Read Zeme Naga 2 HEGUANGME 23 Bible Online

2 HEGUANGME 23 - Zeme Naga bible

2 HEGUANGME 23

¹Chidadege â heguang ne lang gai bei ze Juda ge benai Jerusalem ge bamme gechîngme ramme pe dage zuawang de lei.

²Dadege â heguang ze Tingwang ki ’mbe hang di de lei, zai pe dage Juda ge ’mpeumi leine benai Jerusalem ge bamme leine, zai tingkume benai kemeume, kedi-kechei ziemmena ’nteumena pe dage bam lei; zai Tingwang ki gene ngaudaube samhatkaibe leisikuak gu sam ramme leine penui geseube gene pa ne kiâlia gai de lei.

³Aipau leisikuak ge rawgaibe ai samhatkaibe gu sam ramme tâtew-wang ra Tingwang chai sui ze pe gu samdiegaibe ramme, pe gu mâ-rangliabe ramme, zai pe gu hingde rawdiakkaibe ramme, pe lung leine ne zai pa keringbe leine ne tei’mmi ze bam ra heguang kechia kedibe hiage sap kai lu, Tingwang masuage samhatbe tâ tew de lei, zai ziemmena ’nteumena ne samhatbe tâ tewbe ge herua gai de lei.

⁴Zai Baal hang, Asherah hang zai tinggîm ge ngaube ramme leine hang heli ramme teibe leine Tingwang gu kellumki gene teipat kai ra heguang ne tingkupeu, Hilkiabe, zai tingkume pesinme je samdie gai bei de lei; chiramme ze Kidron kâm Jerusalem hela ’mbene pa ne rû kam ’ndi de lei, zai pa timbun du Bethel ’mbe puatua ’ndi de lei.

⁵Zai Juda gu namdi ramme benai Jerusalem ’mpa-pa ge pebâm hube ramme ge mâ-perîmyibe rû ra heraluîtewbe gu tingku ramme hangge Juda gu heguang ne tew’ntipkaibeime je pa ne lutua kam ’ndi de lei; zai Baal, tingnaimik, hekêu, hegi ramme, zai tinggîm ge ngaube leine hangge mâ-perîmyibe rûgaime je du lutua kam ’ndi de lei,

⁶zai pa ne Ashera je Tingwang ki gene Jerusalem hela Kidron geuki ’mbe teipat kai lu, lakdesuiniang gai lu, chipau moîne ze haimena gu heraw ramme peireige tuâ gai bei de lei.

⁷Tingwang ki ge ’mpeumi penui pum zuateume bambe ramme, Ashera hangge ’mpuimi ramme paîni dak lu kaibe bâm ze pa ne tewkau gai bei de lei.

⁸Zai tingkume leine je Juda gu namdi ramme gene teipat kai de lei, zai tingkume ne mâ-perîmyibe rûgaibe bâm pebâm hube ramme ze Geba gene Beer-sheba riâ pa ne tewhebâ gai bei de lei; zai namdi kemui ge heku’mbia namdi gu laksaibe Joshuabe gu kemuiki gutbe ge pebâm hube ramme pa ne tewkau gai bei de lei.

⁹Acheuleusede Jerusalem ge Tingwang gu herâtewbe-kaira riâ pebâm hube ramme gu tingkume ramme hang mak tai lei, kane penui puiname ruage ’nduihîkaimakbe tingku teu de lei.

¹⁰Zai pa ne Hinombe name bau gu pebakchuak ge Topheth ze peize mî ne du pe na ’mpeumi napoine mei nune ’mpuimi napoine mei ze Molekbe hangge herâtew ze rû gai ta ra hang tewhebâ gai bei de lei.

¹¹Heguang ki kereîpeu saibe Nathan-melekbe, perielung ge bambepeu gu hekisiâm ge Tingwang ki gutbe ’mpuî gene Juda gu heguangme ne hekun ramme tingnaimik râ hang diepat’nchigaibe ramme pa ne tei’mbia kam gai bei lei; zai pa ne tingnaimik râ gu timriang ramme hemi ne rû kam ’ndi de lei.

