Read Zeme Naga 1 HEGUANGME 16 Bible Online

1 HEGUANGME 16 - Zeme Naga bible

1 HEGUANGME 16

¹Tingwang gu sam Jehube Hananibe na dagene Baashabe hangge wangkeu ze,

²“Kedeiniamoîne gene I ne ningchu teichu gai bei de lei, zai a gu Israelme peireige ka’ngguapeu chang ra I ne ningchu tew gai de lei, zai nang ne Jeroboambe tatbe ’mpuî tat ze a gu Israelme je hemui ge nguagaibe gene nang ne a rata tew gai bei de lei,

³pie le lau, Baashabe benai pe kiduîme je I ne tuâpat’nchichiak kai gu lei, zai Nebatbe na Jeroboam ki peireige tew gum ze I ne ning ki peireige du tew gai gu lei.

⁴Namdi lungge mige Baashabe kiduî’mpeu chaidime je hetei ramme ne teu gu lei; zai mige pe kiduî’mpeu hênam gene chaibe kau je â ’nruine liamruabe kau ne teu gu lei,” kacheu de lei.

⁵Baashabe gu tâtewbe rasam kêdadabe ramme benai pa ne tewgaibe ramme, zai pa pe ranchibe rasam Israelme heguangme rasam rawgaibe leisikuak ge raw gai mak ti lau?

⁶Zai Baashabe chai di de lei, zai pechu Tirza ge bai gai bei de lei; zai pe na Elabe ne pe kelei ge heguangsap te lei.

⁷Chipau peireige du Tingwang gu sam kemeu’mpeu Jehube Hananibe na dagene Baashabe benai pe kiduîme hangge wangkeu de lei. Baashabe ne Jeroboambe kiduîme gum ze Tingwang mikngau ge kesiabe tâ leine tew ze, pe tatew gene Tingwang rata leine tew zai pa ne Jeroboambe kiduîme je tew’nsiagai’ndibe ziegeneu.

⁸Judaram gu heguang Asabe kaheguangbe tingkum ’ngkai ze seruk chang dadege, Baashabe na Elabe ne Tirza ge Israelme peireige heguangchu de lei, zai pa kum na heguangsap kai lei.

⁹Kane pe gu herei-timriang pa’mpi peireige besuitewpeu, pe guâ ka’ngguapeu, Zimribe ne pe peireige ’nggi ra kahedei de lei. Pa Tirza ge bambe ting Tirza ge heguang ki kereîpeu, Arzabe ki ge pe runne sakmeneu lu bambe luage,

¹⁰Judaram heguang Asabe kaheguangbe tingkum ’ngkai ze kena kum ge Zimribe ne gut lu, pechu tewkau gai lu, tewchat ’ndi de lei, zai pa kelei ge pa ne heguangsap te lei.

¹¹Pa heguangchu gai ze pe gu heguang-bâm ge ’ntau gap kai dadege, Baashabe kibaume leine je pa ne tewchat ’ndi de lei; zai pa ne pe ki peuname benai pe kangme hangkat je du ringpat ra pei mak tai de lei.

¹²Kemeu’mpeu Jehube ne Tingwang gu sam Baashabe peireige sagai’ndibe luigum ze Zimribe ne Baashabe kiduîme leine je tew’ngga kam ’ndi de lei,

¹³Baashabe benai pe na Elabe ne hemui gai ze, Israelme je hemui tâ tewrabe ’mpuî ge ngua gai, zai penui gu heraluîtewbe ramme zene Tingwang Israelme Rapeu lumpum tewgai’ndibe ziegeneu.

¹⁴Elabe gu tâtewbe rasam kêdadabe ramme benai pa tewgaibe rasam ramme Israelram gu heguangme rasam rawgaibe leisikuak ge raw gai mak ti lau?

¹⁵Judaram gu heguang Asabe ne heguangsapbe tingkum ’ngkai ze sena kum ge Zimribe ne Tirza ge hezie sena heguangsap kai de lei. Israelme bau ne Philistinme ram Gibbethon je gua ra penui wang’ndui gai de lei.

¹⁶Zai hetiamki ge bamme bau ne, “Zimribe ne kesia’mpung ze heguang je tewchat kai ’nde lei,” kacheube sam seu di de lei; chipauziegene penui wang’nduigaibe bâm gene hereikang saibe Omribe je Israelme ruage heguang hang chipau mai ge sum gai de lei.

