Read Zeme Naga 2 HEGUANGME 17 Bible Online

2 HEGUANGME 17 - Zeme Naga bible

2 HEGUANGME 17

¹Judaram heguang Ahazbe ne heguangsapbe tingkum kereu ze kena kum ge Elabe na Hoshiabe ne Samariaram ge Israelme ruage heguangsap te lei, zai pa ne kum sekui heguang gai de lei.

²Zai Tingwang mikngau ge tâsiabe pa tew gai de lei, acheusedu besuage Israelme gu heguang sapkairaime gum â chang mak lei.

³Pechu ’nggi ra hang Assiria heguang Shalmaneserbe hang de lei; dadege Hoshiabe ne pe gu heguang sinpeu chang de lei; zai pechu ’mpuâhâ pei gai lei.

⁴Kane Assiria heguang ze Hoshiabe dage pe lungriaksiabe tak ngau di de lei; pa ne Ijipme gu heguang Sobe dage hepâupaume je lang gai ze, patingkum ’nsangne ge pa tewbambe gum ze Assiria heguang dage ’mpuâhâ meitadibe ziegeneu; chipauziegene Assiria heguang ne pechu â kebangki ge bangnam gai bei de lei.

⁵Chidadege â Assiria heguang ne heram leine gechimgut lu, Samariaram ge wang de lei, zai chize pa ne kum chum tuaguâ nan ze bam de lei.

⁶Hoshiabe kaheguangbe pasekuibe kum ge Assiria heguang ne Samaria duîgut ze Israelme ramme je pa ne Assiria ’mbe nguatat ti de lei, zai penui je Hala ge, zai Gozan geuki Habor peireige zai Medes namdi ramme ge bam ra kai bei de lei.

⁷Aigum ze wangchangbe ze Israelme ne Ijipram ge Ijipme gu heguang Pharaobe ba kang gene penui je nguapatkaipeu Tingwang penui Rapeu peireige hemuitew ze kêdadabe râ ramme je kakellumbe ziegene

⁸benai Tingwang ne Israelme bau masua gene tuâpatkaibe heramzatme telungsie ramme benai Israelram gu heguangme ne telungsie hang tewpatkaibe ramme ge tat ze bamdibe ziegene de lei.

⁹Zai Israelme bau, Tingwang penui Rapeu peireige ’nzeimakbe tâ ramme ’ngkim ne tew gai ze bam de lei. Penui ne penui gu namdi ramme leine hekêtkaibe bâmra gene chu ze namdi tewrehuîgaibe riâ changbe ge herâtewbe-kaira ramme penui hangge tew gai ze bam lei.

¹⁰Penui ne hingbang kang ’nsangne ge zai peloa’ntûm peirei ’nsangne ge penui hangge gechia kedibe ramme benai Ashera rapui luî ramme teleu gai lei;

¹¹zai chi pebâm kehube leine ge penui mikngau gene Tingwang ne nguatattime zat ne tewbeibe luigum ze, penui mâ-perîmyibe rû ze bam lei. Zai penui Tingwang lumpum tâ ze tâsiabe tew de lei,

¹²zai, “Ningnui aize tew ra mak lei,” ze Tingwang ne kacheube heraluîtewbe ramme je penui kakellum de lei.

¹³Acheuleusede Tingwang ne kemeume leine benai mâ-keliâbe ngaume leine dagene Israelme benai Judame hangge sam rang gai ze, “Ningnui peume dage I samdiegaibe benai kemeume a guâ ka’ngguame dagene I langgaibe ningnui peume dage a gu hingde leine peigaibe ramme luigum ze ’mpuî kesiabe gene helatwang dai ze a gu hingde ramme benai a gu hingde rawdiakkaibe ramme reî’mmi lau,” ze kacheu de lei.

¹⁴Kane penui peume, penui Rapeu Tingwang je ’nnum’mmimakme gum ze penui ’ngking gai mak ze penui lungchi ze bam lei.

¹⁵Pe gu rawdiakkaibe-hingde ramme benai penui peume dage pe gu samhatkaibe zai penui je ’ntîng ra ranggaibe ramme ge penui ne ngau’nna ze bam lei. Heraluîtewbe karasa ramme je penui sui ze mau di de lei, zai penui je tuaguâ ze bamme heramzatme, Tingwang ne diegaibe ge penui â penui gum ze tew mak ra lei, kacheume chai suitat ti de lei.

¹⁶Zai penui Rapeu Tingwang gu hingde ramme penui sâu gai kam nan ze, penui hang getumsei kena miê hang hegeîdui lualube ne tew gai lei; zai Asherah luî hang teleu lu, kehu ’mbe bambe leine je kellum ze Baal je kellum ze bam lei.

¹⁷Zai penui na ’mpeumi ramme benai ’mpuimi ramme je herâtewbe ge rû gai ze hedachakpie zai kahekabe tâ tew ze Tingwang mikngau ge tâsiabe tew ze pe lumpum tew ra penui runne penui je zua gai ze bam lei.

¹⁸Chipauziegene Tingwang ne Israelme je pe râta-desang di ze, pe mikngau gene penui je lutua ’ndi de lei; Juda zat je runne zangno, mî je de ’nsak kai tadi de lei.

¹⁹Judame ne du Tingwang penui Rapeu gu hingde pheu mak ze Israelme ne tewpatkaibe sie ramme ge sui ze bam lei.

