Read Zeme Naga 1 HEGUANGME 20 Bible Online

1 HEGUANGME 20 - Zeme Naga bible

1 HEGUANGME 20

¹Siriaram heguang Ben-hadadbe ne pe gu hereikangme leine je gekumwang’ndui gai de lei; pe dage heguangme ziemmena hanghimreu ze kena zai hekun ramme benai timriang ramme bam lei; zai pa ne hang ze Samariaram tuaguâ lu, chize ka’nggi de lei.

²Zai pa ne hepâupaume je namdi ’mbe Israelram gu heguang Ahabbe dage lang gai ze, pechu, “Acheu ze Ben-hadadbe ne sa de lei:

³‘Ning gu gepût benai gechâk ze a gu de lei; ning nâu heleuyime benai ning na ramme ze du a gu de lei,’ zeu,” ze acheu bei lei.

⁴Dadege Israelram gu heguang ne kak ze, “Hei a pau heguang gau, nang ne sabe luigum ze I benai a dage kebambe leine ning gu de lei,” acheu bei de lei.

⁵Hepâupaume bau ne wang dai lu ze, “Acheu ze Ben-hadadbe ne rang de lei: ‘I ne ning dage lang gai lei, “Ning gu gepût benai gechâk zai ning nâu ramme benai ning name ramme je a dage pei gai lau,” ze acheu zeu;

⁶kane aigumbe hî dezai ’nchuamai ge ning dage a guâ ka’ngguame je I lang gai gu, dezai penui ne ning ki benai ning guâ ka’ngguame ki ramme peu ze penui ne teinei-neibe tak tew ze chiramme teitat ’ndu lei,’ zeu” ze kacheu de lei.

⁷Chidadege Israelram heguang ne heram ge gechîngme leine je kû gai lu pa ne, “Chuna ’nchet le lau, zai aipaupeu zene tewkeleu ra peube tak ze pie le lau; a nâu ramme, zai a na ramme, zai a gu gechâk benai gepût ramme pei ra ranggaibe I ne pechu peilak mak ze pei bei de lei,” ze kacheu de lei.

⁸Zai gechîngme leine benai ziemmena ’nteumena ne pechu, “’Ngking se lau, zai hezuâ gai se lau,” ze kacheu de lei.

⁹Chigum ze pa ne Ben-hadadbe gu hepâupaume je, “A pau heguang je ranglia lau, ‘Ning guâ ka’ngguapeu dage nang kiegairaibe leine I tew ra de lei; kane aize â I tewchi lak lei,’ zeu,” ze acheu bei de lei. Zai hepâupaume tat ti ze, pe dage sam pungwang kadai de lei.

¹⁰Ben-hadadbe ne sam lang gai ze, pechu, “Samariaram deiniamoîne ze a chaisuime leine hangge bakuî kat pat lu zai â heramme ne achu peize tewnei-neibe tak tew lau, zai chipau peirei du peize tew lau,” ze kacheu de lei.

¹¹Dadege Israelram gu heguang ne kak ze, “Pechu rang gai be lau, ‘Hereikamlupeu gum ze â, hereirapeu â hereirabe suage peize kedikuâ-kua se lau,’ zeu,” ze acheu bei de lei.

¹²Ben-hadadbe hetiampaîki ramme kang gene heguangme je wain nguasakbe luagene aipau rasam seu lu dege, “Ningnui zeu peu kam le du lau,” kacheu de lei. Chidadege â namdi je ’nggi ra penui zeu peu kam lu bam di de lei.

¹³Zai pie le lau, kemeu’mpeu hangkat Israelram gu heguang Ahabbe dage wanghechut kai lu sa ze, “Aigum ze Tingwang ne rang gai de lei, Ai ziemmena baudime leine je nang ngau de mei? Pie le lau, nemai ge aize I ning ba ge pei gai gu de lei; dezai I â Tingwang lei be nang chî gu lei,” ze acheu bei de lei.

¹⁴Dadege Ahabbe ne, “Châu ne lau?” kacheu de lei. Pa ne, “Tingwang ne aigum ze rang lei, heram ramme gu laksaibe ramme guâ ka’ngguame ne lei,” ze kacheu de lei. Dadege pa ne, “Châu ne herei putchu gai ra lau?” kacheu de lei. Pa ne kak ze, “Nang ne ra de lei,” acheu bei de lei.

¹⁵Chidadege pa ne heram ramme gu laksaibe guâ ka’ngguame ramme je kûwang’ndui gai de lei, zai penui ziemmena haî na ze himreu ze kena lei; zai penui je kûwanggailube chângge Israelme baudime ziemmena chang sename je pa ne kûwang’ndui gai de lei.

