Read Zeme Naga 1 HEGUANGME 4 Bible Online

1 HEGUANGME 4 - Zeme Naga bible

1 HEGUANGME 4

¹Heguang Solomonbe â Israelme leine peireige heguang chang ze bam lei.

²Zai aime bau ze pe gu tâ-muipuame kedime bau lei: Zadokbe na Azariabe ne tingku chang lei,

³Shishabe na Elihorephbe benai Ahijabe ne penui gu leisikuak rawsuime de lei, Ahiludbe na Jehoshaphatbe ne rawka’nduipeu lei;

⁴Jehoiadabe na Benaiabe ne hereikang muiteipeu lei, Zadokbe benai Abiatharbe ne tingku lei;

⁵Nathanbe na Azariabe ne tâ-muipuame leine peireige bam lei; Nathanbe na Zabudbe ne tingku chang zai heguang kangpeu chang ze bam lei;

⁶Ashisharbe ne heguang-bamrâ kereîpeu lei; zai Abdabe na Adonirambe ne kagetedbe lie ze tâtewme peireige kereîpeu lei.

⁷Israelme ram leine ge Solomonbe gu tâ-muipuame hangkereu ze kena bam lei, chime bau ne heguang hang benai pe kiduîme hangge penui bâm bâm gene tak lu lu ze katela lei; kum kat ge kêu kat tew ra hang perun-runne tinggeu kam ra chang lei.

⁸Penui ji ze airamme lei: Ephraimram loa ge Ben-hurbe de lei.

⁹Makaz, Sha-albim, Beth-shemes benai Elon-beth-hanan namdi ramme ge, Ben-dekerbe de lei;

¹⁰Arubboth ge Ben-hesedbe de lei, Sokoh benai Hepher ge heram pelane ze pe gu chang lei;

¹¹Naphath-dor leine ge (Dorram leine ge) Ben-abinadabbe de lei (Solomonbe na Taphathle je pa ne pe nâu lu lei);

¹²Abel-mehola benai Jokmeam namdi chang ze Jezril gene tingpî ’mbia Zarethan namdi hiage Beth-sheanram leine hiage zai Taanak, Megiddo namdi ramme ge Ahiludbe na Baanabe de lei;

¹³Ramoth-gilead ge Ben-geberbe de lei; Gilead ge Manassebe na Jairbe ram pa ne ka’nram lei; (Kangngâgeî ne pechia tew ze kerie rielube namdi kedibe riakseruk Bashan ge bambe Argob ram leine pa ne tei lei);

¹⁴Mahanaim ge Iddobe na Ahinadabbe de lei;

¹⁵Naphtali ge Ahimazbe de lei (pa ne Solomonbe na Basemath je pe nâu lu lei);

¹⁶Asher benai Bealoth ge Hushaibe na Baanabe de lei;

¹⁷Issakar ge Paruabe na Jehoshaphatbe de lei;

¹⁸Benjamin ge Elabe na Shime-ibe de lei;

¹⁹Amorme gu heguang Sihonbe benai Bashan gu heguang Ogbe ram Gileadram ge Uribe na Geberbe de lei. Zai Judaram ge, chime peireige tâ-muipuabe kau hangkat bam lei.

²⁰Judame benai Israelme kiebe tak â sungkling ge hegitmoîne gum lei; penui teu ze sak ze penui suiyi-desang ze bam lei.

²¹Euphrates gene Philistinram benai Ijipram heramrai riâ chang ze heguangram leine ge Solomonbe ne samram ze bam lei; penui ne penui gu ’mpuâhâ Solomonbe dage mei gai ze pa keringbe ting pe guâ ’nggua ze bam lei.

²²Solomonbe je mai kat hang peibe dekuî niangbe moîne yibe kor himreu zai dekuî kor riakseruk,

²³getumsei peleuyibe kereu benai kaurui peleuyibe ’ngkai, meli haî kat zai bepeireige du rehiê’nsei ramme, helung ramme, zai ’nruine chabe ramme ka’nnang lei.

²⁴Pa ne Euphrates bak tingrun ’mbia Tiphsa gene Gaza chang ze Euphrates gene tingrun ’mbia ge heguangme leine peireige besuitew samram ze bambe ziegeneu; zai pehuâzieme leine peireige pa nguadesieyi ze bam lei.

²⁵Zai Judame benai Israelme Solomonbe ting ge Dan gene Beer-sheba riâ lungchang ze bamme penui gu grepchî benai ’mbeuchî merie tew ze lungtemichai ze bam lei.

²⁶Solomonbe du pe gu timriang pungbe hekun ramme ki chang hedai bam lei, zai hekun chuame ziemmena chang kereu ze kena bam lei.

²⁷Zai chime tâ-muipuame ne mi hangkat ne bekêu ’nsangne ge heguang Solomonbe hangge benai heguang Solomonbe gu mâ-teube-kaira ge teume hangge peipat ze bam de lei; riâ ze bam ra penui ne pei mak lei.

²⁸Pa ne kie kiebe riâ ka’nnangbe bâm ge hekun ramme benai hekun pakchibe ramme hangge barli benai megau du penui ne teiwang gai bei de lei.

²⁹Hera ne Solomonbe je kaningchingbe benai ’nningchibe seikam lak ze pei gai de lei; zai ’nggeukung ge deseîdei gumbe helungdibe pei gai bei de lei.

³⁰Chidezai tingbia ’mbe bamme leine benai Ijipme gu kaningchingbe leine peirei Solomonbe kaningchingbe ’ngkeukia ra hangge zeu.

³¹Pa â miramme leine sua â ningching, zai Zarah chaname Ethan zai Maholbe name Hemanbe, Kalkolbe zai Dardabe suadu kaningching dadegeu; zai pehuâzie ge heramzatme dage pe ji di bam de lei.

³²Pa du samrekum chang chum â pe mui gene sapat kai lei, zai pe gu heleu ramme chang kat ze mengeu lei.

³³Heching rasam ge, Lebanon ge kedarching bambe je kerie gene hissop bang puakchube je sa gai lei; zai pa ne mârekaune, ’nruine zai buaruabe mâkâupui ramme, zai hekâ peireige du sa gai lei.

³⁴Zai Solomonbe gu kaningchingbe sam ’ngking gai ra hangge pezat leine ruagene ziemmena ’nteumena benai pa kaningchingbe rasam seulume leine zuawang de lei.