Read Zeme Naga 2 HEGUANGME 24 Bible Online

2 HEGUANGME 24 - Zeme Naga bible

2 HEGUANGME 24

¹Pa bambe ting ge Babilon heguang Nebukadnezzarbe hang de lei, zai kum chum Jehoiakimbe ne pe guâ ka’ngguapeu chang ze bam lei; zai bechâng dege â Jehoiakimbe pe lung lekpat dai ze pechu ka’nggi de lei.

²Zai pechu ’nggi ra Tingwang ne Kaldiame Siriame, Moabme zai Ammonme bau je pe dage lang gai bei de lei, zai pe guâ ka’ngguame kemeume ne Tingwang gu sam sagaibe luigum ze Juda peireige ’nggi ze tew’nsia ra penui ne lang gai bei de lei.

³Manassebe gu hemui ramme ziegene Juda peireige Tingwang gu samde gene penui je pe mikngau gene tei’mbia gai ra aize wangchang sing de lei, pa ne tâtewgaibeibe luigum zeu,

⁴zai pa ne pemâugame jai tewpatkaibeibe luigum zeu; pa ne Jerusalem ge pemâugame jai ne kaipuigitkaibeibe ziegene Tingwang ne lun mak te lei.

⁵Chidaze Jehoiakimbe gu tâtewbe ramme, zai pa ne tewgaibe leine rasam kêdadabe ze Judaram gu heguangme rasam rawgaibe leisikuak ge chiramme raw gai mak ti lau?

⁶Chigum ze Jehoiakimbe pe peume dage jeikeu gai di de lei, zai pe na Jehoiakinbe ne pa kelei ge kaheguang de lei.

⁷Ijip gu heguang gu leine, Ijip geuki gene Euphrates geuki riâ changbe Babilon heguang ne lukam’ndibe ziegene Ijip gu heguang â pe ram gene wang dai mak tai de lei.

⁸Jehoiakinbe heguangchube ting ge pe kum ze kereu ze desat chang di de lei, zai Jerusalem ge pa ne kêu chum heguangsap kai lei. Pe pui ji â, Jerusalem’mpeu Elnathanbe na Nehushtale de lei.

⁹Zai pe peume ne tewtattibe luigum ze Tingwang mikngau ge pa tâsiabe tew gai de lei.

¹⁰Chipau ting ge Babilon heguang Nebukadnezzarbe Jerusalem ’mbe hang lu namdi ze tuagua de lei.

¹¹Zai pe guâ ka’ngguame namdi tuaguabe luage, Babilon heguang Nebukadnezzarbe hang de lei;

¹²dadege Judaram heguang Jehoiakinbe ne Babilon heguang dage pe runne pechu, zai pe pui, pe guâ ka’ngguame, pe gu heguangsinme, zai pe gu heguang ki ge saibe ramme je peipat kai de lei. Babilon heguang pa heguangsapbe padesatbe kum ge pechu kebang hang ngua lu ze,

¹³Tingwang ki heurâ ramme leine benai heguang ki heurâ ramme teitat kam di de lei, zai Tingwang ne rang’ntuagaibe luigum ze, Israelram gu heguang Solomonbe ne teleugaibe gechâk li ramme Tingwang gu kellumki ge bambe ze dimdesuirui gai bei de lei.

¹⁴Pa ne Jerusalem ge bambe leine, heguangsinme leine, peranchime, gekuume ramme, kebang hang tîmlume ziemmena chang kereu, zai heching tâ tewchime benai hegeî tâ tewchime leine je pa ne nguatat kam di de lei; heram ge kelaksia-ka’nteume je runne zangno mî je du ’nsak kai ta di de lei.

¹⁵Zai pa ne Jehoiakinbe je Babilon ’mbe nguatat kai ’ndi de lei, pa ne heguang pui, heguang nâu ramme, pe gu saibe ramme, zai heram ge besuitewme je Jerusalem gene Babilon ’mbe kebang hang nguatat kai ’ndi de lei.

¹⁶Zai Babilon heguang ne ’mpeumi ziemmena gekuume leine ziemmena chang sena, zai mâ-chiamchime benai hegeî tâ tewchime ziemmena chang kat, penui ’nteumena herei hang kebuibe kau ramme je kebang hang Babilon ’mbe nguatat ti de lei.

¹⁷Zai Babilon heguang ne Jehoiakinbe peu peudâpeu Mattaniabe je pa kelei hangge heguang hang sum gai lu, pe ji hang Zedekiabe kû ra ’ntakkeli gai bei de lei.

¹⁸Zedekiabe heguangchube ting ge pe kum ze ’ngkai ze kat chang di de lei, zai Jerusalem ge pa ne kum kereu ze kat heguang gai lei. Pe pui ji â, Libna’mpeu Jeremiabe na Hamutalle de lei.

¹⁹Jehoiakimbe ne tâtewtatbe leine luigum ze Tingwang mikngau ge tâsiabe pa tew gai de lei.

²⁰Tingwang ne pe râtadibe ziegene Juda benai Jerusalem ge pe masua gene penui je tuâpat kai ra wangchang di de lei. Zai Zedekiabe ne Babilon heguang je ka’nggi de lei.