¹⁶Zai tîngna hî ge Ben-hadadbe hetiampaîki kangge pechu ka’ngngame heguangme hanghimreu-ze-kename benai pa wain sakmeneu ze bamdibe luagene penui tatpat ti de lei.

¹⁷Heguang ramme gu laksaibe ramme guâ ka’ngguame ne tatpat raî de lei. Zai Ben-hadadbe ne kereîme ramme je langpat kai de lei, zai penui ne pechu pau gai ze, “Samariaram gene ziemmena ramme pat la de lei,” ze acheu bei de lei.

¹⁸Pa ne, “Penui ne desieyibe tew ra pat zai â ’nring nîm lau, zai penui ne herei ra pat lei zainedu ’nring nîm lau,” ze acheu bei de lei.

¹⁹Chigum ze aime heram ramme gu laksaibe guâ ka’ngguame benai penui chaisuime hereikangme namdi gene tat ti de lei.

²⁰Zai penui hangkat-katne penui kaherei-reipeu je tewchat kam lu de lei; Siriame ne pakbeibe ze Israelme ne guaka’nsa de lei, kane Siriaram heguang Ben-hadadbe â hekunchingchuame je ngua lu hekun gene pak’mbia di de lei.

²¹Zai Israelram gu heguang tatpat ti de lei, zai hekun ramme benai timriang ramme sut ’ndi de lei, zai hereikangme ziemmena gekieme je bichat kai bei de lei.

²²Chidadege kemeu’mpeu ne Israelram gu heguang dage wanghechut lu ze pechu, “Wang lau, ning runne ning ran tew’nchi gai le lau, zai nang ne tewrabe tâ ze ’nningdesi gai le lau; Siriaram heguang ze ningchu ’nggi ra keriakting ge hang gu lei,” ze kacheu de lei.

²³Zai Siriaram heguang guâ ka’ngguame ne pechu, “Penui râ ramme ze â kedeiloa râ ramme de lei; chi ziegene penui â anui suadu penui ranchi lei, kane bekâm yibe gene penui je anui ’nggi kei lei, penui suadu anui ne ranchi sing gu lei.

²⁴Zai aize tew du lau: heguangme ramme je penui tâbâm-bâm gene tei’mbia ne lau, zai penui bâm ge hereikang saibe ramme je kai be lau;

²⁵sipai ningchu sâugaipeu gumbe hereikang je nang kû dai ra zai hekun benai timriang gadibe riak nang teiwang dai ra lei; chidezai bekâm yibe gene penui je anui ’nggi ra hang, zai anui ne penui suadu ranchi sing gu lei,” ze acheu bei de lei. Zai pa ne penui kuâ ’ngking gai ze chigum tew gai de lei.

²⁶Keriakting ge Ben-hadadbe ne Siriame je kû lu Israelme je ’nggi ra Aphek namdi ’mbe hang de lei.

²⁷Zai Israelme baudime je kû’ndui gai de lei, zai penui je kedâzun gai bei ze, Siriame je ’nggi ra hang di de lei; Israelme bau ze kemeidung poine kena helî gum ze Siriame je teidabe bâm ge bau na tew ze wang’ndui gai de lei, kane Siriame ne chipau bâm ramme ge puiting di de lei.

²⁸Zai Hera gu ziemmenapeu ne Israelram heguang dage wang’nna lu pechu, “Aigum ze Tingwang ne rang lei, ‘Siriame bau ne, “Tingwang â kedeiloa ramme rapeu lei, kane pa â teziekining Rapeu mak lei,” ze acheu sagaibeibe ziegene ai ziemmena baudime ’nteumena je I ne ning ba ge pei gai gu lei, zai ningnui ne I â Tingwang lei be chî gu lei,’ zeu” ze kacheu de lei.

²⁹Zai penui kat-kat je teidabe bâm gene chige hezie sena sieki tew lu ze bam lei. Zai hezie pasenabe chang dege, penui hereipat ti de lei; zai Israelme bau ne Siriame, penui pî ne tatrua ze kahereime je mai kat ne ziemmena chang haî kat tewchat ’ndi de lei.

³⁰Zai kêdame bau â Aphek namdi ’mbe pak kai di lei; zai chigene ziemmena chang ’ngkai ze sena ’nsakpatme je kerie kedibe bakêu ze dap te lei. Ben-hadadbe du pak ti de lei, zai namdi hekilung nuksing ge gut kai di de lei.

