Read Zeme Naga 2 HEGUANGME 19 Bible Online

2 HEGUANGME 19 - Zeme Naga bible

2 HEGUANGME 19

¹Heguang Hezekiabe chipau sam seu lu dege â, pe paîni hit ze miseigiriapaî bâ lu hap ze Tingwang ki lam’mbe tat ti de lei.

²Zai miseigiriapaî bâ lu Amozbe na, kemeu’mpeu Isaiabe dage ge tat ra pa ne heguang ki ge besuitewpeu Eliakimbe leisirawpeu, Shebnabe zai tingku tewchîngdime je tat ra lang gai de lei.

³Penui ne pechu, “Hezekiabe ne acheu rang lei, nemai â mi duânggabe, ka’ngngiambe zai kahelêube tingnaimikpui de lei; napoine ramme lungkeu ra chang di, penui je lungpat ra herantewchi lak ti de lei.

⁴Rabshake pe pau, Assiria heguang ne keringbe Rapeu je ki’nnui ra langgaipeu gu sam ramme leine ze Tingwang ning Rapeu ne seu lu lau de lei, zai Tingwang ning Rapeu ne sam seube ze, pa ne ’ngngiam gai gu de lei; chidaze ring’nsakpatme hangge nang ne kellum gai du lau,” ze kacheu de lei.

⁵Heguang, Hezekiabe gu tâka’ngguame Isaiabe tailam wang dege,

⁶Isaiabe ne penui je, “Ningnui pau je, ‘Tingwang ne aigum ze rang lei: Assiria heguang guâ ka’ngguame ne achu ka’nrube sam ramme ningnui seube ziegene hing ze bam se lau.

⁷Pie le lau, I ne pe dage herui kat kai gu lei, chidezai saka’ngguakbe kuâ pa seu lu pe ki lam helatwang dai de ra hangge zeu; zai I ne pechu pe ram singbe gene hiazutkie gene kau ra tew gai gu lei,’ kacheube pau gai lau,” ze kacheu de lei.

⁸Rabshake ze helatwang kadai de lei, zai Libna je Assiria heguang ne hereika’nggibe ngau de lei; heguang â Lakis ’mbe tattibe rasam pa seu lu dadegeu.

⁹Zai Ethiopia heguang, Tirhakabe rasam, “Pie le lau, pa ne ningchu herei ra zuapat ti de lei,” kacheube heguang seu lu dege Hezekiabe dage pa ne hepâupaume je lang gai dai ze,

¹⁰“Judaram heguang Hezekiabe je nang aigum salia ra lei: ‘Nang ka’ngguipeu Hera zene Jerusalem ze Assiria heguang ba ge pei gai ra mak lei, ze hatkaibe zene peize ningchu duaibe chang se lau.

¹¹Pie le lau, Assiria heguangme ramme ne heram ramme leine peireige tâtew ze tew’nsiakamgaibe rasam nang seu de lei. Zai ningchu meupat kai bu semei?

¹²A peume ramme ne Gozan, Haran, Rezep zai Telassar ge lungme Eden ziemmena ramme je heramzatme gu hera ramme dagene penui je ’nripat kai bei semei?

¹³Hamath gu heguang, Arpad gu heguang, Sepharbaim namdi gu heguang, Hena gu heguang nune Ibba heguangpeu ze ’ndaige la lau?’ zeu,” ze kacheu de lei.

¹⁴Hepâupaume ba gene samkela ze Hezekiabe ngau lu kiâ gai de lei; zai Tingwang ki ’mbe Hezekiabe hang lu, Tingwang masuage chize rapat kai bei de lei.

¹⁵Dadege Tingwang masuage Hezekiabe ne kellum ze, “Hei Tingwang Israelme Rapeu, kerubme peireige ka’ntaupeu, kedeirei heguang ramme leine ge ning runne Hera de lei; tinggîm benai kedei nang ne tew gai lei.

¹⁶Hei Tingwang gau, ning kun ’ndualie gai ze ’ngking gai lau, Hei, Tingwang gau, ning mik rakpat pie gai lau; keringbe Rapeu je ki’nnui ra langgaipeu Sennakeribbe sam ramme seu le lau.

¹⁷Hei Tingwang gau, Assiria heguangme bau ne heramzatme benai penui ram ramme gua’mpiehâmmuîgai’ndibe,

¹⁸zai penui gu hera ramme je hemi ge tuâgai’ndibe ze gesang de lei; penui â penui gu hera ramme ga ze ziemmena batâ heching benai tingchu runne dadegeu; chipauziegene penui je â tew’nsia kam gai ’ndi de lei.

¹⁹Chidaze chuna â Hei Tingwang gau, kedeirei heguangram leine ne, ning runne Tingwang Hera lei be peize chî ra, ning ba ne anui je tew’nringpat kai ra I ningchu kiam lei,” ze kacheu de lei.

