Read Zeme Naga 2 HEGUANGME 14 Bible Online

2 HEGUANGME 14 - Zeme Naga bible

2 HEGUANGME 14

¹Israelram gu heguang Joahazbe na Joasbe ne kaheguangbe pakenabe kum ge Judaram gu heguang Joasbe na Amaziabe heguangchu de lei.

²Pa ne kaheguangbe ting ge pe kum ’ngkai ze mengeu lei, zai pa Jerusalem ge kum ’ngkai ze sekui kaheguang lei. Pe pui ji â, Jeho-adinle Jerusalem’mpui lei.

³Zai Tingwang mikngau ge tâ-yibe pa tew gai de lei, acheusedu pe peu Dabidbe gum â chang mak lei; pe peu Joasbe ne tew gai gum ze mâgetaleine pa tew gai de lei.

⁴Kane pebâm kehube ramme ze â tew’ngga gai mak lei; ziemmena ramme ne pebâm kehube ramme ge herâtew ze mâ-perîmyibe ramme rû ze bam gerei lei.

⁵Zai pe ba ge heguangrezie wang’nchichiak kai gap dege, pe gu tâka’ngguame, pe peu heguang je tewchatme je pa ne tewchat ’ndi de lei.

⁶Kane kegîbe tâ tewme name je â pa ne tewchat mak tai lei, Mosabe gu hingde leisikuak ge Tingwang ne samdiegaibe, “Pe name ziegene pe peume je tewchat mak ra lei, zai pe peume ziegene pe name je tewchat mak ra lei; kane ’nteumena mi gu gu hemui gene chai ra lei,” kacheube luigum zeu.

⁷’Nchaîbak kâm gene Edomme ziemmena chang kereu je pa ne tewchat ’ndi de lei, zai Sela ze natri tingkaichibe ne tew’nsia ’ndi de lei, zai chipau bâm je Joktheel ze ku lei. Nemai du chipau ji ze kû larei lei.

⁸Chidadege â Amaziabe ne hepâupaume je Israelram heguang Jehube na Jehoahazbe na Jehoasbe dage lang gai ze, “Wang lau, anui hedautâu sing gai kei lei,” kacheu de lei.

⁹Dadege Israelram heguang Jehoasbe ne Judaram heguang Amaziabe dage sam lang gai ze, “Lebanon peireige heturiebang ne Lebanon peireige kedarchingbang dage sam lang gai ze, ‘Ning na je a na nâu hangge kai lau,’ kacheu de lei; zai Lebanon ge mârekaune kat tatpat ze, heturiebang ze kutkâu gai bei de lei.

¹⁰Gesang sing ze nang ne Edom je lak bei de lei, zai nang ’nrîmyi la de lei, ning ngêudibe geze ning lungwângchang ze bam lau, zai kilûng ge bam lau; ’ndaitew nang ne tewkeleu bei ze nang benai ning dage Judame kau gai ra lau?” kacheu de lei.

¹¹Kane Amaziabe ne ’ngkingmeu tai lei. Chigum ze Israelram heguang Jehoasbe hang de lei, zai pa benai Judaram heguang Amaziabe, Judaram gu Beth-shemes gene kaherei de lei.

¹²Dadege Judaram je â Israelram ne duî ’ndi de lei, zai ’nteumena ne penui ki lam-lam ’mbe paktat kam di de lei.

¹³Zai Israelram heguang, Jehoasbe ne Beth-shemes gene Ahaziabe na Jehoasbe na Judaram heguang Amaziabe je duî lu Jerusalem ’mbe wang de lei, zai Ephraim kemui gene Helabe Kemui riâ ge sâu haî medai Jerusalem kerie tewkau ’ndi de lei.

¹⁴Zai Tingwang ki ge benai heguang ki gu keruakaibeki ge gechâk, gepût zai hepiak, hekuak zai heli ramme ngaudaube leine pa ne lu ’ndi de lei, zai pumlei hangge penui je du lu ’ndi de lei, dadege Samariaram ’mbe pa helatwang dai di de lei.

