Read Zeme Naga 2 HEGUANGME 15 Bible Online

2 HEGUANGME 15 - Zeme Naga bible

2 HEGUANGME 15

¹Israelram gu heguang Jeroboambe ne kaheguangbe tingkum ’ngkai ze sena chang dege, Judaram gu heguang Amaziabe na Azariabe heguangchu de lei.

²Pa heguangchube ting ge pe kum kereu ze seruk chang di de lei, zai Jerusalem ge pa kum rengeu ze kena heguangsap lei. Pe pui ji â, Jekoliale Jerusalem’mpui de lei.

³Pe peu Amaziabe ne tewbe luigum ze pa Tingwang mikngau ge tâ-yibe tew de lei.

⁴Acheuleusedu pebâm kehube ramme ze â pa lutua gai mak lei; ziemmena ramme pebâm kehube ramme ge herâtew ze mâ-perîmyibe ’ntau ze bam lei.

⁵Tingwang ne heguang je tew’nteu gai bei ze, pa kechaibe mai riâ ka’mpapeu chang ze bam de lei, zai heki kêdabe ge pa bam lei, zai heguang na Jothambe ne heram ge ziemmena ramme je samram ze pe ki ge pe sui-sui ne bam lei.

⁶Zai Azariabe tâtewbe kêdadabe benai pa ne tewgaibe leine rasam Judaram gu heguangme rasam rawgaibe leisikuak ge chiramme raw gai mak ti lau?

⁷Zai Azariabe pe peume dage jeikeu di de lei, zai Dabidbe gu namdi ge pe peume dage penui ne pechu bai gai bei de lei, zai pe na Jothambe ne pa kelei ge heguangsap te lei.

⁸Judaram gu heguang Azariabe kaheguangbe tingkum himreu ze desat chang dege, Samariaram ge Israelme peireige Jeroboambe na Zekariabe ne kêu seruk heguang gai de lei.

⁹Zai pe peume ne tewbe luigum ze Tingwang mikngau ge pa tâsiabe tew de lei. Nebatbe na Jeroboambe ne Israelme je hemui ge nguagaibe hemui gene pa tat’mbia mak lei.

¹⁰Jabesbe na Shallumbe ne pechu tew’nsia ra chiam de lei, zai Ibleam gene pechu tewkau ze tewchat kai lu ze pa ne pa kelei ge samram de lei.

¹¹Chidaze pie le lau, Zekariabe ne tâtewbe rasam kêdadabe ramme ze Israelram gu heguangme rasam rawgaibe leisikuak ge raw gai la de lei.

¹²(Aize Tingwang ne Jehube dage hatkaibe sam de lei: “Ning name ne rehei pamedaibe riâ chang ze Israelme gu heguang-bâm ge ’ntau gu lei,” kacheube zeu. Zai chipau luigum ze chize wangchang de lei.)

¹³Judaram heguang Uzziabe ne kaheguangbe tingkum himreu ze sekui kum ge Jabesbe na Shallumbe heguangchu de lei, zai pa ne Samaria ge kêu kat heguang gai lei.

¹⁴Chidadege â Tirza gene Gadibe na Manahembe hang ze Samaria ge wang de lei, dadege pa ne Jabesbe na Shallumbe je Samaria gene tewkau gai lu tewchat kai ’ndi de lei, dadege pa ne pe bâm ge kaheguang de lei.

¹⁵Zai Shallumbe tâtewbe rasam kêdadabe ramme benai pa ne mâ-kesia ka’mpungbe rasam ramme, pie le lau, Israelme heguangme rasam rawgaibe leisikuak ge chiramme raw gai la de lei.

¹⁶Chipau ting ge Menahembe ne Tappua benai pe lung ge bamme leine zai Tirza gene chu ze chipau heram ze tewka’nsia de lei; chize pechu penui ne lat kai mak taibe ziegene pa chize tewka’nsia de lei, zai pa ne chige bamme ’mpuimi ka’mpungme je penui bungpui tewtit kam gai bei de lei.

¹⁷Judaram heguang Azariabe ne heguangsapbe tingkum himreu ze sekui chang dege, Gadibe na Menahembe ne Israelram peireige heguangchu de lei, zai pa ne Samariaram ge kum kereu kaheguang de lei.

¹⁸Zai Tingwang mikngau ge pa tâsiabe tew gai de lei; Nebatbe na Jeroboambe ne Israelme je hemui ge nguagaibe gu hemui gene pa keringbe tingluî ’mbiatat mak lei.

¹⁹Assiria heguang Pulbe ne heram ze ’nggi ra wang de lei; zai Menahembe ne pa heguang gu rezieteibe ge peize pechu ’ngngâ ra Pulbe je gepût talent chang kat pei bei de lei.