¹²Juda gu heguangme ne chiamgaibe, Ahazbe gu heki ’nreibe sîam heki’mpûm ge herâtewbe-kaira ramme bambe benai Tingwang ki gu hekisiâm kena lungge Manassebe ne herâtewbe-kaira ramme tewgaibeibe pa ne chakkau gai bei ze pângdesuirui di de lei, zai chipau moîne ze Kidron geuchuak ge tuâ gai bei de lei.

¹³Zai Jerusalem tingbia ’mbia ge benai choateube deiloa gene tingpî’mbia ge Israelram gu heguang, Solomonbe ne Sidonme gu katenetbe Ashtoret rapui hang benai Moabme gu katenetbe hera Kemosbe zai Ammonme gu katenetbe heraluî hang teleugaibe ze heguang (Josiabe) ne tewhebâ gai bei de lei.

¹⁴Zai mâ-luî ramme pa ne tewbetdesuirui gai bei de lei, zai Ashera rapui ramme bikau gai ze ziemmena ra ramme ne penui bâm ramme ge kaipuiting gai bei de lei.

¹⁵Chipau peireige Nebatbe na Jeroboambe Israelme je hemui ge nguagaipeu ne pebâm hube teichugaibe Bethel ge herâtewbe-kaira, chi herâtewbe-kaira benai pebâm hube ze pa ne chakkau gai bei de lei, zai pa ne chipau chu ramme tewpânghitruai gai ze kedeîniang gai bei de lei; zai pa ne Ashera rapui rû ’ndi de lei.

¹⁶Zai Josiabe ’nreiwang dege chi kedeiloa peireige heraw ramme pa ngau de lei; zai pa ne lang gai bei ze heraw ramme gene mâ-mâ ramme lupat te lei, zai airamme rang’ntuagaipeu, Hera gu ziemmena ne Tingwang gu sam paugaibe luigum ze herâtewbe-kaira gene chiramme rû ze tewhebâ gai bei de lei.

¹⁷Chidadege â pa ne, “Chi hela ge tingchu sumbe I ngaube ze ’ndaikau rei lau,” kacheu de lei. Dadege chipau namdi ge bamme ne pechu rang gai ze, “Aize â Hera gu ziemmena Juda gene pat ze Bethel ge herâtewbe-kaira peireige nang ne airamme tewgai’ndibe hangge pau’ntuagaipeu gu heraw de lei,” ze acheu bei de lei.

¹⁸Zai pa ne, “Peize pechu acheu le lau; mî ne de peize pe ra ramme tew’ngngai se lau,” kacheu de lei. Chigum ze Samaria gene patpeu kemeu’mpeu ra ramme ruage pe ra ramme acheu ze kai bei de lei.

¹⁹Israelram gu heguangme ramme ne Tingwang rata tew ze Samaria namdi ramme ge pebâm hube ramme gu kakellumbe bâm ramme hang teleugaibe leine du Josiabe ne tei’mbiatua kam ’ndi de lei; Bethel ge pa ne tewgaibe luigumbe gene chiramme peireige tâtew gai de lei.

²⁰Zai herâtewbe-kaira peirei gene pa ne chige bambe pebâm hube ramme gu tingkume ramme leine je bichat kai bei de lei, zai chiramme peirei gene ziemmena ra ramme rû de lei, chipau châng dege â Jerusalem ’mbe pa helatwang dai di de lei.

²¹Zai heguang ne ziemmena ’nteumena je, “Samhatkaibe leisikuak ge rawgaibe luigum ze Tingwang ningnui Rapeu hangge tat’ntuahengi reibam lau,” acheu ze samdie gai bei de lei.

²²Aigum ze tat’ntuahengi ze, Israelme peireige samramme bau ting ge mei, nune Israelram gu heguangme ting ge mei nune Judaram gu heguangme ting ge mei ze hengî gai mak lei;

²³kane Josiabe ne heguangsapbe tingkum kereu ze desat kum ge Jerusalem ge aipau tat’ntuahengi ze reibam de lei.

