Read Zeme Naga 2 SAMUEL 8 Bible Online

2 SAMUEL 8 - Zeme Naga bible

2 SAMUEL 8

¹Aipau chângge Dabidbe ne Philistinme je ngam lu penui je tewhelêu gai ’ndi de lei. Zai Dabidbe ne Metheg-ammabe je Philistinme ba gene lupat ’ndi de lei.

²Zai pa ne Moab je duî lu, zai penui je kedei ge ’njei gai lu, heria ne penui je ka’ndeu de lei; zai pa’nria kena je pa ne chai ra ’ndeupat kai de lei. Zai Moabme ze Dabidbe guâ ka’ngguame chang di ze ’mpuâ pei di de lei.

³Dabidbe ne Zoba gu heguang Rahobbe na Hadadezerbe je du duî ’ndi de lei, Euphrates geuki gene pe rimchi ngau dai ra tatbe geneu.

⁴Zai Dabidbe pe dagene hekunchingchuame chang kat ze haî sena, zai kedei gene tatme chang ’ngkai lu ’ndi de lei, zai Dabidbe ne timriang gu hekun ramme leine je tewchoani gai bei de lei, kane timriang haî kat hang buibe hekun ramme sâu gai de lei.

⁵Zai Damaska gene Siriame Zoba gu heguang, Hadadezerbe je ’ngngâ ra wang dege, Dabidbe ne Siriame ’mpeumi chang ’ngkai ze kename je gîchat kam ’ndi de lei.

⁶Dadege Dabidbe Damaska gu Aram ge hereikangme gu tejeîki tew gai de lei; zai Siriame Dabidbe guâ ka’ngguame chang ze ’mpuâ teiwang ra chang di de lei, zai Tingwang ne Dabidbe je pa tatkaibe bâm leine ge kengambe pei bei de lei.

⁷Zai gechâk hinggei Hadadezerbe guâ ka’ngguame ne puabe ramme ze Dabidbe ne lu lu Jerusalem ge teiwang gai de lei.

⁸Zai Hadadezerbe gu namdi kena Beta benai Berothai gene Dabidbe kangngâgeî ramme misongga lu de lei.

⁹Zai Hammath gu heguang Toibe ze Dabidbe ne Hadadezerbe gu hereikang baudime je ngam ’ndi de lei be seu lu dege,

¹⁰Toibe ne pe na Jorambe je heguang Dabidbe dage, pechu rechâ gai ra, zai pa ne Hadadezerbe je ’nggi ze pechu duîlube ziegene hesuiyibe sam pei gai ra lang gai de lei; Toibe je Hadadezerbe â pehî’nsangne herei bam dadegeu. Zai Jorambe pe dage gepût, gechâk zai kangngâgeî merua ramme teiwang de lei;

¹¹airamme ze du Heguang Dabidbe ne gepût benai gechâk heramzat ramme pa duîlume dagene ngaulube Tingwang dage peipatbe ge peipat’mpam gai de lei,

¹²Edom gene, Moab gene, Amonme dagene, Philistinme dagene, Amalekme dagene lulube zai Zoba heguangpeu Rehobbe na Hadadezerbe dagene hereichâ ngaube zeu.

¹³Zai Dabidbe pe hangge hejidibe hang ngampat lu de lei. Pa helatwang dai dadege, Edomme chang desatme je ’Nchaîkui kâm gene gîhiam lu de lei.

¹⁴Zai Edom ge pa hereikang gu sieki sum gai lei; Edomram leine ge pa hereikangme gu tejeîki sum gai de lei, zai Edomme leine Dabidbe guâ ka’ngguame chang di de lei. Zai Tingwang ne Dabidbe je pa tatkaibe bâm leine ge keduîbe pei bei de lei.

¹⁵Dadege Dabidbe ne Israelme leine peireige kaheguang de lei, zai Dabidbe samramka’nzeibe benai kapelingbe pe gu ziemmena leine dage ngua’nggua ze bam de lei.

¹⁶Zai Joabbe Zeruiale na ne hereikangme peireige besuitew de lei; zai Ahiludbe na Jehoshaphatbe ne rawteipeu lei;

¹⁷zai Ahitubbe na Zadokbe benai Abiatharbe na Ahimelekbe ze tingku lei; zai Seraiabe ze rawsuipeu lei;

¹⁸zai Jehoiadabe na Benaiabe ne Keretheme benai Pelethme peireige besuitew lei; zai Dabidbe na ramme â tingkume lei.