²⁰Menahembe ne Assiria heguang je pei ra hang Israelme keheume leine benai ’mpeumi leine dagene gepût shekel rengeu-ngeu ’nchi-chine kiewang de lei. Chipau luigum ze Assiria heguang helatwang dai di ze chipau ram ge ’nnai gai mak tai de lei.

²¹Zai Menahembe ne tâtewgaibe rasam kêdadabe ramme ze Israelram gu heguangme rasam rawgaibe leisikuak ge chiramme raw gai mak ti lau?

²²Zai Menahembe pe peume dage jeikeu di de lei, zai pe na Pekahiabe ne pa kelei ge heguangsap kadai de lei.

²³Judaram heguang Azariabe heguangsapbe tingkum rengeu kum ge Menahembe na Pekahiabe ne Samariaram ge Israelme peireige heguangchu de lei, zai pa ne kum na heguang gai de lei.

²⁴Zai Tingwang mikngau ge tâsiabe pa tew gai de lei; Nebatbe na Jeroboambe ne Israelme je hemui ge nguagaibe hemui gene pa tat’mbia mak lei.

²⁵Zai pe gu hereikang besuitewpeu, Remaliabe na Pekabe ne pechu tew’nsia ra chiam ze pe dage Gileadme ziemmena rengeume je ngua lu Samaria ge heguang ki gu heguang kerie gene pechu bichat kai lu ze pa kelei ge pa ne kaheguang de lei.

²⁶Zai Pekahiabe tâtewbe rasam kêdadabe benai pa ne tewgaibe leine rasam, pie le lau, Israelme heguangme rasam rawgaibe leisikuak ge chiramme raw gai la lei.

²⁷Judaram heguang, Azariabe kaheguangbe tingkum rengeu ze kena chang dege Remaliabe na Pekabe ne Samariaram ge Israelme peireige heguangchu de lei, zai kum ’ngkai heguang gai de lei.

²⁸Zai Tingwang mikngau ge tâsiabe pa tew gai de lei; Nebatbe na Jeroboambe ne Israelme je hemui ge nguagaibe hemui gene pa tat’mbia mak lei.

²⁹Israelram heguang Pekabe ringbe ting Assiriaram heguang Tiglath-pileserbe ne wang ze Ijon, Abel-beth-maakah, Janoa, Kedes, Hazor, Gilead zai Galili, Naphtali ram leine lu kam ’ndi de lei, zai pa ne ziemmena ramme je Assiria ’mbe nguatat kam di de lei.

³⁰Chidadege â Elabe na Hoshiabe ne Remaliabe na Pekabe je tew’nsia ra chiam de lei, zai pechu tewkau gai lu bichat ’ndi de lei, zai Uzziabe na Jothambe ne kaheguangbe tingkum ’ngkai kum ge pa kelei ge kaheguang de lei.

³¹Zai Pekabe tâtewbe kêdadabe benai pa ne tâtewgaibe leine rasam, pie le lau, Israelram heguangme rasam rawgaibe leisikuak ge chiramme raw gai la de lei.

³²Israelram gu heguang Remaliabe na Pekabe ne kaheguangbe tingkum pakenabe kum ge, Judaram heguang Uzziabe na Jothambe heguangchu de lei.

³³Pa heguang chube ting ge pe kum ’ngkai ze mengeu chang di de lei, zai pa ne Jerusalem ge kum kereu ze seruk heguang gai de lei. Pe pui ji â, Zadokbe na Jerushale lei.

³⁴Pe peu Uzziabe ne tewgaibe leine gum ze Tingwang mikngau ge tâ-yibe pa tew de lei.

³⁵Acheuleusedu pebâm kehube ramme ze â tew’ngga mak te lei; ziemmena ramme herâtew ze pebâm kehube ramme ge mâ-perîmyibe ’ntau ze bam bam lei. Pa ne Tingwang ki gu ’nreibe kemui tew gai de lei.

³⁶Zai Jothambe tâtewbe rasam kêdadabe benai pa ne tâtewgaibe leine rasam ze Judaram gu heguangme rasam rawgaibe leisikuak ge chiramme raw gai mak ti lau?

³⁷Chipau ting ge Judaram je ’nggi ra Siriaram heguang Rezinbe benai Remaliabe na Pekabe je lang gai de lei.

³⁸Jothambe pe peume dage jeikeu di de lei, zai pe peu Dabidbe gu namdi ge pe peume dage bai gai bei de lei; zai pe kelei ge pa na Ahazbe ne kaheguang de lei.