Read Zeme Naga 1 HEGUANGME 13 Bible Online

1 HEGUANGME 13 - Zeme Naga bible

1 HEGUANGME 13

¹Pie le lau, Tingwang gu sam ziegene Judaram gene Hera gu ziemmena Bethel ge pat te lei, Jeroboambe â, herâtewbe-kaira hiage mâ-perîmyibe ’ntau ra sapbam de lei.

²Zai chipaupeu ze herâtewbe-kaira peireige Hera gu sam gene acheu sa’nsia ze ’nrung ze, “Hei, herâtewbe-kaira gau, herâtewbe-kaira gau, Tingwang ne acheu ze sa ze, ‘Pie le lau, Dabidbe ki hangge ’mpeumi napoine pe ji, Josiabe lungkeu gu lei; zai peloa ge herâtewbe bâm ramme ge tingku chang ze ningnui hangge mâ-perîmyibe ’ntaugaime je pa ne ningnui peireige penui je herâtew ze rû gai gu lei, zai ningnui peireige pa ne ziemmena ra ramme rû gai bu lei,’ kacheu de lei,” ze kacheu de lei.

³Zai chipau mai gîm ze pa ne chî ra ka’nchetbe kat pei gai ze acheu sa ze, “Tingwang ne rang de lei be chî ra aize ka’nchetbe de lei, ‘Pie le lau, herâtewbe-kaira tewpâng ’ndu lei, zai chige timbun bambe hela ge kuipat kai bu lei,’ acheu zeu,” ze kacheu de lei.

⁴Bethel ge herâtewbe-kaira peireige chi Hera gu ziemmena zene ’nrung ze saka’nsiabe sam heguang seu dadege, herâtewbe-kaira gene Jeroboambe pe ba hela getuapat lu, “Pechu nîm le lau,” kacheu de lei. Zai chipaupeu peireige pe ba getuapatbe ba ze ’ngku gai di ze pe ba gutdaichi ta di de lei.

⁵Tingwang sam ziegene chi Hera gu ziemmena zene chî ra ka’nchetbe peibeibe luigum ze herâtewbe-kaira du pâng di, zai herâtewbe-kaira gene hela ’mbe timbun ramme rarip bam di de lei.

⁶Zai heguang ne chi Hera gu ziemmena je, “A ba yiwang dai ra nang ne Tingwang ning Rapeu je a hangge kiâm gai ze kellum gai lau,” kacheu de lei. Chidadege chi Hera gu ziemmena ne Tingwang dage kellum gai de lei; dadege â heguang ba ze yi dai di ze besua’ngka gum ze peluîrun bam di de lei.

⁷Dadege heguang ne chi Hera gu ziemmena je, “A ki lam’mbe kei lei, zai sau’ntak kai le lau, I ningchu getoabe I pei gu lei,” ze acheu bei de lei.

⁸Dadege chi Hera gu ziemmena zene heguang je, “Ning ki pa’mpi achu pei bei sedu ningchu I nguagut ra mak lei, zai aipau bâm gene I teu ze sak ra mak lei;

⁹Tingwang gu sam ne ranggaibe ge, ‘Nang tak teu mak ra, zai hedui sak mak ra, zai nang wangbe ’mpuîki gene tat dai mak ra lei,’ ze acheu samdie gai daseu,” ze acheu bei de lei.

¹⁰Chipau luigum ze pa Bethel ’mbe wangbe luî helattat dai mak ze, ’mpuîki kêdabe gene pa tat ti de lei.

¹¹Bethel ge kemeu’mpeu gechipau hangkat bam de lei. Zai chipau mai Bethel ge chi Hera gu ziemmena ne tâtewbe rasam pelane pe name bau ne wang lu pechu salia bei lei; chipaupeu ne heguang Jeroboambe je saliabe sam ramme du penui ne penui peu je ranglia gai de lei.

¹²Zai penui peu ne penui je, “’Ndaibe ’mpuî ’mbe pa tat kai di lau,” ze kacheu de lei. Dadege Judaram gene chi Hera gu ziemmena wangbepeu tatkaidibe ’mpuî ze pe name bau ne pechu ngualia bei de lei.

¹³Zai pa ne pe name je, “Hekunmerângne ching gene achu pungtat kai lau,” kacheu de lei. Chipau luigum ze penui ne pechu hekunmerângne ching ge chua gai bei ze pa hang di de lei.

¹⁴Zai chi Hera gu ziemmenapeu chai-chai pa ’nsatat dege ’mpubang kangge pa ’ntau laleu de lei; dadege pa ne pe chu, “Nang ze Hera gu ziemmena Judaram gene patpeu de mei?” ze kacheu de lei. Zai pa ne, “I de lei,” kacheu de lei.

¹⁵Chidadege pa ne pechu, “A ki lam tak teu ra tat ra kei lei,” kacheu de lei.

