Read Zeme Naga 2 HEGUANGME 16 Bible Online

2 HEGUANGME 16 - Zeme Naga bible

2 HEGUANGME 16

¹Remaliabe na Pekabe ne heguangsapbe tingkum kereu ze sena kum ge Judaram heguang Jothambe na Ahazbe heguangchu de lei.

²Ahazbe pe tingkum ’ngkai ge heguangchu de lei, zai Jerusalem ge pa ne kum kereu ze seruk heguang gai de lei. Pe peu Dabidbe ne tewgaibe luigum ze Tingwang mikngau ge tâ-yibe tew mak lei,

³kane Israelram heguangme ’mpuî ge pa tat te lei. Pe na je ’nsangdu herâtew ze rû gai ’ndi de lei, Tingwang ne Israelme baudime masua gene kelipatkaibeibe zat zene katenetbe tewbe luigum zeu.

⁴Zai pebâm kehube ramme ge, peloaramme ge, zai hingbang ringbe kang ’nsangne ge pa herâtew ze mâ-perîmyibe ’ntau ze bam lei.

⁵Chidadege â Jerusalem peireige herei’mpung ra Siriaram heguang benai Israelram gu heguang Remaliabe na Pekabe hang de lei, zai penui ne Ahazbe je tuagua de lei, kane pechu duî lak ti de lei.

⁶Chipau ting ge Edomram heguang ne, Elat benai Edom lu dai ’ndi de lei, zai Elat gene Judaram name je kelipat ’ndi de lei; zai Edomme Elat ge wangchang di de lei, nemai riâ chang ze penui lungbe bâm gezeu.

⁷Chigum ze Ahazbe ne hepâupaume je Assiriaram heguang Tiglat-pileserbe dage lang gai ze, “I â ning tâ ka’ngguapeu zai ning na de lei. Hang lau, achu ka’nggime Siriaram heguang ba gene benai Israelram heguang ba gene achu meupat kai lau,” ze kacheu de lei.

⁸Ahazbe du heguang ki gu kerua kaibeki benai Tingwang ki gene ngaudaube gepût benai gechâk ze kela hangge Assiriaram gu heguang dage lang gai de lei.

⁹Zai Assiriaram gu heguang ne pe kuâ ’ngking bei de lei; Assiriaram gu heguang ne Damaska ge hang ze chipau heram ge ziemmena ramme je kebang hangge Kir ’mbe nguatat ze chize lu ’ndi de lei, zai pa ne Rezinbe je tewchat ’ndi de lei.

¹⁰Heguang Ahazbe Assiriaram gu heguang Tiglath-pileserbe je hedau gai ra Damaska ’mbe tat dadege, Damaska ge herâtewbe-kaira bambe pa ngau de lei. Dadege heguang Ahazbe ne tingkupeu Uriabe dage herâtewbe-kaira miê pelane peluîtaksiakbe lang gai de lei.

¹¹Zai Uriabe tingkupeu ne herâtewbe-kaira tew gai de lei; heguang Ahazbe Damaska gene wang makge heguang Ahazbe ne Damaska gene langgaibe tak luigum ze tingkupeu Uriabe ne teleu gai de lei.

¹²Zai heguang Damaska gene wang dege herâtewbe-kaira heguang hezêu gai de lei. Chidadege â herâtewbe-kaira hiage heguang wanghechut lu chige chu di de lei,

¹³zai pe gu rûkambe-râtewbe benai mâ-himlei hangge herâtewbe hangge pa ne rû gai ze, pe gu sakbe-râtewbe ruî gai bei de lei, zai herâtewbe-kaira peireige pe gu desieyibe-râtewbe gu hejai ze ruî gai bei de lei.

¹⁴Zai Tingwang suage hetageî ne tewbe herâtewbe-kaira bambe ze Tingwang ki suagene pe gu herâtewbe-kaira benai Tingwang ki kak gene pa ne tei’mbiapat lu ze pe gu herâtewbe-kaira gene tingbia ’mbia ge chize kai bei de lei.

¹⁵Zai heguang Ahazbe ne tingkupeu Uriabe je samdie gai ze, “Herâtewbe-kaira kedibe gene hechua ge rûkambe-râtewbe, hegî ge mâ-himlei-râtewbe zai heguang gu rûkambe-râtewbe benai pe gu mâ-himlei-râtewbe ge heram lungge ’nteumena gu rûkambe-râtewbe benai penui gu mâ-himlei-râtewbe zai sakbe-râtewbe ramme ze rû’mpam gai lau, zai chipau kaira peireige rûkambe-râtewbe gu hejai leine benai herâtewbe gu hejai leine kezin gai lau; sedu hetageî ne tewbe herâtewbe-kaira zene a hang mâ-ka’mmêtbe-kaira chang ra lei,” ze kacheu lei.

¹⁶Tingkupeu Uriabe ne airamme leine heguang Ahazbe ne diegaibe luigum ze tew gai bei de lei.

¹⁷Heguang Ahazbe ne bechia ramme gu pa’ngra ramme lupat kai bei de lei, zai chiramme gene mâ-huibe kuakra tei’mbiapat kai bei de lei, zai chi hedui kuak, bekang ge hetageî ne getumsei kena luî tewbe pungbe ze pa ne lukeu gai lu, chize tingchutau peireige kai bei de lei.

¹⁸Assiriaram heguang zene heguang-bambeki lungge ’ntakbambe mai hang ’mpuîki keniak ze teleugaibe benai heguang ki lam gutbe helabe kemuiki ze Tingwang ki gene pa ne lutua gai bei de lei.

¹⁹Zai Ahazbe tâtewbe kêdadabe rasam ze Judaram gu heguangme rasam rawgaibe leisikuak ge chiramme raw gai mak ti lau?

²⁰Zai Ahazbe pe peume dage jeikeu di de lei, zai Dabidbe gu namdi ge pe peume dage pechu bai gai bei de lei; zai pe na Hezekiabe ne pa kelei ge kaheguang de lei.