Read Zeme Naga 1 HEGUANGME 12 Bible Online

1 HEGUANGME 12 - Zeme Naga bible

1 HEGUANGME 12

¹Rehoboambe je heguang hang suang gai ra Israelme leine Shekem ’mbe wangkamdibe ziegene Rehoboambe Shekem ’mbe tat ti de lei.

²Zai Nebatbe na Jeroboambe chize seu lu dege, (heguang Solomonbe dagene pakkaidibe bâm Ijip ge pa â bam rei dadege), Ijipram gene Jeroboambe wang kadai de lei.

³Zai penui ne lang gai bei ze pechu kûwang de lei; dadege Jeroboambe benai Israelme baudime wang lu Rehoboambe je,

⁴“Ning peu ne a put tewrit kai bei de lei. Chidaze chuna ning peu gu tâtewkahereube benai pe peireige heput keritbe tuagaibe ze tew’ncha gai du lau, dezai ning guâ anui ne ’nggua gu lei,” acheu bei de lei.

⁵Pa ne penui je, “Hezie kechum hang ningnui tat tu lau, chidezai a dage wang dai lau,” ze acheu bei de lei. Chidadege baudime tat ti de lei.

⁶Dadege pe peu Solomonbe ringbe ting ge pe taige bamme gechîngme dage pa ’mpautâu gai ze, “Aime baudime je I a samkak kai ra ningnui ne getei gai ra ’ndaigum ra lau?” kacheu de lei.

⁷Dadege penui ne pechu, “Nang ne aime baudime hangge ka’ngguapeu chang ze nemai penui tâ ’nggua gai, zai ning sam penui ne kakbe luage samyibe ramme ne sa bei zai â, betingbeta penui ning guâ ka’ngguame chang ze bam gu lei,” ze acheu bei de lei.

⁸Kane gechîngme ne mâ-kaladdeibe sam pa tuâ nan ze, pe dagene rehangme chîngchume, pe taige bamme je ’mpauchu kadai de lei.

⁹Dadege pa ne penui je, “Aime bau ne achu, ‘Ning peu ne anui peireige heput tuagaibe tew’ncha gai lau,’ ze ranggaibe sam ze penui je kakkairabe sam hang ningnui ne achu ’ndaigum getei gai ra lau,” acheu bei de lei.

¹⁰Dadege rehangme pe dagene chîngchume bau ne pechu, “ ‘Ning peu ne anui put tewrit kai bei de lei, kane nang ne anui hang chize tew’ncha gai de mei’ acheu ze ningchu ranggaime, aime bau je, ‘A bakêrang kelentîne â, a peu gu duilui sua di-’nteu lei.

¹¹Chidaze chuna â a peu ne ningnui je heput keritbe tuagaibe ge I ne ningnui put hang tewsuâ gai dai gu lei. A peu â ningnui je hekun je lakbe ria ne tewsâ da, kane I â ningnui je heruîmegapui ramme ne tewsâ gu lei,’ acheu ze nang sa ra lei,” ze acheu bei de lei.

¹²Chigum ze heguang ne, “Pakechumbe mai ge a dage wang dai lau,” ze ranggaibeibe luigum ze, pakechumbe mai ge Jeroboambe benai baudime ’nteumena Rehoboambe dage wang de lei.

¹³Dadege heguang ne gechîngme pechu laddeigaibe sam tuâ nan ze pe sam siabe ne kak ze,

¹⁴rehangme bau geteigaibe sam ne kak ze, “A peu ne ningnui put tewrit kai bei de lei, kane I ne ningnui put hang tua gai suâ gu lei; a peu ne ningnui je hekun je lakbe ria ne tewsâ da, kane I â heruîmegapui ramme ne ningnui je tewsâ gu lei,” ze acheu bei de lei.

¹⁵Chigum ze baudime sam ze heguang ne ’ngking mak tai de lei; Nebatbe na Jeroboambe je Shilo’mpeu Ahijabe dagene Tingwang ne ranggaibe sam pa ne tewpuidaisingrabe ze Tingwang ne aize wangchang ra tew gai de lei.

¹⁶Zai chime kuâ heguang ne ’ngkingmaktaibe Israelme leine ne chî lu dege baudime ne heguang je kak ze, “Dabid ki-kelak gene anui dam hang ’ndaikau la lau? Jessibe na dagene anui nguaheurabe zat ’ngga lei, Hei Israelme gau, ningnui gu hetiamki ramme hangge zeu! Hei Dabidbe gau, chuna ning ki ge pie gai ni lau,” kacheu de lei. Chigum ze Israelme penui gu hetiampaîki ’mbe tat kam di de lei.

