Read Zeme Naga 2 SAMUEL 7 Bible Online

2 SAMUEL 7 - Zeme Naga bible

2 SAMUEL 7

¹Chunage heguang pe ki ge bam di, zai Tingwang ne pechu pe teureime leine ne guâgitbambe gene gesaube peibeibe luage,

²heguang ne kemeu’mpeu Nathanbe dage rang ze, “Chunage pie le lau, kedarching ne tewlubeki ge I bam de lei, kane Hera gu hingdebung â hetiampaîki ge bambe zeu,” ze kacheu de lei.

³Zai Nathanbe ne heguang je, “Tatchu lau, ning lung ge bambe leine tew zu lau; Tingwang ning dage bam daseu,” ze acheu bei lei.

⁴Kane chipau mai tingmuî ge Tingwang gu sam Nathanbe dage wang de lei,

⁵“Tatchu lau, zai a guâ ka’ngguapeu, Dabidbe dage salia lau, Tingwang ne aigum ze rang lei: ‘Nang ne a hangge bamrabeki hang tew ra mei?

⁶Ijip gene Israelme je nguapatbe mai gene nemai chang ze heki ge I bam gai mak rei lei, kane hetiampaîki lungge a bâm chang ze I tatrua bam de lei.

⁷“’Ndaitew ze kedarching ne a hang heki ningnui ne tew gai mak lau,” acheu ze a gume Israelme je reî ra I ne samdiegaibeime je Israel je I ne ngua lu tatruabe bâm ramme ge Israelme samramme mi-mi dage I sam katte salia mak tai se mei?’ ze acheu zeu.

⁸Chunage chidaze aigum ze nang, a guâ ka’ngguapeu Dabidbe dage salia ra lei, ‘Baudime gu Tingwang ne aigum ze rang lei, melitaning ge meli ramme je reîbe gene ningchu I ne lu ’ndi de lei, dezai a gu ziemmena Israelme peireige nang ne heguang ra hangge zeu;

⁹zai nang ’ndai’ngge tat kai mei be ge ning dage I bam bam lei, zai ning suagene ning teureime leine je ngam gai bei de lei; zai ning hangge heji dibe, kedeirei ge ziemmena kedime ji gum ze I tew gai gu lei.

¹⁰Zai I ne a gu ziemmename Israelme hang pebâm tew’ntip kai ze penui je sum gai gu lei, chidezai penui bâm ge penui bam le ra, zai tewkeleu dai ta ra hangge zeu; zai ziemmena kesiame ne penui je tewhereu dai ra mak lei, keraî’ngka ge,

¹¹a gu ziemmena Israelme peireige samramme I sumgai’ngka gum zeu; zai ning teureime leine dagene ningchu I gesaube pei gu lei. Chipau peireige du Tingwang ne ningchu rang’nchi gai de lei, Tingwang ne ning hangge heki tew gai gu lei, zeu.

¹²Ning ting kam di, ning peume dage nang jeikeu di dezai ning chaige ning chaname je I teichu gai gu lei, ning pum gene zuapatrapeu zeu, zai pe gu heguangram I ne teichu gai gu lei.

¹³Pa ne a ji hang heki tew gai gu lei, zai heguang-bamrak ze pe gu heguangram ge betingbeta hang I sum gai gu lei.

¹⁴I ne pe peu chang gu zai pa ze a na ’mpeumi chang gu lei, pa ne hemui-helut tâ tew dezai I ne ziemmena dage bambe heteu ne, zai ziemmena gu hejâm ne pechu I laddei gu lei;

¹⁵kane pe dagene I hungka’ntipbe teitat ra mak lei, Saulbe, ning suagene I lutua ’ndipeu, dagene I tat ti gum zeu.

¹⁶Zai ning ki benai ning gu heguangram ze betingbeta a suage ka’ntipbe hang I tew gai gu lei, zai ning gu heguang-bamrak ze betingbeta hangge sum gai gu lei,’ acheu zeu” ze kacheu de lei.

¹⁷Aipau sam ramme luigum ze, zai aipau keliâbe leine luigum ze Nathanbe ne Dabidbe je salia de lei.

¹⁸Dadege heguang Dabidbe gut lu Tingwang suage ’ntau gai de lei, zai acheu sa ze, “I ze châu lau, Hei Tingwang Hera gau, zai a ki ze ’ndaikau lau, nang ne achu aipau riâ nguahangchangbe zeu?

¹⁹Acheusede aize â ning mikngau ge mâ-kecheibe lei, Hei Tingwang Hera gau; nang ne ning guâ ka’ngguapeu ki hangge heji dibe wang ra hang du sa gai bei, zai achu wangdairabe rehei teilia bei lei, Hei Tingwang Hera gau!

²⁰Zai ’ndaikau kêdabe Dabidbe ningchu ranglia ra larei lau? Nang ning guâ ka’ngguapeu je chî lei, Hei Tingwang Hera gau!

²¹Ning gu samhatkaibe ziegene, zai ning lung luigum ze nang ne aipau tâ kedibe leine tew gai bei de lei, ning guâ ka’ngguapeu chî ra hangge zeu.

²²Chidaze nang â di-desang lei, Hei Tingwang Hera gau; nang gumbe mî de ga lei, zai ning taige Hera kêdabe ’ngga lei, anui kun ne anui seulube luigum zeu.

²³Kedeirei ge ning gu ziemmena Israelme gumbe kêdabe zat, Hera ne pe gu ziemmena hang ripat ra wangkeu ze, pe runne pe ji hang tew gai ze, zai penui hang mâ-kedibe benai mi kehingbe tew gai ze, pe gu ziemmename suagene heramzatme benai penui rapeu ramme je kelituabeibe ’ndaikau heramzat la lau?

²⁴Zai nang ne ning gu ziemmena Israelme je betingbeta hangge ning gu ziemmena chang ra tew gai bei de lei, zai nang ne Hei Tingwang gau, penui Rapeu chang bei de lei.

²⁵Zai chigum ze, Hei, Tingwang Hera gau, ning guâ ka’ngguapeu deu ge benai pe ki deu ge nang samdiegai’ndibe ze betingbeta hangge tew’ntip kai zu lau, zai nang ne sagai’ndibe gum ze tew gai zu lau;

²⁶zai betingbeta ning ji ngeutew’ndi gu lei, ‘Baudime gu Tingwang ze â Israelme peireige Hera lei,’ ze acheu sa zeu, zai ning guâ ka’ngguapeu Dabid ki ze ning suage teichu gai gu lei.

²⁷Hei baudime gu Tingwang, Israelme Rapeu gau, nang ne aipau keliâbe ze ning guâ ka’ngguapeu dage tew gai bei de lei, ‘Ning hangge heki I tew gai gu lei,’ acheu ze sa gai zeu; chidaze ning guâ ka’ngguapeu ne aipau kellum zene ningchu kellum ra hang pe suî’nzeupat lu de lei.

²⁸Zai chunage, Hei Tingwang Hera gau, Nang â Hera lei, zai ning sam ramme â gesang lei, zai nang ne aipau keyibe ze ning guâ ka’ngguapeu dage samhat kai bei de lei.

²⁹Chunage chidaze ning guâ ka’ngguapeu ki je ’nnam gai ra ning suiyibe peize chang lau, dezai ning suage chize betingbeta tew’nduâtat bam ra hangge zeu; nang ne, Hei Tingwang Hera gau, sa gai bei de lei, zai nang ’nnamgaibe ne ning guâ ka’ngguapeu ki je betingbeta ’nnam gai gu lei,” ze kakellum de lei.