Read Zeme Naga 2 HEGUANGME 7 Bible Online

2 HEGUANGME 7 - Zeme Naga bible

2 HEGUANGME 7

¹Kane Elishabe ne, “Tingwang sam ’ngking le lau: Tingwang ne acheu ze rang lei, ’Nchuamai chuna gumbe hî dezai Samaria keriekemui ge dekuî keyibe hit chum ge shekel kat hang zua gu, zai barli hit chum ge shekel kat hang zua gu lei,” zeu kacheu de lei.

²Heguang ne pe ba ge ’ngngêu ze bambepeu chi sipai besuitewpeu zene Hera gu ziemmena je, “Tingwang pe runne ne tinggîm ge leubaki ramme tew dizai â, aize dauduî gu mei?” kacheu de lei. Kane pa ne, “Ning mik sing gene nang ngau gu lei, kane nang chize teu mak ra lei,” ze kacheu de lei.

³Zai kemuiki tatgutbe chui ge ka’mpame hangmedai bam lei, zai penui karai kat-kat je, “’Ndaitew ze aige anui chai mak tâne ’ntau bam ra lau?

⁴Namdi ge herakûm bam ze anui ne, ‘Namdi ge gut kei lei,’ ze acheu dizai â chige anui chai gai gu de lei; zai aige anui ’ntau zai du anui chai gu lei. Chipauziegene chuna wang lau, Siriame gu tejeîki ’mbe anui tat kei lei; penui ne anui keringbe ’nzuak kai bei zai anui ring ra da, zai penui ne tewchat ra zai anui chai ra de lei,” kacheu de lei.

⁵Chipau luigum ze muîrambe hî dege Siriame gu tejeîbâm ’mbe tat ra penui zuachu de lei; kane Siriame keloa ’ndanghia ge penui wang dege, pie le lau, chige mî du ga di de lei.

⁶Timriang ramme benai hekun ramme ’ncheu zai hereikangme baudime ’ncheu ze Siria hereikangme seu ra Tingwang ne tewgaibeibe ziegene penui karai kat-kat je, “Pie le lau, anui je ’nggi ra wang ra Israelram heguang ne Hethme gu heguangram benai Ijipme gu heguang ramme je rehi kam lu la de lei,” kacheu de lei.

⁷Chipau luigum ze muîram dege penui gu hetiampaîki ramme, hekun ramme zai hekunmerângne ramme je acheu sâurarie gai nan ze penui chai ra hingbe laîkai ne pak kam di de lei.

⁸Zai ai ka’mpame bau penui keloa ’ndanghia wang dege, hetiampaîki ge gut lu teu ze sak te lei, zai gechâk, gepût zai paîni rui lu tat ze bai gai ’ndi de lei; chipau chângge penui wang dai lu hetiampaîki kêdabe ge gut dai lu chige mâ-mâ kerua ramme rui lu tat ze bai gai ’ndi de lei.

⁹Chidadege penui karai kat-kat je, “Anui ne betâumakbe tew ’nde lei. Nemai â samkeyibe gu tingnaimikpui de lei; anui mi kuâneu mak hechua bapatbe riâ chang dizai â, anui dage tewsabe deîtau gu lei; chidaze chuna kei lei, anui tat ze heguang kibaume je pau gai kei lei,” ze kacheu de lei.

¹⁰Chipau luigum ze penui wang lu namdi kemuireîme je kû gai lu salia gai ze, “Siriame gu tejeîpung ge anui wang de lei, zai pie le lau, chige mi je de ngau mak, zai penui ’ncheu du seu mak, kane hekun ramme benai hekunmerângne ramme keîbambe zai hetiampaîki ramme runne laleu lei,” ze acheu bei de lei.

¹¹Chidadege kemui reîme ne kûkelau gai lu heguang ki ge bamme je pau gai bei de lei.

¹²Zai heguang tingmuî ne chu lu, pe guâ ka’ngguame je, “Siriame anui je ’nggi ra kateleube tak ze ningnui je I salia gu lei. Anui (tak) ka’njei de lei be penui chî lei; chipauziegene, ‘Penui namdi gene pat ti dezai penui je ’nringtuî lu namdi ge nguagut kai ’ndu lei,’ ze ’nning lu ze penui gu tejeîbâm gene ’nduloa ’mbe pakpat lu ’mbaidibe kau de lei,” ze salia lei.

¹³Dadege pe guâ ka’ngguame ruage hangkat ne “Aige ’nsakpatme ze Israelme baudime gagaidibe gum chang gai gu daze, hekun ’nsakpatbe ruage mengeu ze hanggesame je peize tei le lau; penui je lang gai lu piekua gai ni kei lei,” ze kacheu de lei.

¹⁴Chipau luigum ze hekun-timriang teipeu kena je kû lu, zai Siriame hereikangme chai suitat ra heguang ne penai je lang gai ze, “Tat ze ngau gai ka ni lau,” kacheu de lei.

¹⁵Chigum ze Jordan riâ penai penui chai suitat ti de lei; zai pie le lau, Siriame penui kakeluabe ziegene paî ramme benai kerua ramme tuâgaibeibe ziegene ’mpuîki tenettat bam di de lei. Zai hepâupaume helatwang dai lu ze heguang je pau gai de lei.

¹⁶Chidadege â baudime pat lu Siriame gu tejeîbâm ze kagechup te lei, Tingwang gu sam luigum ze dekuî keyibe pehit ge shekel kat hangge zua gai zai barli hit na ge shekel kat hangge zua gai lei.

¹⁷Heguang ne hereikang muiteipeu hang sum gai de lei, zai keriekemui reî ra pei gai bei de lei; zai heguang pe dage wangkeu dege, Hera gu ziemmena ne sagaibe luigum ze pechu â keriekemui ge ziemmena ramme ne kutchat nan tai de lei.

¹⁸“Samaria keriekemui ge ’nchuamai chuna gumbe hî dezai barli hit na ge shekel kat hang zua gu, zai dekuî yibe hit kat ge shekel kat hang zua gu lei,” ze Hera gu ziemmena ne heguang dage sa gai ’ndi daseu,

¹⁹hereikang muiteipeu ne Hera gu ziemmena je, “Tingwang pe runne tinggîm ge leubaki ramme tew dizai â aize dau gu semei?” ze kak lei. Dadege pa ne, “Ning mik sing ne nang chize ngau gu lei, kane nang chize teu mak ra lei,” ze acheu bei de lei.

²⁰Zai chipau luigum ze pe peireige wangchang de lei, ziemmena ramme ne keriekemui gene pechu kutgetie bei ze pa chai di de lei.