebusme je ’nggi ra zai â peize pa hedui’mpuî gene bepîsiame benai pe mikchitme, chi Dabidbe lung gene ngaugailakme je ’nggi ra zuachu lau,” ze kacheu de lei. Chidadege acheu ze sa gai de lei, “Hemikchitme benai tatchilakme kilûng ge gut ra mak lei,” zeu.

⁹Zai Dabidbe â kerie ka’ntipbe namdi ge bam di de lei, zai Dabidbe gu namdi acheu ze ku de lei. Zai Dabidbe namdi ze Millo gene helung ’mbia tew gai de lei.

¹⁰Zai Dabidbe â dibi-bi di de lei, Tingwang baudime gu Hera pe dage bam dadegeu.

¹¹Zai Tira gu heguangpeu Hirambe ne sampaume je Dabidbe dage lang gai de lei, zai kedarching ramme, zai heching tâ tewme zai tingchu tâ tewme Dabid ki tewme je lang gai de lei.

¹²Zai Tingwang ne Israelme peireige pechu sum gai de lei be Dabidbe chî di de lei, zai pe gu ziemmename Israelme hang ziegene pe gu heguangram ze pa sum gai de lei be zeu.

¹³Zai Dabidbe gu nausîpui ramme benai pe nâu ramme Jerusalem gene lusî de lei, Hebron gene pa wanglube chângge zeu; zai rehangme benai heleume ramme Dabidbe dagene misongga lungkeu de lei.

¹⁴Zai aime ze Jerusalem ge pe dagene piakeume de lei: Shammu-abe, Shobabbe, Nathanbe, Solomonbe,

¹⁵Ibharbe, Elishu-abe, Nephegbe, Japhiabe,

¹⁶Elishamabe, Eliadabe, zai Elipheletbe lei.

¹⁷Dabidbe je Israelme peireige heguang hang ’nnukkai’ndibe Philistinme seu lu dege, Philistinme leine Dabidbe je peu ra hang de lei; kane Dabidbe chize seu lu ze, riegualube namdi ’mbe wangkeu di de lei.

¹⁸Chunage Philistinme hang lu, Rephaim kâm ge chuangpuiting bam di de lei.

¹⁹Zai Tingwang dage Dabidbe mâ-ka’mmêt te lei, “Philistinme je ’nggi ra I hang ra mei? Penui je a ba ge nang pei gai gu mei?” ze acheu zeu. Zai Tingwang ne Dabidbe dage rang gai ze, “Hang zu lau, Philistinme je ning ba ge I pei gai sing gu daseu,” ze kacheu de lei.

²⁰Dege Dabidbe Baal-perazim ge wang lu, pa ne penui je chigene duî ’ndi de lei; zai pa ne sa ze, “Tingwang ne a suagene, heduinaîbe ne gum ze a teureime je naî ’ndi de lei,” ze kacheu de lei. Chidadege chipau bâm ji ze, Baal-perazim acheu ze ku lei.

²¹Zai Philistinme penui gu heraluîtewbe chige sâudiak kai lei, zai Dabidbe benai pe gu ziemmena ramme ne chiramme ze teitat ti de lei.

²²Zai Philistinme hang kadai rei lei, Rephaim kâm ge chuangpuigit bam de lei.

²³Zai Dabidbe ne Tingwang dage mâ-’mmêt kai dege, pa ne rang ze, “Nang hang ra mak lei, penui chai ’mbe tatguâ lu, zai balsam chingbang katlam ’mbia ne penui peireige wang gai lau.

²⁴Zai balsam chingbang peirei ’mbe penui ’nzangwangbe ’ncheu nang seu dezai ning runne sap’ntip le lau; Tingwang ne Philistinme hereikangme je ’nggi ra ning sua ’mbe zuapat ti daseu,” ze kacheu lei.

²⁵Zai Dabidbe Tingwang ne pechu samdiegaibe luigum ze tew de lei, zai Philistinme je Geba gene Gezer riâ changbe bihiam ’ndi de lei.