Read Zeme Naga 2 HEGUANGME 4 Bible Online

2 HEGUANGME 4 - Zeme Naga bible

2 HEGUANGME 4

¹Zai kemeume name ruage hangkat nâu zene Elishabe dage ’nrung ze, “Ning tâka’ngguapeu benai a napeu â chai de lei; zai ning tâka’ngguapeu â Tingwang je hingchi lei be nang chî lei, kane achu peigaileupeu ne a na kena je pe gu kebang hang lu ra wang la de lei,” ze kacheu de lei.

²Dadege Elishabe ne pechu, “I ne ning hangge ’ndaikau tew gai ra lau? Achu rang gai lau; ning ki ge ning gu ’ndaikau la lau?” ze kacheu de lei. Zai pa ne, “Ning tâka’ngguapui â pe ki ge mâ de ga lei, mâ-châ duibung ramme zangneu,” kacheu de lei.

³Dadege pa ne, “Hela zuapat lu helirua ramme tei ra ning kiningme dagene ’nteulêu le lau,

⁴chipau châng dezai kilûng ge gut lu, nang benai ning name ’mpeumi ramme runne ’ngkam kainam gai lu, ai heli ramme leine ge mâ-châdui lat kai lau,” acheu bei de lei.

⁵Chidadege pa tat lu pa benai pe na ’mpeumi ramme runne ’ngkam kainam gai lu bam de lei; pe tailam penui ne heli ramme teiwang bei ze pa ne chige lat kai de lei.

⁶Heli ramme kaipui gai lu dege, pa ne pe na hangkat je, “Heli kêdabe teiwang rî lau,” acheu bei de lei. Dadege chipaupeu ne pechu, “Kêdabe â ga de lei,” acheu bei de lei. Chidadege â mâ-châdui patsau gai di de lei.

⁷Pa ne Hera gu ziemmena dage wang ze pau gai de lei, pa ne, “Tat zu lau, nang benai ning na ’mpeumi ramme ringchi le ra mâ-châdui zua lu, ning gu hepâupungbe ruî ne du lau,” kacheu de lei.

⁸Mai kat â Elishabe, pechu mâ-teu ra ’nchi-chine langpui, lungyilangpui bâm, Shunem ’mbe tat te lei. Chigum ze pa chipau ’mpuîki tatkapat tânege mâ-teu ra chige pa tatgut kai kai lei.

⁹Zai pa ne pe napeu je, “Pie le lau, anai ki ’mpuî tatpelaka’nsuipeu ze Hera gu ziemmena ka’nchipeu de lei be chuna â I chî de lei,

¹⁰chidaze pa anai dage wang gai tânege peize rêugaichi le ra, heki’mpûm ge hekisiâmpoine kat tew gai lu, chige pe hang jei kat, leisi-kaira kat, bâmra kat zai hemibung kat kai gai be kei lei, dezai pa anai dage wang gai tânege pa chige rêuchi le ra hangge zeu,” ze acheu bei de lei.

¹¹Mai kat â chige pa wang gai de lei, zai chipau kisîam ge zuagut kai lu sau’ntak kai de lei.

¹²Dadege pa ne pe tâ ka’ngguapeu Gehazibe je, “Ai Shunam’mpui je kû gai lau,” acheu bei de lei. Pa ne pechu kû gai dege pe suage pa sap kai de lei.

¹³Zai pa ne pechu, “Pie gai ni lau, anai hanggene nang hereu sang de lei, ze pechu chuna acheu be lau; ning hang ’ndaikau tew gai be ra lau? Heguang dage mei nune hereikang haîmuiteipeu dage mei ze ning deu hangge sam kat sagairabe hang nang nei gu mei?” ze kacheu de lei. Pa ne kak ze, “A zatme ruage I bam lei,” ze kacheu de lei.

¹⁴Dadege pa ne, “Acheuzaine ning hangge ’ndaikau tew gai be ra lau,” kacheu de lei. Gehazibe ne kak ze, “Eu lei, pa â pe na ’mpeumi ’ngga lei, zai pe napeu chîng de lei,” kacheu de lei.

