Read Zeme Naga 1 HEGUANGME 3 Bible Online

1 HEGUANGME 3 - Zeme Naga bible

1 HEGUANGME 3

¹Solomonbe henâu-kahegaibe gene Ijipme gu heguang Pharaobe dage muikattew ze bam lei; pa ne Pharaobe na heleu’mpui je lu lu Dabidbe gu namdi ge nguawang gai de lei; pa pe ki, Tingwang ki zai Jerusalem kerie tewbe tew kam mak tâne chige bam ra hangge zeu.

²Acheuleusede Tingwang ji gene heki tew gai mak kerei dadege ziemmena ramme kedeiloa kehube ramme gene herâtew ze bam de lei.

³Solomonbe â pe peu hingde rawdiakkaibe ge sui ze Tingwang je hung ze bam lei; pa â herâtewbe-kaira pebâm kehube ramme ge herâtew ze mâ-perîmyibe ka’ntaube tâ runne tew bam lei.

⁴Zai heguang ze Gibeon gene herâtew ra tat ti de lei, chipau bâm ze â herâtewbe bâm di ze hube kau dadegeu; chi herâtewbe-kaira ge Solomonbe ne rûkambe-râtewbe hangge chang kat riâ tew gai lei.

⁵Gibeon ge Tingwang ne Solomonbe je pe mang gene lia de lei; zai Hera ne, “Ningchu I peirabe kie du lau,” kacheu de lei.

⁶Zai Solomonbe ne, “Ning guâ ka’ngguapeu, a peu Dabidbe ne ning mikngau ge samsang ’mpuî ge, zai katelingbe ge, zai lungsang tewchibe ’mpuî ge bambeibe luigum ze nang ne pechu ka’nggiabe misongga ze pe hang chuna riâ chang ze heguang-bâm ge ’ntau ra pe na je pei bei de lei.

⁷Zai chuna â Hei, Tingwang a Rapeu gau, nang ne I napoine chang ze bam bei sedu ning tâ ka’ngguapeu je a peu Dabidbe bâm ge heguang hang sum gai bei de lei. I â samramrabe tak chî me lei.

⁸Zai ning tâ ka’ngguapeu â ziemmena pebau seikamlakme, nang ne kelânggaime pezat dime zuilung ge la de lei.

⁹Chidaze ning tâ ka’ngguapeu je ning gu ziemmename peireige samramchi ze bam ra mâ-’nningchibe lungtak pei gai lau, dezai I keyibe benai kesiabe kakge ’ndeu’ndakchi le ra hangge zeu; chi acheu lei mak tizai â, châu ne ai ning gu ziemmena acheuzeume je ’ngngâchi ra lau?” ze kacheu de lei.

¹⁰Solomonbe gu ai ka’nneube zene Tingwang suî tew’mmi gai bei de lei.

¹¹Dadege Hera ne pechu, “Nang ringtie le ra hang mei nune ning heurâ hang mei nune ning teureime keringbe hangge mei nang ne kie mak, kane keyibe tew ra peuchi ra ning hangge mâ-chîka’mmibe lung hang nang ne aize kiegaibeibe ziegene,

¹²pie le lau, chuna I ning sam luigum ze tâtew gai lei. I ne ningchu kaningchingbe benai ’nningchibe lung pei gai de lei, chidezai nang gumbe kau mî du ning sua’ngka ge du ga, zai nang gumbe kau mî du ning chângge pat dai mak ra hangge zeu.

¹³Zai nang ne kie gai tâumakbe, keheube benai pengêudibe, aibe kena ningchu pei lei, chidezai nang keringbe tingnaimikpui leine ge heguang kêdabe kau ne ningchu teikeda dai lak ra hangge zeu.

¹⁴Zai nang ne ning peu Dabidbe tat gum ze a gu hingde rawdiakkaibe ramme benai a gu samde ramme tei ze a ’mpuî ramme ge tat bei zai â, I ne nang keringbe ting ze du tew’ntie gai gu lei,” ze kacheu de lei.

¹⁵Zai Solomonbe ’nrakchu de lei, zai pie le lau, chize pe mang gelêu de lei, chidadege â Jerusalem ’mbe pa wang lu Tingwang gu samhatkaibe herâtewbe-kaira suage sap kai lu ze pe gu tâka’ngguame leine hangge rûkambe-râtewbe benai desieyibe-râtewbe pualia de lei, zai luube-bâm hang du teleu gai de lei.

¹⁶Dadege pe pum zuateupui hangna heguang dage wang lu, pe suage sap kai de lei.

¹⁷’Mpuimi hangkat ne, “Hei, a pau gau, ai ’mpuimi benai I ki kat ge bam de lei; zai kilûng ge pa bambe lua I napoine lungkeu de lei.

¹⁸I ’ngngiêne lung lu hezie kechum châng dege, aipaupui ze du henalung de lei, kilûng ge miramme â mî de ga, anai hangna runne bam lei.

¹⁹Zai tingmuî kejeibe gene aipaupui â pe na ’mpeumi napoine je kâmchat ’ndi de lei.

²⁰Dadege muisum hî gene pa chu lu a taihia gene a na je pua ’ndi de lei, I ning gu tâka’ngguapui jeikeudibe luage neu, zai chipau poine je pe hang lu lu, pe na chaidipoine je a ga ge ’njei gai bei de lei.

²¹Hechua I a na je teleu ra chu dadege, pie le lau, pa chai di laleu lei; kane hechua I pechu piedesi gai dege, pie le lau, chize I ne lungkeube napoine â mak laleu de lei,” kacheu de lei.

²²Kane kêdabepui ne sa ze, “Mak lei, ’ngngiêne keringbe poine ze a na lei, zai chaidibe poine ze ning na de lei,” kacheu lei. Zai keraîpui ne sa ze, “Mak lei, chaidibe poine ze ning na de lei, zai keringbe poine ze a na de lei,” kacheu de lei. Acheu ze heguang suage penai sa de lei.

²³Dadege heguang ne, “Ningnai hangkat ne ‘’Mpeumi napoine keringbe poine ze a na, zai chaibe poine ze ning na lei,’ acheu, zai hangkat ne ‘Mak lei; kane ning na â chai de lei, zai keringbe poine ze a na de lei,’ ze ningnai kacheu de lei,” ze kacheu de lei.

²⁴Zai heguang ne, “Achu hiazutkie pei lau,” acheu bei de lei. Chidadege â heguang dage hiazutkie teiwang gai bei de lei.

²⁵Zai heguang ne, “Ai keringbe ’ngngiêne poine je penai hangna hang pa’mpi-pi dâng’nzi gai be lau,” acheu bei de lei.

²⁶Chidadege â keringbe ’ngngiêne pui ze pe lung ge pe na je ka’nzâbe lungted ne heguang je, “Hei a pau gau, keringbe ’ngngiêne poine je pechu pei gai be du lau, zai pechu tewchat kai serun lau,” acheu bei de lei. Kane kêdapui ne, “Aipau poine je anai mî hangge du peize chang ra mak lei; ’nzi gai du lau,” acheu bei de lei.

²⁷Chidadege â heguang ne kak ze, “Keraîpui je ai keringbe ’ngngiênepoine pei be du lau, zai pechu tewchat se lau, pa ze aipau poine pui de lei,” acheu bei de lei.

²⁸Heguang ne samramgaibe sam Israelme leine seu de lei; heguang dage samram’nzeichi ra Hera gu kaningchingbe pe dage la de lei be penui chilube ziegene ningdaulak ze pe suage penui saprim bam de lei.