Read Zeme Naga 2 HEGUANGME 25 Bible Online

2 HEGUANGME 25 - Zeme Naga bible

2 HEGUANGME 25

¹Zai pa heguangsapbe pakechumbe kum ge pakereube kêu gu hezie kereu mai ge Babilon heguang Nebukadnezzarbe Jerusalem je ’nggi ra pe gu hereikangme leine je ngua lu wang ze chize tuagua de lei; zai penui ne chize tuaguâ ra hang penui ’nseubâm tew gai de lei.

²Chigum ze heguang Zedekiabe ne kaheguangbe tingkum kereu ze kat kum riâ changbe ze namdi tuaguâ kam nan ze bam lei.

³Pamedaibe kêu gu hezie sekui mai ge namdi ge herakûm gechibe wang ze heram ge lungme hang tak teu ra ga di de lei.

⁴Namdi lungge ga kat â tewtit kai de lei; Kaldiame ne namdi ze tuaguâ nan ze bam sedu heguang gu merie ge kerie-riebe kena kak gene tingmuî ne heguang pe gu kahereime ziemmena leine je ngua lu pak ti de lei. Zai Araba ’mbia penui tat kai di de lei.

⁵Kane Kaldia’mpeu hereikang’mpeu ne heguang je Jeriko kâm gene gua’nsachang lu de lei; zai pe gu hereikangme leine â, pe dagene pakrarip tat kam di de lei.

⁶Chidadege â penui ne heguang je pechu chai ra samramgaipeu Ribla, Babilon heguang tailam nguahang gai bei de lei.

⁷Penui ne Zedekiabe na ’mpeumi ramme je pe mikngau gene bichat kai bei de lei, zai Zedekiabe mikcheu letpat kai de lei. Zai pe pî keî gai lu Babilon ’mbe pechu nguatat ti de lei.

⁸Pamengeube kêu gu hezie pasenabe mai ge chize Babilon heguang Nebukadnezzarbe ne heguangsapbe tingkum kereu ze sekui kum ge Babilon heguang guâ ka’ngguapeu pechu reîme ruage pemuitewpeu, Nebuzaradan, Jerusalem ’mbene hang de lei.

⁹Zai pa ne Tingwang ki, heguang ki, zai Jerusalemki leine rû ’ndi de lei; heki kedibe leine pa ne rûtua kam ’ndi de lei.

¹⁰Zai Kaldiame gu hereikangme kereîme ruage pemuitewpeu dage bamme ne Jerusalem kerie tauguabe ramme ze gechimkau gai de lei.

¹¹Namdi ge sâudiakkaime kêdame benai Babilon heguang dage sâudiakkaikaime, baudime kêdame ramme je kereîme gu pemuitewpeu Nebuzaradanbe ne kebang hangge nguatat ti de lei.

¹²Kane kereîme gu pemuitewpeu ne heramme kelaksia-ka’nteume hanggesame je â grepchî merie teleurame hang benai helu tâtewme hangge ’nsak kai bei de lei.

¹³Zai Tingwang ki ge bambe kangngâgeî gu gechia’ndi ramme, zai timriang ramme benai kangngâgeî ne tewbe dekuaki ze Kaldiame ne tewpângdesuirui gai lu, kangngâgeî ze Babilon ’mbe teitat kai ’ndi de lei.

¹⁴Zai penui ne heli ramme, zai mâ tuakbe kuak ramme, zai hemi tewka’mmitbe merua ramme, zai mâ-perîmyibe ge teibe hepiak, hekuak ramme, zai kellumki tâka’ngguabe ge teibe kangngâgeî ne tewbe heli ramme leine,

¹⁵zai hemikuak ramme, zai mâkuak ramme penui ne teitat kam ’ndi de lei. Gechâk benai gepût ne tewbe kerua ze gechâk benai gepût hangge teitat ti de lei.

¹⁶Gechia ramme, dekuaki zai mâ-kaira ramme Tingwang ki hangge Solomonbe ne teleugaibe kangngâgeî ne chiramme leine tewgaibe ze perît ze ’nchu kam lak lei.