¹⁵Pa ne, “Pechu kû gai lau,” acheu bei de lei. Zai pa ne pechu kû gai dege, kûngduaki ge pa sap kai de lei.

¹⁶Dadege pa ne, “Aipau nehî (mâkûm) wang dai dezai ’mpeumi napoine hangkat nang pua gu lei,” kacheu de lei. Zai pa ne, “Hei Hera gu ziemmena, a pau gau, acheu ra mak lei; ning tâka’ngguapui peireige karasa sa se lau,” acheu bei de lei.

¹⁷Kane ’mpuimi ze hena’ngkau di de lei, zai Elishabe ne saliabe luigum ze chigumbe ting keriakting dau dai dege pa ’mpeumi napoine lungkeu de lei.

¹⁸Napoine chîngpat dege mai kat â helugatme ruage, pe peu tailam pa pat te lei.

¹⁹Zai pe peu je, “Alai, a peî lei, a peî lei,” kacheu de lei. Pe peu ne pe tâ ka’ngguapeu je, “Pe pui tailam puapat be lau,” acheu bei de lei.

²⁰Zai pa ne pechu puachu lu pe pui tailam nguawang gai bei dege â pe pui nie ge hegî riâ ’ntauchang de lei, chipau châng dege pa chai di de lei.

²¹Dadege â pa hang lu Hera gu ziemmena jeî peireige pechu ’njei gai bei de lei, zai pechu ’ngkam kainam gai nan ze hela tat ti de lei.

²²Dadege pa ne pe napeu je kûwang lu, pechu, “I Hera gu ziemmena dage tatkelua lu wang dai ra, tâka’ngguame ruage hangkat benai hekunmerângne ruage kat achu lang gai lau,” kacheu de lei.

²³Zai pa ne, “’Ndaitew ze nemai ne nang pe tailam tat ra lau? Nemai â keuhâ mai du mak ta, zai ’ntakbambe mai du mak ta zeu,” ze kacheu de lei. Dadege pa ne, “Chize yi run de lei,” kacheu de lei.

²⁴Chidadege â pa hekunmerângne ching ge chua gai de lei, zai pa ne pe tâ ka’ngguapeu je, “Mâ-rekaune je kum gai ’nrî du lau; I ne rang gai mak ti zai â peize kiamtezie se lau,” ze kacheu de lei.

²⁵Chigum ze pa tatchu di de lei, zai Karmel Loa ge Hera gu ziemmena dage wang de lei. Pa wangbe Hera gu ziemmena ne ngau lu dege, pa ne pe tâ ka’ngguapeu, Gehazibe je, “Pie gai ni lau, Shunam’mpui wangbe zeu;

²⁶kelua ze pechu hedau gai ra pat lau, zai pechu, Nang yi bam mei? Ning napeu yi la mei? Ning na yi la mei? ze acheu gai ra hang gezeu,” ze kacheu lei. Zai pa ne “Chize mâ du me lei,” acheu bei de lei.

²⁷Chidadege kedeiloa ’mbe Hera gu ziemmena tailam pa wang dege, pe pî pa tui de lei. Zai Gehazibe pechu ’nnumtew ta di de lei. Kane Hera gu ziemmena ne, “Pechu peize acheu lau, pa pe duângga-desang di de lei, zai Tingwang ne chize a dagene tei’mbai ’ndi de lei, zai achu ranglia gai mak lei,” ze kacheu de lei.

²⁸Dadege pa ne, “I ne a pau dage ’mpeumi napoine hang kie bei mei? Achu duai se lau, ze I acheu mak mei?” kacheu de lei.

²⁹Pa ne Gehazibe je, “Ning kia ’ngkang gai lu, a tui tei lu, tatchu lau. Mi-mi je nang hedau sedu pechu rechâ gai se lau; zai mi-mige ningchu rechâ gai sedu kak se lau; zai napoine ju ge a tui ’ngking gai lau,” acheu bei de lei.

³⁰Chidadege â napoine pui ne, “Tingwang ring ze bambe ziegene zai nang ring ze bambe ziegene I ne ningchu sâu gai ra mak lei,” kacheu lei. Chigum ze pa chu lu pe chai suitat ti de lei.

