Read Zeme Naga 2 HEGUANGME 1 Bible Online

2 HEGUANGME 1 - Zeme Naga bible

2 HEGUANGME 1

¹Ahabbe chaidibe châng dege Israelme je Moabme ne herei’nggi kadai de lei.

²Dadege Israelram gu heguang Ahaziabe Samaria ge pe ki ’nreibe kisîam gene ’ngngaîkeu ze kum gai di de lei; chigum ze pa ne hepâupaume je lang gai ze, “Tat chu lau, aige I kahejambe gene yi dai gu mei be Ekronram rapeu Baalzebub je ’nneudesi gai lau,” ze penui je pa rang gai de lei.

³Kane Tingwang gu tinggîm kenie’mpeu ne Tishberam ge kemeu’mpeu Elijabe je, “Chu le lau, Samariaram gu heguang gu hepâupaume je nang ne hedau gai ra hang zu lau, zai penui je, ‘Israelme ruage Hera ’nggadibe ziegene Ekronram rapeu Baalzebubbe dagene mâ-’mmêt ra wang mei?’ acheu be lau.

⁴Chidaze chunage Tingwang ne acheu rang gai ze, ‘Nang hejamgaidibe gene zuachu mak ze nang chai sing gu de lei,’ kacheu de lei,” ze kacheu de lei. Chidadege â Elijabe tat ti de lei.

⁵Hepâupaume heguang dage helatwang dai dege pa ne penui je, “’Ndaitew ningnui helatwang dai di lau?” kacheu de lei.

⁶Dadege penui ne pechu, “Mi hangkat ne anui je hedau ra wang lu, anui je, ‘Ningnui je langgaipeu, heguang tailam tat dai du lau, zai pechu, Tingwang ne aigum ze rang lei, Israelme ruage Hera ’nggadibe ziegene Ekron rapeu Baalzebubbe dagene mâ-’mmêt ra nang lang gai mei? Chipauziegene nang kahejambe gene yipat dai mak ze nang â chai sing gu de lei,’ kacheu de lei,” ze acheu bei de lei.

⁷Pa ne penui je, “Ningnui je hedau ra pat lu airamme ningnui je ranggaipeu ze ’ndaigumbe ziemmena bei lau?” ze kacheu de lei.

⁸Penui ne pechu, “Chipaupeu â mâ-gêupaî bâ lu, pe kia ge hemeigei kiakâk kak lei,” acheu bei de lei. Dadege pa ne, “Chipaupeu ze Tishbe’mpeu Elijabe de lei,” kacheu de lei.

⁹Chidadege â heguang ne ziemmena hangrengeu peireige besuitewpeu hangkat je pe gu ziemmena hang rengeume bau je ngua lu Elijabe tailam tat ra lang gai de lei. Kedeiloa ’ntûm ge ’ntau bambepeu, Elijabe tailam pa ne hang lu pechu, “Hei Hera gu ziemmena gau, heguang ne rang ze ‘Wangkeu lau,’ kacheu de lei,” ze kacheu de lei.

¹⁰Kane Elijabe ne ziemmena hangrengeu peireige besuitewpeu je, “I Hera gu ziemmena lei zai â tinggîm ’mbene hemi wangkeu ze nang benai ning gu ziemmena hangrengeume je peize rû kam ne lau,” acheu bei de lei. Chidadege â tinggîm ’mbene hemi wangkeu ze pechu zai pe gu ziemmena hangrengeume je rû kam ’ndi de lei.

¹¹Heguang ne kêdabe ziemmena hangrengeume peireige besuitewpeu hangkat je pe gu ziemmena hangrengeume je ngua lu pe dage tat ra lang gai kadai de lei, zai pa ne hang lu pechu, “Hei, Hera gu ziemmena gau, ‘Wangkeu kelua lau,’ aize heguang gu samde de lei,” ze acheu bei de lei.

¹²Kane Elijabe ne penui je kak ze, “I Hera gu ziemmena lei zai â, tinggîm ’mbene hemi wangkeu ze nang benai ning gu ziemmena hangrengeume je peize rû kam ne lau,” acheu bei de lei. Chidadege â tinggîm ’mbene Hera gu hemi wangkeu ze pechu benai pe gu ziemmena hangrengeume je rû kam ’ndi de lei.

¹³Heguang ne ziemmena hangrengeume peireige besuitewpeu pakechumpeu je pe gu ziemmena hang rengeume bau je ngua lu tat ra lang gai kadai de lei. Zai ziemmena hangrengeume bau peireige besuitewpeu, pakechumpeu ne hang lu Elijabe je wang ze kukdungkeu lu pechu kiâm ze, “Hei Hera gu ziemmena gau, a keringbe benai aime ning tâ ka’ngguame ziemmena hangrengeume keringbe ze peize ning mikngau ge pemîhung-kadesangbe chang ra ning dage I kie lei.

¹⁴Pie gai ni lau, tinggîm ’mbene hemi wangkeu ze besua’ngka gu ziemmena hangrengeume bau peireige besuitewpeu hangna je benai penai gu ziemmena hangrengeume bau je rû’ngga kam ’ndi de lei; kane chuna â a keringbe ze peize ning mikngau ge pemîhung-kadesangbe chang lau,” ze kacheu de lei.

¹⁵Chidadege Tingwang gu tinggîm kenie’mpeu ne Elijabe je, “Pechu ngua lu wangkeu du lau; pechu nang hing se lau,” ze acheu bei de lei. Chigum ze pa zuachu lu, heguang tailam pechu ngua lu wangkeu di de lei,

¹⁶zai pechu, “Tingwang ne aigum ze rang lei, ‘Hera gu sam ’mmêtdesi ra Israelme ruage Hera ’ngga di de mei? Nang ne Ekronram rapeu Baalzebubbe dage mâ-’mmêt ra hepâupaume je langgaibeibe ziegene de lei—chipauziegene nang kahejambe gene yipat dai ta di ze nang chai sing gu de lei,’ acheu zeu,” ze acheu zeu.

¹⁷Chigum Hera gu sam luigum ze Elijabe ne sa gai bei ze pa chai di de lei. Zai Ahaziabe na ’mpeumi gabe ziegene, Judaram heguang Jehoshaphatbe na Jehorambe ne heguangsapbe pakenabe kum ge pe kinapeu Jorambe ne pe kelei ge heguangsap kadai de lei.

¹⁸Ahaziabe ne tewgaibe rasam kêdadabe ramme Israelram gu heguangme rasam rawgaibe leisikuak ge raw gai mak ti lau?