Read Zeme Naga 1 HEGUANGME 8 Bible Online

1 HEGUANGME 8 - Zeme Naga bible

1 HEGUANGME 8

¹Chi Zaion, Dabidbe gu namdi gene samhatkaibebung ze Jerusalem ge heguang Solomonbe tailam teihang ra rang gai ra Israelme ruage gechîngchangme leine benai pezatme ruage bepeî changme zai Israelme gechîng pau-paime ki ramme ge kanguame besuitewme leine je Solomonbe ne kû’ndui wang gai de lei.

²Zai Israelme leine hekêu pasenabe Ethanim kêu ge kahengîbe bâm ge heguang Solomonbe dage wang’ndui gai de lei.

³Zai Israelme gechîngme leine wang de lei, zai tingkume ne hingdebung ze puahang de lei.

⁴Penui ne Tingwang gu hingdebung ka’nduibe, hetiampaîki zai paîki ge ka’nchibe hekuak, heli leine bambe ze penui ne teihang de lei; chiramme tingkume benai Lebime ne teihang de lei.

⁵Heguang Solomonbe benai Israelme baudime pe dage zuawangme ’nteumena hingdebung suage wang ze seikamdailaktibe, meli benai getumsei ramme ne herâtew gai de lei.

⁶Dadege kerubme kan kangge ’nchilangbe bâm, hekilung ge helungbe kakellumbeki ge tingkume ne Tingwang gu samhatkaibebung puagut ze pebâm ge kai bei de lei.

⁷Hingdebung benai hingdebung-kaira chia ramme bepeirei ’mbene sungnam ra hangge kerubme penui kan hingdebung kaibe bâm peireige liâmpat kai de lei.

⁸Helunglangbe ka’nchibe bâm suage ka’nchibe bâm gene du chipau chia ramme tûn ze ngauchi lu lei, tie-desangbeibe ziegeneu; sede hela gene chiramme ngauchi lak lei, zai chiramme nemai riâ du chige larei lei.

⁹Samhatkaibebung lungge mâ de ga lei, kane Ijipram gene penui patbe luage, Tingwang ne Israelme dage puinakat tew’ntipkaibe bâm Horeb loa ge Mosabe kaibe tingchudepei kena runne lei.

¹⁰Tingkume ka’nchibe bâm gene patbe luage Tingwang ki ze kemua ne puigit bam di de lei.

¹¹Chidadege kemua ne hiampuigitdibe ziegene tingkume tâ’ngguachi lak ra chang di de lei; Tingwang ki ge Tingwang ngeudibe ne puigit bamdibe ziegeneu.

¹²Dadege Solomonbe ne sa ze, “Tingwang ne naimik tinggîm ramme ge kai bei de lei, kane kemuakâng seudeibe ge pa bam gu lei, ze pa ne kacheu de lei.

¹³Nang betingbeta bamrabe heki, sasuangbeki, ning hangge I ne tew gai bei de lei,” ze kacheu de lei.

¹⁴Dadege Israelme baudime sapbe luage penui tailam pe ma ’nsua lu penui je ’nnam gai de lei.

¹⁵Pa ne sa ze, “Tingwang Israelme Rapeu je peize suang lau, a peu Dabidbe dage pa ne deseugaibe pe ba ne tewpui gai ze,

¹⁶‘Israelme je Ijip gene I ne nguapatbe mai gene seu ze Israelme zat leine ge a ji kairabeki hang namdi I ne kelâng ta di de lei; kane Israelme peireige peize besuitew ra Dabidbe je I ne kelâng gai de lei,’ ze kacheubepeu jeu.

¹⁷Chuna â Tingwang Israelme Rapeu ji gene heki tewchu ra a peu Dabidbe lung ge ka’nning de lei.

¹⁸Kane a peu Dabidbe je Tingwang ne sa ze, ‘A ji gene heki nang ne tew ra ka’nningbe ze yi-desang de lei,

¹⁹acheuleusedu heki ze nang â tew mak ra lei, kane ning na ’mpeumi napoine ning dagene lungkeupeu zene a ji gene heki tew ra lei,’ kacheu de lei.

