Read Zeme Naga 2 HEGUANGME 13 Bible Online

2 HEGUANGME 13 - Zeme Naga bible

2 HEGUANGME 13

¹Judaram heguang Ahaziabe na Joasbe ne heguangsapbe kum ’ngkai ze kechum kum ge Samaria ge Israelme dage Jehube na Jehoahazbe ne heguangchu de lei, zai pa ne kum kereu ze sena samram gai de lei.

²Tingwang mikngau ge tâ-kesiabe pa tew de lei, zai Nebatbe na Jeroboambe ne Israelme je hemui ge nguagaibe gu hemui geze pa du sui gai de lei; chiramme gene pa ’mbia mak tai lei.

³Zai Israelme peireige Tingwang ne pe râta-desang di de lei, zai Siriaram heguang Hazaelbe benai Hazaelbe na Ben-hadadbe ba ge penui je â pa ne peipat kai ’nsui bam de lei.

⁴Chidadege â Tingwang dage Jehoahazbe ne kiâm gai bei ze Tingwang ne pe kuâ ’ngking gai bei de lei; Israelme kategabe liebe, Siriaram heguang ne penui je kagetedbe tak ze pa ngau lu dadegeu.

⁵(Chipauziegene Siriame ba gene Israelme ’mbiapat le ra ripatrapeu hang Tingwang ne penui je pei gai de lei; dadege â tingtie gum ze Israelme penui ki-ki ge bam di de lei.

⁶Acheuleusedu Jeroboambe kibaume ne Israelme je hemui ge nguagaibe gu hemui gene penui ’mbiatat mak, kane chige ze penui tat bam lei; zai Asherah du Samaria ge bam bam lei.)

⁷Siriaram heguang ne chiramme tew’nsia ze chaîniang-gai’ndibe ziegene Jehoahazbe dage â mâ de sâudiak kai mak te lei, kane hekun teime ziemmena hangrengeu, hekun-timriang kereu zai mi pî ne tatme ziemmena chang kereu ’nsakkaibe runne zangnêu.

⁸Zai Jehoahazbe tâtewbe kêdadabe benai pa ne tewgaibe leine zai pa pe ranchibe rasam ze Israelram gu heguangme rasam rawgaibe leisikuak ge raw gai mak ti lau?

⁹Chigum ze Jehoahazbe â pe peume dage nguajeikeu gai di de lei, zai pechu Samariaram ge penui ne bai gai de lei; zai pe na Jehoasbe ne pa kelei ge kaheguang de lei.

¹⁰Judaram heguang Jehoahazbe ne heguangsapbe tingkum himreu ze sena chang dege, Jehoahazbe na Jehoasbe ne Samariaram ge Israelme peireige heguangchu de lei, zai pa ne kum kereu ze seruk kaheguang de lei.

¹¹Pa du Tingwang mikngau ge tâ-kesiabe tew de lei; Nebatbe na Jeroboambe ne Israelme je hemui ge nguagaibe gu hemui leine gene pa ’mbia mak, kane chiramme ge pa tat bam lei.

¹²Zai Joasbe tâtewbe kêdadabe benai pa ne tewgaibe rasam leine zai Judaram heguang Amaziabe je pa ka’nggibe pe ranchibe rasam Israelme gu heguangme rasam rawgaibe leisikuak ge chiramme raw gai mak ti lau?

¹³Chigum ze Joasbe pe peume dage nguajeikeu gai di de lei, zai Jeroboambe ne pe gu heguang-bamrâ ge ’ntau gai de lei; zai Joasbe je â Samariaram ge Israelram gu heguangme taige bai gai bei de lei.

¹⁴Zai Elishabe pa chairabe-’nra ’nrâkâu gai dege Israelram heguang Joasbe pe dage wangkeu lu pe suagene hap ze, “A peu! a peu! Israelme gu timriang ramme benai hekun ramme hangge zeu!” kacheu de lei.

¹⁵Dadege Elishabe ne pechu, “Bai’mpi benai hetu ramme tei le lau,” kacheu de lei; chigum ze pa ne bai’mpi benai hetu ramme lu lu de lei.

¹⁶Dadege â pa ne Israelram heguang je, “Bai’mpi lupat le lau,” acheu bei de lei; zai pa ne lupat kai bei de lei. Zai Elishabe ne heguang ba kena ge pe ba kena kai de lei.

¹⁷Dadege pa ne, “Tingbia ’mbia leubaki lat kai lau,” acheu bei lei, zai pa ne chize lat kai bei de lei. Chidadege â Elishabe ne, “Kap kai zu lau,” kacheu de lei. Dadege pa kap kai de lei. Zai pa ne, “Tingwang gu keduîbe bai’mpitu, Siria peireige keduîbe gu bai’mpitu! Siriame je Aphek gene penui je nang ne tew’ngga kam mak tâne nang ne penui je ’nggi gu daseu,” kacheu de lei.

¹⁸Zai pa ne, “Hetu ramme lu le lau,” kacheu de lei; dadege pa ne chiramme tei lu de lei. Dadege pa ne Israelram gu heguang je, “Chiramme zene kedei lak kai be lau,” acheu bei de lei; zai pa ne luachum lak kai lu sau gai di de lei.

¹⁹Chidadege â Hera gu ziemmena ne pechu pe râta di ze, “Nang lua mengeu, lua seruk lakkairabe kau zeî lau; chidezai Siriame je nang tew’ngga kam mak tâne penui je nang lakkau gu de zeî lau, kane chuna â nang Siriame je luachum ling runne tewkau gai gu de lei,” kacheu de lei.

²⁰Chidadege â Elisabe chai di de lei, zai penui ne pechu bai gai ’ndi de lei, zai kum’nsangne keriakting ge Moabme bau ne heram ze gua ka’nsui lei.

²¹Zai hangkat je bai gai lage, pie le lau, keloa guame bau je ngau di de lei, zai ziemmena je Elisabe raw ge tuâ gai bei de lei; dadege chipaupeu zene Elisabe ra ze kegeitâu gap kai dadege pa ringwang dai ze pe pî ne sap ti de lei.

²²Zai Jehoahazbe ringbe ting ge Siriaram heguang Hazaelbe ne Israelme je tewsâ ze bam lei.

²³Kane penui je â Tingwang ne, Abrahambe, Isaakbe, zai Jakobbe dage puinakattewdibe ziegene, tew’ngga gai mak ze, hung ze ngau’nggia gai bei de lei; zai chuna riâ chang ze penui je â pe dagene lutua mak ze bam lei.

²⁴Siriaram heguang Hazaelbe chai di dege pe na Ben-hadadbe ne pe bâm ge kaheguang de lei.

²⁵Chidadege â Jehoahazbe na Jehoasbe ne pe peu Jehoahazbe dagene namdi ramme, Ben-hadadbe ne lutat’ndibe ze pe dagene lu dai ’ndi de lei. Jehoahazbe pechu luachum duî lu ze Israelram gu namdi ramme lupat kai dai bei de lei.