²⁰Zai Tingwang ne Israel chaname leine je tuâpat kai bei de lei, zai penui je tewhereu gai zai pe mikngau gene pa ne penui je lutua kam mak tâne penui je tew ka’ngngamme ba ge pei gai bei de lei.

²¹Pa ne Israelme je Dabid kiduîme ruagene tew’nsia gai bei dadege â Nebatbe na Jeroboambe je penui ne heguang hang sum gai dai lu bam de lei. Zai Israelme je peize Tingwang je sui ta ra Jeroboambe ne tei’mbia gai bei, zai penui ne hemui tâ tew ra tew gai bei de lei.

²²Jeroboambe kahemuibe ’mpuî ge Israelme tat te lei; chiramme gene penui ’mbia mak lei,

²³Tingwang ne pe guâ ka’ngguame kemeume dagene sagai’ndibe luigum ze pe mikngau gene Israelme je guatua gai mak tâne gezeu. Chipau luigum ze nemai riâ Israelme je â penui ram singbe gene Assiriaram ’mbe guapat kai bei ze la lei.

²⁴Assiriaram heguang ne Israelme kelei hangge ziemmena ramme je Babilon, Kutha, Ibba, Hamath zai Sepharbaim gene nguawang ze Samaria namdi ramme ge kai bei de lei; dadege â penui ne Samariaram ’nrak lu, chige namdi ramme ge lung di de lei.

²⁵Zai penui chige lunggairaibe ting ge â, penui Tingwang je hing mak lei; chipauziegene penui ruage duilui ramme lang gai bei ze, penui hanggesame je â tewchat ’ndi de lei.

²⁶Chidadege â Assiria heguang je rang gai ze, “Nang ne heramzatme ramme je nguatat lu Samaria namdi ramme ge kaibeime bau ze pedeiname rapeu gu hingde penui chî mak lei; chipauziegene penui ruage duilui ramme je pa ne lang gai bei de lei, zai pie le lau, penui ne pedeiname rapeu gu hingde chimakbe ziegene penui je tewchat te lei,” ze kacheu de lei.

²⁷Chidadege â Assiria heguang ne samdie gai ze, “Nang ne chilia ’mbe tingkume je nguatatkai’ndime ruage hangkat je lang gai lau; zai peize pa ne tat ze chige bam lu, pedeiname rapeu gu hingde penui je getei gai lau,” ze acheu bei de lei.

²⁸Chigum ze tingkume ruagene hangkat Samariaram gene penui ne nguatatpeu wang lu Bethel ge bam ze, Tingwang je penui hingrabe tak getei gai de lei.

²⁹Kane pezat leine ne penui lungbe namdi ramme ge penui rapeu ramme luî hang teleulube ze Samariame ne teleugaibe pebâm hube ramme gu kellumki ramme ge chiramme kai’nsui ze bam de lei;

³⁰Babilonme ne Sukkoth-benoth ze chiampat, Kuthme ne Nergal chiampat, Hamathme ne Ashima chiampat,

³¹zai Ibbame ne Nibhaz benai Tartak chiampat ze bam lei; zai Sepharbaimme ne Sepharbaimme râ kena Adrammelek benai Anammelek dage hemi ge penui name je rû gai ze bam lei.

³²Penui du Tingwang je hing ze penui ruagene ziemmena gechâm-châmme je pebâm kehube ramme gu kellumki ramme ge herâtew ra pebâm hube ramme gu tingku ramme hangge sum gai de lei.

³³Chigum ze penui Tingwang je hing da, kane penui je nguatatme ne tew-tewbe sie chai sui ze penui râ ramme guâ ’nggua ze bam di de lei.

³⁴Nemai riâ du tingtie luigum ze penui tew larei lei. Tingwang je penui hing mak, zai Tingwang ne Israelme acheu ze kûme, Jakobbe name dage hingde rawdiakkaibe mei, nune hingde tewgaibe ramme mei, zai hingde ramme mei ze tew ra peibe ramme penui sui mak lei.

³⁵Tingwang ne penui dage samhat kai lu, penui je samdie gai ze, “Ningnui hera kêdadabe ramme je hing mak ra, penui suage keikeu kellum mak ra, penui guâ ’nggua mak ra, zai penui hangge herâtew gai mak ra lei;

³⁶kane Tingwang ningnui je pe ba huapat ze reziechibe gene Ijipram gene ningnui je nguapatkaipeu je ningnui hingchi ra lei; pe dage ningnui keikeu ze pe dage ningnui herâtew gai ra lei.

³⁷Pa ne ningnui hangge hingde rawdiakkaibe benai hingde tewgaibe zai hingde benai samde rawgai’ndibe ze tei’ntîng ze ningnui tewtat ra lei. Kêdabe hera ramme je ningnui hing mak ra lei,

³⁸zai ningnui dage I samhatkaibe ze ’ngngaî se lau. Kêdabe hera ramme je ningnui hing mak ra lei,

³⁹kane Tingwang ningnui Rapeu je ningnui hing ra lei, dezai ningnui teureime ba gene pa ne ningnui je ’nripat kai gu lei,” ze kacheu de lei.

⁴⁰Acheusede penui â seu mak ze tingtie tewbe luî tew ze bam lei.

⁴¹Chigum ze aime heramzatme Tingwang je hing ze kellum ze bam sedu penui gu heraluî hang chiamlube je pe guâ ’nggua bam lei; penui name luîrun ze penui chaname bau du bam de lei. Penui peume ne tewgaibeibe luigum zeu.