Read Zeme Naga 2 HEGUANGME 10 Bible Online

2 HEGUANGME 10 - Zeme Naga bible

2 HEGUANGME 10

¹Samariaram ge Ahabbe name ’mpeumi riaksena bam lei, chigum ze Jehube ne Samariaram hang namdi ge samramme dage, gechîngme dage, zai Ahabbe name je kereîme bau hang samkela ramme raw lu langgaibe ge,

²“Chidaze chunage aipau samkela ning dage changgap dezai ning wangpeu name ning dage bamme, zai timriang benai hekun ramme du zai hereikerua ramme ning dage bambe ze,

³yilangbe gepa gai lau, zai ning wangpeu name ruagene kebuibe kau hang gepa gai lu ze pe peu gu heguang-bamrak ge teichu’ntau gai ra lei,” ze rang gai lei.

⁴Kane penui â hing-desang di ze, “Pie le lau, pe suage heguang hangna sapchi ta di de lei; chigum dizai ’ndaigum anui sapchi ra lau?” ze kacheu de lei.

⁵Chigum ze heguang-bâm ge bambepeu benai namdi ge besuitewpeu ne gechîngme benai kereîme je nguaherua lu, Jehube dage sam lang gai ze, “Anui â ning guâ ka’ngguame bau lei, zai nang ne rangbe leine anui tew ra de lei. Mî je du heguang hang anui sum gai ra mak lei; nang ne yira-rabe tew lau,” ze kacheu de lei.

⁶Chidadege â pakenabe samkela pa ne penui hangge raw gai ze, “A lam ’mbia ningnui bam zai ningnui a kuâ lu ra de lei dizai â ningnui wangpeu name peîdâng ramme a dage ’nchuamai chuna gumbe hî ge Jezril ge teiwang gai lau,” kacheu de lei. Zai heguang na ’mpeumi hang riaksename bau, penui je nguahanggaime, namdi ge besuitewme dage bam lei.

⁷Zai penui dage leisikuak chang dege penui ne heguang name je nguapat lu, riaksename je tewchat ’ndi de lei, zai penui peîdâng ramme ’ntui ramme ge kai lu, Jezril ge pe dage lang gai bei de lei.

⁸“Heguang na ’mpeumi ramme peîdâng penui ne teiwang la de lei,” ze hepâupaume ne wang lu, pechu rang gai bei dege â, pa ne, “Keriekemuiki ge chiramme tûm na koa gai lau, zai hechua riâ peize bamchang lau,” ze kacheu de lei.

⁹Zai hechua pa tatpat dege pa sap lu, ziemmena ramme je, “Ningnui â ningnui mâu ga lei, I â a pau peireige mâ-kesiabe tew ra ’mpung ze pechu bichatpeu de lei; kane airamme ze châu ne tewkau kam gai ni lau?

¹⁰Chidaze Ahab ki peireige Tingwang ne sam sagai’ndibe, Tingwang sam ze kedei ge mâ de kêu’ngga gai ra mak lei be chî le lau; Tingwang ne pe guâ ka’ngguapeu Elijabe dagene sagai’ndibe ze tew gai de lei,” kacheu de lei.

¹¹Chigum ze Jezril ge Ahabbe kibaume ’nsakpatme leine, pe gu ziemmena besuitewme leine, zai pe kang kahechutme, zai pe gu tingkume je Jehube ne bichat ’nzâuchiak ’ndi de lei.

¹²Chidadege â Samaria ’mbe tat ra pa zuapat ti de lei. ’Mpuiki ge melireîme gu tejeîki Beth-eked ge pa bambe luage,

¹³Judaram heguang Ahaziabe kiduîme je Jehube hedau lu pa ne, “Ningnui chaume lau?” acheu bei de lei. Zai penui ne, “Anui â Ahaziabe kiduîme lei, heguangsinme benai heguangpui name ’mpeumi ramme je hedau gai ra wangkeu lei,” ze kak kai de lei.

¹⁴Pa ne, “Penui je, ’nring nîm le lau,” acheu bei de lei. Zai penui ne penui je ’nring nîm lu, Beth-eked gu mâ-kuiki ge penui ziemmena hanghedai-ze-kename je bichathiam gai bei de lei.

¹⁵Zai chigene pa zuapat dai dege, Rekabbe na Jehonadabbe pechu ngauhedau gai ra wangpeu je pa kahedau de lei; zai pa ne pechu rechâ gai de lei, zai pechu, “Ning lung du a lung gum ze ’ntiprip ze bam mei?” kacheu de lei. Dadege Jehonadabbe ne kak ze, “Eu lei,” (chize de lei) kacheu de lei. Jehube ne, “Chigum dizai â, ning ba ngiêpat lau,” kacheu de lei. Chigum ze pechu pe ba ngiêpat kai bei de lei. Zai Jehube ne pechu timriang ge nguachu gai de lei.

¹⁶Dadege pa ne, “A tailam kei lei, Tingwang hangge a lungkaibe tak pie gai ni lau,” kacheu de lei. Chigum ze pa pe gu timriang gene chuatat ti de lei.

¹⁷Zai pa Samaria wangchang dege, Elijabe dagene saliabe Tingwang gu sam luigum ze Samaria ge Ahabbe kiduîme ’nsakpatme leine je pa ne bichat ’nzâuchiak kai bei de lei.