¹⁶Zai pa ne, “I ning tailam tat ra mak ku de lei, zai ning ki ge anai gut ra mak ku de lei; zai aipau bâm ge du I ning dage nguateu zai nguasak ra mak te lei;

¹⁷Tingwang gu sam gene, ‘Chige nang tak du teu ra mak, zai hedui du sak ra mak lei, zai nang wangbe ’mpuî luî ze nang tat dai ra mak lei,’ ze achu ranggaibe ziegeneu,” ze kacheu de lei.

¹⁸Dadege pa ne pechu, “I du nang gum kemeu’mpeu de lei, zai tinggîm kenie’mpeu ne, ‘Pa tak teu zai dui sak kai ra ning ki lam pechu nguawang dai ne lau,’ ze achu acheu rang gai ze Tingwang gu sam gene salia de lei,” ze kacheu de lei. Kane pa pechu karasa dam gai lei.

¹⁹Chipau luigum ze pa pe tailam helatwang dai di de lei, zai pe ki gene tak teu zai dui sak te lei.

²⁰Zai penai tak teu ra tak teube kaira ge ’ntau gai lage, kemeu gechipau, pechu nguawangkadaipeu dage Tingwang gu sam wangkeu de lei;

²¹dadege chi Hera gu ziemmena Judaram gene patpeu peireige pa ’nrung ze, “Tingwang ne acheu ze rang lei, ‘Nang ne Tingwang sam pheu mak, zai Tingwang ning Rapeu gu hingde ning peireige kaibeibe nang tei’mmi mak,

²²kane wang dai ze, ningchu, “Tak teu se lau, hedui sak se lau,” ze ranggaibe bâm gene nang teu sak bambeibe ziegene ning pum ze ning paume raw ge kai ra mak lei,’ acheu zeu” ze kacheu de lei.

²³Zai pa teu-sak kai lu dege â, pechu nguawanggaikadaipeu kemeu gechipau ne hekunmerângne ching ge pechu chua gai de lei.

²⁴Zai pa tatbe luagene ’mpuîki gene pechu duilui ne hedau lu tewchat ’ndi de lei. Zai pe pum â ’mpuîki ge tuâ gai bei de lei, zai hekunmerângne â pe taige sapbam de lei, zai duilui du kechaipum hiage sapbam de lei.

²⁵Zai pie le lau, ’mpuîki ge pe pum tuâgaibe benai chipau hiage duilui sapbambe ze tatka’ngguakme ngau de lei. Dadege penui ne tat ze kemeu gechipau bambe namdi ge pauliâ de lei.

²⁶Zai pechu nguawanggaikadaipeu kemeu gechipau ’mpuî ki gene chipau rasam seuchang lu dege, “Chize â Hera gu ziemmena Tingwang kuâ pheumakpeu de lei, chipauziegene Tingwang ne pechu saliabe sam luigum ze pechu tew’nsia ze tewchatkaibe duilui je pe dage lang gai be kau de lei,” kacheu de lei.

²⁷Zai pe name je, “Hekunmerângne kedâ gai lau,” kacheu lei. Dadege penui ne kedâ gai bei de lei.

²⁸Zai pa tat ti ze ’mpuîki ge pe pum tuâgaibeibe zai hekunmerângne benai duilui chipau hiage saplaleube pa ngau de lei. Duilui ne chi kechaipum ze teu mak, zai hekunmerângne je deî de deî’nsia mak tai de lei.

²⁹Zai kemeu gechipau ne chi Hera gu ziemmena pum ze lu lu hekunmerângne ching ge ’njei gai de lei, zai pe peireige desui gai ra, zai pe pum bai gai ra hang namdi ’mbe teiwang kadai de lei.

³⁰Zai pa ne pe gu heraw ge pechu bai gai de lei; zai pe peireige penui desui ze, “Hei, a kinapeu gau!” acheu ze bam de lei.

³¹Zai pa pechu kedei ge bai gai lu dege, pe name je, “I chai dezai chi Hera gu ziemmena je baigaibe heraw ge achu bai gai lau; a ra ramme pe ra taige kai gai lau.

³²Tingwang sam ziegene Bethel ge herâtewbe-kaira peireige benai Samaria namdi ramme gu peloa ramme ge herâtewbeki ramme bambe peireige pa ne sa’nsia ze ’nrunggai’ndibe ze wangchang sing gu lei,” ze kacheu de lei.

³³Aipau chângge du Jeroboambe pa tâ siabe tewbe gene ’nreiwang mak, kane ziemmena baudime ruagene herâtewbe kehube bâm ramme ge tingkume hang pa ne teleu ze bam lei; mi-mige kenei-neime je â, herâtewbe kehube-kaira ramme gu tingkume hangge pa ne tew’nchi ze bam de lei.

³⁴Aipau tâtewbe ze Jeroboam ki hangge kedeirei gene lupat ze dei’nsiakam’nderabe hemui hangge chang gai di de lei.