²⁰Chuna â Tingwang ne deseugaibe ze tewpui gai ’nde lei; Tingwang ne deseugaibe luigum ze I ne a peu bâm ge chu ze, Israelme gu heguang-bâm ge ka’ntau de lei, Tingwang Israelme Rapeu ji gene I ne heki tew gai de lei.

²¹Zai anui pau-paime je Tingwang ne Ijipram gene nguapatbe luage, anui pau-paime dage Tingwang ne hatkaibe sam bambe hingdebung kai ra pebâm hang chige I ne rehei gai de lei,” kacheu de lei.

²²Chidadege Israelme baudime bambe gene Tingwang gu herâtewbe-kaira suage Solomonbe sap lu, tinggîm ’mbe pe ba kena huachu gai de lei;

²³zai acheu sa ze, “Hei, Tingwang Israelme Rapeu gau, ning gu samhatkaibe nang tei’mmi ze ning gu tâka’ngguame ning suage penui lung sing ne tatbeibe peireige hungka’ntipbe nang teiliabambepeu, nang gumbe kau ting kehube benai kedeisîng ge ’ngga lei;

²⁴ning guâ ka’ngguapeu, a peu Dabidbe dage nang ne samhat kai de lei, zai nang ne chize tewpui gai bei de lei, ning mui ne nang samhat kai de lei; zai nemai ge chize wangchang ra tew gai bei de lei.

²⁵Chidaze chuna â Hei, Israelme Rapeu Tingwang gau, ning tâ ka’ngguapeu, a peu Dabidbe je nang ne hatkaibe, ‘Nang ne a suage tatbe gum ze ning na ’mpeumi ramme a suage penui ’mpuî gene tat’ntîng bei zai â, a masua gene ning na ’mpeumi Israelme gu heguang-bamrâ ge ’ntaurabe kau hang ’ngga ta ra mak lei,’ kacheube sam ze nang ne chibam lau.

²⁶Chidaze chuna Hei, Israelme Rapeu gau, ning sam peize tew’ntip kai du lau, ning tâ ka’ngguapeu, a peu Dabidbe dage nang ne sagai’ndibe zeu.

²⁷“Kane gesangsing ze Hera kedei ge bam bam gu mei? Pie le lau, tinggîm benai tinggîm hulangbe ge nang â bamtâulak lei; I ne tewgaibe ki ze â ning hangge ’ndaizeuge chei de ra lau!

²⁸Sede Hei, Tingwang a Rapeu gau, nemai ge ning tâ ka’ngguapeu ning masuage ’nrung ze kiebe kuâ ’ngking gai ze, pa kakellumbe benai pa gekiebe ze tinggeu gai lau;

²⁹chidezai, ‘A ji chige bam gu lei’ nang acheu ranggaibe bâm aipau ki peireige kemuî-keba nang ne pie bam ra, dezai ning tâ ka’ngguapeu aipau bâm ’nreipie lu kakellumbe kuâ nang seu le ra hangge zeu.

³⁰Zai ning tâ ka’ngguapeu benai ning gu Israelme aipau bâm ’nreipie lu kellum dezai penui kiebe kuâ nang ne ’ngking gai lau; Eu lei, nang bambe bâm tinggîm gene ’ngking gai lau; zai nang seu dezai anui je lun gai lau.

³¹“Mige ne pe ramna’mpeu peireige hemui gai lu, pa’nzei hangge deseutew dai ra ’nning ze, aipau kilûng ge ning gu herâtewbe-kaira suage wang dizai â

³²ning gu tâka’ngguame peireige penui mâu bamme je pa ka’nzeibe luigum ze tew gai ze, tinggîm gene nang ne penui kuâ seu lu, penui je samram gai be lau.

³³“Ning gu Israelme ning peireige hemui tâ tewgailube ziegene heteureime masua gene kâukeu dezai, penui ne ning dage ’nreiwang dai ze, ning ji chî ze aipau ki gene kellum bei zai â,

³⁴nang ne tinggîm gene penui kuâ ’ngking gai lu, ning gu Israelme mâu lun gai ze, penui pau-paime hangge nang peigaibe heram ge penui je nguawang gai dai lau.