²⁰Chidadege Amozbe na Isaiabe ne Hezekiabe dage sam lang gai ze, “Tingwang Israelme Rapeu ne rang ze: Assiria heguang Sennakeribbe deu gene nang ne a dage kellumgaibe ze I seu lu de lei.

²¹Pe rasam tedeu ge Tingwang ne sagaibe ze aigum de lei: “Zaion na’mpui, leusang ka’nchipui ne ningchu ngauka’nna de lei, zai ningchu tewkahelêu de lei; Jerusalem na’mpui ne ning chai ’mbene pe peî kakezit te lei.

²²“Châu je nang takakehi lau, zai châu je nang deset kai lau? Châu peireige nang ’nret ze keditewbe gene ning mik piekari gai lau? Israelme gu ka’nchipeu peireige de lei!

²³Ning gu hepâupaume je langgaibe gene Tingwang je nang ne teihenuitew gai ’ndi de lei. Zai nang ne, ‘Lebanon hulangbe bâm riâ chang ze a gu timriang misongga tei lu kedeiloa hube ramme ge I hang gai lu de lei; kedarchingbang hulangbe ramme, Sipres chingbang ’nzâlangbe ramme I ne kuîkau gai de lei; deu langbe bâm ’nrêu kungzingbe bâm ge I tatchang gai de lei.

²⁴I ne dekuaki ramme su lei, zai hesangme gu hedui ze sak lei, zai Ijipram geuki leine a pîdei ne kutchangku gai kam de lei,’ ze kacheu de lei.

²⁵“Tingtie gene I aize tew ra ’nninggaibe rasam nang seu mak mei? Chuna I tâtewbe ze ’ndâting gene I ’nningkedâkua di de lei; chidezai nang ne namdi ’ntiptibe ramme tuâgechutrut bam ra tew gai gu lei.

²⁶Penui ramname penui ran-gakeukamdibe lua helung cheikeu di, zai penui suî hang ga di de lei, zai peningkâm ge mâ-kiak ramme gum, hereubuâ ka’nnuabe gum, zai heki’mpûm ge hereubang gum penui chang gai di de lei; chize chîngpatrabe suagene kezai gutkaidibe kau mei?

²⁷“Kane nang ’ntaukeube benai nang pat ze gutbe, zai nang achu kakeliangbe I chî lei.

²⁸Nang ne achu kakeliangbe ziegene, zai nang keditewbe kuâ a kun ge seuchangdibe ziegene, I ne ningchu nang megau kai gu zai a gu hegeîdâng ne ning muiki ge kai gu lei, zai nang wangbe ’mpuî gene I ne ningchu chuitua dai ’ndu lei.

²⁹“Zai aize ne ning hangge ka’nchetbe chang gu lei: nang henai kum ge mâ-mâ pe runne puakpatbe teu ra lei, zai pakenabe kum ge chipau luigum ze patbe teu ra lei, chipau châng pakechumbe kum ge nang ling ze gat ra, zai grepchî merie tew ze perachî nang raiteu ra lei.

³⁰Zai Judabe kiduîme ring’nsakpatme ze pema hiam’nchukgut dai gu, zai pechî ’nchi’ntuachu gu lei;

³¹kecheîne ’nsakkaime Jerusalem gene tatpat ku lei, zai Zaion loa gene ring’nsakpatme bau tatpat ku lei, Tingwang pa lungsang singbe ranchi gene aize tew gu lei.

³²“Chipauziegene Assiria heguang deu ge Tingwang ne acheu sa ze, pa aipau namdi ge gut ra mak, zai chige hetu katte kap kai ra mak, zai chipau namdi suage hinggei tei lu ze wang gai ra mak, zai penui ’nseubâm hangge kedei kebauchu ra mak lei.

³³Pa wangbe ’mpuî gene pa helat dai gu, zai aipau namdi ge pa wang ra mak lei, ze Tingwang ne kacheu de lei.

³⁴A ji hangge ne benai a guâ ka’ngguapeu Dabidbe ji hanggene aipau namdi tew’nring gai ra I ne sapdang gai gu daseu,” kacheube zeu.

³⁵Zai chipau mai tingmuîzeu ge Tingwang gu angel’mpeu pat lu Assiriame gu tejeîki ge ziemmena chang haî kat ze riakdesat-ze-mengeume je bichat ’ndi de lei; zai hechuasûn ziemmena ramme chu dege, pie le lau, airamme ze kechaipum ’nnia di de lei.

³⁶Dadege â Assiria heguang Sennakeribbe pe ki lam’mbe tat ti de lei, zai Ninebi ge lung di de lei.

³⁷Zai pe rapeu Nisrokbe ki ge pa kakellumbe luagene pe na hangna, Adrammelekbe benai Sharezerbe ne hiazutkie ne pechu bichat kai lu, Araratram ’mbe pak kai di de lei. Zai pe na Esarhaddonbe ne pa kelei ge kaheguang de lei.