¹⁷Gechia kat gu pehut ze sâu kereu ze desat lei, zai pe peireige bambepeu ze kangngâgeî ne tew lei; chize pehut sâu chum lei, hela ge reming ze tewgaibe ramme benai bepuâ hang turiechî luî hang kaibe kangngâgeî ne tewbe ze ’nreibe chia kai’ngguareube ge bam kam lei.

¹⁸Zai kereîme gu pemuitewpeu ne tingku chîngpeu Seraiabe zai pakenapeu, tingkupeu Zephaniabe, zai kellumki gu kerie reîme ziemmena hangchum je nguatat ti de lei;

¹⁹zai herei ge besuitewpeu saibe zai namdi gene ngaudaume heguang gu tâ tewbeki ge bamme ziemmena hangmengeu je pa ne nguatat ti de lei; zai heram ge bamme je reî ze hereikangme gu besuitewpeu gu leisirawbe tâtewpeu zai namdi gene ngaudaume heram ge ziemmena riakseruk je du pa ne nguatat ti de lei.

²⁰Zai kereîme ruage besuiteupeu, Nebuzaradanbe ne penui je Ribla ge Babilon heguang tailam nguatat kai ’ndi de lei.

²¹Dadege Babilon heguang ne penui je Hamathram Ribla gene tewchat ’ndi de lei. Chigum ze Juda je â pe ram dei gene hesangme ram ’mbe nguatat kai ’ndi de lei.

²²Dadege â Nebukadnezzarbe ne sâudiakkaime Judaram ge bamme ruage besuitew ze bamme laksaibe hangge pa ne Ahikambe na Shaphanbe chapeu, Gedaliabe je sum gai bei de lei.

²³Zai ’nduloa ge hereikangme ruage besuitewme ramme benai penui gu ziemmena ramme Babilon heguang ne Gedaliabe je laksaibe hang sum gai ’nde lei be rasam seu lu dege Mizpa ge Gadaliabe tailam penui gu ziemmena ramme je nguawang de lei, chime bau ji ze, Nethaniabe na Ishmaelbe, Kariabe na Johananbe, zai Netophat’mpeu Tanhumetbe na Seraiabe, zai Maaka’mpeu na Ja-azaniabe de lei.

²⁴Zai Gedaliabe ne penui benai penui gu ziemmena je, “Kaldiame gu saibe ramme ziegene ningnui hing se lau; heram lungge bamme ze Babilon heguang guâ ’nggua ze bam lau, chidezai ningnui hang yi gu lei,” ze acheu bei de lei.

²⁵Kane pasenabe kêu ge Nethaniabe na Elishamabe chapeu Ishmaelbe heguang kiduî’mpeu ne ziemmena hangkereu je ngua lu wang de lei, zai Gedaliabe benai Mizpa ge pe dage bamme Kaldiame zai Judame je ’nggi ze tewchat ’ndi de lei.

²⁶Chidadege â ziemmena ’nteumena kedi-kecheime, zai hereikangme ruage besuitewme ramme zuachu lu, Ijip ’mbe tat ti de lei; Kaldiame je penui hing dadegeu.

²⁷Dadege Judaram heguang Jehoiakinbe hela ge kebang ge bambe kum himreu ze sena wangchang dege, hekêu kêu kereu ze kena zai hezie ’ngkai ze sena mai Babilon heguang Ebil-merodakbe heguangchube tingkum ge Judaram heguang Jehoiakinbe je kebangki gene ka’nggiabe gene ’mpat kai bei de lei;

²⁸zai pa ne pechu yine ze ’mpau gai lu dege, Babilon ge heguangme pe dage bamme peireige ’ntau ra pa ne pechu bâm pei gai bei de lei.

²⁹Chidadege â Jehoiakinbe pe gu kebangki puâ ramme luakpat kai ’ndi de lei. Zai pe gu keringbe ting ge patingnai’nsangne ge heguang gu mâ-teube-kaira gene pa mâ-teu bam di de lei;

³⁰zai pa ring tânege heguang ne patingnai’nsangne hî hang pe hangge chakpat kai bei ze bam de lei.