Read Zeme Naga 1 HEGUANGME 22 Bible Online

1 HEGUANGME 22 - Zeme Naga bible

1 HEGUANGME 22

¹Siriame benai Israelme kakge kum chum riâ herei ga ze lung lei.

²Kane pakechumbe kum ge Judaram heguang Jehoshaphatbe Israelram heguang tailam wangkeu de lei.

³Dadege Israelram heguang ne pe tâ ka’ngguame je, “Ramoth-gilead ze anui gu lei, kacheube benai anui ne chize mi kuâneu du mak ze Siriaram heguang ba gene lupat dai mak ze bam lei be ningnui chî mei?” ze kacheu de lei.

⁴Zai pa ne Jehoshaphatbe je, “Ramoth-gilead je ’nggi ra hang anai tat ra mei?” kacheu de lei. Zai Jehoshaphatbe ne Israelram heguang je, “Nang benai ning gume zai ning gu hekun ramme teleu lu lu ge I benai a gume zai a gu hekun ramme â changdui kam lei,” ze kacheu de lei.

⁵Zai Jehoshaphatbe ne Israelram heguang je, “Kane Tingwang je ’mpautâu raî kei lei,” kacheu de lei.

⁶Dadege Israelram heguangpeu ne kemeume ziemmena haî medai riâ gum ze gekumwang’ndui gai lu penui je, “Ramoth-gilead je I herei ra mei nune gesut kai ne ra lau?” kacheu de lei. Zai penui ne, “Hang du lau; Tingwang ne chize heguang ba ge pei gai gu daseu,” ze kacheu de lei.

⁷Kane Jehoshaphatbe ne, “Tingwang gu kemeu’mpeu kêdadabe anui mâ-’mmêt kai ra aige ’ngga mei?” kacheu de lei.

⁸Dadege Israelram heguang ne Jehoshaphatbe je, “Tingwang dage anui mâ-’nneu gai ra aige mi hangkatpeu Imlabe na Mikaiabe lamui rei lei, kane mâdau du a deu hangge pa ne mâ-yibe rangpat mak ze kesiabe rangpatchibe ziegene pechu I ngaugailak lei,” kacheu de lei. Zai Jehoshaphatbe ne, “Heguang ne peize aigum sa se lau,” ze kacheu de lei.

⁹Dadege Israelram heguang ne saibe hangkat je peize wang ra sam pei bei de lei, zai pechu, “Imlabe na Mikaiabe je nguawang kelua lau,” kacheu de lei.

¹⁰Samaria keriekemui gutbe kechaîpung ge Israelram heguangpeu benai Judaram heguangpeu, Jehoshaphatbe penai puâ kering gai lu, penai bâm heguang-bâm ge ka’ntau de lei; zai penai masua gene kemeume leine penui gu kemeu sam salia de lei.

¹¹Zai Kenaanabe na Zedekiabe â hegeî’ngkia teleu lu Ahabbe je, “Aigum ze Tingwang ne rang lei, ‘Siriame je tew’nsia kam mak tâne airamme ne penui je kumtua ra de lei,’ acheu zeu” ze kacheu de lei.

¹²Zai kemeume ramme ne chipau luîrun ze sa ze, “Ramoth-gilead ’mbe hang ze tewkau gai be lau; Tingwang ne chize heguang ba ge pei gai gu lei,” kacheu de lei.

¹³Zai Mikaiabe je sam pei gai ra tattipeu hepâupaupeu ne pe chu, “Pie le lau, kemeume gu sam ramme, heguang hangge yibe hang ’nteumena ne sa kam gai lei; ning sam du peize penui ruage hangkatpeu sam gum ze sa’mmi gai be lau,” acheu bei de lei.

¹⁴Kane Mikaiabe ne, “Tingwang ne sa ra achu ranggaibe luigum ze I sa sing gu lei,” kacheu de lei.

¹⁵Zai pa heguangpeu tailam wang dege, heguang ne pechu, “Mikaiabai, Ramoth-gilead je herei ra anui tat ra mei nu gesut kai ne ra lau?” kacheu de lei. Dadege pa ne kak ze, “Hang ze duî le lau, Tingwang ne chize heguang ba ge pei gai gu lei,” acheu bei de lei.

¹⁶Kane heguang ne pechu, “Tingwang ji gene samsang runne sa ra lei be lua daikie ningchu I rangdesi gai ra lau?” ze kacheu de lei.

¹⁷Dadege pa ne, “Kereîpeu gabe melidung helî gum ze Israelme leine kedeiloa ramme ge bamrariptibe I ngau lei; zai Tingwang ne sa ze, ‘Aime bau dage â pa’mpaupeu ’ngga lei; peize pe run-runne pe ki lam lam’mbe yize tatchu lau,’ kacheu de lei,” ze kacheu de lei.

