Read Zeme Naga 1 HEGUANGME 1 Bible Online

1 HEGUANGME 1 - Zeme Naga bible

1 HEGUANGME 1

¹Zai pie le lau, heguang Dabidbe chîng ze pe tingkum misongga hang di de lei, zai pechu penui ne paî taplup kai bei sedu kelumbe du pa chî ta di de lei.

²Chipauziegene pe ki guâ ka’ngguame ne pechu, “A pau heguang hangge peize heleu’mpui hangkat je peu le lau, dezai pa ne peize heguang je reî ze teleu ra hangge zeu; a pau heguang je gûmlum gai ra peize pe ga ge jei gai lau,” acheu bei de lei.

³Chidadege Israel leine ge heleuyibe kau je penui peurua de lei, dadege Shunam’mpui, Abishakle je ngaudau lu pechu heguang tailam nguawang gai bei de lei.

⁴Heleu’mpui ze peluiyi-kadesang lei; zai pa ne heguang bajuî teleu ze ka’nsipui chang ze pa ne pechu pe tâ ’nggua ze bam lei; acheusede heguang â pechu pe nâu hang ’nning gai mak lei.

⁵Zai pie le lau, Haggithbe na Adonijabe pe runne pe ji teigetua ze, “I heguang chang gu de lei,” kacheu de lei; dadege hekuntimriang ramme benai hekun teichime, zai ’mpeumi hangrengeu pe sua pakraîtatrame hangge pa ne kedâ’ntua gai de lei.

⁶Mâdau du pe peu â pechu luakat te, “Nang ’ndaitew aigumbe tâ tew lau,” ze kiâkengam gai mak lei, pa du ’mpeumi rehangyi-kadesangbe kau de lei, zai Absalombe châng gene pechu lungkeu lei.

⁷Zeruiale na Joabbe benai tingkupeu Abiatharbe dage pa sam ka’mpau de lei; zai penui ne pe kuâ ge sui gai ze pechu ’ngngâ gai bei de lei.

⁸Kane tingkupeu Zadokbe zai Jehoiadabe na Benaiabe, zai kemeu’mpeu Nathanbe, zai Shime-ibe, Reibe zai Dabidbe gu ziemmena peranchime ramme mî du Adonijabe tailam gu mak lei.

⁹En-rogel tai Henêu Chukâng ge Adonijabe meli, getum, zai getumpoine peleuyibe ramme herâtew ze bi gai de lei, zai pe sikiname heguang Dabidbe name leine zai Juda ge heguang besuitewme je â wang ra ’nnâ gai da,

¹⁰kane kemeu’mpeu Nathanbe je mei nune Benaiabe je mei nune ’mpeumi peranchime je mei nune pe kina Solomonbe je â wang ra ’nnâ gai mak tai de lei.

¹¹Chidadege Solomonbe pui Bathsheba je Nathanbe ne, “Haggithbe na Adonijabe heguang changdibe anui pau Dabidbe ne chî mak lei be nang seutâu mei?

¹²Chidaze nang wang lau, nang ning keringbe benai ning na Solomonbe keringbe ze ripat chilerabe tak hang I ne ningchu mâ-ranglia gai mie lei.

¹³Nang gutgap lu ze heguang Dabidbe je, ‘A pau heguang gau, nang ne ning gu tâka’ngguabepui je, “Ning na Solomonbe ne a sin ge heguang chang ze a gu heguang-bamrak ge ’ntau gu lei, ze nang sam deseu gai mak ti lau”? ’Ndaikau tew bei ze Adonijabe ne heguang chang ra lau?’ ze acheu be lau.

¹⁴Zai nang heguang dage sam ka’mpaube luage, I du ning chai suigut lu ning sam ze hezuâ-gaihâ gu lei, acheu be lau,” ze kacheu de lei.

¹⁵Chidadege â Bathshebale heguang kilûng sîam ’mbe gut ti de lei, (pie le lau, heguang â chîng-kezuzie di ze Shunem’mpui Abishakle ne pechu ngua laleu de lei).

¹⁶Bathshebale ne heguang suage keikut kêu lu pechu hengêutewbe pei gai de lei, dadege heguang ne, “Nang ’ndaikau lu nei lau?” kacheu de lei.

¹⁷Pa ne pechu, “A pau gau, nang ne ning guâ ka’ngguapui je, ‘Ning na Solomonbe ne a sin ge heguang chang ze a gu heguang-bamrak ge pa ’ntau gu lei, ze Tingwang ning Rapeu ji gene nang ne sam deseu gai de lei,’ acheu bei de lei.

¹⁸Zai chuna â pie le lau, nang a pau heguang chî mak leusedu, Adonijabe â heguang chang de lei.

