Read Zeme Naga 1 HEGUANGME 7 Bible Online

1 HEGUANGME 7 - Zeme Naga bible

1 HEGUANGME 7

¹Solomonbe ne pe runne pe gu heguang ki hang kum kereu ze kechum tew lei, zai pa ne pelane tew kam gai lei.

²Lebanon ’nrêu ge pa ne heki tew gai lei; heki petâ ge sâu haî kat, pedit ge sâu rengeu, zai pehut ge sâu himreu zai gechia’ndi ramme peireige kedarching ne tewbe dappai ramme kai lu kedarching ne kechia’ndi ’nria kechum kailube ge heki tew gai de lei.

³Chize chia hedai ze mengeuki, ’nria kat ge kechia kereu ze mengeu peireige kedarching ne lia lei.

⁴’Ndangtau kat ge muicheiki ’nria kechum-chum tew gai lei, muicheiki ramme kena lam kaidasa gai lei.

⁵Kemuiki benai muicheiki ramme châu medai ’nsamrap ze tew gai lei, zai ’nria kechum-chum kena lam kaidasa gai lei.

⁶Kechia’ndi ramme ne tewbeki petâ sâu rengeu zai pedit sâu himreu lei, zai kiziêsua-kegup hang gechia’ndi ramme kai ze tewpat kai lei.

⁷Pa samramrabe bâm hangge pa ne heguang kisîam kat tew gai de lei, kedarching ne bepeirei, bekang tew kam gai lei.

⁸Samramrabe bâm hang tewgaibe heki chaige pa bamrabeki hang tewbe ze, kêdabe heki ramme luigum ze tew zun tew lei, pe nâu hangge lubepui Pharaobe na ki hang du aipau ki luigum ze Solomonbe ne tew gai lei.

⁹Aipau ki ramme ze pemîhungbe tingchugialube ramme benai heching rumlube ramme ne hekipung ’ndamchube gene tewkambe riâ pelane bechai-besua tew de lei, zai chigum ze heki-rielung benai Tingwang ki-rielung du pelane tew de lei.

¹⁰Tingchu pemîhungbe ramme, tingchu kedibe ramme, zai tingchu sâu desat benai sâu kereu kau ramme ne heki ze tewchu gai raî lei.

¹¹Zai tingchu pemîhungbe ramme ’ndeu ze gialube ramme benai kedarching ne bepeirei nâlangbe hangge tewhekap kai lei.

¹²Hekisiâm kedibe lungge tingchugialube ne kuaguâlube hekisiâm poine ramme kechum zai kedarching ne tewbe hekisiâm kai lei, Tingwang ki gu helungbe kisîam benai heki namsûng du chigum ze tew lei.

¹³Zai heguang Solmonbe ne lang gai bei ze, Tira gene Hirambe je nguawang de lei.

¹⁴Chipaupeu â Naphtali zat kemîpui na lei, zai pe peu â Tira ge bambe kau, zai kangngâgeî hekichipeu lei; chipaupeu â kangngâgeî ne mâ-mâ kahekibe ge ningching, mâ-’nsapchi zai pe chiâm yi lei. Pa ne heguang Solomonbe dage wang lu, pe tâ ramme leine tew kam gai bei de lei.

¹⁵Pa ne kangngâgeî chia kena luî hang hekipat kai de lei. Chia kat gu pehut sâu kereu ze desat lei, kechia dit heria ne ’ndeuguâ gai dege, sâu kereu ze kena ’ndeupat lei; chipau chia ze pekuangki put lei, zai beseu ze kêrang medai lei; pakenabe chia du chipau riâ lei.

¹⁶Gechia ramme peireige kai ra kangngâgeî dui ne zuâlube ruasuabe chia kena hangge du tew gai lei; chi ruasuabe chia ze pehut sâu mengeu lei, chipau pambe chia du sâu mengeu lei.