¹⁸Zai Israelram gu heguang ne, Jehoshaphatbe je, “Kesiabe hang ra zangno keyibe hang â a peireige pa rangka’ntuabe sam salia ra mak lei be ze ningchu I salia mak ti lau?” ze kacheu de lei.

¹⁹Dadege Mikaiabe ne, “Chipauziegene Tingwang sam ’ngking lau: Tingwang ne pe gu heguang-bamrâ ge ka’ntaube benai tinggîm baudime ne pa hezat’mbia ge benai pa heku’mbia ge sapbambe I ngau lei;

²⁰zai Tingwang ne, ‘Châu ne Ahabbe je choa gai ra lau, chidezai peize pechu Ramoth-gilead ’mbe hang ze chigene kau de ra hangge zeu?’ ze kacheu de lei. Zai hangkat ne sam kat sa, zai kêdapeu ne kêdabe sam sa acheu ze bam de lei.

²¹Dadege herui zuapat ze Tingwang masuage sap kai lu ze, ‘I ne pechu choa gai ra de lei,’ kacheu de lei.

²²Dadege Tingwang ne pechu, ‘’Ndaigumbe chiam ne ra lau?’ kacheu de lei. Dadege pa ne, ‘I ne zuapat ku lei, zai pe gu kemeume leine mui ge I ne karasa-sarabe herui chang gu lei,’ kacheu de lei. Zai pa ne, ‘Nang pechu choa ra de lei, dezai nang ne duî gu lei; tat lu chigum tew zu lau,’ acheu bei de lei.

²³Chipauziegene pie le lau, aime ning gu kemeume leine mui ge Tingwang ne karasa sabe herui kai bei de lei; ning hangge Tingwang ne kesiabe sa gai ’nde lei,” ze kacheu de lei.

²⁴Chidadege â Kenaanabe na Zedekiabe wang’nna lu Mikaiabe je pe biapi kepei ze, “’Ndaigumbe tak tew ze Tingwang gu Herui ze ning dage sam sa ra a dagene tat lu lau?” kacheu de lei.

²⁵Dadege Mikaiabe ne, “Pie le lau, helungbe sîam ge nang ’mbai ra tatbe mai dezai nang ngau gu lei,” kacheu de lei.

²⁶Zai Israelram gu heguangpeu ne, “Mikaiabe je nîm lu ze namdi gu laksaibe Amonbe dage benai heguang na Joasbe dage teitat dai zu lau;

²⁷zai acheu ze rang gai lau, ‘Aigum ze heguang ne rang lei, “Aipaupeu je kebangki ge kai ne lau, zai I yi ze wang dai mak tâne pechu pemîseu-sêube tingku benai hedui ne kei lau,” zeu’ ze acheu zeu” ze kacheu de lei.

²⁸Dadege Mikaiabe ne, “Nang ne yize helatwang dai dizai â Tingwang ne a dage sam sa gai mak te lei,” kacheu de lei. Zai pa ne “’Ngking le lau, ningnui pezat leine gau!” kacheu de lei.

²⁹Chigum ze Israelram gu heguang benai Judaram gu heguang Jehoshaphatbe Ramoth-gilead ’mbe hang de lei.

³⁰Zai Israelram gu heguang ne Jehoshaphatbe je, “I ne a runne a luî tewchâm lu herei ge tat ra de lei, kane nang â ning puâ kai le lau,” kacheu de lei. Chidadege Israelram gu heguang peluî tewchâm lu herei ge tat ti de lei.

³¹Chidadege Siriaram gu heguang ne pe gu timriang ramme ge besuitewme ziemmena hanghimreu ze kena je samdie gai ze, “Ziemmena kecheime je du zai ziemmena kedime je du herei se lau, kane Israelram gu heguang je runne ra lei,” kacheu de lei.

³²Zai timriang ramme peireige besuitewme, Jehoshaphatbe je ngau lu dege, penui ne, “Chize Israelram gu heguang sing de lei,” kacheu de lei. Chigum ze penui ne pechu ’nggi ra ’nreiwang de lei, dadege Jehoshaphatbe ’nrungpat te lei.

³³Zai timriang peireige besuitewme ne chize Israelram gu heguang mak te lei be ngau dege, pechu guaka’nchube gene penui helet dai di de lei.

³⁴Kane mige ne pe gu hetubaimpi ketadau lupat lu ze, Israelram heguang Ahabbe je pe gakam benai mechua kakge kap bei de lei; chipauziegene pa ne pe gu timriang teipeu je, “Tei’nruiwang gai lu ze herei gene hela achu pungpat kai zu lau, I hejam de lei,” kacheu de lei.

