Read Zeme Naga 1 KRONIKIL 11 Bible Online

1 KRONIKIL 11 - Zeme Naga bible

1 KRONIKIL 11

¹Chidadege â Israelme leine Hebron ge Dabidbe dage wang’ndui lu acheu sa ze, “Pie le lau, anui ze â ning ra benai ning pum meikâng de lei.

²Tattibe hî ramme ge Saulbe ne kaheguangbe ting ge ’nsangdu nang ne nguapat kai ze Israelram ge nguagut kai de lei; dadege Tingwang ning Rapeu ne ningchu, ‘Nang ne a gu ziemmena Israelme gu melireîpeu chang ra de lei, zai nang ne a gu ziemmena Israelme peireige heguang chang ra de lei,’ ze kacheu de lei,” ze kacheu de lei.

³Chigum ze Israelme gechîngme leine Hebron ge heguang Dabidbe dage zuamie de lei; dadege Hebron ge Tingwang masua gene Dabidbe ne penui dage nguapuinakat tew’ntip kai de lei, zai Samuelbe dage Tingwang ne ranggaibe sam luigum ze Israelme peireige heguang hang Dabidbe je penui ne ’nnuk kai de lei.

⁴Zai heram ge lungme, Jebusme lungbe bâm, Jebus kacheube Jerusalem ’mbe Dabidbe benai Israelme leine tat ti de lei.

⁵Jebus ge bamme ne Dabidbe je, “Nang aige gut ra mak lei,” kacheu de lei. Acheuleusedu Dabidbe ne Zaion gu keriedibe duîgut ti de lei, chize Dabidbe gu namdi lei.

⁶Dabidbe ne, “Jebusme je deîtaurai-raîme ne dilangpeu chang ze haîmuiteipeu chang gu lei,” kacheu de lei. Dadege Zeruiale na Joabbe ne hangraî di de lei, chigum ze pa ne dilangpeu chang di de lei.

⁷Zai Dabidbe â ’mbaiki ge bam de lei; chipauziegene chi je Dabidbe gu namdi ze ku de lei.

⁸Zai kedei besat huchube (Millo kacheube) gene pa ne namdi tewguâ’ngguareu gai de lei. Zai Joabbe ne namdi kêdadabe â teleu kadai de lei.

⁹Dadege â Dabidbe ze dibi-bitat ti de lei, Tingwang baudime Rapeu ne pe dage bam di dadegeu.

¹⁰Aime bau ze Tingwang ne Israelme hangge sam ranggai’ndibe luigum ze Dabidbe je heguang hang teichu gai ra Israelme je ngua lu ranggaihâme heguang Dabidbe gu ziemmena peranchime bau ruage besuitewme bau de lei.

¹¹Aize Dabidbe gu ziemmena peranchime rasam lei: Hangchum ruage, Hakmon’mpeu Jashobe-ambe ne di de lei; pa ne hengeu tei ze luakatne ziemmena haî chumme je tewchat ’ndi lei.

¹²Zai peranchime hangchum ruage pesin ge bampeu ze â Aho’mpeu Dodobe na Eleazarbe de lei.

¹³Chige herei ra Philistinme ’nduiwangbe luage pa â Pas-dammim ge Dabidbe dage bam lei. Barli ne puigitbe kedeibâm bâm kat bam lei, zai ziemmena ramme ze Philistinme dagene pak kam di lei.

¹⁴Kane chipau kedei bâm ge sûngngangkelî ge pa â sapgînggit lu reîkua de lei, zai pa ne Philistinme je tewchat ’ndi de lei; zai Tingwang ne penui je hereiheka kam ’ndi lei.

¹⁵Philistinram gu hereikangme Rephaim kâm ge bamgaileube ting ge ziemmena besuitewme hanghimreu ruage hangchum, Adullam tingchutegup ge Dabidbe tailam tingchukâng ’mbe wangkeu de lei.

¹⁶Chidadege Dabidbe ze kerie lungge bam di de lei; zai Philistinme gu hekêt-bâm kereîpeu â Bethlehem ge bam di de lei.

¹⁷Zai Dabidbe pe ki ’nning-desang di ze, “Hei, keriekemui ge bambe Bethlehem dekuaki gene mige ne hedui sak ra achu pei bei nung laîzai,” kacheu de lei.

