Read Zeme Naga 2 HEGUANGME 22 Bible Online

2 HEGUANGME 22 - Zeme Naga bible

2 HEGUANGME 22

¹Josiabe heguangsapchube ting ge pe kum desat chang di de lei, zai Jerusalem ge pa ne kum himreu ze kat heguang gai de lei. Pe pui ji â, Bozkat’mpui Adaiabe na Jedidale de lei.

²Zai Tingwang mikngau ge pa tâ-yibe tew ze pe peu Dabidbe tatbe ’mpuî leine ge pa tat te lei, zai heku-hezat ’mbia du tatkelikrua mak lei.

³Josiabe pa heguangsapbe kereu ze desat kum ge heguang ne leisirawpeu Meshullambe chapeu, Azaliabe na Shapanbe je Tingwang ki lam’mbe lang gai ze,

⁴“Ziemmename ramme dagene kiziêsua kemuiki reîme ne rehâ ha’nduigaibe rangkâng Tingwang ki ge teiwanggaibe peize tingku dilangpeu, Hilkiabe ne riam gai ra pe tailam hang du lau;

⁵zai chipau rangkâng ze Tingwang ki reîme bau tâtewme ba ge pei gai ra lei, zai peize penui ne Tingwang ki ge bamme heki kagetakme, tâtewme je pei gai be lau,

⁶chize â, heching tâ tewme, hekitewme, tingchugiame je peigairabe kau lei, heki getîng ra hangge heching benai tingchu teleulube ramme lui ra hangge neu.

⁷Kane penui pelingtid ze tâtew la daze penui ba ge rangkâng peigaibe, rangkâng ka’nrabe tak ze penui dagene mâ de ’nneu mak ra lei,” acheu ze rang gai de lei.

⁸Dadege tingku dilangpeu Hilkiabe ne leisirawpeu Shapanbe je, “Tingwang ki gene hingde leisikuak I ngaudau lu de lei,” kacheu de lei. Zai Hilkiabe ne Shapanbe je chipau leisikuak bala gai bei ze pa chize kiâ gai de lei.

⁹Dadege leisirawpeu Shapanbe heguang dage wang ze pau gai ze, “Kilûng gene ngaube rangkâng ze ning guâ ka’ngguame ne lutat ’nzâu de lei, zai Tingwang ki reîme, tâtewme ba ge penui ne pei gai ’nde lei,” kacheu de lei.

¹⁰Chidadege â leisirawpeu, Shaphanbe ne heguang je salia ze, “Tingkupeu Hilkiabe ne achu leisikuak pei gai la lei,” acheu bei lei. Zai Shaphanbe ne chize heguang suage kiâlia gai de lei.

¹¹Zai hingde leisikuak gu sam ramme heguang seu lu dege pe paîni ramme hitchu di de lei.

¹²Dadege heguang ne tingkupeu Hilkiabe, zai Shaphanbe na Ahikambe zai Mikaiabe na Akborbe, zai leisirawpeu Shaphanbe, zai heguang guâ ka’ngguapeu Asaiabe je samdie gai ze,

¹³“Tat chu lau, aipau leisikuak ngaudaube sam ramme tedeu ge Tingwang dage a hang benai a gume zai Judame leine hangge mâ-’mmêt kai ni lau; anui tedeu ge rawgai’ndibe leine luigum ze tew ra hangge aipau leisikuak gu sam ramme anui peume ne pheugaimakbe ziegene anui peireige Tingwang rata kedibe la daseu,” kacheu de lei.

¹⁴Chidadege â (chipau ting ge Jerusalem ge pakenabe kisîam ge bambepui) Harhabe chapeu, Tikbabe na Shallumbe paîki kereîpeu nâu kemeu’mpui Huldale tailam kemeu’mpeu Hilkiabe, Ahikambe, Akborbe, Shapanbe zai Asaiabe tat ti de lei; zai chipaupui je penui ka’mpau de lei.

¹⁵Dadege pa ne penui je, “Israelme Rapeu Tingwang ne, ‘A dage ningnui langgaipeu je ranglia lau,

¹⁶Tingwang ne acheu rang lei, pie le lau, aipau bâm peireige benai aipau bâm ge lungme peireige mâ-kesiabe, aipau leisikuak gu sam ramme leine ge Judaram heguang ne kiâgaibe ze I ne teiwang gai gu lei.

¹⁷Penui ba tatew ramme ne a rata tew ra achu put kai nan ze penui ne hera kêdabe ramme je mâ-perîmyibe rû gai ze bambe ziegeneu, chipauziegene aipau bâm peireige a lumpumbe ’ntau gai gu lei, zai chize ’mmit ra mak lei.

¹⁸Kane Tingwang dage mâ-’mmêt ra ningnui je langgaipeu Judaram gu heguang je â, ningnui acheu salia ra lei, Tingwang, Israelme Rapeu ne acheu ze rang lei: Nang ne kiâgaibe sam ramme deu ge,

¹⁹aipau bâm peireige benai aige lungme peireige put-hâmmuîgairabe benai desetkaibe penui changrabe rasam I saliabe nang seube luage nang â ning lunggailak ti ze, Tingwang masuage kecheiluîtewkeu ze ning paîni hit ze a dage hapbe luage I du ning kuâ seutâulube ziegeneu, ze Tingwang ne kacheu de lei.

²⁰Chipauziegene pie le lau, I ne ningchu ning peume dagene gekumwang gai gu lei, dezai nang â ning raw ’mbe yi ze gut tu lei, zai aipau bâm peireige mâ-kesiabe I ne teiwangrabe ze ning mik ne ngauchang ra mak lei, kacheu de lei,’ ze rang gai be lau” ze kacheu de lei. Dadege â penui heguang tailam sam pungwang kadai de lei.