¹⁹Pa ne getum, getumpoine peleuyibe ramme, zai meli misongga ze herâtew ze bi gai de lei, zai heguang (Dabidbe) name ramme tingkupeu Abiatharbe, zai Joabbe hereikang saibe je wang ra ’nnâ gai de lei; kane Solomonbe, ning guâ ka’ngguapeu je â wang ra ’nnâ gai mak tai de lei.

²⁰Zai chuna â a pau heguang gau, châu ne a pau heguang sin ge pe bâm heguang-bamrak ge ’ntau ra mei be Israelme leine je nang ne ranglia gai ra ningchu penui ne pierim la de lei.

²¹Makchai â, nang heguang ne pe peume dage jeikeudibe mai dezai â I benai a na Solomonbe je â, kesiabe tâ tewbe kau hangge riam gai bei ta du lei,” ze acheu bei de lei.

²²Zai heguang dage pa sam ’mpau lage, kemeu’mpeu Nathanbe gut te lei.

²³Zai penai ne heguang je, “Kemeu’mpeu Nathanbe aige la lei,” ze rang gai bei de lei. Zai heguang dage pa gut dege, keikeu ze pe peî kedei ge ’ngkum gai de lei.

²⁴Dadege Nathanbe ne, “A pau heguang gau, nang ne, ‘Adonijabe ne a sin ge heguang gu lei, zai a gu heguang-bamrak ge pa ’ntau gu lei,’ acheu bei mei?

²⁵Nemai pa wangkeu lu, getumsei, kaurui peleuyibe ramme, zai meli misongga ze herâtew ze bi gai la de zeî lau, zai pa ne heguangpeu name leine je, Joabbe hereikang saibe je zai tingkupeu Abiatharbe je wang ra ’nnâchang gai ’nde lei; zai pie le lau, pe suagene penui â teu ze sak lu ze, ‘Heguang Adonijabe je peize ringtie lau!’ ze penui kacheu de lei.

²⁶Kane I ning guâ ka’ngguapeu zai ning gu tingkupeu Zadokbe, Jehoiahdabe na Benaiabe, zai ning tâ ka’ngguapeu Solomonbe je â pa ’nnâ gai mak te lei.

²⁷Aigum chang ra a pau heguang ne tew gai bei mei, zai nang â ning tâ tewme je châu ne a pau heguang sin ge heguang bâmrak ge ’ntau ra mei be salia gai mak mei?” ze acheu bei de lei.

²⁸Dadege heguang Dabidbe ne kak ze, “Bathshebale je kû gai lau,” acheu bei de lei. Chidadege pa heguang dage wang lu pe suage sap kai de lei.

²⁹Zai heguang ne sam deseu gai ze, “A keringbe je kahereube zat leine gene ripatkaipeu Tingwang ne ringbambe luigum ze,

³⁰I Tingwang Israelme Rapeu zene ningchu, ‘Ning na Solomonbe ne a sin ge heguang chang gu lei, zai pa ne a gu heguang-bamrak ge a kelei ge ’ntau gu lei,’ ze I acheu deseu gai lei; acheuleusede nemai ge I tew gu de lei,” kacheu de lei.

³¹Chidadege heguang dage Bathshebale pe peî ze kedei ge keikeu lu hengêutewbe pei gai de lei, zai “A pau heguang Dabidbe je peize ring bam lau,” ze kacheu de lei.

³²Heguang Dabidbe ne, “A tailam tingkupeu Zadokbe, kemeu’mpeu Nathanbe, zai Jehoiadabe na Benaiabe je kûwang lau,” acheu bei de lei. Dadege heguang suage penui wang de lei.

³³Zai heguang ne penui je, “Ningnui wangpeu gu tâka’ngguame je ngua le lau, dezai a na Solomonbe je a gu hekunmerângne ching ge chua ra teichu’ntau gai lu, pechu Gihon ’mbe nguakeu du lau;

³⁴zai chige tingkupeu Zadokbe benai kemeu’mpeu Nathanbe ne pechu Israelme peireige heguang chang ra taudui peize ’nnuk kai be lau; chidezai hegeîluîkie ’mmut ze, ‘Heguang Solomonbe ringtie lau!’ acheu lau.

³⁵Chipau chângge ningnui pe chai suihang dai ra lei, dezai pa a gu heguang-bamrak ge wang ze ’ntau ra de lei; pa ne a kelei ge heguang hang chang gu daseu; zai Israelram benai Judaram peireige pa ne samram ze bam ra I ne pechu sum gai de lei,” acheu bei lei.

³⁶Zai Jehoiadabe na Benaiabe ne heguang je kak ze, “Amen! Tingwang a pau, heguang Rapeu ne peize acheu sa lau.

³⁷Tingwang ne a pau heguang dage bam bam gum ze peize pa ne Solomonbe dage du bam bam ra de lei, zai a pau heguang Dabidbe gu heguang-bamrak suadu pe gu heguang-bamrak â tew’ndi-bi gai be lau,” kacheu de lei.

