Read Zeme Naga 2 HEGUANGME 3 Bible Online

2 HEGUANGME 3 - Zeme Naga bible

2 HEGUANGME 3

¹Judaram gu heguang Jehoshaphatbe ne kaheguangbe tingkum kereu ze desat chang dege Samariaram ge Israelme ruage Ahabbe na Jehorambe heguangsapchu de lei.

²Jehorambe â pe peu ne Baal luî hang tew lu sumgaibeibe pa ne tuâ ’ndi dadege, pe peu benai pe pui Jezebelle gu kahemuibe riâ pa â hemui tâ tewchang mak te lei; sedu Tingwang mikngau ge tâ-kesiabe pa tewgaibe bam lei.

³Acheuleusede Nebatbe na heguang Jeroboambe ne Israelme je hemui ge nguagaibe tak ze pa du tew de lei, chigene pa sâukeu mak ze bam lei.

⁴Moabram heguang Meshabe â meli ka’ngkutpeu lei; patingkum ge luakat â Israelram gu heguang dage ’mpuâ hang meli poine ramme chang haî kat zai meli’nsei chang haî kat gêu chiap lu pei gai lei.

⁵Kane Ahabbe chai di dege â, Moabram heguang ne Israelme ram heguang je ka’nggi de lei.

⁶Chigum ze heguang Jehorambe ne chipau ting ge Samaria gene pat lu Israelme ramme je kelauka’ndui de lei.

⁷Zai pa ne tat lu Judaram heguang Jehoshaphatbe dage sam kelâ gai ze, “Moabram heguang ne achu ka’nggi de lei; Moabme je herei ra anai tat ra mei?” kacheu de lei. Dadege pa ne, “I tat sing gu lei, I ze nang riâ da, a gume bau ze ning gume bau riâ da, zai a gu hekun ramme je ning gu hekun ramme riâ de zeî lau,” kacheu de lei.

⁸Dadege pa ne, “’Ndaibe ’mpuî gene anui tatchu ra lau?” kacheu lei. Jehorambe ne kak ze, “Edomram hênam ’mpuî gene tatchu ra de lei,” kacheu de lei.

⁹Chigum ze Israelram gu heguang Jehorambe â Judaram gu heguang benai Edomram heguang je ngua lu tat ti de lei. Zai penai hezie senane tatguârua gai dege â, hereikangme benai mârekaune penui chaisuime hangge hedui ga di de lei.

¹⁰Chidadege â Israelram gu heguang Jehorambe ne, “Aha, Tingwang ne chi heguangme hangchum je Moabme gu heguang ba kangge pei gai ’nde lei,” kacheu de lei.

¹¹Zai Jehoshaphatbe ne, “Tingwang dagene anui mâ-’mmêt’mmi ra aige Tingwang gu kemeu’mpeu ga mei?” kacheu de lei. Chidadege â Israelram gu heguang guâ ka’ngguame ruage hangkat ne, “Elijabe ba ge hedui zuâgaika’nsuipeu, Shaphatbe na Elishabe aige lamui lei,” acheu bei de lei.

¹²Dadege Jehoshaphatbe ne, “Pe dage Tingwang gu sam la de lei,” kacheu de lei. Chidadege Israelram gu heguang, benai Jehoshaphatbe zai Edomram heguang penui hangchum Elishabe tailam tat ti de lei.

¹³Dadege Elishabe ne Israelram gu heguang je, “I ne ning dage ’ndaikau tâ tew gai ra la lau? Ning pui ning peu gu kemeume dage tat lau,” acheu bei de lei. Kane Israelram gu heguang ne pechu, “Acheu me lei, Moabram gu heguang ba ge chi heguangme hangchum je â kai ra Tingwang ne peigaibe kau de lei,” kacheu de lei.

¹⁴Zai Elishabe ne, “I ka’ngguapeu baudime gu Tingwang ringbe ziegene Judaram heguang Jehoshaphatbe je I ne tinggeu mak nung laîzai â I ne ningnui je du pie du pie ra mak, zai ngau de ngau ra mak lei.

¹⁵Kane chuna a tailam ’ntoî, ’nra teime je nguawang lau,” acheu bei de lei. Zai penui ne heleutew gai dege â, Tingwang gu tâtewchibe pe dage wangchang di de lei.

¹⁶Dadege pa ne, “Tingwang ne aigum ze rang lei, ‘I ne aipau gechang geu ze hedui ramme sungpui ra tew gai gu lei,’ acheu zeu.

¹⁷‘Ningnui tingkaichibe benai tingruibe ngau ra mak lei, kane heduigabe kuiki ge hedui ne puigit bambe ningnui ngau gu lei, chidezai ningnui benai ningnui gu kaurui zai ningnui gu mârekaune ramme hedui sak ra hangge zeu,’ ze Tingwang ne kacheu dadegeu.

¹⁸Zai Tingwang mikngau hangge â aipau tâ ramme ze sêulane lei; ningnui ba ge Moabme je du pa ne pei gai gu lei,

¹⁹zai namdi keyibe peranchibe leine ningnui ne duîwang gu lei, herachi bang keyibe leine kuîkau gu lei. Hedui depin ramme ningnui ne tewnam kam ’ndu lei, zai hetâram hang yibe leine ge ningnui ne tingchu ne kaipuigit kai gu lei,” kacheu de lei.

²⁰Bechaibe mai hechua herâtewbe hî dege, pie le lau, Edomram ’nchui gene hedui luakeu ze heram ze hedui ne sungpui mak tâne luakeu bam de lei.

²¹Moabme penui je herei’nggi ra heguangme bau hangchum hang la de lei be seu lu dadege â napoine gene chu ze gechîngme riâ herei kerua teichiduime leine je kûpat kam lu, heramrai ge nguahang gai de lei.

²²Zai hechuasûn penui chu dadege tingnaichiê’mbi hedui ge hia gai bei dege hela ’mbe penui suage bambe hedui ze hejai gum ze gie bambe penui ngau de lei.

²³Dadege penui ne, “Aize hejai de lei; anui teureime heguangme hangchum kat-kat je hegei ze bichatbe kau de lei. Chidaze chuna anui ne hereichâ ramme lu ra tat kei lei!” kacheu de lei.

²⁴Kane Israelme gu tejeîki ge penui wang dadege Israelme ramme ne chu lu Moabme paktat dai kam mak tâne penui je ka’nggi de lei; zai penui pakbe luage Israelme ne ’nsa ze Moabme je bichat te lei.

²⁵Zai penui gu namdi ramme gechim’nsia lu (Penui gu) hetâram hang yibe bâm leine ge ’mpeumi leine ne tingchu tuâ’ndui gai bei ze puigit bam di de lei; penui ne hedui depin bâm ramme tewnam de lei, zai hêrachi bang ramme kuîkau kam ’ndi de lei. Kir-hereseth namdi chukâng runne ’nsak kai bei de lei, zai tingchurak paichime ne chize tuaguâ lu tewkau ’ndi de lei.

²⁶Moabram heguang ne pechu herei’nggiwangbe ngau lu dege Edomram heguang dagene tewpânggut ra hiazutkie kezapchime ziemmena haî sename je pe dage ngua lu bam de lei; kane penui mâ de tewchi lak tai de lei.

²⁷Chidadege â pe na chînglangbe peu, heguang hangge pechu leîrapeu je pa ne ngua lu namdi kerie peireige rûkambe-râtewbe hangge peipat kai bei de lei. Zai Israelme peireige Hera lumpum kedibe wangkeu de lei; chidadege â pe dagene penui zuapat lu penui ram ’mbe helatwang di de lei.