²⁴Chipau peirei tingkupeu Hilkiabe ne Tingwang ki gene ngaudaube leisikuak ge rawgaibe hingde gu sam ramme tew’ntip kai ra hangge Judaram ge benai Jerusalem ge gekungme, heduaîtewchime, heramiê ramme, heraluîtewbe ramme, zai mi katenetbe ramme leine ngaube ramme ze Josiabe ne lutua ’ndi de lei.

²⁵Pa sua keraîbe ting ge â, Mosabe gu hingde-sie luigum ze, Tingwang dage pa gum ze pe lung leine, pa keringbe leine zai pe ranchi leine ne ’nreiwangbe kau heguangme hangkatte ’ngga lei; zai pa gumbe kau pe chaige pat mak lei.

²⁶Manassebe ne Tingwang lumpum tâ ze bambe ziegene Juda peireige pe râtabe bambe zene Tingwang pe lumpum-kadesangbe gakeu ta di de lei.

²⁷Zai Tingwang ne, “Israelme je I ne lutua gum ze Juda je du a mikngau gene lutua gai gu lei, zai I ne kelânggaibe aipau Jerusalem namdi benai A ji chige bam gu lei, ze I ne kacheube ki ze I ne tuâ ’ndu lei,” kacheu de lei.

²⁸Chidaze Josiabe tâtewbe benai pa ne tewgaibe leine rasam kêdadabe ze Judaram gu heguangme rasam rawgaibe leisikuak ge chiramme raw gai mak ti lau?

²⁹Pa bambe ting ge Ijipme gu heguang, Pharao Neko Assiria heguang tailam Euphrates geuki ’mbe hang de lei. Heguang Josiabe ne pechu hedau gai ra tat ti de lei; dadege Pharao Neko ne Megiddo gene pechu ngau lu dege bichat ’ndi de lei.

³⁰Zai pe guâ ka’ngguame ne pa chai di ze, Megiddo gene pechu timriang gene pungtat ti de lei, zai pechu Jerusalem ’mbe teiwang lu pe gu heraw ge bai gai bei de lei. Dadege â heramme bau ne Josiabe na Jehoahazbe je ngua lu pechu taudui ’nnuk kai de lei, zai pe peu kelei ge heguang hang pechu sum gai de lei.

³¹Jehoahazbe heguangchube ting ge pe kum ’ngkai ze kechum chang di de lei, zai Jerusalem ge pa ne kêu chum heguang gai lei. Pe pui ji â, Libna’mpeu Jeremiabe na Hamutalle de lei.

³²Pe peume ramme ne tewtattibe luigum ze Tingwang mikngau ge pa tâsiabe tew gai de lei.

³³Peize pa ne Jerusalem ge samram ta ra Hamathram ge Ribla gene Pharao Neko ne pechu bangnam gai bei de lei, zai heram ge ’mpuâhâ hang gepût talent haî kat zai gechâk talent kat kai de lei.

³⁴Zai Pharao Neko ne Josiabe na Eliakimbe je pe peu Josiabe kelei ge heguang hang sum gai bei de lei, zai pe ji Jehoiakimbe ze ’ntakkeli gai bei de lei. Kane pa ne Jehoahazbe je â nguatat ti lei, zai Ijip ge pa wang gai lu chigene chai di de lei.

³⁵Zai Jehoiakimbe ne gepût benai gechâk Pharaobe je pei de lei, kane Pharaobe ne kie-kiebe luî gene rangkâng pei ra heramme dagene pa rehâ lu de lei. Pharao Neko dage pei gai ra hang heramme dagene gepût benai gechâk pei ra penui je diegaibe riâ gene pa kie de lei.

³⁶Jehoiakimbe heguangchube kum ge pe kum ze ’ngkai ze mengeu di de lei, zai pa ne Jerusalem ge kum kereu ze kat samram ze bam lei. Pe pui ji â, Ruma keloa’mpeu Pedaiabe na Zebidale de lei.

³⁷Zai pe peume ne tewtattibe leine luigum ze Tingwang mikngau ge pa tâsiabe tew de lei.