¹⁷Kane Juda gu namdi ramme ge bamme Israelme peireige Rehoboambe ne heguang chang ze bam lei.

¹⁸Dadege tâtewme ruage tâ kereîpeu, Adorambe je heguang Rehoboambe ne lang gai de lei, zai Israelme leine ne pechu tingchu ne tuâchat ’ndi de lei. Zai heguang Rehoboambe kelua ze pe gu timriang ge chu gai lu Jerusalem ’mbe pak ti de lei.

¹⁹Chigum ze nemai riâ Israelme â Dabidbe heguang ki peireige ’nggi ze bam lei.

²⁰Zai Jeroboambe wang dai la de lei be Israelme leine seu lu dege, penui ne ka’nduibe bâm ge wang ra kû gai lu, chigene Israelme leine hangge heguang hang pechu sum gai de lei. Chige Dabidbe ki lam’mbe suibe kau mî de ga di ze, kane Judabe zat runne di de lei.

²¹Rehoboambe Jerusalem ge wang dadege, Solomonbe na Rehoboambe gu heguangram teichu dai ra Israel kibaume je ’nggi ra pa ne Judabe kibaume leine, Benjamin kibaume leine zai herei zeu chîme hang kelângpatlume ziemmena chang haî kat ze riakdesatme je kelauwang’ndui gai de lei.

²²Kane Hera gu ziemmena hangkatpeu, Shemaiabe dage Hera gu sam pat ze,

²³“Judaram heguang Solomonbe na Rehoboambe benai Benjaminbe zai baudime kêdame je,

²⁴‘Aigum ze Tingwang ne rang lei, ningnui hang ze ning puiname Israelme je ’nggi se lau. ’Nteumena mi ki lam-lam tat kam du lau, aize a dagene chang daseu, kacheu de lei,’ ze salia lau,” ze acheu bei lei. Chigum ze Tingwang gu sam seu lu ze, Tingwang ne rangbe luigum ze penui ki lam’mbe wang dai kam di de lei.

²⁵Chidadege Jeroboambe Ephraim kedei ge Shekem namdi tewchu gai lu, chige pa bam di de lei; zai chigene pat dai lu, Penuel namdi hang tewchu kadai de lei.

²⁶Zai Jeroboambe pe lung ge acheu ’nning ze, “Chuna â heguangram ze Dabid ki ge tat kai dai du da;

²⁷aime bau ne hang ze Jerusalem ge Tingwang ki ge herâtew ze bam dizai â, aime bau lung ramme ze Judaram ge penui wangpeu heguang Rehoboambe lam’mbe ’nreiwang dai kam di ze achu tewchat kai nan ze Judaram heguang Rehoboambe lam’mbe penui zua dai kam du de lei,” kacheu de lei.

²⁸Chigum ze pa ’nningdesi gai lu dege, gechâk ne getumpoine kena luî hang pa chiam de lei, zai pa ne baudime je, “Jerusalem ’mbe ningnui hang lei’ngga gai ’ndi de lei. Hei, Israelme gau, Ijipram gene ningnui je nguapatkaibe ningnui gu hera ramme je pie gai ni lau,” kacheu lei.

²⁹Dadege chi kat ze pa ne Bethel ge kai zai kat ze Dan ge kai de lei.

³⁰Aize hemui tâ tewbe hang chang di de lei, ziemmena ramme Bethel ge zai Dan riâ changbe tatchangdibe ziegeneu.

³¹Pa ne peloaram ge kellumrabeki hang tew gai lu ze, Lebime zat makme, baudime ruagene tingkume hang sum gai de lei.

³²Judaram ge kahengîbe zat gumbe padesatbe kêu gu hezie kereu ze mengeu mai ge Jeroboambe ne hengîrabe mai hang teleu gai de lei, zai pa ne herâtewbe-kaira ge herâtew gai de lei; chigum ze Bethel ge pa ne kateleube getumpoine kena dage herâtew gai de lei. Zai peloaram ge herâtewbeki ge tingkume pa ne sumgailume je Bethel ge kai de lei.

³³Hekêu padesatbe gu hezie kereu ze mengeu mai, pe lung ge gesûchube tingnaimikpui ge Bethel ge herâtewbe-kaira pa ne tewgailube ge hang di de lei; zai Israelme hengî ra chipau mai ze pa ne tew’nchi gai lu dege herâtewbe-kaira ge mâ-perîmyibe ’ntau gai ra pa hang di de lei.