¹⁸Chidadege â peranchime hangchum ne Philistinme gu tejeîki gene butgut lu keriekemui ge bambe Bethlehem dekuaki gene hedui tuaklube Dabidbe je teiwang pei gai bei de lei. Kane Dabidbe ne chize sakmeu tai lei; pa ne chize Tingwang hangge ruîpat kai lu,

¹⁹acheu sa ze, “I ne aize tewrabe ze â a Rapeu masua gene a dagene aize tei’ndeu ne lau. Aime bau jai keringbe I sak ra se mei? Miramme keringbe tew’nsia ra hingmakbe gene aize teiwangbe kau daseu,” kacheu de lei. Chipauziegene pa chize sak mak tai lei, Airamme ze peranchime hangchum ne tew gai de lei.

²⁰Zai Joabbe kinapeu Abishaibe â hanghimreu ruage kedipeu de lei. Zai pa hiazutkie teibe gene ziemmena haî chumme je tewchat lu de lei, zai hangchumme bau gum ze pa du pe ji ditat ti de lei.

²¹Ziemmena hanghimreu ruage pa pe ji tatlangpeu de lei, zai pa ne penui gu haîmuiteipeu chang di de lei; kane pa â hangchumme gum â chang mak lei.

²²Zai Jehoiadabe na Benaiabe â tâ-kedibe ramme tewpeu, Kabzil ge pe lungdipeu de lei; Moabram ge peranchime hangna je pa ne tewchat ’ndi de lei. Kebunkeube mai ge pa du wangkeu lu ze mâ-kuiki gene duilui je tewchat te lei.

²³Zai pa ne Ijip’mpeu pe kaurayipeu, pehut sâu mengeu riâ hubepeu je tewchat ’ndi de lei. Chi Ijip’mpeu ze â pe ba ge hengeu teibe ze paîdakbe tezupum kedibe teibe riâ lei; kane Benaiabe hetui tei lu pe dage wangkeu ze Ijip’mpeu ba gene hengeu sut lu, pe gu hengeu singbe zene pechu tewchat kai dai bei de lei.

²⁴Airamme ze Jehoiadabe na Benaiabe ne tew gai bei de lei, zai hangchumme gum ze pa du pe ji ditat ti de lei.

²⁵Ziemmena hanghimreu ruage pa â pe ji ditat ti de lei, kane hangchumme bau riâ â chang mak lei. Zai Dabidbe ne pechu â pechu reîme peireige bam ra kai bei de lei.

²⁶Hereikangme peranchime je Joabbe kinapeu, Asahelbe, Bethlehem keloa’mpeu Dodobe na Elhananbe,

²⁷Harod’mpeu Shammothbe, Pelet’mpeu Helezbe,

²⁸Tekoa keloa’mpeu, Ikkesbe na Irabe, Anothoth keloa’mpeu Abiezerbe, Hushath’mpeu Sibbekaibe,

²⁹Ahoh’mpeu Ilaibe,

³⁰Netopha keloa’mpeu Maharaibe, Netopha keloa’mpeu Baanabe na Heledbe,

³¹Gibea ge Benjamin zat’mpeu Ribaibe na Ithaibe, Pirathon’mpeu Benaiabe,

³²Gaas kuîbak taige bambepeu, Huraibe, Arbath’mpeu Abielbe,

³³Baharum’mpeu Asmabethbe, Sha-albon’mpeu Eliababe,

³⁴Gizon’mpeu Hashembe, Harar’mpeu Shagibe na Jonathanbe,

³⁵Harar’mpeu Sakarbe na Ahiambe, Urbe na Eliphalbe,

³⁶Mekerath’mpeu Hepherbe, Pelon’mpeu Ahijabe,

³⁷Karmel’mpeu Hezrobe, Ezbaibe na Naaraibe,

³⁸Nathanbe kinapeu Joelbe, Hagribe na Mibharbe,

³⁹Ammon’mpeu Zelekbe, Zeruiale na Joabbe gu hereipuâ teipeu Be-eroth keloa’mpeu, Naharaibe,

⁴⁰Zattir’mpeu Irabe, Zattir’mpeu Garebbe,

⁴¹Het’mpeu Uriabe, Ahlaibe na Zabadbe,

⁴²Reuben zat ge besuitewpeu Reuben’mpeu, Shizabe na Adinabe zai pe dage ziemmena hanghimreu bamme,

⁴³Maakabe na Hananbe, Mithan’mpeu Joshaphatbe,

⁴⁴Ashterath’mpeu Uzziabe, Aroer’mpeu Hothambe na Shamabe benai Je-ielbe,

⁴⁵Shimribe na Jedia-elbe, pe kina Tiz’mpeu Johabe,

⁴⁶Mahaba’mpeu Elielbe, zai Elna-ambe na Jeribaibe benai Joshabiabe, zai Moab’mpeu Ithmabe,

⁴⁷Elielbe, Obedbe, zai Zoba’mpeu Ja-asielbe, aime bau de lei.