¹⁷Chigum ze Omribe ne Israelme je ngua lu, Gibbethon gene hang di de lei, zai penui ne Tirza keloa ze tuagua de lei.

¹⁸Zai namdi lu’ndibe Zimribe ngau lu dadege, heguang ki gu heguang kerie ’mbe tat lu, pa bambe heguang ki ge hemitua gai lu pa du chai di de lei.

¹⁹Pa Tingwang mikngau ge kesiabe tew ze Jeroboambe ’mpuî ge tatbe zai pa ne Israelme je hemui ge nguagaibeibe ziegeneu.

²⁰Zimribe gu tâtewbe rasam kêdabe ramme benai pa ne herei’nggi ra ka’mpungbe rasam ramme Israelram gu heguangme rasam rawgaibe leisikuak ge raw gai mak ti lau?

²¹Chidadege Israelme bau na sapat ti de lei; pebau pa’mpi, Ginathbe na Tibnibe je heguang hang teichu gai ra penui ne pe chai suitat ti de lei, zai pebau pa’mpi kat zene Omribe chai suitat ti de lei.

²²Kane Omribe chaisuime bau ne Ginathbe na Tibnibe chaisuime bau je duî ’ndi de lei; zai Tibnibe chai di de lei, dadege Omribe ne heguangsap te lei.

²³Judaram heguang Asabe kaheguangbe himreu kat kum chang dege Omribe ne Israelme ruage heguangchu de lei, zai kum kereu ze kena pa samram ze bam de lei; Tirza ge pa ne kum seruk heguang gai lei.

²⁴Pa ne Shemerbe dagene Samariaram kedeiloa ze gepûtgeî chang seruk ne lui de lei; zai kedeiloa riegua zun gai de lei, zai namdi pa ne tewgaibe ji hangge kedeiloa ’mpaupeu Shemerbe ji gene lu lu ze Samaria ze ’ntak kai de lei.

²⁵Tingwang mikngau ge Omribe ne tâ-kesiabe tew gai de lei, zai pa suadu tewraime suane â, pa tâsiabe tew’ngkie gai de lei.

²⁶Pa ne Nebatbe na Jeroboambe ’mpuî ge tat lu Israelme je peize hemui tâ tew ra tew gai ze penui gu heraluîtewbe ramme gene Tingwang Israelme Rapeu rata tew bei dadegeu.

²⁷Omribe gu tâtewbe rasam kêdabe ramme benai peranchi teiliabe rasam ramme ze Israelme heguangme rasam rawgaibe leisikuak ge raw gai mak ti lau?

²⁸Zai Omribe chai di de lei, zai Samaria ge pechu bai gai de lei; zai pe na Ahabbe ne pe kelei ge kaheguang de lei.

²⁹Judaram gu heguang Asabe ne kaheguangbe tingkum himreu ze desat chang dege, Omribe na Ahabbe ne Israelme peireige heguangchu de lei, zai Omribe na Ahabbe ne Samaria ge Israelme peireige kum ’ngkai ze kena kaheguang de lei.

³⁰Zai Omribe na Ahabbe ne Tingwang mikngau ge tingtie keraime suane tâsiabe tew’ngkie gai ’ndi de lei.

³¹Nebatbe na Jeroboambe gu hemui ge pa ne gutkaibe â mâ-kecheibe hangge ’nning gai lu ze Sidon’mpeu heguang Ethbaalbe na heleu’mpui Jezebelle je pe nâu hang lu lu tat ze Baal je ’nggua ze pechu kellum di de lei.

³²Samaria ge pa ne Baal je kellumrabeki hang tew gai de lei, zai chipau ki ge Baal hang herâtewbe-kaira tei’nsap kai bei de lei.

³³Zai Ahabbe ne Asherah luî hang tew gai bei de lei. Pa sua tewraime Israelme ram gu heguang ramme suane â pa ne Tingwang Israelme Rapeu rata tew’ngkie gai lei.

³⁴Pa bambe ting ge Bethel ge bambepeu Heilbe ne Jeriko namdi tewchu gai kadai lei. Nunbe na Joshuabe dagene Tingwang gu sam ranggai’ndibe luigum ze, pe na meraipeu Abirambe je tewchat kai raî lu, heki tewdîmchu de lei, zai heki keriekemui tewdîmchurabe hangge pe na henalangpeu Segubbe je tewchat kai kadai de lei.