Read Zeme Naga 2 HEGUANGME 18 Bible Online

2 HEGUANGME 18 - Zeme Naga bible

2 HEGUANGME 18

¹Israelram heguang Elabe na Hoshiabe ne kaheguangbe ting pakechumbe kum ge Judaram heguang Ahazbe na Hezekiabe heguangchu de lei.

²Pa heguangchube kum ge pe tingkum ’ngkai ze mengeu lei, zai Jerusalem ge pa ne kum ’ngkai ze sekui heguang gai lei. Pe pui ji â, Zekariabe na Abile de lei.

³Zai pe peu Dabidbe ne tewbe luigum ze Tingwang mikngau ge pa tâ-yibe tew gai de lei.

⁴Pebâm hube ramme pa ne lutua ze, mâ-luîtewbe ramme tew’nsia zai Asherah ze bikau ’ndi de lei, chipau ting riâ Israelme ne mâ-perîmyibe rû gai ze bambe, Mosabe gu kangngâgeî ne tewbe henêu luî ze pa ne tew’nsia ze kedeîhitruai gai bei de lei. Chi je Nehustan ze ku lei.

⁵Tingwang Israelme Rapeu je pa ’nnum’mmi bam lei, chigum ze Judaram heguangme pa sua heguangraidime benai nâdime ruage pa gumbe kau mî de ga lei.

⁶Pa â Tingwang je ’nggui’ntip ze bam lei; pechu sui ze bambe gene pa â tat dai ta di ze, kane Tingwang ne Mosabe dage hingde ramme hang diegaibe ze pa tei’mmi bam de lei.

⁷Chidadege â Tingwang pe dage bam di de lei, pa tatkaibe bâm leine ge pa â lung’ntua ze bam lei. Assiria heguang je pa â ’nggi ze pe tâ ’nggua mak lei.

⁸Pa ne Philistinme je Gaza benai chipau heram rai riâ hekêtkaibe-kaira kehube gene namdi tewrehuîlube riâ chang ze duî ’ndi de lei.

⁹Heguang Hezekiabe ne kaheguangbe pakechumbe kum, chize Israelram heguang Elabe na Hoshiabe kaheguangbe pasenabe kum dege Assiria heguang Shalmaneserbe ne Samaria ’nggi hang ze tuaguâ ’ndi de lei,

¹⁰zai kum chum bamtud kai dege pa ne chize lu ’ndi de lei. Hezekiabe ne kaheguangbe pa serukbe kum, chize Israelram heguang Hosiabe ne kaheguangbe pasekuibe kum ge Samariaram ze lutat ti de lei.

¹¹Assiria heguang ne Israelme je Assiria ’mbe nguatat lu penui je Hala ge zai Gozan geuki Habor ge zai Medes namdi ramme ge kai bei de lei.

¹²Chize Tingwang guâ ka’ngguapeu Mosabe ne samdiegai bei sedu penui ne Tingwang penui Rapeu kuâ pheu mak ze pe gu samhatkaibe tew’nsiabeibe ziegene de lei; penui â ’ngking de ’ngking mak, zai pheu de pheu mak lei.

¹³Heguang Hezekiabe heguangsapbe kum kereu ze medai chang dege Assiria heguang Sennakeribbe ne hang ze Judaram namdi ka’ntipbe ramme ze ’nggigut ze chiramme lu ’ndi de lei.

¹⁴Dadege Assiria heguang dage Judaram heguang Hezekiabe ne Lakis ge sam lang gai ze, “I ne tewmau ’ndi de lei; achu ’nggisau gai du lau; nang ne achu pung ra tuagaibe put I pung ra de lei,” ze kacheu de lei. Dadege â Assiria heguang ne Judaram heguang Hezekiabe dage gepût talent haî chum zai gechâk talent himreu pei ra rang gai de lei.

¹⁵Dadege Tingwang ki ge gepût leine benai heguang ki heurâ ramme ngaulube leine Hezekiabe ne pechu pei gai de lei.

¹⁶Chipau ting ge Tingwang gu kellumki ’ngkam ramme ge benai Judaram gu heguang Hezekiabe ne ’ngkamchia ramme ge gechâk kaugaibe ramme Hezekiabe ne gâupat lu Assiria heguang je pei gai de lei.

¹⁷Zai Assiria heguang ne Tartan Rabsaris zai Rabshakeh aime je hereikang baudime je ngua lu Lakis gene Jerusalem ge heguang Hezekiabe tailam tat ra lang gai bei de lei, zai penui Jerusalem ge hangchang gai de lei, penui wangchang dege, wang ze paî kagetabe bâm ’mbe tatbe ’mpuî ge ’ngkiêzai ’nreibe gu heduiga ge sap kai de lei.

¹⁸Zai penui heguang je kû gai dege, penui tailam Hilkiabe na Eliakimbe, heguangki ge besuitewpeu zai Shebnabe leisirawpeu zai Asapbe na Joabe, rawka’nduipeu patlêu de lei.

¹⁹Dadege Rabshake (tâ) tewpeu ne penui je, “Hezekiabe je, ‘Assiria heguang, heguang dilangpeu ne acheu ze rang ze: Nang ’ndai gene ai mâ-kebai ra chang lu lau?