¹⁵Zai Jehoasbe tâtewbe kêdadabe benai pa ne tewgaibe zai pa pe ranchibe zai Judaram heguang Amaziabe dage pa kahereibe rasam ze Israelram heguangme rasam rawgaibe leisikuak ge raw gai mak ti lau?

¹⁶Zai Jehoasbe pe peume dage jeikeu di de lei, zai Samariaram ge Israelram gu heguangme taige bai gai bei de lei; zai pe na Jeroboambe ne pe bâm ge samram kadai de lei.

¹⁷Judaram heguang Joasbe na Amaziabe ze Israelram heguang Jehoahazbe na Jehoasbe chaidibe châng gene kum kereu ze mengeu ring gai de lei.

¹⁸Zai Amaziabe ne tâtewgaibe rasam, kêdadabe rasam, Judaram heguang rasam rawgaibe leisikuak ge chiramme raw gai mak ti lau?

¹⁹Zai penui ne Jerusalem ge pechu tew’nsiarabe chiâm hang tew de lei, dadege â Lakis ’mbe pa pak kai di de lei, kane Lakis ’mbe pe chai sui ra penui ne lang gai ze, chigene pechu bichat ’ndi de lei.

²⁰Zai pechu penui ne hekun ramme gene nguawang de lei; zai Dabidbe keloa Jerusalem ge pe peume taige pechu â bai gai bei de lei.

²¹Zai Judaram baudime ’nteumena ne, kum kereu seruk changdipeu Azariabe je ngua lu ze, pe peu Amaziabe kelei ge pechu heguang hang sum gai bei de lei.

²²Pa ne Elath tei’nsap kai de lei, zai heguang, pe peume dage jeikeudibe châng dege Judaram hangge chize pei dai bei de lei.

²³Joasbe na Amaziabe ne Judaram ge heguangsapbe kum kereu ze mengeu chang dege, Israelram ge Jehoasbe na Jeroboambe ne heguang chang di de lei, zai Samariaram ge pa ne samramchu ze kum hedai ze kat riâ samram ze bam de lei.

²⁴Zai Tingwang mikngau ge tâ-kesiabe pa tew gai de lei; Nebatbe na Jeroboambe ne Israelme je hemui ge nguagaibe gu hemui gene pa ’mbia mak lei.

²⁵Tingwang Israelme Rapeu gu sam Gath-hepher ge bambepeu kemeu’mpeu, Amittaibe na pe guâ ka’ngguapeu Jonabe dagene pa saliabe luigum ze Israelme gu kedei’nrai ze, Hamath ge gutbe kemui gene Araba sungkling riâ chang ze pa ne lupat kai kadai de lei.

²⁶Kebang changme, kebang changmakme mi-mi je de sâu gai ta di, Israelme je ’ngngâgairabe kau mî de gadibe ziegene Israelme kahereube liebe kecheîne tadibe ze Tingwang ne ngau di de lei.

²⁷Kane tingkehube kang gene Israelme ji chui’ngga ’ndu lei be Tingwang ne sa gai mak lei, chigum ze penui ne Joasbe na Jeroboambe ba gene pa ne ’nripat kai bei de lei.

²⁸Zai Jeroboambe tâtewbe kêdadabe benai pa ne tewgaibe zai pa pe ranchibe pa kahereibe tak, zai Judaram gu changbe Damaska benai Hamath ze Israelme hangge pa ne peigaikadaibe tak rasam ze Israelme Heguangme rasam rawgaibe leisikuak ge chiramme raw gai mak ti lau?

²⁹Zai Jeroboambe ze pe peume Israelram gu heguangme dage jeikeu di de lei, zai pe na Zekariabe ne pa kelei ge kaheguang de lei.