³¹Zai pe guâ ka’ngguame ne pechu, “Pie le lau, Israelram gu heguang ramme â heguangme je ’nggiachibe kau ramme lei be chuna â anui seu lu de lei; kei lei, anui kia ge miseigiriapaî ramme rat kai lu, zai anui peî ge anui paîni ramme kedui gai lu, Israelram gu heguang tailam anui pat kei lei; ningnui je pa ne chai ra pei ra mak leu gu lei,” ze kacheu de lei.

³²Chigum ze penui kia ge miseigiriapaî ’ngkang gai lu, penui peî ge penui paîni ramme kedui gai lu, Israelram gu heguang tailam pat lu ze pechu, “Ning guâ ka’ngguapeu Ben-hadadbe ne rang lei, ‘Ka’nggia ze achu ring ra pei lau,’ zeu,” ze acheu bei lei. Dadege pa ne, “Pa ring larei mei? Pa â a kinapeu de lei,” ze kacheu de lei.

³³Chidadege â ziemmena ramme mâ-tak ge â tewpat leu gu mei ze pie bam de lei; zai pe samsa gene penui ’nningchi lu ze, “Eu lei, Ben-hadadbe ze ning kinapeu de lei,” acheu bei de lei. Chidadege pa ne, “Tat ze pechu nguawang du lau,” kacheu de lei. Chidadege Ben-hadadbe pe tailam zuapat ti de lei; zai pa ne pechu timriang ge chu gai ra rang gai bei de lei.

³⁴Zai Ben-hadadbe ne pechu, “A peu ne ning peu dagene namdi ramme lu’ndibe I ne pei dai gu lei; dezai a peu ne Samariaram ge tew gum ze nang Damaska ge hechaiki ramme tew ra hangge zeu,” ze acheu bei de lei. Dadege Ahabbe ne, “Nemai tingkak gu ze â nang ne sappui gai ra I ne tew gai gu lei,” ze kacheu de lei.

³⁵Kemeume bau ruagene hangkat Tingwang gu samde gene pe kanghiâpeu je, “Achu lak kai ra I kie lei,” kacheu de lei. Kane chipaupeu ne pechu kak kai ra ngaurau tai de lei.

³⁶Chidadege pa ne pechu, “Nang ne Tingwang kuâ pheumaktaibe ziegene, pie le lau, nang a dagene zuapat gap dezai duilui ne ningchu ’nsia gu lei,” acheu bei de lei. Zai pe dagene pa zuapat gap dege duilui ne pechu hedau lu, ’nsia ’ndi de lei.

³⁷Dadege pa ne kêdapeu je ngaudau dai lu ze pechu, “Achu lak kai ra I kie lei,” acheu bei de lei. Zai chipaupeu ne pechu lak ze bêu ze tewhejam gai bei de lei.

³⁸Chidadege â kemeu’mpeu ze tatrimnatat lu, pe mikkûm peireige hejâm dumbe zene pe runne pechu tewchâm lu ’mpuîki ge heguang je bamkuâ de lei.

³⁹Zai heguang tatpat dege, heguang je kû ze, “Ning guâ ka’ngguapeu kahereibe zeu ge pat ti de lei; zai pie le lau, hereikang hangkat ’nreiwang lu, ziemmena hangkat je a dage nguawang ze achu, ‘Aipaupeu je rei’mmi lau; pa ne ga di lêu zai â pa kelei ge nang ne chai gu lei, makchai â, nang ne gepûtgeî chang chum pei ra lei,’ kacheu de lei.

⁴⁰Zai ning guâ ka’ngguapeu ’nchuakpret bambe luage pa â tat ti de lei,” ze kacheu de lei. Israelram gu heguang ne pechu, “Ning gu samrambe luî peize tat ku lei; nang ne aize ramkeu gai de lei,” ze kacheu de lei.

⁴¹Chidadege pe mik kena hiage geteube jâm dumbe paîrie kelua ze gâutua ’ndi de lei; zai Israelram gu heguang ne kemeume ruage hangkat te lei be ngaupat kai di de lei.

⁴²Dadege pa ne pechu, “Aigum ze Tingwang ne rang lei, ‘I ne dei’nsia ra ’nninggaipeu je ning ba gene tat dai de ra nang ne lun-gaibeibe ziegene pa ne pa keringbe garabe ze nang ne nang keringbe ’ngga gu lei. Zai pe gu ziemmena ne chairabe ze, ning gu ziemmename ne chai gu lei,’ zeu” ze kacheu de lei.

⁴³Chidadege â Israelram gu heguang pe lung sia-desang ze pe ma hâmrei ze pe ki lam tat ti de lei, zai Samariaram ge wang gai di de lei.