¹⁷Kechia ramme peireige bambe ruasuabe chia kena ge hegeîriagua ramme ne bepuâ hang kai lei; chia kat ge ria sena-na kai lei.

¹⁸Zai kangngâgeî ne turiechipum luî hang tewlube zene ’nria kena tew gai lei.

¹⁹Zai namsûng-chia gu bepeirei ruasuabe-chia ge lilipâ luî ne bepuâ hang tew gai lei, chize sâu medai lei.

²⁰Ruasuabe-chia ramme ze gechia’ndi kena peireige bam lei. Zai tewgai’ndibe tâ ramme peireige chize ne bam lei, chi ruasuabe chia ge turiechipum luî haî na tewgaibe ze ’nria kena lei, chipau luigum ze kêdabe ruasuabe-chia ge du tew gai lei.

²¹Kellumki-namsûng ge du pa ne kechia ramme sum gai lei, pa ne tingpî ’mbia kechia kat sumgaibe je pe ji Jakin ze kû lei; zai pa ne tingpeî ’mbia kechia kat sumgaibe je pe ji Boaz ze ku lei.

²²Zai chi gechia kena tûnroi geze bepuâ hang lilipâ luî tew gai lei. Aigum ze hekikechia ramme kai ze heki tew kam gai de lei.

²³Hirambe ne dekuaki kedibe ’ngguareu ze tew gai de lei; dekuaki kung pedit, petâ, sâu kereu, pehut sâu mengeu, zai dekuaki gua pelane ’ndeu gai dege, sâu himreu lei.

²⁴Kangngâgeî ne timriechî luî hang tewbe zene dekuaki kung ’nria kena kaiguâ lei; aize hegeîdui rûluapatbe luagene luagai’ndibe kau lei.

²⁵Ai dekuaki ze kangngâgeî ne getumsei kereu kena luî hang tewlube peireige bam lei, peî chum ze tingpeî ’mbia ’nrik, peî chum ze tingrun ’mbia ’nrik, peî chum ze tingpî ’mbia ’nrik zai kêdabe peî chum zene tingbia ’mbe ka’nrik lei; penui dang leine pelung ’mbe bam kam di lei.

²⁶Beseu ze hebadeipak lang lei; zai pemui â hepiak mui gum, zai lilipâ luigum tew lei; dekuaki ge hedui hit chang hedai riâ gut lu lei.

²⁷Hirambe ne kangngâgeî timriang du kereu tew gai lei; timriang ramme kat ge petâ sâu medai, pelung ge sâu medai zai pehut ge sâu medai kam lei.

²⁸Aize timriang ramme tewbe tak lei: chize hechingpak ramme ne dangguâ gai lei,

²⁹zai hechingpak ramme peireige duilui ramme, getumsei ramme zai kerubme bâm, zai mâpâ-gua luî ramme kaureu gai lei.

³⁰Timriang pelane ge kangngâgeîgua benai bepîguakang hang kangngâgeî ne tewlube ne kai lei; zai mik medai ge hegeî’ntui kairabe bâm hang kai lei. Chipau chia ramme kangngâgeîdui ne lua gai lu, chige mâpâ-gua tew gai lei.

³¹Mâ-kuak-mui ramme kungge tausuagaibe ze sâu kat lei; pemui ka’nggua lei, zai kechia pî ge besat tewgaibe gum ze pechuk du sâu kat ze bepi lei, pemui ge bepuâ tew ze giareu gai lei, zai ’ngkamki putkaibe ramme ze mik medai pung’nsamrap lei; chiramme ze ’nggua mak lei.

³²Zai bekam kangge bepîgua medai bam lei, bepîguakang ze timriang ge tewtemi gai lei, bepîgua hut ze sâu kat ze bepi lei.

³³Zai bepîgua ramme ze hekuntimriang pîgua gum ze tew lei, bepîguakang ramme, beku ramme, bechâptû ramme, zai bekuiki gua ramme ze kangngâgeî ne tew lei.

