Read Zeme Naga 1 KRONIKIL 10 Bible Online

1 KRONIKIL 10 - Zeme Naga bible

1 KRONIKIL 10

¹Zai Philistinme peireige Israelme ne ka’nggi de lei; dadege â Israelme bau ze Phlistinme suagene pat ti de lei, zai Gilboa loa gene bikau kam gai bei de lei.

²Zai Philistinme ne Saulbe benai pe name je gua’nsachang lu de lei; dadege â Philistinme ne Saulbe name bau, Jonathanbe, Abinadabbe zai Malkishuabe je bichat ’ndi de lei.

³Saulbe peireige herei ze peranchi-desang di de lei, zai hetubaimpi teime ne pechu ngau di de lei; dadege â hetubaimpi puame ne pechu kaphejam gai bei de lei.

⁴Chidadege â Saulbe ne pe gu herei keruapungpeu je, “Ning gu hiazutkie tatpat lu, chize ne achu reichat kai zu lau, chidezai peize aime rumgetenmakme ne wang ze achu teihenuitew mak ra hangge zeu,” ze kacheu de lei. Kane pe gu herei keruapungpeu ne ngaurau tai de lei, pa du hing-desang di dadegeu. Chipauziegene Saulbe pe gu hiazutkie tatpat lu pe runne hiazutkie mui ge kau gai di de lei.

⁵Zai pe gu herei keruapungpeu ne Saulbe chaidibe ngau dege pa du pe gu hiazutkie mui ge kau gai lu chai di de lei.

⁶Chigum ze Saulbe chai di de lei; pa benai pe name hangchum zai pe kiduîme ’nteumena chai’nsam di de lei.

⁷Dadege Israelme peningkâm ge bamme leine hereikangme paktibe benai Saulbe zai pe name chaidibe ngau lu dege â penui gu namdi ramme je put kai nan ze pak kam di de lei; zai Philistinme ne wang ze chipau bâm ramme ge lung di de lei.

⁸Bechaibe mai dege Philistinme chaidime gu kerua lu ra wang dege, Gilboa loa ge Saulbe benai pe name chaigaidibe ngaudau de lei.

⁹Penui ne pe dagene kerua ramme lu lu de lei, zai pe peî dâng lu zai pe gu hereipuâ lu ’ndi de lei, zai ziemmena ramme benai penui gu hera ramme je penui suiyibe rasam Philistinram dei lungge paurua gai ra hang hepâupaume je lang gai de lei.

¹⁰Dadege penui ne pe gu hereipuâ ze penui rapeu gu kellumki ge kai de lei, zai Dagon gu kellumki ge pe peîdâng ze keî’nchie gai de lei.

¹¹Kane Jabesh-gilead ge bamme leine ne Philistinme ne Saulbe peireige tâtewbe rasam leine seu lu dege,

¹²penui lungdime leine ne zuapat lu Saulbe benai pe name gu kechaipum ramme lu lu Jabes ge teiwang gai bei de lei. Dadege penui ne penui ra ramme ze Jabes ge ’mpubang kangge ritbai gai de lei, zai hezie sena teseurei ze bam de lei.

¹³Chigum ze Saulbe ze pa lungsangtewmakbe ziegene chai di de lei; Tingwang gu hingde pa ’nzaî mak, zai gekungme dage tatchi,

¹⁴zai Tingwang geteiliabe pheumakbe ziegene pa â Tingwang hangge lungsang tewmakbe chang di de lei. Chipauziegene Tingwang ne pechu bichat ’ndi de lei, zai heguangram ze Jessibe na Dabidbe dage tat kai di de lei.