Read Zeme Naga 2 HEGUANGME 21 Bible Online

2 HEGUANGME 21 - Zeme Naga bible

2 HEGUANGME 21

¹Manassebe heguangsapchube ting ge pe tingkum kereu ze kena chang di de lei, zai Jerusalem ge pa ne kum rengeu ze mengeu kaheguang de lei. Zai pe pui ji â, Hephzibale de lei.

²Israelme masua gene Tingwang ne kelipatkaibeime zat ramme ne katenetbe tâ tewbe luigum ze Tingwang mikngau ge tâsiabe pa tew gai de lei.

³Pe peu Hezekiabe ne pebâm kehube ramme tew’nsiagaibeibe pa ne tewchu gai dai bei dadegeu; zai Baal hangge pa ne herâtewbe-kaira ramme teichu gai bei de lei, zai Israelram heguang, Ahabbe ne tâtew gum ze Asherah luî hang tew gai lu tinggîm piehang-ngaube leine je kellum ze penui guâ ’nggua ze bam lei.

⁴Zai Tingwang ne “Jerusalem ge a ji I ne kai gu lei,” kacheube Tingwang ki ge heraluîtewbe gu herâtewbe-kaira ramme pa ne tewchu gai bei de lei.

⁵Zai Tingwang ki sîam kena lungge tinggîm ge piehang-ngaube zat leine hangge pa ne herâtewbe-kaira ramme tewchu gai de lei.

⁶Zai pe na ’mpeumi napoine je herâtewbe ge rû gai de lei, zai hedachakbe tâ tew ze mâ-mâ sakeli ze bam lei, zai gekungme benai heduaîtewme dage nguakebut ze bam lei. Pa Tingwang mikngau ge tâsiabe misongga tew ze pe rata tew gai de lei.

⁷Zai Tingwang ne Dabidbe benai pe na Solomonbe je rang gai ze, “Israelme zat leine ruagene I ne kelânglube aipau ki ge benai Jerusalem ge betingbeta I a ji kai gu lei;

⁸zai penui Israelme peireige I ne diegaibe leine benai a guâ ka’ngguapeu Mosabe ne hingde sui ra diegaibe leine luigum ze penui ne tew dizai â, penui peume hang heram peigaibe gene kezitrua ra I ne pei ta du de lei,” kacheu de lei.

⁹Kane penui ’ngking mak tai lei, zai Israelme masua gene Tingwang ne tew’nsiagaibeime zat ramme ne tewbe suane â, tâsiabe tew’ngkeu ra penui je Manassebe ne getu gai bei de lei.

¹⁰Tingwang ne pe guâ ka’ngguame kemeume dagene sa gai ze,

¹¹“Judaram heguang Manassebe ne ai mi katenetbe tâ ramme tew ze, pa bambe ting sua ’mbe ziemmena ramme bamme Amorme ne tewbe suadu sia ze pa ne tâsiabe tew de lei, zai pe gu heraluîtewbe ramme zene Judame je du peize hemui tâ tew ra pa ne tew gai bei de lei;

¹²chipauziegene Tingwang Israelme Rapeu ne acheu sa ze, Pie le lau, geseume leine ne peize penui kun seuregi ra Jerusalem benai Judaram peireige aigumbe mâ-kesiabe I ne teiwang mui de lei.

¹³Zai Samariaram gu mâ-ka’ndeube ria benai Ahab ki gu ’ndîng mâ-ka’ndeube-ria ze Jerusalem peireige I ne gîng gai gu de lei; zai mige ne hekuak chui gum ze I ne Jerusalem je chuirit lu ze tei’ngkum gai bu lei.

¹⁴Zai a gume ’nsakpatme je I ne lupat kai ze penui teureime ba ge I ne penui je pei gai gu lei, zai penui ze penui teureime hang chang gu lei,

¹⁵penui peume Ijip gene zuapatbe mai gene nemai riâ chang ze a mikngau ge tâ-kesiabe tew ze a rata tewgaibe ziegeneu,” ze kacheu de lei.

¹⁶Chipau peireige du Judame je Tingwang mikngau ge tâsiabe peize tew ra pa ne penui je hemui ge nguagaibe peireige Jerusalem mik na lam ge pemâugame jai ne puichu mak tâne Manassebe ne pemâugame jai misongga tewpat kai bei de lei.

¹⁷Manassebe tâtewbe rasam kêdadabe benai pa ne tewgaibe rasam leine, zai pa ne hemui tâ tewbe rasam leine Judaram heguangme rasam rawgaibe leisikuak ge chiramme raw gai mak ti lau?

¹⁸Zai Manassebe pe peume dage nguajeikeu gai di de lei, zai Uzzabe gu merie, pe ki gu merie ge bai gai bei de lei; zai pe na Amonbe ne pa kelei ge kaheguang de lei.

¹⁹Amonbe heguangchube ting ge pe kum ’ngkai ze kena di de lei, zai Jerusalem ge pa kum na samram gai lei. Pe pui ji â, Jotba’mpui Haruzle na Meshullemethle de lei.

²⁰Zai pe peu Manassebe tew gum ze Tingwang mikngau ge pa tâsiabe tew gai de lei.

²¹Pe peu tatkaibe ’mpuî leine ge pa tat ze, pe peu ne heraluîtewbe je ka’ngguabe ge pa ’nggua ze kakellum de lei;

²²Tingwang pe peume Rapeu je pa put kai ’ndi de lei, zai Tingwang ’mpuî ge tat mak lei.

²³Dadege â Amonbe guâ ka’ngguame ne pechu tew’nsia ra chiam ze heguang peu je pe ki gene tewchat ’ndi de lei.

²⁴Kane heramname ne Amonbe peireige kesiabe tew ra chiamme leine je bichat kam ’ndi de lei, zai heramname ne pa kelei hangge pe na Josiabe je heguang hang sum gai bei de lei.

²⁵Chidadege Amonbe gu tâ ramme pa ne tewgai’ndibe rasam kêdadabe ramme Judaram gu heguangme rasam rawgaibe leisikuak ge chiramme raw gai mak ti lau?

²⁶Zai pechu â Uzzabe gu merie ge pe gu heraw ge bai gai bei de lei; zai pe na Josiabe ne pa kelei ge kaheguang de lei.