Read Zeme Naga 2 HEGUANGME 20 Bible Online

2 HEGUANGME 20 - Zeme Naga bible

2 HEGUANGME 20

¹Chipau ting ge Hezekiabe ’nrâkâu di de lei, zai chai ra gum bam di de lei. Dadege Amozbe na kemeu’mpeu Isaiabe pe dage wang lu ze pe chu, “Tingwang ne aigum ze rang ze, ‘Ning ki teleu’ntia gai le du lau; nang yipat mak ze chai gu daseu,’ kacheu de lei,” ze acheu bei de lei.

²Chidadege â Hezekiabe megu ’mbe jei’ngngiawang gai lu, Tingwang dage kellum ze,

³“Hei, Tingwang gau, ning mikngau ge I a lung leine peipat ze, a lung gesang gene ning masuage I tat ze bambe benai I ne tâ-yibe tewgai’ndibe ze nang ne chibam lau, chuna I ningchu kiam lei,” ze kacheu de lei. Zai Hezekiabe ze happuai bam di de lei.

⁴Dadege Isaiabe hekakbe sîam gene tatpat makge, Tingwang gu sam pe dage wangkeu ze,

⁵“Helatwang dai ze a gu ziemmename gu heguangsinpeu, Hezekiabe je, Tingwang, ning peu Dabidbe Rapeu ne aigum ze rang gai lei: I ne nang kakellumbe kuâ seuchang lu de lei, I ne ning mikdui ngau lu de lei; pie le lau, I ne ningchu tew’mmi gai gu lei; pakechumbe mai ge nang Tingwang ki ’mbe hang gu lei.

⁶Zai nang keringbe ting ze I ne kum kereu ze mengeu kaisî gai gu lei, Assiria heguang ba gene I ne ningchu, nang benai aipau namdi ze ’nripat kai gu lei, zai a ji hanggene benai a guâ ka’ngguapeu Dabidbe ji hanggene I ne aipau namdi je sapdang gu lei, acheu rang gai be lau,” ze kacheu de lei.

⁷Dadege â Isaiabe ne, “’Mbeuchî tingku teiwang lau, kacheu de lei. Zai pa peize yi de ra chiramme ningnui ne lu lu, geteube jâm peireige kai be lau,” acheu bei de lei.

⁸Dadege Hezekiabe ne Isaiabe je, “Pakechumbe mai ge I Tingwang ki lam’mbe hangrabe hangge Tingwang ne achu tew’mmi gai gu lei be ’ndaikau ne ka’nchetbe chang ra lau?” ze kacheu de lei.

⁹Zai Isaiabe ne kak ze, “Aize ning hangge Tingwang dagene ’nchetrabe de lei, pa ne samhatkai’ndibe ze Tingwang ne tewgairabe zeu: chi kezui kiâm kereu tatpat ra mei, nune kiâm kereu ’ngngîngut ra lau?” ze kacheu de lei.

¹⁰Zai Hezekiabe ne kak ze, “Chi kezui ge kiâm kereu tatpatrabe â sêula ne de lei; chi suane â peize kezui ze kiâm kereu ’ngngîn de lau,” kacheu de lei.

¹¹Dadege â kemeu’mpeu Isaiabe ne Tingwang dage kûka’nrung de lei; zai chidadege â Ahazbe gu pehî ka’nchetbe-kaira peireige naimik peran-heguikeugaibe gene Tingwang ne kezui ze mi kiâm kiâm kereu riâ tew’ngngîngut kai bei de lei.

¹²Chipau ting ge Baladanbe na Merodak-baladanbe, Babilon heguang ne Hezekiabe dage hepâupaume je lang gai ze, samkela benai pe gu kela lang gai de lei; Hezekiabe ze ’nrâ la lei be rasam pa seu lu dadegeu.

¹³Dadege penui je Hezekiabe ne ’nchâ ze bamkuâ de lei, zai penui je pa ne pe gu keruaki leine, gepût, gechâk, mâ-perîmyibe, taudui pemîhungbe, pe gu hereimerua, zai pe gu keruaki ge kebambe zat leine ngualia gai de lei; pe ki ge benai pe gu heguang ram leine ge bambe penui je teilia gai mak tadibe mâ de ga lei.

¹⁴Chidadege â kemeu’mpeu Isaiabe ze heguang Hezekiabe dage wang lu pechu, “Aime bau ’ndaikau tew lei lau? Zai ’ndai ’mbene penui ning dage wang lau?” kacheu de lei. Dadege Hezekiabe ne, “Heram kedeu ’mbe bambe Babilon gene penui wang lei,” kacheu de lei.

¹⁵Pa ne, “Ning ki ge penui ’ndaikau-kau ngau lau?” kacheu de lei. Dadege Hezekiabe ne kak ze, “A ki ge kebambe zat leine penui ngau de lei; a gu keruaki ge penui je I teilia gai mak tadibe zat mâ de ga lei,” acheu bei de lei.

¹⁶Chidadege â Isaiabe ne Hezekiabe je, “Tingwang gu sam ’ngking le lau:

¹⁷Pie le lau, ning ki ge kebambe zat leine, zai nemai riâ ning peume ne kaigekua gai ze bambe leine Babilon ’mbe teitatkai’nderabe tingnaimikpui wang mui de lei, mâ de ’nsak kai ra mak lei, ze Tingwang ne rang lei.

¹⁸Zai ningnui na ’mpeumi napoine ramme ningnui ne lungkeume hanggesame je nguatat tu lei; zai Babilon gu heguang gu heguang-bâm ge kahetiâme penui chang gu lei,” acheu bei de lei.

¹⁹Chidadege â Hezekiabe ne Isaiabe je, “Tingwang gu sam nang ne saliabe ze yi-desang lei,” kacheu de lei. Pa ne, “I bambe ting ge desieyi ze kehingbe ga ze lung dizai, ’ndaitew acheu mak ta ra run lau?” ze pe lung ge pa ’nning gai di dadegeu.

²⁰Hezekiabe tâtewbe ramme benai pa gekuube tak leine zai pa ne hezai benai heduiga hang teleu ze namdi ge hedui teiwanggaibe rasam kêdadabe Judaram gu heguangme rasam rawgaibe leisikuak ge chiramme raw gai mak ti lau?

²¹Dadege Hezekiabe â pe peume dage jeikeu gai di de lei; zai pe na Manassebe ne pa kelei ge kaheguang de lei.