³⁴Chi timriangkuak mik medai ge tûnggaihabe-chia medai kai lei; zai chipau chia ramme ze pera ge tewtemi gai lei.

³⁵Timriang peireige mâ-gua tew gai lei, chize sâu kat ze bepi lei; zai pa’ntung ramme benai bepakpi ramme ze timriang ge tewherua gai lei.

³⁶Pa’ntung ramme benai bepakpi ge kerubme, duilui, zai mêupi bang luî ramme tew gai lei; mâpâ luî ne tewguâ gai lei.

³⁷Aipau luigum ze timriang kereu tew gai de lei; luagaibe du kat, zai periâ du kat, zai peluî du kat lei.

³⁸Zai pa ne kangngâgeî’ntui kereu tew gai lei, hegeî’ntui kat ge hedui hit haî desat gut lei, hegeî’ntui lung sâu medai lei. Zai timriang ’nsangne hang hegeî’ntui kai lei.

³⁹Zai heki gene tingrun ’mbia timriang mengeu, tingpeî ’mbia mengeu kai lei, zai heki gene tingpî naimikpat ’mbia pa ne dekuaki tew gai lei.

⁴⁰Hirambe ne heli, mâ-tuakbe kuak, zai hegeî’ntui ramme du tew gai lei; chigum ze heguang Solomonbe hangge Tingwang ki tewbe tâ leine tewkam’nchichiak kai lei.

⁴¹Kechia’ndi kena, betun ge heli luigum tewlube ruasuagaibe kena ge kechia puâ hang turiechipum luî ramme tewgaibe kechia kat tûn ge turiechipum luî ramme ’nria kena tewgaibe, timriang kereu benai bekuak kuak kereu tewgaibe, dekuaki dibe kangge getumsei kereu ze kena tewgaibe, heli ramme, mâ-tuakbe kuak ramme, heduikuak ramme, zai Tingwang gu kellumki hangge ka’nnangbe hekuak ramme tew gai lei. Heguang Solomonbe ne luneibe merua zat leine Hirambe ne tew gai lei. Chiramme leine ze kangngâgeî chiam pelinglube ne tew gai lei.

⁴²

⁴³

⁴⁴

⁴⁵

⁴⁶Jordan kâm Sukkoth benai Zarethan kakge hegeîlangbe bâm gene chiramme chiam ra lang gai lei.

⁴⁷Zai kie’nteu’ndibe ziegene chiramme Solomonbe ’nchu mak ze kai bei lei. Kangngâgeî rît ’ndaikie mei be riamchi ta di de lei.

⁴⁸Chigum ze Tingwang ki ge heli ramme leine Solomonbe ne tew gai de lei. Herâtewbe-kaira gechâk ne tewgaibe, pualiabe tingku-kaira gechâk ne tewbe kaira;

⁴⁹gechâk ka’nchibe ne tewbe kachâbung-kaira ramme, tingpî ’mbia mengeu zai tingpeî ’mbia mengeu ze hulangbe kisîam suage bam lei, mâpâ, kachâbung, zai desip ramme ze gechâk ne tew lei;

⁵⁰hepiak ramme, kachâleitu chiapbe tegîne, hedui-kuaki ramme, mâ-perîmyibe ka’ntaube kuak ramme, zai meching puabe kuak ramme gechâk ne tew lei; kellumki gu hekisiâm kedibe, benai hulangbe kisîam ka’nchibe bâm gu ’ngkam ramme hang gechâk ne ’ngkam’nnak (kobza) ramme tew gai lei.

⁵¹Chidadege heguang Solomonbe ne Tingwang ki hang tewrabe ramme leine tew kam lu de lei. Chidadege Solomonbe ne pe peu Dabidbe ne diepat’nchigaibe ramme gepût, gechâk, zai heli ramme tei lu ze Tingwang ki, merua kaibe bâm ge kai’ndui gai de lei.