Read Zeme Naga 1 HEGUANGME 17 Bible Online

1 HEGUANGME 17 - Zeme Naga bible

1 HEGUANGME 17

¹Gileadram ge Tishbe’mpeu Elijabe ne Ahabbe je, “I pe suage sappeu, Tingwang Israelme Rapeu ringbambe ziegene I ne rang gai lei mak tizai â, kum na kum chum kezik du zai ting du ruikeu ra mak lei,” kacheu de lei.

²Chidadege Elijabe dage Tingwang gu sam wangkeu ze,

³“Aigene pat lu naimikpat ’mbia tat kai ze Jordan gene tingbia ’mbia ge Kerith geuki ’nggeutenane ge ’mbai de lau.

⁴’Nggeuterak gene nang hedui sak ra lei, zai I ne ’nggekpui je ningchu hedui tela ra samdie gai ’nde lei,” kacheu de lei.

⁵Chigum pa ne Tingwang gu sam luigum ze tat ze tew de lei; Jordan gene naimikpat ’mbia Kerith ge ’nggeuterak ge pa tat ze bam de lei.

⁶Zai hechua benai hegî ge ’nggekpui ne pe hangge tingku benai hemei teiwang bei de lei; zai ’nggeuterak gene pa hedui sak te lei.

⁷Zai bechâng mâtiege mak ze heram ge tingruikeutadibe ziegene ’nggeuterak ze changku gai di de lei.

⁸Chidadege Tingwang gu sam pe dage wangkeu ze,

⁹“Chu le lau, Sidonram hiage bambe Zarephath namdi ’mbe tat lu chige bam de lau, pie le lau, nang hetak pei ra I ne ’mpuimi kemîpui hangkat je lang gai ’nde lei,” kacheu de lei.

¹⁰Chidadege â pa chu lu, Zarephath ’mbe tat ti de lei; zai pa namdi kemui wangchang dege, pie le lau, kemîpui hangkat heching keî ramme keriaprua laleu de lei; dadege pa ne pechu kû lu, pechu, “I sak kai ra mâkuak gene hedui kecheîne teiwang lau,” acheu bei lei.

¹¹Dadege pa chize teiwang ra tatpat ti dadege, pechu rang gai dai ze, “Ning ba gene tingku kecheîne ge du teiwang lau,” kacheu de lei.

¹²Dadege pa ne pechu, “Tingwang ning Rapeu ji gene I mâ-peling sa lei, I ne tingku mâ de teleupat kai mak lei, chuna a dage bambe â dekuî bakui kat zai hegamli ge olib taudui kecheîne runne lei; chuna I heching keî ramme kagepie lei, chidezai kilûng ge teigut lu, a na benai a hangge helang gai lu ze chinane ze teu gai ’nzâu lu chai de ra hangge zeu,” kacheu de lei.

¹³Dadege Elijabe ne pechu, “Hing se lau; nang ne sabe gum ze tat ze tew zu lau; kane chiramme gene ’nruibûm tingku lang gai lu a tailam teiwang gai raî lu dezaine ning na benai ning hang â teleu le lau.

¹⁴Tingwang Israelme Rapeu ne acheu sa de lei, ‘Tingwang ne kedei ge tingruikeu ra langgaibe mai chang mak tâne â mâ-bung ge dekuî bambe tuâ mak ze kaikua gu, zai hegamli ge olib taudui kaibe bam bam gu lei,’ zeu,” ze kacheu de lei.

¹⁵Zai Elijabe ne saliabeibe luigum ze pa tat lu tew de lei; zai pa benai pe na zai pe kibaume betingtie sang ze teusûnhang de lei.

¹⁶Elijabe dagene Tingwang ne sam ranggaibe luigum ze, mâ-bung ge dekuî bambe ga sua mak, zai hegamli ge olib taudui kaibe ze ga sua mak bam de lei.

¹⁷Aipau châng dege kilûng ge bambepui kemîpui na ’mpeumi napoine ’nrâ di de lei; zai pa ka’nrâbe ran-desang di ze pe chui ga gai di de lei.

¹⁸Zai pa ne Elijabe je, “Hei, Hera gu ziemmena gau, achu nang ne ’ndaikau tew lau? Nang ne a dage wang lu, (Hera ne) a gu hemui ’ngngaî dai ta ra tew gai bei, a na ’mpeumi napoine chai ra tewgaibeibe nung zeu!” kacheu de lei.

¹⁹Dadege pa ne pechu, “Ning na ’mpeumi napoine achu pei lau,” acheu bei de lei. Zai pa puabambe gene (pe ga gene) pechu lu lu, pa rêube heki ’nreibe sîam ’mbe puahang ze, pe jeî ge ’njei gai bei de lei.

²⁰Dadege Tingwang je pa ku ze, “Hei, Tingwang a Rapeu gau, I rêubeki kemîpui peireige pe na je tewchetkaibeibe ziegene mi duânggabe wang ra nang ne tew gai bei mei?” kacheu de lei.

²¹Chidadege napoine peireige pa luachum jeikau gai lu, Tingwang je ku de lei, “Hei, Tingwang, a Rapeu gau, peize ai napoine je ring wang dai lau,” acheu zeu.

²²Zai Tingwang ne Elijabe sam ’ngking gai de lei; chidadege a napoine ringwang dai ze, ’nrakhak bam di de lei.

²³Zai napoine je Elijabe ne pua lu, ’nreibe sîam gene pe pui tailam teikeu pei gai bei de lei.

²⁴Dadege â ’mpuimi ne Elijabe je, “Nang ze Hera gu ziemmena lei, kacheube ze chuna â I chî de lei, zai Tingwang gu sam ning mui gene patbe ze â peling de lei,” kacheu de lei.