Read Zeme Naga 1 HEGUANGME 9 Bible Online

1 HEGUANGME 9 - Zeme Naga bible

1 HEGUANGME 9

¹Solomonbe ne Tingwang ki benai heguang ki hang tewbe zai pa ne heki tewneibe leine tew kam gai dege,

²Gibeon ge pechu liabe gum ze Solomonbe je Tingwang ne pakenabe liâ de lei.

³Dadege Tingwang ne pechu, “A dage nang ne kellum ze kiebe kuâ ze seu lu de lei; aipau ki nang tewgaibe ze I ne tew’nchi gai ’nde lei, zai chige a ji bam bam ra kai ’nde lei; pehî’nsangne chige a mik benai a lung bam bam gu de lei,

⁴zai ningchu â ning peu Dabidbe tat gum ze ning lung ’ntiprip ze gechîng lung pung ze, I ne ningchu samdiegaibe luigum ze nang tew ze, a gu rawdiakkaibe-hingde ramme benai a gu samdiegaidiakbe ramme tei ze a masuage tat bam bei zai â,

⁵I ne ning peu Dabidbe je ‘Israelme gu heguang-bâm ge ’ntaurabe kau gabe ziegene ning duângga bam ra pei ra mak lei,’ acheu ze hatkai’ndibe luigum ze betingbeta hang Israelme ruage ning gu heguang-bamrâ ze I ne tei’nsap kai gu lei,

⁶kane nang benai ning name achu suibe gene lietat ze ningnui suage a gu hingde ramme benai rawdiakkaibe-hingde ramme tei mak ze (kane) tat ze hera kêdabe ramme je ’nggua ze kellum dizaiâ,

⁷I penui hang peigaibe heram gene I ne penui je lutua ’ndu lei; zai a ji hangge tew’nchigai’ndibe heki ze du a mikngau gene I tuâpat kai ’ndu lei, dezai Israelme â miramme ruagene teihenuitew ze teisa bam ra, zai teliarame chang gai du lei.

⁸Zai aipau ki ze â kâukeu tuâ’mpum bam du de lei. Chige tatka’ngguakme leine ne ningdaulak ze kehuisiak bam gu lei; chidezai penui ne, ‘’Ndaitew ze Tingwang ne aipau ramme ge benai aipau ki peireige aigum tâtew gai rei lau,’ ze acheu gu lei.

⁹Chidezai penui ne, ‘Penui pau-paime je Ijip gene nguapatkaipeu Tingwang penui Rapeu je sâu gai nan ze hera kêdabe ramme je ’nggui ze kellum ze penui guâ ’ngguadibe ziegene de lei,’ ze penui acheu gu lei; chipauziegene penui peireige ai kesiabe Tingwang ne teiwang gai bei de lei, ze acheu gu de lei,” ze kacheu de lei.

¹⁰Solomonbe ne heki kena, Tingwang ki benai heguang ki tewbe kum ’ngkai chang dege,

¹¹Tira heguang Hirambe ne Solomonbe je kedarching benai chingkeleu zai gechâk pa ne ka’nnangbe riâ pei, zai heguang Solomonbe ne Hirambe je Galiliram namdi ’ngkai pei de lei.

¹²Kane Hirambe Solomonbe ne pechu namdi ramme peigaibe ngau gai ra Tira gene pa wang dege, chiramme ge pe lungwângchang mak te lei.

¹³Chipauziegene pa ne, “A kinapeu gau, achu nang namdi airamme peigaibe ze ’ndaigumbe zat se lau?” acheu bei de lei. Chigum ze nemai riâ penui ne Kabulram acheu kû bam lei.

¹⁴Hirambe ne Solomonbe dage gechâk hit chang medai suadu kie ze lang gai bei de lei.

¹⁵Aize heguang Solomonbe ne Tingwang ki, pa bambe ki, Millo, Jerusalem kerie, Hazor namdi, Megiddo namdi zai Gezer namdi ramme tewchu ra tâtewrame je kelângpatkaibe rasam rawgaibe de lei.

¹⁶(Pharaobe Ijipme gu heguang ne hang ze Gezer tewpânggut lu, chige hemitua gai bei de lei, zai Kanaanme gu namdi ge bamme je tewchat kam lu dege, pe na heleu’mpui ze Solomonbe dage meikeube mai ge pe na meipui hang chize kela pei gai bei de lei;

¹⁷chigum ze Solomonbe ne Gezer namdi ze tew’nsapchu gai de lei) zai ’ngkangbe Beth-horon,

¹⁸zai Judaram ge hênamkang ge Baalat benai Tamar,

¹⁹zai Solomonbe gu kerua kahekâmbe namdi leine, pe gu timriang kaibe namdi ramme, pe gu hekunteime bambe namdi ramme, zai Jerusalem ge, Lebanon ge zai pa ne kaheguangbe bâm leine ge pa ne tewgaineibe tâ leine tew’nsapchu gai kadai de lei.

²⁰Israelme makme, Amorme, Hethme, Perizme, Hibme zai Jebusme ruagene chai’nsakpatme,

²¹penui chângge penui name lungleîme, Israelme ne tew’nsiakammaktaime je â, kebang hangge chui gai kam ’ndi lei, zai chuna riâ chang ze chiramme larei lei.

²²Kane Israelme je â, kebang hang Solomonbe ne chui gai mak lei; penui â hereikang chang, zai pe kumme hang chang, zai pe gu hereikang saibe chang, pe gu hereikang gu haîmuiteime chang, pe gu timriang peireige besuitewme chang zai pe gu hekun chingchuabe ziemmename chang ze bam lei.

²³Aime ziemmena haî mengeu ze rengeume bau ne Solomonbe gu tâtewbe peireige besuitewme bau de lei.

²⁴Kane Pharaobe na heleu’mpui â Dabidbe gu namdi ge Slomonbe ne pe hang tewgaibeki ’mbe hang di de lei; dadege pa ne Millo tei’nsapchu gai bei de lei.

²⁵Solomonbe â pa ne tewlube herâtewbe-kaira ge kum kat ge luachum, rûkambe-râtewbe benai desieyibe-râtew ze Tingwang masuage perîmyibe ’ntau ze bam lei. Chigum tew ze pa heki tew kam gai de lei.

²⁶Edomram ge Kegiebe Sungkling kung Eloth hiage bambe Ezion-geber ge heguang Solomonbe ne hedui-’nneikuak chiampat danggit kai de lei.

²⁷Zai Hirambe ne pe gu tâka’ngguame sungkling ge bamme zai chime je Solomonbe tâka’ngguame bau dage kangkattew ze tat ra lang gai bei de lei;

²⁸zai penui ne Ophir ’mbe tat lu chigene gechâk hit chang kereu ze medai suadu kie ze teiwang de lei; zai penui ne chiramme heguang Solomonbe dage teiwang gai de lei.