³¹Gehazibe ne raîtat lu, napoine peireige pe tui ’mbeî gai bei de lei, kane pe kuâ ’nrapat mak, zai ringbe luitak hang du ga di de lei, chipauziegene pechu hedau gai ra pa wang dai lu, pechu, “Napoine chu mak kerei lei,” ze salia lei.

³²Elishabe kilûng wang dege napoine chai ze pe jeî ge jei laleube pa ngau de lei.

³³Chigum ze pa kilûng gut lu ’ngkam kainam gai lu, Tingwang dage kakellum de lei.

³⁴Chidadege â pa hang lu napoine peireige nup kai lu, napoine muiki ge pe mui chuatâu gai lu, pe mik ge pe mik tûngtâu gai lu, zai pe ba ge pe ba ’ngkingtâu gai lu jei de lei, zai pe peireige pa jei’nta gai dege napoine pum ze lumpat ti de lei.

³⁵Dadege pa chu dai ze luakat hekilung ge tatrua gai lu dege hang dai lu pe peireige jei’ntatui gai de lei; napoine lua sena dêsei gai lu pe mik rakpat ti de lei.

³⁶Dadege â pa ne Gehazibe je kû lu pechu, “Ai Shunam’mpui je kû gai lau,” kacheu de lei. Chigum ze pa ne pechu kû gai de lei, zai pa pe dage wang dege, pa ne pechu, “Ning na je pua le zu lau,” acheu bei de lei.

³⁷Pa wang lu, pe pî kangge kedei ge keikeu gai de lei; zai pe na ’mpeumi napoine je puachu lu zuapat ti de lei.

³⁸Heram ge herakûm bambe ting ge Elishabe Gilgal ’mbe wang kadai de lei. Zai kemeume na ramme pe suage ’ntaurim bambe luage pa ne pe tâka’ngguapeu je, “Heli ’mmang ge kie gai lu, kemeume na ramme hangge hegi lang gai lau,” acheu bei de lei.

³⁹Penui ruage hangkat ne helu ge gineu getai ra tat ti de lei, zai hênam grepchî ngaudau de lei, zai chigene hênam timriebang ramme ’nggumpuagit lu wang ze, chiramme ’ndaikau mei be chî mak che, keruisuai gai ra heli ge rum’nchîamra gai de lei.

⁴⁰Zai chime bau teu ra penui ne ruîpat kai de lei. Kane mâ-neu keruilube penui teube luage, penui kuâ’nrung pat ze, “Hera gu ziemmena gau, heli lungge mâ-kechaibe la de lei!” kacheu de lei. Zai chize penui teuchi lak tai de lei.

⁴¹Pa ne, “Chi lei zai â teseu hangge mâ-teiwang du lau,” kacheu de lei, zai pa ne chize heli ge tuâ gai lu dege, “Chime bau teu ra latpat kai be lau,” acheu bei de lei. Dadege heli ge mâ de kesiabe ga di de lei.

⁴²Baal-shalishah gene hangkat Hera gu ziemmena tailam hêrachi ’nchikeuraibe gene tingku teleupatlube, barlitingku (liâp) ’ngkai zai hemeubuî karchibe ramme pe gu metie ge kai lu teiwang de lei. Dadege Elishabe ne, “Ziemmena ramme teu ra pei be lau,” acheu bei de lei.

⁴³Kane pe tâ ka’ngguapeu ne, “’Ndaigum ze ziemmena haî kat bamme masuage I aize (gechâmne bambe) lupatliâchi ra lau?” acheu bei lei. Chigum ze pa ne luakat rang gai dai ze, “ ‘Penui teu gu lei, zai ’nsakpat dai gu lei,’ ze Tingwang ne acheu rang daze ziemmena ramme je teu ra pei be lau,” acheu bei de lei.

⁴⁴Chigum ze pa ne penui suage teipat kai bei de lei. Zai Tingwang sam luigum ze penui teu lu, ’nsakpat kadai de lei.