Read Zeme Naga 2 HEGUANGME 5 Bible Online

2 HEGUANGME 5 - Zeme Naga bible

2 HEGUANGME 5

¹Naamanbe ziegene Siriaram duî ra Tingwang ne peibeibe ziegene Naamanbe â Siriaram heguang gu hereikangme ruage pemuitewpeu chang ze pe gu heguang mikngau ge ziemmena kedipeu chang ze pechu â ’nning’ndi gai bei ze bam de lei. Pa â pe ranchipeu, gekuupeu lei, kane ka’mpapeu lei.

²Siriame herei ’mpungchu ze bambe ting ge mai kat â Israelme ram ge Israel ’mpuimi napoine je tuîtat ti de lei, zai Naamanbe nâu gu tâka’ngguapui chang ze bam lei.

³Pa ne pe pai je, “Samaria ge bambepeu kemeu’mpeu dage a pau bam nung laîzai neu! Pa ka’mpabe tew’mmi gai bu de lei,” acheu bei de lei.

⁴Chidadege â Naamanbe gut lu, pe pau je, “Israel ge ’mpuiminapoine ne aigum ze salia gai de lei,” ze rang gai bei de lei.

⁵Dadege Siriaram heguangpeu, ne, “Chuna tatchu lau, Israelram heguang dage I ne samkela lang gai gu lei,” acheu bei de lei. Chigum ze gepûtgeîpum chang himreu, gechâk shekel chang seruk zai hengîpaî kereu tei lu pa tat ti de lei.

⁶Zai “Aipau samkela ning dage wangchang dezai, a tâ ka’ngguapeu Naamanbe je pa ka’mpabe nang ne tew’mmi gai ra I ne ning dage pechu lang gai de lei be nang ne chî ra de lei,” acheu ze kiârabe samkela ze Israelram heguang dage pa teiwang de lei.

⁷Zai Israelram heguang ne samkela ze kiâ gai lu dege, pe paîni hit ze, “Aipaupeu ne ai hangkat ka’mpabe tew’mmi gai ra a dage sam langgaibe ze, tewchatrabe benai tew’mmirabe hangge I Hera se mei? ’Nning gai ka ni lau, pie le lau, achu teihegeirabe ’mpuî pa peu lei,” kacheu de lei.

⁸Kane Israelram gu heguang pe paîni hitbe Hera gu ziemmena Elishabe seu lu dege, “’Ndaitew nang ning paîni hit se lau? Israelram ge kemeu’mpeu la lei be peize pa chî ra chuna pechu a dage wang lau,” kacheube sam heguang dage pa lang gai de lei.

⁹Chidadege â Naamanbe pe gu hekun benai timriang gene wang ze Elishabe ki kemui ge sapgap kai de lei.

¹⁰Zai Elishabe ne sampaupeu je pe dage lang gai ze, “Tat lu Jordan geuki gene lua sena hui gai lau, chidezai ning chie ramme bua dai gu, zai nang ’nchi du lei,” ze acheu bei de lei.

¹¹Kane Naamanbe â pe râta di ze ’nnuktat lu, acheu sa ze, “Pie le lau, pa ne a tailam pat sing lu sap kai lu, pe Rapeu Tingwang ji gene kû gai ze (ka’mpabe chui ramme ge) pa’nchui ge pe ba kezap kai ze ka’mpapeu je teleu’mmi gai gu lei ze I â ’nning gai de lei.

¹²Israelram gu hedui leine sua yibe Damaska geuki ramme, Abana benai Pharpar geuki ga mei? Chiramme gene I hui’nchichi lak mei,” ze kacheu de lei. Chidadege â pa pe râta-desang di ’nnuklap kai lu tat ti de lei.

¹³Kane pe tâ ka’ngguame bau ne pe dage wanghechut lu pechu, “A peu gau, kemeu’mpeu ne ningchu tâ kedibe tew ra die gai bei ze nang â chize tew mak ta ra semei? Pa ne, ningchu, ‘Hui lu ’nchichiak bam du lau,’ acheugairabe ze ’ndaizeu yi ra lau?” acheu bei de lei.

¹⁴Chidadege â Hera gu ziemmena sam luigum ze pa Jordan geuki ’mbe wangkeu lu, lua sena hedui ge pe runne pechu sûm gai de lei; dadege â napoine chigum pe chie buapat dai ze pa ’nchichiak ti de lei.

