Read Zeme Naga 2 HEGUANGME 9 Bible Online

2 HEGUANGME 9 - Zeme Naga bible

2 HEGUANGME 9

¹Dadege Elishabe kemeu’mpeu ne kemeume name ruage hangkat je kû lu, pechu, “Ning kia kak kai lu ning ba gene mâ-châdui bung tei le lau, zai Ramoth-gilead ’mbe tatchu lau.

²Zai nang wangchang dezai Nimshibe chapeu, Jehoshaphatbe na Jehube je peu gai ka ni lau; dezai kilûng gut lu, pe kangme ruagene (kehuai ze) kû lu helungbe sîam ’mbe pechu nguagut le lau.

³Dezai mâ-châdui bung tei lu pe peî ge ruî gai ze, ‘Tingwang ne acheu rang ze, Israelme ruage heguang hang I ningchu ’nnuk kai lei,’ acheu gai lau, chidezai ’ngkam lat lu paktat te lau, bam bam se lau,” acheu bei de lei.

⁴Chigum ze kemeu’mpeu rehang’mpeu Ramoth-gilead ’mbe tat ti de lei.

⁵Zai pa wang dege, pie le lau, hereikang besuitewme ramme ’ndui laleu de lei; dadege pa ne, “Hei besuitewpeu gau, I ningnui je mâ-sam salia ra la lei,” acheu bei de lei. Dadege Jehube ne, “Anui ruage châu je lau?” kacheu de lei. Dadege pa ne, “Hei besuitewpeu gau, ningchu de lei,” acheu bei de lei.

⁶Chigum ze pa chu lu kilûng ’mbe gut ti de lei; dadege rehang’mpeu ne pe peî ge mâ-châdui ruî gai ze pechu, “Aigum ze Tingwang Israelme Rapeu ne rang lei, Israelme ruage Tingwang gu ziemmena peireige heguang hang I ne ningchu ’nnuk kai de lei.

⁷Zai nang ne ning peu Ahabbe kibaume je tewkau gai ra lei, chidezai Tingwang guâ ka’ngguame leine benai a guâ ka’ngguame kemeume jai Jezebelle ne tewpatkaibe hangge hekûm lu ra hangge zeu.

⁸Ahabbe kibaume leine â, ’ngga kam ra chang gu de lei; zai Israelram ge Ahabbe kibaume ruage ’mpeumi leine, kebang changme benai kebang changmakme je I ne tewchat ’ndu lei.

⁹Zai Ahab ki ze Ahijabe na Baashabe ki benai Nebatbe na Jeroboam ki gum bam ra I ne tew gai bu lei.

¹⁰Zai Jezril gu kedei ge hetei ramme ne Jezebelle je teu gu lei, zai mî ne de pechu ritbai ra mak lei,” kacheu de lei. Chidadege â pa ’ngkam lat lu pak ti de lei.

¹¹Jehube, pe pau guâ ka’ngguame tailam pat dege, penui ne pechu, “Mâleine yi kam la mei? ’Ndaitew ze kemiepeu ning dage wang lau?” kacheu de lei. Dadege pa ne penui je, “Ningnui ne chipaupeu je chî, zai pa ’ndaikau sa mei be chî lei,” acheu bei de lei.

¹²Zai penui ne, “Chize gesang mak lei; anui je chuna ranglia lau,” kacheu de lei. Dadege pa ne, “Pa ne aigum ze achu salia de lei, ‘Tingwang ne aigum ze rang lei, Israelme ruage heguang hang ningchu I ’nnuk kai lei,’ zeu,” ze acheu bei de lei.

¹³Chidadege â ’mpeumi leine ne kelua ze pe paî lupat lu, kedei pichaî sat ramme ge pe pî chaî ra tew gai lu, mâkie ’mmut ze, “Jehube ne heguang de lei,” acheu ze rangba gai de lei.

¹⁴Chigum ze Nimshibe na Jehoshaphatbe na Jehube ne Jorambe peireige kesiatew ra kahedei de lei. (Zai Jorambe â Israelme je ngua lu, Ramoth-gilead gene Siriaram heguang Hazaelbe hanggene hekêt-kaikua bam de lei;

¹⁵kane heguang Jorambe, pa Siriaram heguang Hazaelbe dage hegeigaibe ting ge Siria ramme ne pechu hejâm tewpatkaibe ramme teleu’mmi ra Jezril ge helatwang gai kadai de lei.) Chigum ze Jehube ne, “Aize nang ne ning lung gesang lei dizai â Jezril ge hepâusam pau gai ra peize namdi gene mî de reine ze tat se lau,” kacheu de lei.

¹⁶Dadege â Jorambe chige chuchi lak ze tuâ larei dadege, Jehube â pe gu timriang ge chu gai lu, Jezrilbe tailam tat ti de lei. Zai Judaram heguang Ahaziabe Jorambe je ’ngkiâkeu de lei.

¹⁷Zai Jezril ge hekêtkaibe kaira peireige hekêtkaikuapeu sap lu ze Jehube pe kumme je ngua lu wang dege pa rikkua de lei, zai pa ne, “Baudime je I ngau lei,” kacheu de lei. Dadege Jorambe ne, “ ‘Desieyibe sam mei?’ be penui je hedau gai lu ’mmêt kai ra hekun teipeu je ngua lu lang gai du lau,” acheu bei de lei.