¹⁸Chidadege Jehube ne baudime leine je kûwang’ndui lu penui je, “Ahabbe â kecheîne runne Baal guâ ’nggua gai lei; kane Jehube â pechu misongga ’nggua gai gu lei.

¹⁹Chidaze chunage Baal gu kemeume leine pechu kakellumme leine benai pe gu tingkume leine je a dage kû gai lau; peize mî je de gabetew se lau, Baal dage herâtewbe kedibe I ne teleugairabe la daseu; chige wang-’nsangmakme â ring ra mak lei,” kacheu de lei. Kane Jehube â kêdabe ningching pung lu ze Baal je kakellumme leine je tew’nsia ra chize tew de lei.

²⁰Zai Jehube ne samdie gai ze, “Baal hangge ’nsimrim ze ’nduikuâme je tew’nchi gai du lau,” acheu bei de lei. Chigum ze penui chipau rasam paurua gai de lei.

²¹Zai Jehube ne Israelram leine ge lang gai de lei; zai Baal je kakellumme leine wang gai de lei, chigum ze hangkat du wangmaktaibe kau ga lei. Zai penui Baal ki ge gut te lei, zai Baal ki ze ziemmena ne pe mik-mik bampuigit ti de lei.

²²Paîni ki ge besuitewpeu je pa ne, “Baal je kakellumme leine hang paîni ramme teipat chu lau,” kacheu de lei. Chigum ze penui hangge pa ne paîni ramme teipat kai bei de lei.

²³Chidadege â Jehube ze Rekabbe na Jehonadabbe je ngua lu Baal ki lam’mbe tat ti de lei; zai pa ne Baal je kakellumme je, “Peu gai ni lau, zai ngau le lau, aige ningnui ruage Tingwang guâ ka’ngguame peize bam se lau, kane Baal je kakellumme runne ra lei,” ze acheu bei de lei.

²⁴Chidadege â pa herâtew ra, zai rûkambe-râtew ra gut ti de lei. Zai Jehube ne ziemmena riakdesatme je hela ge kailêu gai de lei, dadege â pa ne, “Ningnui ba ge I peipatkaibeime ruage hangkat je ’mpattuabe kau ze â pa keringbe ga gu lei,” kacheu de lei.

²⁵Pa herâtewbe benai rûkambe-râtewbe tew kam lu dege, Jehube ne kereîpeu benai tâ-muipuame je, “Gut lu, penui je tewchat ne lau, mi-mi je de peize pak’mbia se lau,” kacheu de lei. Chigum ze penui je bichat kai lu dege, kereîpeu benai tâ-muipuame ne penui je hela ’mbe tuâpat kai bei de lei, zai Baal ki helungbe sîam ’mbe penui gut ti de lei.

²⁶Zai Baal ki ge heraluîtewbe penui ne teipat lu rû ’ndi de lei.

²⁷Zai penui ne Baal luîtewbe tew’nsia kam gai lei, zai Baal ki tew’nsia kam gai lei, nemai riâ chang ze chipau ki ze kadesibeki hang tew gai bei de lei.

²⁸Aigum ze Jehube ne Baal je Israelram gene gechaîpat kai bei de lei.

²⁹Kane Nebatbe na Jeroboambe, Israelme je hemui ge ngua gai ra Bethel ge benai Dan ge gechâk ne tewbe getumseipoine luî ramme teleugaipeu gu hemui gene pa ’mbia mak lei.

³⁰Dadege Tingwang ne Jehube je, “A mikngau ge mâ-keyibe nang ne tew zun tew-wanggaibeibe ziegene zai I ne a lung ge ’nninggaibe luigum ze, Ahab ki peireige nang ne tâtewgaibeibe ziegene ning chaname ne rehei pamedaibe ge Israelram ge heguang-bamrak ge ’ntau gu lei,” kacheu de lei.

³¹Kane Jehube â pe lung leine ne Tingwang Israelme Rapeu gu hingde sui’mmi mak lei; Israelme je hemui tâ tew ra nguagaibe Jeroboambe gu hemui gene pa keli mak lei.

³²Chipau ting ge Israelram gu kedei gêsa â, Tingwang ne rittua chu di de lei. Hazaelbe ne Israelram dei duîgut’ndibe:

³³Jordan gene tingbia ’mbia ge Gileadram leine, Gadme zat ram leine zai Reubenbe zat ram leine, zai Manassebe zat ram leine, Gilead benai Bashan kacheube Aroer, chi Arnon kâm gene luchu de lei.

³⁴Zai Jehube gu tâtewbe rasam kêdadabe benai pa ne tâtewgaibe, pa pe ranchibe rasam leine Israelram gu heguangme rasam rawgaibe leisikuak ge raw gai mak ti lau?

³⁵Chigum ze Jehube â pe peume dage jeikeu gai di de lei, zai penui ne pechu Samariaram ge bai gai bei de lei. Zai pe na Jehoahazbe ne pe kelei ge heguangsap ze samram kadai de lei.

³⁶Samariaram ge Israelme ruage Jehube ne heguang sapkaibe tingkum ze kum ’ngkai ze desat lei.