¹⁵Chidadege â Hera gu ziemmena dage pa helatwang dai ze, pa benai pe kumme ’nteumena wang lu, pe suage sapkailia de lei; zai pa ne, “Pie le lau, Israelram ge runne zangno, kedeirei leine ge Hera ’ngga lei be I chî lei; chidaze ning guâ ka’ngguapeu dagene kela peipatbe lu gai du lau,” kacheu de lei.

¹⁶Kane pa ne, Tingwang I pe guâ ka’ngguapeu ringbambe ziegene, “I ne mâ du lu mak ku lei,” acheu bei de lei. Dadege pa ’nchi-chine lu gai ra lang de lei, kane pa lumeu tai lei.

¹⁷Chidadege Naamanbe ne pechu, “Makchai du hekunmerângne put na riâ kedeiniamoîne ning tâ ka’ngguapeu je pei gai ra I kiam lei; chidezai aigene seu ze Tingwang dage runne zangno, kêdabe hera dage rûkambe-râtewbe benai herâtewbe ramme ne ning gu kebang ne tew gai ta ra hangge zeu.

¹⁸Aipau deu ge Tingwang ne ning tâ ka’ngguapeu je peize lun gai ra de lei: Chi Rimmon gu heki ge a wangpeu kellum ra a ba ’nggui lu gutbe ge, I Rimmon gu heki ge a runne keikeu dezai, zai Rimmon gu heki ge I a runne keikeu dezai, aipau deu ge Tingwang ne ning tâ ka’ngguapeu je lun gu lei,” kacheu de lei.

¹⁹Pa ne pechu, “Yi ze tatchu lau,” acheu bei de lei. Kane pe dagene Naamanbe kecheîne tatpat ti dege,

²⁰Hera gu ziemmena Elishabe gu tâka’ngguapeu, Gehazibe ne, “Pie gai ni lau, ai Siria’mpeu Naamanbe pe ba ge mâge â teiwangbe lu gai mak ze a wangpeu â pechu ’mpat kai ’nde lei, Tingwang ring ze bambe ziegene I pechu ’nsatat lu, pe dagene mâge â lu gu lei,” ze kacheu de lei.

²¹Chigum ze Naamanbe chai Gehazibe suitat ti de lei. Zai Naamanbe ne mige pechu ’nsamiebe ngau lu dege, pa pechu hedautâu ra timriang gene ’nsakkeu de lei, zai pechu, “Mâleine yi la kam mei?” kacheu de lei.

²²Dadege pa ne, “Mâleine yi la kam lei, ‘Ephraimram deiloa gene kemeume na rehangme hangna a tailam chuna- chuna wang la de lei; kellum de lei, gepûtgeî chang chum benai hengî-puâ kena penai je pei gai be lau,’ ze rang gai ra a wangpeu ne achu lang gai lei,” ze acheu bei lei.

²³Dadege Naamanbe ne, “Ning suiyi ze gepûtgeî chang seruk lu gai be zu lau,” kacheu de lei. Zai ’nchi-chine salia gai lu gepûtgeî chang seruk chiaka kena lungge hepuâhengîpaî kena kai’mpam gai lu pe tâ ka’ngguapeu kena pung ra tuachu gai bei de lei; zai Gehazibe sua-sua pung’ntuatat ti de lei.

²⁴Zai pa kedeiloa ge wang dege penai ba gene pa ne lu lu hekilûng ge chiramme hekâm gai de lei; dadege penai je pa ne tat ra lang gai bei ze penai tat ti de lei.

²⁵Pa gut lu, pe gu heguang suage sap kai de lei, zai Elishabe ne pechu, “Gehazibai, nang ’ndaige bam bam lau,” acheu bei de lei. Dadege pa ne, “Ning tâka’ngguapeu â mâge du tat kai me lei,” ze acheu bei de lei.

²⁶Kane pa ne pechu, “Ziemmena hangkat ningchu hedautâu ra pe gu timriang gene ’nreiwangbe luage herui gene ningchu I nguatat mak mei? Chunage rangkâng, paîhenî, olib merie zai grepchî merie, meli zai getumsei ramme, tâka’ngguame ’mpeumi ramme benai ka’ngguame ’mpuimi ramme je lurabe hî semei?

²⁷Chipauziegene Naamanbe gu ka’mpabe rarît ze ning dage benai ning chaname dage betingbeta bam bam du lei,” acheu bei de lei. Chigum ze ka’mpapeu chang ze kebun gum ’ngngûpchup ze pe dagene pa zuatat ti de lei.