¹⁸Chigum ze ziemmena hangkat ne hekun ching ge chua gai lu, pechu hedau ra tat ti de lei, zai pa ne, “Desieyibe hang mei be heguang ne ka’nneu lei,” acheu bei de lei. Dadege Jehube ne, “Desieyibe je nang ’ndaikau tâu hang lau? ’Nreiwang ze a chai sui le lau,” acheu bei de lei. Zai hekêtkaipeu ne, “Penui dage hepâupaupeu tatchang de lei, kane pa wang dai mak lei,” acheu ze pau gai bei de lei.

¹⁹Chidadege â pakenabe hekunteipeu penui dage wang lu, “ ‘Desieyibe hang mei?’ ze heguang ne aigum ze kacheu de lei” ze saliapeu je lang gai de lei. Dadege Jehube ne kak ze, “Desieyibe je nang ’ndaikau tâu hang lau? ’Nreiwang ze a chai sui le lau,” acheu bei de lei.

²⁰Zai hekêtkaipeu ne, “Pa penui dage tatchang de lei, kane pa wang dai mak lei. Pa pe lumpumpat ze kakereibe tak pie gai dege chi kakereibe ze Nimshibe na Jehube gum lei,” ze pau gai kadai lei.

²¹Jorambe ne, “Kedâ gai du lau,” kacheu de lei. Zai penui ne pe gu timriang kedâ gai de lei. Chidadege â Israelram gu heguang Jorambe benai Judaram heguang Ahaziabe Jehube je hedau ra penui gu timriang gene tat ti de lei, zai Jezril’mpeu Nabothbe gu helu gene pechu kahedau de lei.

²²Zai Jehube je Jorambe ngau lu dege, pa ne, Jehubai, “Desieyibe hang mei?” kacheu de lei. Pa ne kak ze, “Ning pui Jezebelle ne hepumzuateube tâ benai heduaîtewbe tâ ramme tewbe zene puiting bam tânege ’ndaikau desieyibe bamchi ra lau?” kacheu de lei.

²³Chidadege â Jorambe ’nreikedetwang lu, paktat lu ze, Ahaziabe je, “Kesia ka’mpung de lei, Ahaziabe gau!” kacheu de lei.

²⁴Dadege â Jehube ne, pe gu bai’mpi chakpat lu ze, Jorambe je pe keîtoa kena kakge pe rankai ze kap kai bei ze pa’nnung sugutchang di de lei, zai pe gu timriang gene pa ’ngngaîkeu de lei.

²⁵Jehube ne pe kumme ruage besuitewpeu je, “Pechu nguahang lu ze Jezril’mpeu Nabothbe gu kedei ge pechu tuâ gai be lau; chî bam ra de lei, nang benai I pe peu, Ahabbe tatda ze tatbe luage, Tingwang ne pe peireige ai kemeu sam liâgaibe tak ge:

²⁶‘Hera ne sa ze, ’nzimai ge Nabothbe jai I ngausinglube luigum ze aipau bâm gene I ningchu peiruî gu lei,’ chidaze chuna pechu nguahang lu, Tingwang sam luigum ze pechu chipau bâm ge tuâ gai be lau,” ze acheu bei de lei.

²⁷Judaram heguang Ahaziabe aize ngau lu dege, Beth-haggan ’mbe paktat ti de lei. Dadege Jehube ne pechu gua’nchumie lu ze, pa ne, “Pechu du kap lau,” kacheu de lei; dadege Ibleam hiage Gur ’mbe chube gene penui ne pechu timriang gene kap bei de lei. Zai pa Megiddo ’mbe pak kai lu, chige chai gai di de lei.

²⁸Pe guâ ka’ngguame ne Jerusalem ’mbe timriang gene pechu pungtat kai de lei, zai Dabidbe gu namdi ge pe peume raw ge pechu bai gai de lei.

²⁹Ahabbe na Jorambe ne heguangsapbe kum kereu ze kat chang dege, Ahaziabe ne Judaram ge heguangsapchu de lei.

³⁰Jehube Jezril ge wang gai dege Jezebelle chize seu di de lei; dadege pe mik benai pe peî keru gai lu, leubaki gene pie gai de lei.

³¹Zai Jehube teririe kemui zuagut dege, pa ne, “Ning pau je gîchatpeu nang Zimribai, Desieyibe mei?” kacheu de lei.

³²Dadege pa leubaki ’mbe pe ju ’ngngangchu lu, “Châu a lam kau lau? Châu lau?” kacheu de lei. Kahetiâme hangna mei, hangchum mei ne pechu pie gai de lei.

³³Pa ne, “Pechu tuâkeu gai be lau,” kacheu de lei. Chigum ze penui ne pechu tuâkeu gai de lei; zai pe jai gêsa â ’mbie ge benai hekun ramme peireige ’nsaktera gai di de lei, zai penui ne pechu kutkagetie de lei.

³⁴Chidadege â hekilung ’mbe pa gut lu, teu ze sak te lei, zai pa ne, “Ai ’mpuimi desetkai’ndipui je pie gai ka ni lau, zai pechu bai gai be lau, pa â heguang na ’mpuimi daseu,” kacheu de lei.

³⁵Kane penui pechu bai ra tat dege, pe peîkuakrie, pe pî zai pe badei ramme zangno kêdabe â ngau ta di de lei.

³⁶Penui wang dai lu pechu pau gai bei dege, pa ne, “Aize Tishbe’mpeu, Tingwang guâ ka’ngguapeu, Elijabe dagene Tingwang ne ranggaibe sam lei, ‘Jezrilram lungge hetei ramme ne Jezebelle pum ji teu gu lei;

³⁷zai aize Jezebelle lei be mî ne de rangchi lak ra, Jezebelle kechaipum ze hebâ gum ze Jezrilram lungge bam gu de lei,’ zeu” ze kacheu lei.