Read Zeme Naga 1 HEGUANGME 2 Bible Online

1 HEGUANGME 2 - Zeme Naga bible

1 HEGUANGME 2

¹Dabidbe pa chairabe ting nawang dege, pe na Solomonbe je sam rang gai ze,

²“I kedeikum wangzi gu de lei. Ning ranchi ze ’mpeumi ’nsîng-sîng bam lau,

³ning Rapeu Tingwang ne ranggaibe leine, pe gu hingde rawgaibe ramme, pe gu hingde ramme, zai pe gu hingde tewgaibe ramme tei’mmi ze pe gu ’mpuî ramme ge tat lau, Mosabe gu hingde ge raw gai gum nang tâtewbe leine ge benai nang tatmie-tatwangbe leine ge lung’ntuachu ra hangge zeu;

⁴a peireige pa Tingwang ne sam sagaibe, ‘Ning name ne penui ’mpuî ge ’ntîng ze bamchi zai penui lung penui keringbe lungsang keneibe gene tat bam dizai â, Israelme gu heguang-bamrâ ge ziemmena ’ntaurabe kau hang ga bam ra ningchu pei ra mak lei,’ kacheube ze pa ne tew’ntip kai be leu gu lei.

⁵“Chipau peireige du Zeruiale na Joabbe ne a peireige ’ndaikau tew gai bei mei, tingtie kahereibe gene hejai tewpatkaibe kûm desieyidibe ting gene ruî dai ze pa ne gîchatkai’ndime Israelme gu hereikang pemuitewpeu kena, Nerbe na Abnerbe benai Jetherbe na Amasabe je ’ndaigum pa ne tâtew mei, zai a kiakâk kakkaibe ramme ge benai a peichûp ge ’ndaigum pa ne ziemmena katelingme jai kai bei mei be tak ze nang du chî lei.

⁶Chidaze nang kaningchingbe luî gene tâtewtat lau, kane pe peîpube luî gene Kechaimeram peize yi ze wangkeu se lau.

⁷Kane Gilead’mpeu Barzillaibe name je â ’nggiachi bam lau, zai ning gu mâ-teube ra gene mâ-teume ruage peize penui je du bam lau; ning kinapeu Absalombe dagene I hing ze pakpatbe mai ge penui ne achu aigum ze ’nggia ze teleu zun bei de lei.

⁸Zai I Mahanaim ’mbe tatbe mai ge achu chianggaipeu Bahurim ge Benjamin’mpeu Gerabe na Shime-ibe du ning dage bam de lei. Kane pa Jordan gene achu hedau gai ra, wangkeube luage, ‘I ningchu hiazutkie ne bichat kai ra mak lei,’ ze Tingwang ji gene pechu I deseu gai de lei.

⁹Chidaze chuna â nang kaningchingbe kau daze pemâugabe kau hangge pechu tei gai se lau; pe peireige ’ndaikau tak tew gai ra yi ra mei be nang chî gu lei, hejai pung lu pe peî pû ze nang ne Kechaimeram ’mbe nguakeu gai ra lei,” kacheu de lei.

¹⁰Pe peume dage Dabidbe jeikeu gai di de lei, zai pechu Dabidbe gu namdi ge bai gai bei de lei.

¹¹Dabidbe ne Israelme ruage heguang sapkaibe tingkum hedai lei; Hebron ge kum sena, zai Jerusalem ge kum himreu ze kechum pa heguang gai lei.

¹²Dadege Solomonbe ne pe peu Dabidbe gu heguang-bamrak ge ’ntau gai de lei; zai pe gu heguangram tew’ntip ze tei’nsapchu gai de lei.

¹³Chidadege Haggithbe na Adonijabe Solomonbe pui Bathshebale tailam zuamie de lei. Dadege Bathshebale ne, “Nang keyibe lam gene wang mei?” ze kacheu de lei. Pa ne, “Eu lei,” kacheu de lei.

¹⁴Zai Adonijabe ne, “I ningchu mâ salia ra lamui lei,” ze kacheu de lei, “Sa du lau,” ze Bathshebale ne kacheu de lei.

¹⁵Dadege pa ne, “Chi heguangram ze a gu lei be nang chî lei, zai Israelme ’nteumena ne I ne samram ra heguî-desang ze la kam lei, acheuleusedu kedetda ze a kinapeu hang chang di de lei, Tingwang dagene pe hang chang ra bam di dadegeu.