³⁵“Penui ne ning peireige hemui tâ tewbeibe ziegene tinggîm kebanam gai bei, tingruikeu ta di dezai penui ne aipau ki ’nreipie ze kellum ze ning ji kû ze, nang ne penui je tewkahereube lua penui gu hemui gene heliwang dai bei zai â,

³⁶nang ne tinggîm gene penui kuâ ’ngking gai ze, zai penui tatrabe ’mpuî hang keyibe nang penui je getei gai dezai penui ning tâ ka’ngguame ning gu Israelme mâu lun gai lau; zai nang ne ning gu ziemmena heurâ hang peigaibe heram ge tingrui gai dai ra pei lau.

³⁷“Heram lungge herakûm wanglêu ze, herarît mei nune kezai mei nune heriâmkau mei, nune tingtingbe mei, zai penui teureime ne penui gu namdi mâ-mâ ge tuaguâwang mei, herarît gechâm-châmbe, ka’nrâbe zat gechâm-châmbe bam mei,

³⁸mige hangkat ne mei nune ning gu Israelme leine ne mei pelung gene pechu tewkahereube benai pe run-runne ne chî lu kakellumbe leine zai mâ-mâ gekiebe leine ge zai aipau ki ’mbia pe ba getua’nrikpat kai bei zai â,

³⁹nang bambe bâm tinggîm gene ’ngking gai lu, nang ning runne ziemmena lungtak chîbepeu ne penui je lun ze penui kebambe tak nang ne pie ze nguabam lau;

⁴⁰chidezai anui pau-paime je heram nang peigaibe ge penui lung tâne penui ne ningchu hingchi ze bam le ra hangge zeu.

⁴¹“Chipau luigum ze, mi-mige ning gu Israelme makme, hesang’mpeu ning ji gene heram kedeu ’mbene wang dezai,

⁴²(Ning ji kedibe ning ba ranchi zai ning ba getuapatbe rasam penui seu gu daze), pa wang lu, aipau ki ’nreipie ze kellum dezai,

⁴³nang bambe bâm tinggîm gene pe kuâ ’ngking gai ze chi hesang’mpeu ne ning dage gekiebe sam luigum ze nang ne tew gai lau; chidezai ning gume bau Israelme ne tewbe luigum ze kedeirei ge ziemmena zat leine ne ning ji je hingchi ra, zai ning ji gene I aipau ki tew gai lei be penui chî le ra hangge zeu.

⁴⁴“Ning gume bau ne penui teureime je ’nggi ra tat lêuzai â, nang ne penui je tat ra langgai-gaibe bâm gene, nang ne kelânggaibe namdi benai ning ji gene I tewgaibeki ’nreipie ze penui Tingwang je kellum dezai,

⁴⁵nang ne tinggîm gene penui kakellumbe benai penui gekiebe kuâ ’ngking gai ze penui je nguadui gai lau.

⁴⁶“Mî de hemui tewmakbe kau â ga daze— ning peireige penui ne hemui gai bei ze, nang ne ning râtabe ne kenahia ge benai kedeu ’mbe heteureime ram ’mbe penui je kebang hang peize nîmtat ra heteureipeu ba ge penui je nang ne pei gai lêuzaidu;

⁴⁷penui je kebang hang nîmtatkai’ndibe heram gene penui lung gene ’nning dau dai ze, penui lung heli lu, penui je kebang hang tîmme ram gene ning dage kellum ze, ‘Anui hemui gai ’ndi de lei, anui hekuâpheumeu ze tâtew’nsia kam de lei,’ acheu dizai â

⁴⁸penui je kebang nguatatkaime, penui teureime ram ge penui ka’nningbe benai penui lung leine ne heliwang dai ze penui pau-paime hangge nang heram peigaibe namdi kat nang ne kelânggaibe, zai ning ji gene I ne heki tewgaibe lam’mbe ’nreipie ze ningchu kellum bei zai â,

⁴⁹nang bambe bâm tinggîm gene penui kakellumbe benai penui gekiebe kuâ ’ngking gai ze, penui je nguadui gai be lau.

⁵⁰Zai ning gume ning peireige hemui tâ tewgai’ndibe benai penui ne hedieka’ngkabe tâ ning peireige tewgai’ndibe leine peireige lun gai lau; zai penui je kebang hang nîmme mikngau ge ngauka’nggiabe bam ra pei gai lau, chidezai penui ne chime je peize ngau’nggia ra hangge zeu.

