Read Zeme Naga 2 HEGUANGME 12 Bible Online

2 HEGUANGME 12 - Zeme Naga bible

2 HEGUANGME 12

¹Jehube heguangsapbe pasenabe kum dege Jehoasbe heguangchu de lei, zai pa ne Jerusalem ge kum hedai kaheguang de lei. Pe pui ji â Beer-sheba’mpui Zibiale lei.

²Kemeu’mpeu Jehoiadabe ne Jehoasbe je â getei’mmi gai bei dadege pe gu ringting ge Tingwang mikngau ge ka’nzeibe tâtew ze bam lei.

³Acheuleusede pebâm kehube ramme ze â lutua gai mak lei; pebâm kehube ramme ge ziemmena ramme herâtewbe benai rûkambe-râtewbe ramme sau mak ze tew bam lei.

⁴Jehoasbe ne tingkume je, “Mâ-ka’nchibe gu rangkâng Tingwang ki ge teiwanggaibe leine, chipau hangge hangkat, hangkat ne rangkâng pei ra riagaibe ramme, ’nteumena ne pei ra riagaibe ramme, zai ziemmena lung gene luakatne Tingwang ki hangge rangkâng pei ra ’nningpat ze peigaibe ramme,

⁵tingkume ne chiramme pa gechîme dagene peize lu le lau; zai heki ’ndai-daige getak ra ka’nnang mei be hangge peize tew le lau,” acheu bei de lei,

⁶kane heguang Jehoasbe kum ’ngkai ze kechum heguangsapchang di ze, tingkume ne heki ze mâ de getakwang gai mak te lei.

⁷Chipauziegene heguang Jehoasbe ne tingkupeu, Jehoiadabe benai tingku kêdame je kûwang lu, penui je, “’Ndaitew ze ningnui heki teleuwang mak lau? Chidaze chuna â ningnui luîchime (rangkâng teime) dagene rangkâng lu ta lau, kane heki getakrabe hangge chize pei be lau,” ze kacheu de lei.

⁸Chigum ze tingkume ramme baudime dagene rangkâng lu ta ra, zai heki getak mak ra penui suîhezua gai de lei.

⁹Chidadege â tingkupeu ne heching bakso kedibe lu lu, pegum ge ki kat bûngput kai de lei, zai chize herâtewbe-kaira hia, Tingwang ki ge mi-mige gutbe ge hezat’mbia ge chize ’ngking gai de lei. Zai tingkume hekikegeu reîme ne Tingwang ki ge rangkâng teiwanggaibeibe leine chige kai de lei.

¹⁰Zai heching bakso kedibe lungge rangkâng misongga bamdibe penui ngau-ngaube luage heguang gu leisirawpeu benai tingku dilangpeu ne wang ze, Tingwang ki ge rangkâng ngaube leine riam lu chiaka ge kit kai lei.

¹¹Chidadege â rangkâng ’ndeupatkailube ze penui ne Tingwang ki reîme tâtewme ba ge kai de lei; zai penui ne Tingwang ki kateleume, heching tâ tewme benai heki tewme,

¹²zai tingchugiame benai tingchu tâ tewme ba ge Tingwang ki teleugetîng ra hang heching benai tingchu gialube lui ra, zai heki kagetîngbe tâ ge teitattewrabe hang rangkâng ze penui ne pei gai de lei.

¹³Kane Tingwang ki hangge gepûtgeî’ntui ramme, hegeî’ntui kuak ramme, hegeîluîkie ramme, zai mâ-li ramme gechâk benai gepût ne tewbe ramme Tingwang ki gene rangkâng lupatbe zene tew gai mak tai lei,

¹⁴chipau rangkâng zene heki teleukagetîngme hangge pei gai ’ndi dadegeu.

¹⁵Penui ne peling ne tâtewbeibe ziegene, tâtewme hî hang pei ra, chaume ne chaume ba ge rangkâng pei gai mei be rasam penui ’nneu ta di de lei, penui ne ’ntîngteî ze rangkâng teidibe ziegeneu.

¹⁶Kemaube-râtewbe benai hemui-râtewbe gu rangkâng ze â Tingwang ki ge teiwang gai mak lei, chize â tingkume gu chang lei.

¹⁷Chipau ting ge Siriaram heguang Hazaelbe ne hang ze Gathram ze ka’nggi de lei, zai chize pa ne lu ’ndi de lei. Kane Hazaelbe Jerusalem ’nggi ra hang ra pe ma ’nrik kai dege,

¹⁸Judaram heguang Jehoasbe ne Jehoshaphatbe benai Jehorambe zai Ahaziabe Judaram heguangme pe peume ne herâtewbe ge mâ-teurabe kela hang peipatkaibe benai pe gu pa ne peipatkaibe kela ramme, zai Tingwang ki gu keruakaibeki gene benai heguang ki gene gechâk ngaube leine ze Siriaram heguang Hazaelbe dage lang gai bei de lei. Chidadege â Jerusalem gene Hazaelbe tat ti de lei.

¹⁹Zai Joasbe tâtewbe rasam benai pa ne tewgai’ndibe rasam leine Judaram gu heguangme rasam rawgaibe leisikuak ge raw gai mak ti lau.

²⁰Pe guâ ka’ngguame ramme zuachu lu, mâ-kesiabe ka’mpung de lei, zai Joasbe Silla ’mbe wangkeube gene Millo ki gene pechu bichat ’ndi de lei.

²¹Shimeathbe na Jozakarbe, Shomerbe na Jehozabadbe pe guâ ka’ngguame ne pechu lakkau gai bei ze pa chai di de lei. Dadege â Dabidbe gu namdi ge pe peume taige penui ne pechu bai gai bei de lei, zai pe na Amaziabe ne pa kelei ge heguang chang ze samram de lei.