Read Zeme Naga 1 HEGUANGME 6 Bible Online

1 HEGUANGME 6 - Zeme Naga bible

1 HEGUANGME 6

¹Israelme Ijipram gene zuapatbe châng tingkum haî medai ze riakdesat zai Israelme ruage Solomonbe ne samrambe pamedaibe tingkum gu Kena kêu ge pa Tingwang ki tewchu de lei.

²Heguang Solomonbe ne Tingwang hang hekitewbe petâ sâu riakseruk, pedit sâu’ngkai zai pehut sâu himreu lei.

³Hekidit lang ze hekilûng kegup tewpatbe petâ sâu ’ngkai zai hekikegup ge pechuk sâu kereu lei.

⁴Heki ge leubaki ramme hang pa ne tew gai lei.

⁵Heki ’mbe hekilûng sûngngang benai ka’nchibe helungbeki gu pelane ge kehu ’mbe hekisiâm poine ramme ruachurabe hangge pa ne ’nrang-’ngguareu gai de lei, zai pa ne hekisiâm ramme tewhiâ’ngguareu gai lei.

⁶Hekisiâm ’ngkanglangbe ge pelane pedit sâu mengeu, sûngngang kisîam pedit pelane sâu seruk, zai pakechumbe sîam ge pelane sâu sena lei. Heki gu ’mbie taube tewputgut ra hingbe hangge hela ’mbene pa’ntung kai ze dangguâ kadai lei.

⁷Heki tewchube ting ge tingchu giabe bâm ’mbene tingchu giazun ze gia de lei, chidezai tediak mei, ’nrei mei, hegeî kerua ramme kuâ mei be kellumki lungge seu mak ra hangge zeu.

⁸Heki ’ngkanglangbe sat ge tingrun ’mbia heki kemui put kai lei; zai ziemmena sûngngangkelî sat ge desua gene luichu lei, zai sûngngangkelî set gene pakechumbeki sat ’mbe du chu lei.

⁹Pa ne acheu tew ze heki tew kam gai de lei; zai pa ne (heki gu siling) ’nsing heki’mpûm gu keza, kerie, hangge kedarching ramme ne tew gai lei.

¹⁰Heki sat leine hang pehut sâu mengeu kai ze heki pelane hangge ’nrang gai de lei, zai kedarching ramme ne ’ntuk ze tew de lei.

¹¹Zai Tingwang gu sam Solomonbe dage wang ze,

¹²“Aipau ki nang tewbe deu ge a gu hingde rawdiakkaibe ge nang ne teichi ze a gu hingde-sie ze nang suichi, zai a gu hingde ramme reîchi ze bamchi bei zai â, ning peu Dabidbe dage I sam sagai’ndibe ze ning dage chize tewpui gai gu lei.

¹³Zai Israelme ruage I bam gu zai a gu Israel zatme je I put kai ra mak lei,” kacheu de lei.

¹⁴Chigum ze Solomonbe ne heki tew de lei, zai tew kam gai bei de lei.

¹⁵Hekilûng ze du kedarching kedibe ramme ne lia ze bieting gai lei. Kedei gene heki’mpûm riâ pelane heching ne pa bieguâ gai de lei, zai hekilung kedei du sipress ching ne lia ze tew lei.

¹⁶Kedei gene ’nsing riâ chang ze kedarching ramme ne kichai’ngkuaki sîam sâu ’ngkaiki pa ne tew gai de lei. ’Nchilangbe bâm helungbe ka’nchibeki gumbe ge aize pa ne tew gai de lei.

¹⁷Ka’nchibe bâm hiage kilûng sûngngangkelî gu ze petâ sâu hedai lei.

¹⁸Kedar ching ge timriebang benai mâpâ luî ramme hang gialube ramme ne kilûng ge kai lei; kedarching ’nnia lei, chize tingchu ngau mak lei.