⁵¹(Penui â ning gume zai ning heu keyime Ijipram hemi kuiki ramme gene nang ne nguapatkaibeime bau daseu).

⁵²Penui ne ningchu ku tânege ning kun ’ndualie gai ze, ning guâ ka’ngguapeu gekiebe benai ning gume Israelme gekiebe ge peize ning mik rakpat kai lau.

⁵³Hei, Tingwang Hera gau, anui pau-paime je Ijipram gene nang ne nguapatbe ting ge ning guâ ka’ngguapeu Mosabe dage nang sagai’ndibe gum ze kedeirei ziemmena pezat gechâm-châmbe dagene nang ne penui je ning gume chang ra teichâm gai bei de lei,” ze kacheu de lei.

⁵⁴Dadege Solomonbe Tingwang dage kellum ze, kierabe kie kam gai lu dege, tinggîm ’mbia pe ba kena getuachu lu, kukdung ze bambe bâm Tingwang gu herâtewbe-kaira suagene zuachu de lei;

⁵⁵zai pa sap lu Israelme baudime peireige pe kuâchibe gene sa ze, ’nnam gai ze,

⁵⁶“Pe sam hatkailube luigum ze pe gu Israelme je saukatemibe peipeu, Tingwang je peize toa lau; pe guâ ka’ngguapeu Mosabe dagene pa hatkaibe sam keyibe ramme katte kêu’ngga mak lei.

⁵⁷Anui pau-paime dage Tingwang Hera ne nguabam-bam gum ze peize pa ne anui dage du nguabam-bam lau; anui je peize pa ne sâu gai se lau, zai peize put kai se lau;

⁵⁸chidezai pe gu ’mpuî leine ge anui tatchi le ra, pe gu samdiegaibe ramme, pe gu hingde rawdiakkaibe ramme, zai pe gu hingde tewgaibe ramme anui teichi le ra peize pa ne anui lung pe dage teiwang gai be ra hangge zeu.

⁵⁹Tingwang suage I ai kiegaibeibe sam ramme ze, kemuî-keba Tingwang Hera dage peize bam lau, zai peize pa ne Israelme benai penui gu heguangme nai’nsangne ka’nnangbe hangge tinggeu bam lau.

⁶⁰Chidezai kedeirei ge pezat leine ne, Tingwang â Hera lei, zai kêdabe ga lei be chî le ra hangge zeu;

⁶¹chipauziegene nemai gum ze pe gu hingde rawdiakkaibe ramme benai pe gu samdiegaibe ramme ge sui’mmi ze ningnui lung Tingwang dage lungsangtew ze peize bam lau,” kacheu de lei.

⁶²Chidadege heguang Solomonbe benai pe dage bamme Israelme Tingwang suage herâtewbe pualia de lei.

⁶³Tingwang dage desieyibe-râtewbe hangge Solomonbe ne getumsei chang ’ngkai ze kena, zai meli chang haî kat ze ’ngkai peipat te lei. Chigum ze heguang benai Israelme ’nteumena ne Tingwang ki diepat’nchi gai de lei.

⁶⁴Chipau mai gîm ge Tingwang ki suage bambe kerie zuilung ze heguang Solomonbe ne tew’nchi gai de lei; rûkambe-râtewbe zai chêu-râtewbe zai desieyibe-râtewbe meiji kâng ramme peipatkairabe bâm hangge Tingwang suage kangngâgeî ne tewbe herâtewbe-kaira ze chei dadege, chize ne rûkambe-râtewbe zai chêu-râtewbe zai desieyibe-râtewbe meiji kâng ramme peipat kai de lei.

⁶⁵Hamath kemui gene chu ze Ijip ’nggeutering riâ chang ze Tingwang anui Rapeu masua gene Solomonbe benai pe dage bamme Israelme baudime hezie sena hengî ze bam de lei.

⁶⁶Hezie padesatbe mai dege â, penui je tat dai kam ra lang gai ’ndi de lei; zai penui Solomonbe peireige getoabe pei gai de lei, zai Tingwang ne pe guâ ka’ngguapeu Dabidbe benai pe gu Israelme peireige pa keyibe teiliabeibe ziegene penui lung ge penui suigutpat ze, Solomonbe je toa ze, penui ki lam tat kam di de lei.