³⁵Zai chipau mai ge hereilum-desang di de lei, zai heguang â hegî pa chaikeube riâ chang ze timriang ge ’nnaigit lu Siria ’mbia pie’nsua bam lei; zai hejâm gene hejai ze timriang kang ’mbe luakeu de lei.

³⁶Zai naimik kêurabe lia dege hereikangme ne ’nrungpat ze, “Ziemmena leine ne pe ram-ram ’mbe tat dai kam zu lau!” kacheu de lei.

³⁷Chigum ze heguang chai di dege pechu â Samaria ’mbe teiwang gai bei de lei; zai penui ne heguang je Samaria ge bai gai de lei.

³⁸Zai Samaria gu ’ngkêzai dui ne penui timriang ze huika’nchi de lei, zai hetei ramme ne pe jai ze ’nniak ’ndi de lei, zai Tingwang ne pe sam sagai’ndibe luigum ze, ’mpuimi penui pum zuateume chigene penui runne penui je huika’nchi de lei.

³⁹Zai Ahabbe gu tâtewbe rasam kêdadabe ramme benai hepuagim ne tewbeki zai namdi ramme pa ne hênam tewgutkairaibe rasam ramme ze Israelram gu heguangme rasam rawgaibe leisikuak ge raw gai mak ti lau?

⁴⁰Chigum ze Ahabbe chai di de lei; zai pe na Ahaziabe ne pa kelei ge kaheguang de lei.

⁴¹Israelram gu heguang Ahabbe ne kaheguangbe pamedaibe kum ge Asabe na Jehoshaphatbe ne Judaram ge heguangchu de lei.

⁴²Jehoshaphatbe pa heguangchube ting ge pe kum â himreu ze mengeu chang di de lei; zai Jerusalem ge pa kum ’ngkai ze mengeu heguangsap kai lei. Pe pui ji â Shilhibe na Azubale lei.

⁴³Pe peu Asabe tatbe ’mpuî leine ge pa tat te lei; pa chigene tatlie mak ze Tingwang mikngau ge keyibe tâ tew ze bam lei; kane pebâm kehube ramme â tew’nsia gai mak lei, zai ziemmena ramme pebâm kehube ramme gene herâtew ze mâ-perîmyibe ’ntau ze bam rei de lei.

⁴⁴Israelram heguang dage Jehoshaphatbe du desieyibe tâ tew de lei.

⁴⁵Jehoshaphatbe gu tâtewbe rasam kêdadabe ramme benai peranchi tewliabe zai kahereibe rasam ramme Judaram gu heguangme rasam rawgaibe leisikuak ge raw gai mak ti lau?

⁴⁶Pe peu Asabe ting gene ’mpeumi penui pum zuateume ka’nsakme je pa ne heram gene tew’ngga kam gai de lei.

⁴⁷Edomram ge â heguang ga ze lung lei; kane Judaram ge heguang ne sumgaibeipeu zene heguang gum ze samram lei.

⁴⁸Heguang Jehoshaphatbe ne Ophir gene gechâk lu ra tat ra, Tarshis gu ’nneikuak ramme chiam gai de lei; kane Ezion-geber gene ’nneikuak ramme hedui ne tew’nsia’ndibe ziegene penui tat mak tai de lei.

⁴⁹Chidadege Ahabbe na Ahaziabe ne Jehoshaphatbe je, “A guâ ka’ngguame ramme je peize ning guâ ka’ngguame gu dui-’nneikuak ramme gene tat lau,” kacheu de lei. Kane Jehoshaphatbe ne hezuâ mak tai lei.

⁵⁰Zai Jehoshaphatbe chai di de lei, zai pe peu Dabidbe gu namdi ge pe peume raw ge bai gai bei de lei; zai pe na Jehorambe ne pa kelei ge kaheguang de lei.

⁵¹Judaram ge heguang Jehoshaphatbe ne kaheguangbe tingkum kereu ze sena ge Ahabbe na Ahaziabe ne Samariaram ge Israelme peireige heguang ze bam lei, zai pa ne Israelme peireige kum na kaheguang de lei.

⁵²Tingwang mikngau ge pa kesiabe tâ tew gai de lei; zai pe peu benai pe pui zai Israelme je peize hemui tâ tew ra tewgaipeu Nabothbe na Jeroboambe tatbe ’mpuî ge pa tat kai de lei.

⁵³Tingwang Israelme Rapeu lumpum tew ra pe peu ne tewgaibeibe ’mpuî leine gene pa Baal guâ ’nggua ze pechu kellum ze bam de lei.