¹⁶Zai chuna â ningchu I mâ kat kiâm gai ra la lei, nang daulak se lau,” ze pa ne kacheu de lei. Bathshebale ne pe suage, “Sa du lau,” acheu bei lei.

¹⁷Zai pa ne, “Heguang Solomonbe je kiâm gai lau—Shunam’mpui Abisakle je a nâu hang pa ne peilak lei ze ningchu acheu ra mak lei,” ze kacheu de lei.

¹⁸Bathshebale ne, “Yisang de lei; heguang dage I ne ning hang ’mpau ra de lei,” acheu bei de lei.

¹⁹Adonijabe kelei ge pechu ’mpau ra, Bathshebale heguang Solomonbe tailam tat te lei, zai heguang ne pechu hedau ra hangge zuachu de lei, zai pe suage keikeu gai de lei, chipau chângge pe gu heguang-bamrak ge ’ntau gai di de lei, zai pe dage heguangpeu pui ’ntau ra bâm teiwang gai de lei, zai chige heguangpeu pui ne pa hezat’mbia ge ka’ntau de lei.

²⁰Dadege pa ne, “I ningchu mâ-sam kat ’nneugaineibe la lei; nang achu daulak lei acheu se lau,” acheu bei de lei. Dadege heguang ne pechu, “A pui gau, nang neibe rang gai zu lau, I ningchu mâ de daulak lei acheu ra mak lei,” acheu bei de lei.

²¹Penui ne, “Ning kinapeu Adonijabe nâu hangge Shunam’mpui Abisakle je pei gai be lau,” ze salia de lei.

²²Heguang Solomonbe ne pe pui kuâ kak ze, “’Ndaikau tâu hang ne nang Shunam’mpui Abisakle je Adonijabe nâu hang kie lau? Pa â a sipeu da, zai pe lam’mbia ’mbe tingkupeu Abiatharbe benai Zeruiale na Joabbe du la daze heguangram ze du pe hang kie du lau,” acheu bei de lei.

²³Chidadege heguang Solomonbe Tingwang ji gene sam deseu ze, “Aipau sam zene Adonijabe chai mak tizai â, Hera ne peize achu aigum tew gai lau, chipau peirei du peize tew gai be lau!

²⁴Chidaze chuna â Tingwang achu tei’nsapkaipeu, a peu Dabidbe gu heguang-bamrak ge achu kaigaipeu, zai pa ne samhatkailube luigum ze a ki hang tewgaipeu ringbambe luigum ze nemai ge Adonijabe je tewchat kai ’ndu de lei,” kacheu de lei.

²⁵Chidadege heguang Solomonbe ne Jehoiadabe na Benaiabe je lang gai bei ze pa ne pechu tewkau gai bei ze pa chai di de lei.

²⁶Dadege heguang Solomonbe ne tingkupeu Abiatharbe je, “Nang â ning kidei Anathoth ’mbe tatchu lau; nang â chai de ra bui di daseu. Kane nang ne a peu Dabidbe suage heguang Hera gu hingdebung puabeibe ziegene zai a peu je tewkahereube ge nang ne ngualiegaihabe ziegene chuna I ningchu tewchat kai ra mak lei,” acheu bei de lei.

²⁷Shilo ge Elibe ki peireige sagai’ndibe sam acheu tewpui gai ze, Tingwang hangge Abiatharbe pa tingku chang ze bambe gene Solomonbe ne pechu lutua ’ndi de lei.

²⁸Joabbe aipau rasam chîwangchang dadege, pa Absalombe je gu mak leusede, Adonijabe je â pa gu dadege, Tingwang gu hetiamki ’mbe paktat lu, herâtewbe-kaira gu mâkie ze bia de lei.

²⁹Joabbe â Tingwang gu hetiamki ’mbe paktat ti de lei, zai pie le lau, pa â herâtewbe-kaira hiage la de lei be sam heguang Solomonbe je rang gai bei dadege, Solomonbe ne Jehoiadabe na Benaiabe je lang gai lu ze tat ze pechu, “Tewkau ne lau,” acheu bei de lei.

³⁰Chidadege Tingwang gu hetiamki ’mbe Benaiabe wang lu pechu, “Pat kelua ra heguang ne samdie gai lei,” ze acheu bei de lei, kane pa, “Pat ra mak lei, aigene I chai gu lei,” kacheu de lei. Benaiabe heguang dage wang dai ze, Joabbe ne sabe sam ze rang gai bei de lei.