³⁸Chidadege tingkupeu Zadokbe, kemeu’mpeu Nathanbe zai Jehoiadabe na Benaiabe zai Kerethme benai Philistinme (heguang je kereîme) wangkeu lu heguang Dabidbe gu hekunmerângne ching ge Solomonbe je chua ra teichu’ntau gai lu, pechu Gihon ’mbe nguakeu de lei.

³⁹Chige tingkupeu Zadokbe ne hetiamki gene taudui kaibe mâkie tei lu, Solomonbe je ’nnuk kai de lei, chidadege penui ne hegeîluîkie ka’mmut te lei; zai baudime ne, “Heguang Solomonbe ringtie lau,” kacheu de lei;

⁴⁰zai baudime leine metiam ’mmut ze, penui suigutpat ze pe chai suihang di de lei. Chidadege â penui ’ncheu chibe ne kedei ’ngkak ra gum bam di de lei.

⁴¹Penui hengîrabe hengî kam dezaine Adonijabe benai heguangme pe dage bamme ’nteumena chipau rasam seutâu de lei. Zai Joabbe ne hegeîluîkie kuâ seu lu dege, “Namdi ge kakebiengbe ze ’ndaikau tak tew rei se lau,” ze pa kacheu de lei.

⁴²Pa mâ-dam lage, pie le lau, Abiatharbe tingkupeu na Jonathanbe wangleu de lei; dadege Adonijabe ne, “Gut lau, nang â mâ-rasam yibe pungwangbe kau, ziemmena betâudibe kau de lei,” kacheu de lei.

⁴³Jonathanbe ne Adonijahbe je kak ze, “Acheu me lei, a pau heguang Dabidbe ne Solomonbe je anui pau hang tew gai ’nde lei;

⁴⁴zai heguang ne tingkupeu Zadokbe, kemeu’mpeu Nathanbe, zai Jehoiadabe na Benaiabe, zai Pelethme benai Kerethme je pechu sui ra lang gai ’nde lei, zai heguang gu hekunmerângne chingchua ra penui ne pechu teichu’ntau gai ’nde lei;

⁴⁵zai Gihon gene pechu â heguang hangge tingkupeu Zadokbe benai kemeu’mpeu Nathanbe ne taudui ’nnuk kai ’nde lei; zai penui suiyi’ntakediâu ze hangwak te lei, namdi ze penui kuâ ne him la de lei, nang seube ze chipau kuâ ramme de lei.

⁴⁶Solomonbe â heguang-bamrak ge ’ntau la de lei.

⁴⁷Chipau peireige heguang tâka’ngguame ramme ne anui pau heguang Dabidbe je penui suiyibe getoabe sam sa ze, ‘Ning Rapeu ne Solomonbe ji je â ning ji suadu tew’ndi gai ’nde lei, zai pe gu heguang-bamrak du ning gu heguang-bamrak suadu tew’ndi gai ’nde lei,’ kacheu de lei. Zai heguang du pe jeî ge kei’ngkum gai de lei.

⁴⁸‘I ngaube sing gene nemai ge a gu heguang-bamrak ge a haîhikme ruage hangkat ’ntau ra peigaipeu Israelme Rapeu Tingwang je peize suang ze bam lau,’ ze heguang ne du kacheu de lei,” ze acheu bei de lei.

⁴⁹Chidadege Adonijabe dage hesang bamme hing ze kedun chu di de lei, zai penui zuachu lu, hangkat-katne ze penui ’mpuî ra ’mbe tat kam di de lei.

⁵⁰Zai Adonijabe Solomonbe je hing di de lei, zai pa chu lu, tat ze herâtewbe bâmra kie ramme bia de lei.

⁵¹Aipau rasam Solomonbe je rangchang gai ze, “Pie le lau, Adonijabe Solomonbe je hing lei; pie le lau, herâtewbe-kaira gu mâkie ramme pa bia lu ze, ‘Heguang Solomonbe ne pe gu tâka’ngguapeu je hiazutkie ne peize bichat kai ra mak lei,’ ze peize achu acheu sa gai raî lau,” kacheu de lei.

⁵²Dadege Solomonbe ne, “Pa ziemmena kebuibe kau run lei zai â, kedei ge pe peîtam katte ’ngngaîkeu ra mak lei; kane pe dage kesiabe ngaupat tizai â, pa chai gu lei,” acheu bei de lei.

⁵³Chidadege heguang Solomonbe ne, Adonijabe je herâtewbe-kaira gene nguakeu ra rang gai bei ze penui ne nguakeu de lei, dadege pa wang ze Solomonbe dage hengêutewbe pei gai de lei, zai Solomonbe ne pechu, “Ning ki lam tat tu lau,” acheu bei lei.