Read Zeme Naga 1 HEGUANGME 10 Bible Online

1 HEGUANGME 10 - Zeme Naga bible

1 HEGUANGME 10

¹Solomonbe ji ditattibe rasam Sheba heguangpui seu lu dege, sam gechukbe ramme ne pechu kedak ra wang de lei,

²Reheumoîne ramme (hegi’mmung), zai gechâk benai tingchu pemîhungbe ramme misongga put-hu ramme peireige kai lu, pa benai pechu ngua-teritatme ziemmena misongga ze Jerusalem ge wang de lei; zai Solomonbe dage pa wang dege, pe lung ge ka’nningbe leine pechu salia gai de lei.

³Dadege pa ne ka’nneube sam ramme Solomonbe ne kak kam gai de lei; mâ de sakebai meluisui ze heguang ne pechu salia kam gai de lei.

⁴Zai Sheba heguangpui ne Solomonbe kaningchingbe leine, pa ne heki tewgaibe,

⁵teu-sak ra teleupatbe zat, pe kumme ’ntau ze bambe tak, zai pe tâ ka’ngguame ne mâ kateleube tak, penui paînikaibe, hepiakpuame bambe tak, zai Tingwang ki ge pe gu rûkambe-râtewbe tak ngau kam gai dege â, pe lungchêutew ta di de lei.

⁶Dadege pa ne heguang je, “I a ram gene ning rasam benai nang kaningchingbe tak rasam hepâusam gene I seulube ze gesang de lei,

⁷sedu I ne wangchang ze a mik ne chiramme ngau mak tâne I ’nnum’mmi mak lei; zai pie gai ni lau, chipau rasam ze pa’mpi riâ du achu saliachang mak lei; nang kaningchingbe benai nang pung-ze-sabe tak ningdaulakbe ze I geseube peirei ’ngkeukia di de lei;

⁸ning nâu changme zai ning guâ ka’ngguame nang kaningchingbe sam ’ngking ze bamme je peize helungtemi lau!

⁹Tingwang ning Rapeu ning dage pe suiyi ze bambe zai Israelme gu heguang-bamrâ ge ningchu tei’ntaugaipeu je peize yi lau! Tingwang ne Israelme je betingbeta hungbambe ziegene, zai nang ne samram’nzei ze pelingtew ze tâtew ra pa ne ningchu heguang hangge tewgaibeibe ziegeneu,” ze kacheu de lei.

¹⁰Dadege pa ne heguang je gechâk hit chang medai sua kiebe, reheumoîne, benai tingchu pemîhungbe, misongga pa kela hang pei gai de lei; Sheba heguangpui ne heguang Solomonbe je reheumoîne acheuzeu peibe ze mâdau du chipau riâ gumbe â wang dai mak lei.

¹¹Chipau peireige du Ophir gene gechâk pungbe Hirambe gu ’nneikuak gene Ophir gene Almug ching benai tingchu pemîhungbe ramme misongga pungwang de lei.

¹²Zai Tingwang ki benai heguang ki gu heki’ngra hangge Solomonbe ne Almugching ramme kai, zai leutewme bau hangge ’nrabung zat ramme du kai bei de lei; aigum ze Almugching yibe Israelme ram ge hela gene teiwangbe nemai riâ ngau merei lei.

¹³Sheba heguangpui hangge heguang Solomonbe ne tinggeupatkaibe peireige du pa ne luneibe benai gekiebe zat leine ze pei bei de lei. Chigum ze pa ne pe tâ ka’ngguame je ngua lu pe ram Sheba ’mbe helattat dai di de lei.

¹⁴Zai kum kat ge gechâk Solomonbe dage wangbe pehit chang ’ngkai ze kechum riâ lei,

¹⁵chize helîkahedetbe tâtewbe, helîkahedetme tat ka’nruibe zai Arab heguangme benai heram lungge laksaibe tâ tewme dagene wangbe ze â chak kai mak zeu.

¹⁶Heguang Solomonbe ne gechâk dui ne zuâlube hinggei kedibe haî na teleu gai lei; hinggei kat ge gechâk shekel haî seruk riâ gut lei.

¹⁷Zai pa ne gechâk dui ne zuâlube hinggei kecheibe haî chum teleu gai lei; hinggei kat tewbe ge gechâk hit na riâ gut lei, zai chiramme heguang ne Lebanon ’Nrêu Ki ge kai gai lei.

¹⁸Zai heguang ne hepuagim ne tewbe heguang-bamrak tew gai lei, zai chige pa ne gechâk ka’nchibe dui ne lua gai lei.

¹⁹Chi heguang-bamrak ge pichaî sat seruk bam lei, zai pe chaige getumsei peîdâng luî tewlube kai, zai ka’ntaube bâm kena lam hang mi ba ’ngkingrabe bâm kena-na tewgaibe ge duilui kena sapbe luî tew lu ze kai lei,

²⁰chipau bâm ge duilui kereu ze kena pichaî sat, sat seruk gu betû-tû ge sapbe hang tew gai lei. Heguangram kat ge du aigumbe luî mâdau tew gai mak kerei lei.

²¹Heguang Solomonbe sakbe piak-kuak leine gechâk ne tewbe kam lei, zai chi Lebanon ’Nrêu Ki gu hepiak-hekuak leine gechâk ka’nchibe ne tewbe kam lei; gepût ne tewbe â chige mâ de ga lei, chi Solomonbe ting ge â gepût â mâ-hangge du chak kai mak dadegeu.

²²Heguang gu Tarshis ge sungkling tatbe dui-’nneikuak ramme bam lei, chiramme Hirambe gu ’nneikuak dung ruage tat-herua bam lei. Kum chum lungge luakat Tarshis ge bambe ’nneikuak ramme zene gechâk, gepût, hepuagim, hezua tikbe zai wûeng ramme teiwang-wang lei.

²³Kedeirei heguangme ruage heguang Solomonbe zene lungyilang zai ningching lang lei.

²⁴Solomonbe dage Hera ne kaningchingbe sam peigaibe ’ngking gai ra kedeirei leine ne pechu peu ze bam lei.

²⁵Penui ’nteumena ne penui kela hang gepût, benai gechâk, kerua ramme, mâ-perîmyibe, reheumoîne, hekun ramme, zai hekunmerângne ramme misongga tei lu, patingkum ’nsangne wang-wang lei.

²⁶Zai Solomonbe ne timriang benai hekun chingchuame je gekumwang’ndui gai de lei; pa ne Jerusalem ge benai namdi ramme ge kai’nduigailube timriang chang kat ze haî medai, zai hekun chingchuame ziemmena chang kereu ze kena pe gu bam lei.

²⁷Jerusalem ge â, gepût ze tingchu ’ndeî ze bam ra heguang ne tew gai bei de lei; zai Shephelaram gu ’ndutchî ching ramme kie ze kedarching bam ra pa ne tew gai bei de lei.

²⁸Hekun ramme hela gene Solomonbe hang ’mputwangbe â, Ijipram benai Kueram gene wang lei, zai heguang gu helîkahedetme chiramme Kue gene pemî pei ze lu kadai de lei.

²⁹Ijipram gene ’mputwangbe timriang kat ge gepût-rangkâng shekel haî seruk ne lui, zai hekun kat ge shekel haî kat ze rengeu ne lui lei. Hethme benai Siriame gu heguangme hangge airamme ze heguang gu helîkahedetme dagene ’mputkelitat lei.