¹⁹Tingwang gu hingdebung kairabe hang kilûng nuksing ge helunglangbe kakellumbeki hang pa ne teleu gai lei.

²⁰Helunglangbe kakellumbeki ze petâ, pehut, pedit leine ge sâu ’ngkai lei; zai gechâk ka’nchibe dui ne chiramme ge pa ne zuâlik kai lei, zai pa ne kedarching ne herâtewbe-kaira du tew gai lei.

²¹Solomonbe ne kilûng ramme gechâk ka’nchibe dui ne zuâ gai de lei, zai helunglangbe kakellumbeki suage gechâk ria ramme gîng gai ze chipau ki ge du gechâk dui ne zuâ gai de lei.

²²Heki kenui kam mak tânege gechâk dui ne zuâ ze tew lei. Zai helungbe kakellumbeki ge herâtewbe-kaira ge du gechâk dui ne zuâ gai lei.

²³Helungbe kakellumbe ki ge olib ching ne tewbe kerub kena pehut sâu kereu-reu tew gai lei.

²⁴Kerub kan kat gu petâ sâu mengeu lei, zai kêdabe kan ze du petâ sâu mengeu lei, zai pekantû kat gene kêdabe kentû riâ ge sâu kereu lei.

²⁵Kerub kat ze du sâu kereu ’ndeupat lei; kerub kena ze penai kau, penai luî ’nzuâ lei.

²⁶Kerub kat ze pehut sâu kereu lei, zai kerub kêdabe ze du chigumbe riâ lei.

²⁷Helunglangbe kisîam sûngngangkelî sing ge pa ne kerub kena kai de lei; zai kerub kena gu kat lam’mbia kan liâmpat kai dege ’mbie kena deîtau lei; zai heki sûngngangkelî sing ge katlam ’mbia gu penai kan karai kat kat je deîtau ra tew gai lei.

²⁸Zai pa ne kerub kena je gechâk dui ne zuâ gai de lei.

²⁹Hekilung ge hekisiâm ’mbie ramme leine ge helung, hela ge kerub kena ge mêupi bang zai mâpâ papatbe luî ramme ’nrit kai lei.

³⁰Heki ge helabe sîam benai helungbe sîam kedei pelane gechâk dui ne zuâ lei.

³¹Helungbe ka’nchibeki sîam ge gutbe kemui kena â olib ching ne tew lei; ’ngkam-chia benai ’ngkam-kung ramme ’nsum-sum ze râchu gai lei.

³²Olib ching ne tewbe ’ngkam kena ge kerubme, mêupi bang zai mâpâ papatbe luî ’nritlube ramme ne kûmchim gai lei; chiramme ge pa ne gechâk dui ne zuâ ze kerub kena benai mêupi bang ramme luî ge gechâk dui kai lei.

³³Kilûng-kûngduaki chia ramme hangge pemik medai ’nsamrap ze olib ching ne pa tew gai lei,

³⁴zai gechia kena â sipress ching ne tew gai lei; kemuiki kat gu ’ngkampak kena ze kakedipbe zat lei, zai kêdabe kemuiki gu ’ngkampak kena ze du kakedipbe zat lei.

³⁵Chiramme ge kerub kena zai mêupi bang, zai mâpâ papatbe luî ramme giapat kai lei; zai giapatkaibe jâm ramme ge gechâk dui ne zuâ’nniksik kai lei.

³⁶Riegualube helungbe bâm hangge pa ne tingchu gialube ne ’nria kechum zai kedarching ne ’nria kat kuachu gai lei.

³⁷Pamedaibe kum Kena kêu ge Tingwang ki tewdîmchu gai de lei.

³⁸Tew ra ranggaibe luigum ze tingkum kereu ze kat kum, Bul kêu, (chize padesatbe kêu) ge heki hang ’nrang kam gai lu de lei. Aipau ki tew ra Solomonbe hangge kum sena ’nnang di de lei.