²⁰Sam runne ne hereirabe hangge kakedâbe benai mi rimchi hang changlube hang nang ’nning gai se mei? Nang châu je ’nnumtew lu achu ka’nggi rei se lau?

²¹Pie le lau, heruapum puptibe tui, chige ’ngguigaime leine je duakjâmrabe, Ijipme je nang â ’nnumtew de lei. Ijipme gu Pharaobe heguang je ’nnumtewme â aigum bam de lei.

²²Kane nang ne achu, “Anui Rapeu Tingwang je anui ’ngngêu bam lei,” acheu dizai â, Juda benai Jerusalem je Hezekiabe ne, “Jerusalem ge aipau herâtewbe-kaira suagene ningnui kellum ra lei,” acheu ze salia gum ze Hezekiabe ne pebâm hube ramme benai herâtewbe-kaira ramme tew’ngga’ndibe ze pa ne pe gu mak ti lau? ze kacheu de lei.

²³Chidaze kei lei, aipau Assiria heguang dage samria kai ze ’mpau kei lei: ning lam ’mbia gene hekun chingchuame hang peu duî bei zai â, I ne ningchu hekun chang na pei gu lei.

²⁴Timriang ramme benai hekun chingchuame hanggene Ijipme je nang ’nnumtewlube ne ’ndaigum ze a pau guâ ka’ngguame ruage cheilangme ruage hereikang muiteipeu hangkat je nang tewkauchi ra lau?

²⁵Aipau peireige du aize tew’nsia ra, Tingwang ’ngga ze aipau bâm je ’nggi ra I aige hang mei? Tingwang ne achu, Aipau bâm ’nggi ra hang du lau, zai chize tew’nsia ne lau, kacheu de lei be salia lau,’ zeu,” kacheu de lei.

²⁶Chidadege â Hilkiabe na Eliakimbe benai Shebnabe zai Joabe ne Rabshakeh tewpeu je, “Ning suiyi ze ning guâ ka’ngguame je, Aramaik lad ne sa gai lau, anui seuchi lei; kerie rieguabe peireige bamme geseube ruagene Judame lad (Hebrai) ne anui je ’mpau se lau,” kacheu de lei.

²⁷Kane Rabshakeh ne penui je, “Ziemmena kerie-riebe peireige ’ntau lu ning dage penui duângga ne penui bâ teu zai penui jûng sakme dage aipau sam ramme salia mak ze, nang benai ning gu heguang je salia ra a gu heguang ne achu lang gai semei?” ze kacheu de lei.

²⁸Chidadege â Rabshake ne sap lu ze, Judame lad gene, “Assiria heguang, heguang dilangpeu, sam ’ngking le lau!

²⁹Aigum ze heguang ne rang lei: ‘Hezekiabe ne ningnui je a ba gene ’nripatchi lak daze peize pa ne ningnui je duai se lau.

³⁰Hezekiabe ne, Tingwang ne anui je ’nripat kai sing gu lei, zai Assiria heguang ba ge aipau namdi ze pei gai be ra mak lei, acheu ze Tingwang peireige peize ningnui ’nnum’mmi ra ningnui je tew gai se lau,’ acheu zeu.

³¹Hezekiabe kuâ ’ngking se lau; Assiria heguang ne aigum ze rang lei: ‘A dage desieyibe tew lu, a tailam zuapat te lau; chidezai ningnui ’nteumena ne mi gu, mi gu grepchî teu ra, mi gu mi gu ’mbeuchîbang bam zai mi gu, mi gu dekuaki dui sak kû lei;

³²ningnui chai mak ze ring le ra hangge I ne wang ze ningnui je ningnui ram gumbe heram, wain benai tak kiebe heram, tingku benai grepchî yibe heram, olib chingbang benai ’ngkuidui kiebe heram ’mbe nguatat kai mak tâne gezeu. Zai Hezekiabe ne ningnui je ngua’mmie ze, Tingwang ne anui je ’nripat kai gu lei, acheu dezai pe kuâ ’ngking se lau.

³³Mâdauge heramzatme gu hera ne Assiriaram heguang ba gene pe ram ’nripatkaibe la mei?

³⁴Hamathram benai Arpadram gu hera ramme ’ndaige la lau? Sepharbaim, Hena zai Ibbaram gu hera ramme ’ndaige la lau? Penui ne a ba gene Samaria ze ’nripat kai mei?

³⁵Heram ramme leine gu hera ramme leine ruage châu a ba gene penui ram ’nripat lu lau? Chidaze Tingwang ne a ba gene Jerusalem ’nripat ra semei?’ acheu zeu,” ze kû’nchi gai de lei.

³⁶“Pechu kak se lau,” kacheube ze heguang gu samde dadege, baudime ne penui kuâneu mak ze pechu sam kie kat de kak kai mak tai lei.

³⁷Hilkiabe na Eliakimbe heguang ki ge besuitewpeu, zai Shebnabe leisirawpeu zai Asapbe na Joabe mâ-mâ rawka’nduipeu penui ne penui paî hit’nsia’ndibe ramme tei lu ze, Hezekiabe dage wang lu Rabshake gu sam ramme pechu salia gai bei de lei.