³¹Heguang ne pechu kak ze, “Pa ne rangbe luigum ze pechu tewkau lu bai ne lau; zai Joabbe ne pedeu mâ de ga ze hejai tewpatbe mâu ze a dagene benai a peu ki gene aigum ze tei’mbia ne lau;

³²Pa ne a peu Dabidbe chimakbe gene pa sua â, ziemmena katelingbe kau, zai ziemmena keyibe kau hangna, Nerbe na Abnerbe, Israelme gu hereikangme muiteipeu benai Jetherbe na Amasabe Judame gu hereikang muiteipeu je ’nggi ze hiazutkie ne bichatkai’ndibe ziegene Tingwang ne pe peireige pe mâu ze peiruî dai gu lei.

³³Chidezai betingbeta Joabbe benai pe chaname peî ge penai jai ze wang dai gu lei, kane Dabidbe benai pe chaname zai pe kilûngkang ge benai pe gu heguang-bamrak ge â lungkatemibe Tingwang dagene betingbeta ngau bam du de lei,” ze heguang ne kak te lei.

³⁴Chidadege Jehoiadabe na Benaiabe ne hang lu pechu tewkau gai lu tewchat ’ndi de lei, zai pechu â hênamkang pe ki gîmsing ge bai gai bei de lei.

³⁵Heguang ne hereikangme peireige besuitew ra Joabbe kelei ge Jehoiadabe na Benaiabe je kai, zai Abiatharbe kelei ge tingku chang ra Zadokbe je kai bei de lei.

³⁶Dadege heguang ne lang gai ze Shime-ibe je kûwang gai de lei, zai pe chu, “Nang Jerusalem ge ning ki tew le lau, zai chige lung lau, zai chigene kêda ’mbe tat kai se lau.

³⁷Nang tat ze Kidron geuki kapatbe mai ge nang chai gu lei be chîsing le lau; ning jai ze ning peireige bam gu lei,” kacheu de lei.

³⁸Dadege heguang je Shime-ibe ne, “Nang sabe ze yi de lei; a pau heguang ne sabe luigum ze, ning gu tâka’ngguapeu ne tew gu lei,” acheu bei de lei. Chidadege Shime-ibe Jerusalem ge beting misongga bam di de lei.

³⁹Kane kum chum tud kai dadege Shime-ibe gu kebang hangna, Gath heguang, Maakabe na Akisbe tailam paktat ti de lei. Zai “Pie le lau, ning gu kebang hangna ze â Gath ge la de lei,” be Shime-ibe je pau gai bei dadege â

⁴⁰Shime-ibe chu lu pe gu kebang hangna je peu ra hang hekunmerângne ching ge chua lu Gath ge Akisbe tailam tat ti de lei; Shime-ibe tat lu Gath gene pe gu kebang hangna je nguawang de lei.

⁴¹Zai Shime-ibe Jerusalem gene Gath ’mbe tat lu wang dai de lei be rasam Solomonbe je pau gai bei dadege,

⁴²heguang ne lang gai bei ze Shime-ibe je kûwang de lei, zai pa ne pechu, “Tingwang ji gene I ningchu deseu gai ze, ningchu I mâ-ranglia zun gai ze, ‘Nang zuapat ze kêdabe bâm ’mbe tatbe mai ge nang chai gu de lei be chî sing le lau,’ ze acheu mak mei? Zai nang ne, ‘Nang sabe yi de lei; I pheu gai de lei,’ ze achu kacheu de zeî lau.

⁴³Acheuzaine nang ’ndaitew Tingwang dagene ning sam salube benai samde I ningchu peigaibe nang tew mak lau?” ze acheu bei de lei.

⁴⁴Heguang ne Shime-ibe je aize du rang gai lei, “A peu Dabidbe peireige tâ-kesiabe nang tewgaibe leine ning lung gene chî lamui lei; chidaze Tingwang ne nang kesiabe ning peireige wang dai ra tew gai gu lei.

⁴⁵Kane heguang Solomonbe je â ’nnam gai bu lei, zai Tingwang masua gene Dabidbe gu heguang-bamrak â betingbeta bam ra tew’ntip kai bu lei,” ze kacheu de lei.

⁴⁶Chidadege heguang ne Jehoiadabe na Benaiabe je samdie gai bei de lei; zai pa ne tat lu pechu tewkau gai bei ze pa chai di de lei. Chidadege Solomonbe ba ge heguangram ze tew’ntip kai bei de lei.